Juan 12

María oñohẽ mba’e ryakuã porã Hesu akã rehe

1Séis ára páscua mboyve Hesu oho Betániape Lázaro rendápe, Ha’e omoingove jevyva’ekue omanóva apytégui.

2Ha ojapo hikuái ichupe g̃uarã peteĩ karuguasu, ha Márta ogueroja pe tembi’u mesápe, ha Lázaro oĩ umi oguapyvahína Hesu ndive mesápe.

3Upérõ María ojapyhy peteĩ botella’i mba’e ryakuã porãite ha hepyetéva, ha oñohẽ Hesu py rehe ha iñakã raguépe omokã ipykuéra, ha opaite hóga hyakuã porãite opytávo.

4Upérõ Júdas Iscarióte, hemimbo’e oityuka vaítava (otraicionátava) ichupe he’i:

5Mba’érehe piko noñevendéi ko mba’e ryakuã porã kóva 300 ára tembiapo repy rehe, oñeme’ẽ hag̃ua imboriahúvape.

6Júdas katu nde’íri péva oipytyvõségui imboriahúvape, ha’e omondaségui uvei pe pirapire, oñeme’ẽgui ichupe pe pirapire ryru oñangareko hag̃ua hese.

7Upérõ Hesu ombohovái ichupe: Ehejána, ko mba’e kóva ha’e ojapóva, ha’e ojapo porã che añeñotỹ ramog̃uarã.

8Mboriahukuéra ningo tapia oĩta pende apytépe, che katu ndapytamo’ãi tapia g̃uarã pende apytépe.

9Heta Judayguakuéra oikuaávo Hesu oĩha upépe oho joa hendápe, ndahesehápe añói, ohecha hag̃ua avei Lázarope, Hesu omoingove jevyva’ekue omanóva apytégui.

10Umi pa’i ruvicha oñemoĩ katu peteĩ ñe’ẽme ojukauka hag̃ua avei Lázarope.

11Heta Judayguakuéra Lázaro jeikove rupi ojerovia Hesu rehe.

Hesu oike Jerusalénpe

12Ha pe ára ambuépe ningo Judayguakuéra ou pe páscua aretépe ha ohendúvo Hesu outaha Jerusalénpe,

13oikytĩ hikuái pindo rogue, ha osẽ ohug̃uaitĩ hag̃ua sapukaipópe ichupe, he’ívo: Ore Jára yvateguáva orepytyvõna, ha toñemomba’eguasu pe oúva Ñanderuete rérape, Israel retã ruvichaguasu.

14Hesu ojohu peteĩ búrro ra’y, ojupi hi’ári, ojehai háicha Ñanderuete kuatiañe’ẽme:

15Ani pekyhyje peẽ Jerusalengua, pema’ẽ porã ou ningo guapyhápe hína peteĩ búrro ra’y ári, pene Mburuvichaguasu, (Zacarías 9,9).

16Ko’ã mba’e ko’ãva hemimbo’ekuéra ndohechakuaái ñepyrũrãme, Hesu oñemoingove jevy rire katu imandu’a opaite ko’ã mba’e rehe, ojehaipa hague avei ko’ã mba’e Ñanderuete kuatiañe’ẽme, ha ha’ekuéra voi ojapo hague ko’ã mba’e ichupe g̃uarã.

17Upérõ umi oĩva’ekue, Hesu omoingove jevy ramoguare Lázarope itakuaguasu oñeñotỹ haguégui, omyasãimba joa ohechava’ekue guive.

18Upévare umi tetãygua osẽ avei ohug̃uaitĩ hag̃ua ichupe, ohendúgui Ha’e ojapo hague pe milágro péva.

19Upéramo umi fariséo he’i ojupe: Pehechápa, ndaikatúi jajapo mba’evete. Opavave ningo omoirũ ichupe ha oho hapykuéri.

20Oĩmimi ningo avei Greciayguakuéra umi atyguasu apytépe, ohóva avei Jerusalénpe omomba’eguasu hag̃ua Ñanderuetépe pe páscua aretépe.

21Ko’ãva oñemboja Felípe rendápe, ha’e ningo peteĩ Betsaidaygua opytáva Galiléape, ha ojerure ichupe, he’ívo: Karai, ore rohechasemi Hesúpe.

22Felípe oho Andres rendápe, ha oñondive oho hikuái Hesu rendápe ha omombe’u ichupe.

23Hesu katu oñe’ẽ ichupekuéra ha he’i: Og̃uahẽmahína pe hóra yvyarigua Ra’y oñembotuicha hag̃ua.

24Añetehápe, añetehápe, ha’e peẽme: Pe trígo ra’ỹi ho’a’ỹ ramo yvýpe ha omano’ỹ ramo, opyta ha’eño rei, omano ramo katu, hi’a hetáta.

25Upéicha avei opavave hakate’ỹva hekovére ningo oñehundiva’erã, ha pe nomomba’éiva hekove ko yvy apére katu oñongatu hi’ánga tekove tapia g̃uarãme.

26Oime ramo cheserviséva tou che rapykuéri, ha Che aimeháme upépe oĩva’erã avei che rembiguái, umi cheservívape che Ruete ombotuichava’erã.

