Génesis 42
42
Jose ryke’ykuéra oho Egíptope hembi’urã rekávo
1Jacóbo oikuaávo Egíptope oĩha hi’upyrã, he’i ita’yrakuérape: Mba’érehe piko pema’… rei ojuehe.
2Ha he’ive: Pejapysaka porãke, che ahendu Egíptope oĩha heta hi’upyrã; tapeho upépe ha pejogua ñandéve g̃uarã, jaikove hag̃ua, anítei ñamanomba.
3Ha 10 Jose ryke’y oguejy Egíptope ojogua hag̃ua trígo.
4Jacóbo katu nomondói Benjamínpe, Jose ryvy, ityke’yrakuéra ndive, he’ígui: Anítei ojehu avei ichupe mba’evai.
5Ha Israel ra’ykuéra oho omba’ejoguávo ambuekuéra apytégui; oĩgui avei ñembyahýi tuicháva Canaan retãme.
6Ha Jose, pe tetã ruvicha, ovende avei trígo ambue tetãnguérape ha ijapytépe ou avei Jose ryke’ykuéra ha oñakãity hikuái henondépe.
7Ha Jose, ohecha vove ityke’yrakuérape voi oikuaa ichupekuéra; ha oiko ku oikuaa’ỹrõguáicha ichupekuéra, ha oñe’ẽ pohýi ichupekuéra, he’ívo: Mamóguipa peju. Ha he’i hikuái: Roju Canaan retãgui ore rembi’urã rekávo.
8Jose oikuaa ityke’yrakuérape; ha’ekuéra katu ndoikuaái ichupe.
9Upéramo Jose imandu’a ike peguare rehe, ha he’i ichupekuéra: Pyrague hína peẽ; peju pehechávo mamópa ko tetã noñemo’ã porãiha.
10Ha he’i ichupe hikuái: Nahániri, ore jára, tembi’urã joguávonte rojúkuri ore, ne rembiguaikuéra.
11Orekuéra peteĩ kuimba’e ra’y meménte; ore reko porã, ne rembiguaikuéra araka’eve ndoikóiva’ekue omaña ñemi pyraguéicha.
12Jose katu he’i ichupekuéra: Ndaupéichai, pejúnte pehecha hag̃ua mamópa noñemo’ã porãiha ko tetã kóva.
13Ha he’i ichupe hikuái: Ore, ne rembiguaikuéra, roime 12, peteĩ kuimba’e ra’y meme, Canaan retãme roikóva; pe imitãvéva ko árape opyta ore ru ndive, ha peteĩ katu ndaiporivéima.
14Ha Jose he’i ichupekuéra: Péva ha’éma, añetehápe pyrague voínte peẽ.
15Ko’ã mba’épe poha’ãta, faraon rekovére, napesẽmo’ãi ko’águi, ou peve pende ryvy imitãvéva.
16Pemondo peteĩme ogueru hag̃ua pende ryvýpe, ambuekuéra katu opytáta cárcelpe, ha ndaha’éi ramo peje haguéicha, faraon rekovére, pyrague voínte peẽ.
17Upéramo Jose omoingeuka ichupekuéra oñondivepa, mbohapy ára, cárcelpe.
18Ha pe ára mbohapyhápe Jose he’i ichupekuéra: Pejapopa ramo hekoitépe peikovéta: Che voi ajerovia Ñanderuete rehe ha akyhyje ichugui.
19Oime ramo peẽ kuimba’e heko potĩva, peteĩnte pende apytégui topyta cárcelpe, ha ambuekuéra toho togueraha pe tembi’urã pende rogayguakuérape, pembogue hag̃ua pe ñembyahýi.
20Pegueru katu pende ryvy imitãvévape, ha ojehecháta hi’añeteha ramo pene ñe’ẽngue ha napemanomo’ãi, ha upéicha ojapopa hikuái.
21Ha he’i joa ojupe: Añetehápe ñane rembiapo vai ñande ryvy ndive ñanerupitýma ko’ág̃a, jahecha voi ningo hi’ánga angekõi ojerure asy ramoguare ñandéve, ha nañahendúi ichupe; upéicharupi ou avei ñandeári ko angekõi vaietéva.
