Juan 18
18
Ojeapresa Hesúpe
1Hesu oñe’ẽ rire ko’ã mba’e, osẽ oho hag̃ua hemimbo’ekuéra ndive Cedron ysyry mboypýri, oike hag̃ua peteĩ ka’aguýpe.
2Júdas, pe otraicionátava Hesúpe, oikuaa avei pe ka’aguy péva, heta jevy ningo Hesu ohómi upépe hemimbo’ekuéra ndive.
3Upépe Júdas og̃uahẽ avei soldádo aty, mburuvicha rembiguaikuéra ha fariséo remimondokuéra ndive, ha ogueraha hikuái hata’yrendy, imyendyha avei iñorãirõ rembiporukuéra reheve.
4Hesu katu, oikuaágui opaite mba’e ojehútava ichupe, osẽ ha oho hendápe oporandu hag̃ua ichupekuéra: Mávape piko peheka.
5He’i hikuái ichupe: Hesu Nazaretguápe. Upérõ Hesu he’i ichupekuéra: Che voi ningo. Ha Júdas, pe otraicionáva, omoirũ ichupekuéra.
6Hesu he’ívo ichupekuéra: Che voi ningo, oguevi ha ho’a hikuái yvýpe.
7Hesu katu oporandu jevy ichupekuéra: Mávape piko peheka. Ha ha’ekuéra ombohovái: Hesu Nazaretguápe.
8Upérõ Hesu he’i ichupekuéra: Ha’éma ningo peẽme, Che ha’eha Hesu Crísto, chévente cherekárõ, peheja ko’ãva toho.
9Péicha oiko hag̃ua pe ñe’ẽ ojehaiva’ekue Ñanderuete kuatiañe’ẽme: Umi Nde reme’ẽva’ekue apytégui avave noñehundíri, (Juan 17,12).
10Upémaramo Simon Pédro ohekýi ikyse puku ha onambi’o pa’iguasu rembiguáipe nambi akatúa pegua, pe tembiguái hérava Málco.
11Upérõ Hesu he’i Pédrope: Emoinge jevy nde kyse puku hyrúpe, pe váso che Ruete ome’ẽmava’ekue chéve piko nda’umoãi.
12Upévo pe soldádo ruvicha he’i soldadokuéra ha Judaygua rembiguaikuérape oapresa hag̃ua Hesúpe ha oipokua hag̃ua ichupe,
13ha ogueraha hikuái Hesúpe Anas rendápe, ha’e ningo Caifas rembireko ru, kóva ningo oiko pa’iguasu ramo pe áño pévape.
14Caifas voi he’iva’ekue Judayguakuérape: Iporãve peteĩ kuimba’e omano hetã rehe, (Juan 11,50).
Pédro he’i ndoikuaaiha Hesúpe
15Simon Pédro oho Hesu rapykuéri ha peteĩ ambue Hesu remimbo’e oikuaáva pe pa’iguasúpe, kóva oike avei Hesu ndive pe pa’iguasu korapýpe.
16Pédro katu opyta pe korapy rokẽguasúpe. Upérõ Hesu remimbo’e oikuaáva pe pa’iguasúpe ojevy ha oñe’ẽ pe kuñakarai ndive, oñangarekóva pe okẽguasúre, ha omoinge avei Pédrope pe korapy ryepýpe.
17Upéramo ko kuñakarai oñangarekóva pe okẽ rehe he’i Pédrope: Nde piko ndaha’éi avei Hesu remimbo’e. Pédro katu he’i ichupe: Che ndaha’éi.
18Ha ro’ýgui, pa’iguasu rembiguái ha tahachikuéra ojatapy ha oñembo’y hikuái pe tata jerekuévo, ha Pédro ojepe’e avei hína ijapytepekuéra.
19Upéramo pe pa’iguasu oporandu Hesúpe hemimbo’ekuéra rehe ha umi mba’e Ha’e oporombo’éva rehe.
20Hesu ombohovái ichupe: Che ningo aporombo’e’aína opavave rovake Ñanderuete rogakuéra Israel retãme ha Ñanderuete rogaguasúpe oĩva Jerusalénpe ha mba’eve nambo’éi ñemiháme.