Hesu he’i omanotaha

27Ko’ág̃a che ánga ojepy’apyhína, ha mba’e piko ha’éne. Ha’énepa che Ruete chesalvána ko hóra kóvagui. Ndaupéichai, pevarãnte voi Che ajuva’ekue.

28Che Ruete embotuicha nde réra. Upevove ou peteĩ ñe’ẽ yvágagui he’íva: Che ambotuicháma ha ambotuicha jevyva’erã ichupe.

29Ha umi upépe oñembyatýva oĩ umi he’íva: Osunu. Ambuekuéra katu he’i: Peteĩ ángel oñe’ẽ ichupe.

30Hesu he’i umi oñembyatývape: Pe ñe’ẽ péva ndoúi cherehehápe, penderehehápente uvei.

31Ko’ág̃a oñembojovakéta ko múndope ha oñemosẽta avei okápe Satana, ko múndo ruvichápe.

32Ha Che añemopu’ã rire ko yvy árigui amog̃uahẽta opavavépe che rendápe.

33Péicha Hesu he’i oikuaauka hag̃ua omanotaha kurusúre.

34Ha umi oñembyatýva ombohovái Hesúpe: Ore ningo rohendu Ñanderuete kuatiañe’ẽgui pe Crísto oikove tapiava’erãha. Ha mba’éicha piko nde ere: Oñemopu’ãva’erã pe yvyarigua Ra’y. Máva piko upe yvyarigua Ra’y.

35Ha Hesu ombohovái ichupekuéra: Pe Tesape ndahi’aremo’ãvéima pende apytépe. Upévare peguata, peguereko aja pe tesape, ha ho’a mboyve pe pytũ pende’ári, ha upe oguatáva pytũnguýpe ndoikuaái moõ rupípa oguatáta.

36Peguereko aja gueteri pe Tesape, pejerovia pe Tesape rehe, oiko hag̃ua pendehegui Tesape ra’y ha rajykuéra. Oñe’ẽmba rire ko’ã ñe’ẽ ko’ãva ojei ijapytégui ha okañy ichuguikuéra.

Ndahetái Judaygua apytégui ojeroviáva Hesu rehe

37Hesu ojapo ramojepe heta milágro opavave renondépe, ndojeroviái hikuái hese.

38Oiko hag̃ua pe ñe’ẽ proféta Isaías he’iva’ekue: Ore Jára, máva piko oguerovia ore ñe’ẽ, ha mávape g̃uarã piko ojehechauka Ñanderuete pu’aka, (Isaías 53,1).

39Ha’ekuéra ndaikatúi oguerovia, Isaías he’ígui avei:

40Ñanderuete omohesatũ ichupekuéra, ha omohatã ipy’apykuéra, ani hag̃ua ohecha hesa rupi, ni oikuaa mba’evete ipy’apy rupi, ani hag̃ua ojevy hikuái Che amonguera hag̃ua ichupekuéra, (Isaías 6,9-10).

41Ko’ã ñe’ẽ ko’ãva Isaías he’iva’ekue ohecha rire Hesu Crísto reko jajaipa ha hese oñe’ẽ.

42Opáichavo, mburuvichakuéra apytépe oĩ avei umi ojeroviáva ñemiháme Hesu rehe, nomombe’úinte katu opavave renondépe, okyhyjégui fariseokuéra omosẽrõ g̃uarã ichupekuéra Ñanderuete rogaguasúgui.

43Ohayhuvégui pe ñemomba’eguasu oúva hapichakuéragui, Ñanderuete ñemomba’eguasúgui.

Hesu ñe’ẽ ombojovake opavavépe

44Hesu katu oñe’ẽ hatã ha he’i: Upe ojeroviáva cherehe, ndojeroviái cherehénte, ojerovia uvei pe chembouva’ekue rehe,

45ha upe cherecháva, ohecha avei pe chembouva’ekuépe.

46Che ningo pe Tesape ha aju ko yvy apére, opaite cherehe ojeroviáva ani hag̃ua opyta pytũnguýpe.

47Ha upe ohendúva che ñe’ẽ ha ndojapói ramo, Che nambojovakemo’ãi ichupe, Che ndajúigui ambojovake hag̃ua, asalva hag̃ua uvei tetãyguakuérape.

48Upe chemboykéva ha ndojapóiva che ñe’ẽ, ojohúma imbojovakehára, pe ñe’ẽ Che amombe’úva, upéva voi ombojovakéta ichupe.

49Chejehegui rei nda’éi mba’evete, che Ruete chembouva’ekue ñe’ẽ ambohasa jevy hag̃uánte peẽme aju, umi ñe’ẽ Ha’e omoĩva che jurúpe Che añe’ẽ ha aporombo’emanteva’erã.

50Ha Che aikuaa porã umi ñe’ẽ Ha’e oikuaaukáva chéve ha’e pe tekove tapia g̃uarãva. Ha umi ñe’ẽ Che añe’ẽva, Ha’e he’iukapa chéve.

Currently Selected:

Juan 12: ÑÑP2015

Highlight

Copy