22Upémarõ Ruben he’i ichupekuéra: Nañe’ẽipara’e peẽme ha nda’éipara’e: Ani peñemboheko vai pe mitãrusu rehe, ha peẽ nacherenduséi. Péina ápe huguykue ojejeruréma ñandéve.
23Ha’ekuéra katu ndoikuaái Jose oikuaaha he’íva guive hikuái, oĩgui omoñe’ẽva ichupekuéra ambue ñe’ẽ mbohasahára rupi.
24Ha Jose ojei ijypýgui, ha ojahe’o; ha upéi ou jevy hendapekuéra, ha oñe’ẽ ichupekuéra, ha oapresa ijapyteguikuéra Simeónpe, ha oipokuauka ichupe hesakuéra renondépe.
25Upéi Jose omyenyhẽuka ivosakuéra trígogui, ha ome’ẽuka jevy peteĩteĩme ipirapire omoĩukávo ñemiháme ivosakuérape, ha ome’ẽuka avei ichupekuéra hembi’urã tapére g̃uarã; ha ojejapopa Jose oipota háicha.
26Ha omoĩ hikuái pe trígo iburrokuéra ári ha oho hikuái.
27Ha peteĩ ombojurupe’ávo ivosa omongaru hag̃ua ibúrro pe mbohupa rógape, ohecha oĩha ipirapire ivosa jurúpe.
28Ha he’i ityke’yrakuérape: Che pirapire oñeme’ẽ jevy chéve, péina oĩhína che vosápe. Upérõ ipy’andýi hikuái, ha kyhyjepópe he’i ojupe hikuái: Mba’érehepa Ñanderuete ojapo ko’ã mba’e ñanderehe.
29Ha og̃uahẽvo itúva Jacóbo rendápe, Canaan retãme, omombe’upa ichupe ojehuva’ekue ichupekuéra, he’ívo:
30Pe kuimba’e, pe tetã jára, oñe’ẽ pohýi oréve, ha oreguerekóma pyrague ramo.
31Ha ore ro’ékuri ichupe: Ore ningo kuimba’ekuéra heko potĩva, araka’eve ndoroikoiva’ekue pyrague ramo.
32Ore ru ita’ýra 12; peteĩ ndojekuaavéi hapykuere, ha pe imitãvéva opyta Canaan retãme, ore ru ndive.
33Upémarõ pe kuimba’e, pe tetã jára, he’i oréve: Aikuaáta hi’añeteha peẽ kuimba’e heko potĩva: Peheja ramo chendive peteĩ pende ryke’y ha pejapyhy pene rembi’urã pende rogaygua ñembyahýipe g̃uarã, ha tapeho,
34pegueruva’erã katu chéve pende ryvy imitãvévape, che aikuaa hag̃ua peẽ ndaha’eiha pyrague ha pende reko potĩha; upéicharamo ame’ẽta peẽme pende ryke’y ha pejogua jevýta trígo ko tetãgui.
35Ha omonandívo hikuái ivosakuéra, péina peteĩteĩ ojohu ipirapire ivosa jurúpe, itúva ohechapa avei, ha okyhyje joa hikuái.
36Upémarõ Jacóbo, itúva, he’i ichupekuéra: Peẽ cherejáta ta’yra’ỹre; Joségui ndojekuaavéi mba’eve ha Simeon opyta Egíptope, ha ko’ág̃a peguerahase avei Benjamínpe; cheárinte oupa ko’ã mba’e.
37Ha Ruben oñe’ẽ itúvape, he’ívo: Rejukaukáta mokõivéva che ra’ýpe, ndagueruvéi ramo ndéve Benjamínpe; eheja ichupe che pópe, che agueru jevýta ichupe.
38Ha Jacóbo he’i: Che ra’y ndohomo’ãi penendive, omanóma ningo ityke’yrateéva ha ha’eñóntema opyta; ha ojehu ramo ichupe oimeraẽ mba’evai pe tape pehoha rupi, pemboguejýta che atĩnguéra ñembyasypópe te’õngue rendápe.
Currently Selected:
Génesis 42: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
