Juan 20
20
Hesu opu’ã jevy omanóva apytégui
1Pe semána ñepyrũha árape, ko’ẽmba mboyve, María Magdaléna oho Hesu oñeñotỹ haguépe, ha ohechávo ojeíma hague pe itaguasu ombotyva’ekue pe tyvy juru,
2oñani ohóvo Simon Pédro ha pe ambue Hesu remimbo’e rendápe, kóva ningo pe temimbo’e Hesu ohayhuvéva, ha he’i ichupekuéra: Ojegueraha ningo Ñandejára retekue ityvýgui, ha ore ndoroikuaái moõpa omoĩra’e hikuái.
3Upéramo Pédro ha pe ambue temimbo’e oho pya’e Hesu oñeñotỹ haguépe.
4Mokõivéva oñani oñondive, pe ambue Hesu remimbo’e katu iñakuãve Pédrogui ha og̃uahẽ voive ichugui Hesu tyvýpe.
5Ha’e ojayvy ha oma’ẽ pe tyvypýre ohecha pe páño yvýpe, ha’e katu ndoikéi hyepýpe.
6Ha Pédro oúva hapykuéri, og̃uahẽ vove oñeñotỹ haguépe ichupe, oike pe tyvy ryepýpe ha ohecha pe páño yvýpe.
7Pédro ohecha avei umi páño oñu’ãva’ekue Hesu akã, noĩri katu pe ambue páño oĩháme, umía oñemoĩ oñemboapakuahápe (ojelia porã) mombyryve ijykére.
8Upérõ oike avei pe ambue Hesu remimbo’e, og̃uahẽ raẽva’ekue pe tyvýpe ha ohecha ha oguerovia.
9Ha’ekuéra ne’ĩra gueteri ohechakuaa Ñanderuete kuatiañe’ẽme he’imava’ekue voi Hesu opu’ãva’erãha omanóva apytégui.
10Upémaramo ko’ã mokõi Hesu remimbo’e oho jevy hógape.
11María katu opyta pe tyvy rokápe ha ojahe’ohína. Ha jahe’ohápe ojayvy ha oma’ẽ pe tyvy rehe.
12Upéramo ohecha mokõi ángel ijao morotĩva, oguapýva Hesu retekue oñemoĩ haguépe, peteĩ iñakã gotýo, ha ambue ipy gotýo.
13Ha ha’ekuéra he’i Maríape: Kuñakarai, mba’érehe piko nerasẽ. Ha ha’e ombohovái ichupekuéra: Ojeguerahágui che Jára retekue.
14He’ipávo ko’ã mba’e ojere hapykuévo ha ohecha Hesu oñembo’yha hapykuépe, ndoikuaái katu Hesuha.
15Upérõ Hesu he’i ichupe: Nde kuñakarai, mba’érehe piko nerasẽ. Mávapepa reheka. María ningo oimo’ãgui ha’eha pe yvotyty rerekua, he’i ichupe: Karai, nde regueraha rire Hesu retekue, eréna chéve moõitépa remoĩ ra’e, che agueru jevy hag̃ua ichupe.
16Upéramo Hesu he’i: María. Ha María oñembojerévo he’i ichupe hebréo ñe’ẽme: Rabóni, he’iséva mbo’ehára.
17Hesu katu he’i ichupe: Ani repoko cherehe, ne’ĩra ajupi che Ruete rendápe, tereho uvei che hermanokuéra rendápe, ha ere ichupekuéra: Che ajupitaha che Ruete ha pende Ruete rendápe, che Jára ha pende Jára rendápe.
18Ha María Magdaléna oho omombe’u hag̃ua hemimbo’ekuérape ohecha hague Hesúpe, ha Ha’e he’i hague ichupe opaite ko’ã mba’e.
Hesu ojehechauka hemimbo’ekuérape
19Ha pe arete páscua ára rire, domíngo pyharépe, umi okẽ oñemboty porã jave, ha Hesu remimbo’ekuéra oñembyaty okyhyjégui hikuái Judayguakuéragui, sapy’aitépe Hesu oike ha oñembo’y ijapytepekuéra ha he’i ichupekuéra: Tapendepy’aguapy,
20ha oñe’ẽmbávo ko ñe’ẽ kóva, ohechauka ichupekuéra ipokuéra ha ijyke. Upérõ hemimbo’ekuéra ovy’aite ohechávo Ijárape.
21Hesu he’i jevy ichupekuéra: Tapendepy’aguapy, Che Ruete chembou haguéicha, Che pomondo avei.
22Ha he’ipávo ko’ã ñe’ẽ, Ha’e oipeju hi’ári he’i ichupekuéra: Perecibi pe Pytu Porãmbáva.
23Oimeraẽva peẽ peperdonáva hi’angaipa, opytáta oñeperdonapyréma, ha oimeraẽvape peẽ napeperdonáiva, opytáta perdon’ỹre.
Hesu ojehechauka avei Tomáspe
24Tomas peteĩ umi 12 Hesu remimbo’e reheguáva, ojehérova Kõingue, noĩri ambue Hesu remimbo’ekuéra ndive, Hesu ou ramoguare.
25Ambue temimbo’ekuéra he’i ichupe: Rohecháma ningo Hesúpe. Ha’e katu he’i ichupekuéra: Che ndahechái ramo ipóre iclávo kuare, ha namoingéi ramo che kuã iclávo kuarépe, ha che po ikyse kuarépe, ndagueroviamo’ãi.
26Ohasa rire 8 ára, Hesu remimbo’ekuéra oñembyatypa jave peteĩ ógape, ha Tomas oĩ avei ijapytépe, Hesu oike, oñembotypa ramojepe hokẽnguéra, ha oñembo’y ijapytepekuéra ha he’i: Tapendepy’aguapy.
27Ha upéi he’i Tomáspe: Emoinge ne kuã che clávo kuarépe, ha ema’ẽ porã che póre, ha emoinge avei nde po che yképe. Ha anive ndepy’amokõi, erovia uvei.
28Tomas katu ombohovái: Che Ruete ha che Járaite.
29Upérõ Hesu he’i ichupe: Reguerovia, nde cherecha haguérente, ovy’aiteva’erã umi ojeroviáva cherehe ohecha’ỹre mba’eve.
30Heta ambue techaukaha (señal) Hesu ojapova’ekue hemimbo’ekuéra renondépe nojehaíri ko kuatiañe’ẽ kóvape.
31Ko’ã mba’e katu ojehai peguerovia hag̃ua Hesu ha’eha pe Crísto, Ñanderuete Ra’y, ha pejerovia hese oñeme’ẽ hag̃ua peẽme pe tekovete.
Currently Selected:
Juan 20: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
