Juan 15
15
Parral máta ha hakãnguéra
1Che ningo pe parral máta añeteguáva, ha che Ruete ningo pe parral máta rehe oñangarekóva.
2Ha’e ningo ohakã’o opaite parral rakã hi’a’ỹva, ha opaite che rakã hi’áva Ha’e oikytĩ ha omopotĩ hi’ave hag̃ua.
3Peẽ ningo penepotĩmbáma pe ñe’ẽ rupi Che ha’emava’ekue peẽme:
4Pepyta chepype, upérõ che apytáta avei pendepype. Pe parral rakã ndaikatúi hi’a ijehegui rei, oĩ’ỹ ramo pe parral máta rehe, upéicha avei peẽ ndaikatúi pejapo mba’eve iporãva napeiméirõ chepype.
5Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.
6Pe opyta’ỹva chepype oñemombova’erã okápe yvyra rakã vaícha ipiru hag̃ua ha oñembyatypa rire katuete ojehapýta.
7Peime ramo chepype, ha Che ñe’ẽ oĩ ramo pendepype, opaite mba’e pejeruréva guive oñeme’ẽta peẽme.
8Che Ruete oñembotuicha pende’a heta rupi ha upéicharõmante peẽ che remimbo’ekuéra añeteguáva oikóta pendehegui.
9Che Ruete cherayhu háicha, Che pohayhu avei, upévare pepyta che mborayhúpe.
10Pejapo ramo che rembipota peiméta che mborayhúpe, Che voi ajapo che Ruete rembipota ha aĩ imborayhúpe.
11Ko’ã mba’e ko’ãva Che ha’éma peẽme che vy’a oĩ hag̃ua pendepype, ha penerenyhẽ hag̃ua vy’águi.
12Kóva ningo che rembipota: Tapejohayhu, Che pohayhu háicha.
13Upe imborayhu tuichavéva ome’ẽ hekovetee voi ohayhúva rehehápe.
14Peẽ ningo che rayhupára, pejapórõ che rembipota.
15Napomboheramo’ãvéima tembiguái, pe tembiguái ndoikuaáigui ijára ojapóva, pombohéra uvei angirũ (amígo) ambohasapámagui peẽme opaite mba’e ahendúva guive che Ruetégui.
16Peẽ ndacheporavói chéve, Che voi ningo poiporavova’ekue peẽme, ha Che pomondo peẽ pende’a hag̃ua, ha pende a opyta hag̃ua oñehundi’ỹre. Ha opaite mba’e peẽ pejeruréva Ñanderuetépe che rérape, Ha’e katuete ome’ẽta peẽme.
17Kóva ningo che rembipota: Tapejohayhu.
Tetãyguakuéra ndaija’éi Hesu rehe ni heseguakuéra rehe
18Kuimba’e ha kuñakuéra ija’e’ỹ ramo penderehe, peikuaa porã katu, ha’ekuéra ndaija’éi hague cherehe raẽ.
19Peẽ peiko rire gueteri yvyariguakuéra oiko háicha, ha’ekuéra penderayhuva’erãmo’ã. Peẽ katu ndapeikovéima yvyariguakuéra oiko háicha, Che poiporavógui uvei yvyariguakuéra apytégui, upévare ha’ekuéra ndaija’éi penderehe, peẽ ndaha’evéimagui iñirũnguéra.
20Penemandu’ákena pe ñe’ẽ Che ha’emava’ekue rehe peẽme: Pe tembiguái ningo namba’eguasuvéi ijáragui. Ha’ekuéra chepersegui ramo, katuete pendeperseguiva’erã avei. Ha oĩ umi ojapóva che ñe’ẽ, katuete oĩta avei umi ojapótava pene ñe’ẽ.
21Opaite ko’ã mba’e ojapóta hikuái penderehe che réra rehe, ndoikuaáigui pe chembouva’ekuépe.
22Che ndajúi rire ha nañe’ẽi rire ichupekuéra, naiñangaipaiva’erãmo’ã hikuái; ko’ág̃a katu ndojohumo’ãi peteĩ discúlpa oñemoangaipa haguére.
23Upe oñemoĩva cherehe, oñemoĩma avei che Ruete rehe.
24Che ndajapói rire umi milágro ijapytepekuéra, avave ndaikatuiva’ekue ojapo, naiñangaipaiva’erãmo’ã hikuái, ko’ág̃a katu ohecha jepe che milagrokuéra ha upeichavéramo jepe oñemoĩ hikuái che ha che Ruete rehe.
25Péicha ojehu oiko hag̃ua umi mba’e ojehaimava’ekue Ñanderuete kuatiañe’ẽme: Reiete oñemoĩ hikuái cherehe, (Salmokuéra 35,19).
26Ouva’erã pene Pytyvõhára, pe Pytu Porãmbáva, che Ruete omboútava pene rendápe, Ha’e chembotuicháta pende apytépe ha opytáta che rechahare ramo.
27Ha peẽ avei pepytáta che rechahare ramo ha moherakuãhára ramo, peikógui chendive ñepyrũ guive.
Currently Selected:
Juan 15: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
