Génesis 46
46
Jacóbo ha hogayguakuéra oho Egíptope
1Israel (Jacóbo) osẽ opaite mba’e oguerekóva reheve, ha ou Beersébape, ha upépe ome’ẽ kuave’ẽmby itúva Isaac Járape.
2Ha Ñanderuete oñe’ẽ Israélpe (Jacóbope) pe pyhare techapáype (visiónpe), ha he’i: Jacóbo, Jacóbo. Ha ha’e he’i ichupe: Na’ápe aĩ.
3Ha he’ive: Che ningo pende Ruete, nde ru Jára, ani rekyhyjétei reguejy hag̃ua Egíptope, upépe ajapóta ndehegui peteĩ tetã ndetuichaitéva.
4Che aháta nendive Egíptope, ha che rogueru jevýta; ha Jose po ombotýta nde resa.
5Ha Jacóbo opu’ã Beersébagui, ha Israel ra’ykuéra ogueraha itúva Jacóbo, imitãkuéra ha hembirekokuérape, ha ohupi ichupekuéra faraon carrokuérape, ha’e ombouva’ekue ogueraha hag̃ua ichupekuéra.
6Ha ogueraha hikuái hymbakuéra, ha imba’erepyeta Canaan retãme ojoguava’ekue, péicha Jacóbo mayma iñemoñarenguéra ndive ou Egíptope,
7ita’yrakuéra ha ita’ýra ra’ykuéra; itajyrakuéra ha ita’ýra rajykuéra, ha mayma iñemoñare ndive og̃uahẽ Egíptope.
8Ha ãvahína Israel ra’y réra oikeva’ekue Egíptope: Ruben, Jacóbo ra’y ypykue.
9Ha Ruben ra’ykuéra: Hanoc, Falu, Hezron ha Carmi.
10Simeon ra’ykuéra: Jemuel, Jamin, Ohad, Jaquin, Sóhar ha Saul, ha’e peteĩ Canaangua memby.
11Levi ra’ykuéra: Gerson, Coat ha Merari.
12Juda ra’ykuéra: Er, Onan, Sela, Fares ha Zara; Er ha Onan omanova’ekue Canaan retãme. Ha Fares ra’ykuéra Hezron ha Hamul.
13Isacar ra’ykuéra: Tola, Fuva, Job ha Simron.
14Zabulon ra’ykuéra: Sered, Elon ha Jahleel.
15Ko’ãva Léa membykuéra, ha’e ome’ẽva’ekue Jacóbope Padan-arámpe, ha imembykuña Dína avei; iñemoñare 33 mitãkuimba’e ha kuñáva.
16Gad ra’ykuéra: Sifjon, Hagui, Ezbon, Suni, Eri, Arodi ha Areli.
17Ha Aser ra’ykuéra: Imna, Isva, Isvi, Bería ha heindy Serach. Bería ra’ykuéra: Héber ha Malquiel.
18Ko’ãva Zilpa membykuéra, Laban ome’ẽva’ekue itajýra Léape hembiguái kuña ramo, Zilpa ome’ẽ Jacóbope oñondivepa 16 tekove.
19Ko’ãva Raquel, Jacóbo rembirekore membykuéra: Jose ha Benjamin.
20Ha Asenat, pa’i Potífera rajy, ome’ẽ Josépe Egípto retãme: Manases ha Efrain. Potífera On pegua pa’i.
21Benjamin ra’ykuéra: Bela, Bequer, Asbel, Gera, Naaman, Ehi, Ros, Mupim, Hupim ha Ard.
22Ko’ãva Raquel memby, ha’e ome’ẽva’ekue Jacóbope; oñondivepa oĩ 14 tekove.
23Dan ra’y: Husim.
24Neftali ra’ykuéra: Jahseel, Guni, Jézer ha Silem.
25Ko’ãva Bílha memby, Laban ome’ẽva’ekue itajýra Raquélpe hembiguái kuña ramo, ha’e ome’ẽva’ekue Jacóbope, oñondivepa 7 tekove.
26Mayma tekove ouva’ekue Jacóbo ndive Egípto retãme, umi ichugui osẽva’ekue oĩ 66, ojepapa’ỹre Jacóbo ra’ykuéra rembirekokuéra.
27Ha Jose ra’y mokõi onace Egíptope, mokõi tekove. Upéicha oĩ 70 Jacóbo rogayguateéva, oikóva Egípto retãme.
28Ha Jacóbo omondo Judápe henonderãme Jose rendápe, ou hag̃ua ohechávo ichupe Gosénpe; ha og̃uahẽ hikuái Gosen yvýpe.
29Ha Jose ojokua peteĩ cárro ha ou ohecha hag̃ua itúva Israélpe, Gosen yvýpe, ha ohechávo ichupe ojeity ijajúra ári ha ojahe’o puku.
30Ha Israel he’i Josépe: Ko’ág̃a amanokuaáma ahechágui nde rova, ha aikuaa reikoveha gueteri.
31Ha Jose he’i ityke’yrakuéra ha itúva rogayguápe: Ajupíta ha aikuaaukapáta faraónpe, ha ha’éta ichupe: Che ryke’ykuéra ha che ru rogaygua, oikova’ekue Canaan retãme, og̃uahẽma che rendápe.
32Amombe’úta avei ichupe peẽ tymba rerekuaha ha peguerupaha pene rymba atykuéra ko’ápe.
33Ha ág̃a faraon penerenói vove ha he’i ramo peẽme: Mba’épe piko pemba’apo.
34Peẽ pejéta: Ore, ne rembiguái, tymba rerekua ore mitãrusu ára guive ko’ág̃a peve, ore ha ore rukuéra avei; ikatu hag̃uáicha roiko Gosen yvýpe; Egiptoyguakuérape g̃uarã ovecha ha kavara rerekua mba’e iky’aitéva.
Currently Selected:
Génesis 46: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