21Mba’érehe piko reporandu chéve, mba’épa aporombo’e’aína. Eporandúna umi cherenduva’ekuépe, ha’ekuéra ningo oikuaa umi mba’e Che aporombo’eva’ekue.
22Hesu he’ívo péva, peteĩ tahachi ohovapete Hesúpe he’ívo: Péicha piko rembohovái pa’iguasúpe.
23Hesu katu he’i ichupe: Añe’ẽvai ramo ehechauka chéve moõitépa, ha ndajavýi ramo, mba’érehepa nde chenupã.
24Upéramo Anas omondo Hesúpe ñapytĩháme Caifas, pe pa’iguasu rendápe.
25Simon Pédro ojepe’e gueterihína ñembo’yhápe. Upérõ oporandu hikuái ichupe. Nde piko ndaha’éi avei hemimbo’e. Pédro katu ombohovái he’ívo: Che ndaha’éi.
26Peteĩ pa’iguasu rembiguái, upe Pédro onambi’ova’ekue reheguáva, he’i: Ndorohechái nga’u piko ra’e avei pe ka’aguýpe.
27Pédro katu onega jevy, ha upetévo peteĩ gállo osapukái.
Hesu ojegueraha Piláto rendápe
28Upérõ ojegueraha Hesúpe Caifas rógagui Piláto rogaguasúpe, ko’ẽmbáma ramo, umi Judaygua katu ndoikéi Piláto rogaguasu ryepýpe ani hag̃ua oñemongy’a, ikatu hag̃ua ho’u pe páscua rehegua tembi’u.
29Upévare Piláto osẽ hógagui ha oporandu ichupekuéra: Mba’e piko ojapo ko kuimba’e kóva, mba’épa peje hese.
30Ha’ekuéra ombohovái ichupe: Kóva nahembiapo vaíri rire ndoromoĩriva’erãmo’ã nde pópe.
31Piláto katu he’i: Pegueraha ichupe ha pembojovake ichupe ikatuha peve pene rembiapoukapy rupi.
Upérõ he’i hikuái ichupe: Ndaijái oréve ore rojukauka avavépe.
32Ko’ã mba’e peichaite ojehu oikopaite hag̃ua Hesu he’i hagueichaite, ha mba’eichagua ñemano rupípa ha’e omanova’erã.
33Upérõ Piláto oike jevy hogaguasúpe, ohenoiuka Hesúpe ha oporandu ichupe: Nde piko Judayguakuéra ruvicha.
34Hesu ombohovái Pilátope: Ndépa reporandu ko mba’e ndejeheguínte, térãpa ambuekuéra he’íra’e ndéve ko mba’e kóva cherehe.
35Piláto ombohovái Hesúpe: Che nga’u piko Judaygua. Ne retãyguakuéra ha pa’iguasukuéra nemoĩ che pópe, mba’e piko rejapo.
36Hesu ombohovái ichupe: Che retãguasu ndaha’éi ko yvy arigua; che retãguasu ko yvy arigua rire, che rembiguaikuéra oñorãirõva’erãmo’ã ani hag̃ua Che ha’a Judayguakuéra pópe, che retãguasu katu ndaha’éi ko yvyariguigua.
37Upéramo Piláto he’i Hesúpe: Péicha ramo piko Nde avei peteĩ tetã ruvicha. Hesu ombohovái ichupe: Peichaite, Che ningo peteĩ tetã ruvicha. Pévarã Che anaceva’ekue ha aju ko yvy ape ári amombe’u hag̃ua pe añetegua. Ha opaite umi ohayhúva guive pe añetegua, cherenduva’erã.
38Upérõ Piláto oporandu Hesúpe: Mba’e piko añetegua. Ha oñe’ẽ rire péva, osẽ jevy Judayguakuéra rendápe ha he’i ichupekuéra: Che ningo ndajohúi mba’eve ivaíva hekovépe.
39Pejepokuaa ningo che apoi peẽme peteĩ ojeapresáva páscua aretépe. Peipota piko che apoi peẽme ko Juda retã ruvichágui.
40Upérõ osapukái jevy: Ani repoi ichugui, Barrabásgui uvei, epoi. Barrabas ningo peteĩ mondaha ha jukahára.
Currently Selected:
Juan 18: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
