Juan 9

Hesu omonguera peteĩ hesatũvape

1Hesu oguata ohóvo, ohecha peteĩ hesatũvape, onaceha ára guive.

2Ha hemimbo’ekuéra oporandu Hesúpe, ha he’i hikuái: Mbo’ehára, mávapa oñemoangaipa (oñemohembiapo vai) raka’e, itúva, térã isy, térãpa ha’e voi, onace haguére hesatũva ramo.

3Hesu katu he’i ichupekuéra: Kóva, ndaha’éi itúva ni isy angaipáre ha’e onace hague hesatũva. Péva ojehúnte ojehechauka hag̃ua ha’érupi Ñanderuete pu’aka, peteĩ milágro rupi.

4Ára aja Che ajapova’erã pe chembouva’ekue rembiapo, pyhare ningo oúta, upérõ avavete ndaikatuvéima omba’apo.

5Che aiko aja ko yvy ári, che’aĩna ko múndo resapehára.

6Oñe’ẽ rire ko’ã mba’e, Hesu ondyvu yvýre, ha ojapo tuju hendy reheve oipichy hag̃ua hesatũva resáre.

7Ha Hesu he’i ichupe: Tereho ejovahéi Siloe ykuápe. Pe hesatũva oho ha ojovahéi, ha ojevývo ohecha porãma.

8Hogaykereguakuéra ha ambue oikuaámiva ichupe he’i: Kóva piko ndaha’éi pe hesatũva’ekue, oguapýmiva ha ojerurémiva pirapire ohasáva guivépe ijypy rupi.

9Oime ningo umi he’íva: Ha’e voi, ambuekuéra katu he’i: Ndaha’éi, ojoguánte ichupe. Pe hesatũva’ekue katu he’i: Che ningo pe hesatũva’ekue.

10Upérõ oporandu hikuái ichupe: Mba’éicha piko oñemonguera nde resa rehecha hag̃ua.

11Ha’e ombohovái ichupekuéra: Pe kuimba’e, hérava Hesu, ojapo tuju, oipichy che resáre ha he’i chéve: Tereho ha ejovahéi Siloe ykuápe; ha che aha, ajovahéi ha aju jevývo ahecha ñepyrũva’ekue.

12Upérõ oporandu hikuái ichupe: Moõ piko ha’e oime. Ha’e ombohovái: Ndaikuaái.

13Ogueraha hikuái pe hesatũva’ekuépe fariseokuéra rendápe.

14Ha ko milágro kóva Hesu ojapova’ekue sábado árape.

15Upérõ fariseokuéra oporandu jevy ichupe: Mba’éicha piko rehecha ñepyrũ ra’e. Ha’e he’i ichupekuéra: Hesu ojapo tuju ha oipichy che resáre, ha ajovahéi rire apytáma ahecha.

16 Fariseokuéra apytégui oĩ umi he’íva: Pe kuimba’e péva ndaha’éi Ñanderuete reheguáva, nomomba’éigui sábado ára. Ambuekuéra katu he’i: Mba’éicha piko kuimba’e heko vaíva ikatu ojapo koichagua milágro. Ha oñoñe’ẽapi hikuái.

17Upévare oporandu jevy hikuái pe hesatũva’ekuépe: Ha nde, mba’e piko ere hese, nemonguera haguére. Ha ha’e he’i: Hesu ningo peteĩ proféta.

18Judayguakuéra ndogueroviái ha’e hesatũ hague, upévare ohenoiuka itúva ha isýpe.

19Ha oporandu hikuái ichupekuéra, he’ívo: Añete piko, kóva pende ra’y, pejéva ha’e onace hague hesatũva ramo. Ha mba’éicha piko ko’ág̃a ohecha.

20Ituvakuéra ombohovái: Ore roikuaa porã kóva ore ra’yha, ha onace guive ndohechái voiva’ekue.

21Ndoroikuaái katu mba’éichapa ohecha ko’ág̃a, ni mávapa omonguera ichupe, peporandu ichupe, okakuaapáma ningo, ijehe voi toñe’ẽ ha’e.

22Upéicha itúva ha isy he’i okyhyjégui Judayguakuéragui. Fariseokuéra he’iukáma voi oimeraẽ he’íva Hesu ha’eha pe Crísto, oñemosẽtaha Ñanderuete rogaguasúgui.

23Upévare itúva ha isy he’i avei: Okakuaapáma ningo, peporandu ichupe.

24Upérõ ohenói jevy hikuái pe hesatũva’ekuépe ha he’i ichupe: Emomba’eguasu Ñanderuetépe, ore roikuaa pe nemonguerava’ekue peteĩ heko vaíva.

25Upéramo pe hesatũva’ekue he’i ichupekuéra: Che ndaikuaái pe chemonguerava’ekuépa peteĩ heko vaíva, aikuaa porã katu cheresatũ hague ha ko’ág̃a Ha’érupi che ahecha porãha.

26Oporandu jevy ichupe hikuái: Mba’e piko ojapo nderehe. Mba’éicha piko omonguera nde resa.

27Ha’e katu he’i ichupekuéra: Ha’epáma ningo peẽme, napehendúi piko. Mba’érehe piko pehenduse jevy. Térã piko peikose avei hemimbo’e ramo.

28Upérõ oja’o hikuái ichupe ha he’i: Nde ningo hemimbo’e. Ore ningo Moises remimbo’e.

29Ore ningo roikuaa porã Ñanderuete oñe’ẽ hague Moiséspe; kóva katu ndoroikuaái mamoguarépa ha’e.

30Pe hesatũva’ekue ombohovái ichupekuéra he’ívo: E’a, peẽ ndapeikuaái mamoguápa ha’e, ha chéve chemonguera.

31Jaikuaa porã ningo Ñanderuete nohenduiha heko vaívape, umi oñemomirĩva ha ojapóva uvei hembipota, umívapente Ha’e ohendu.

32Upe ára atyguasu ñepyrũ guive noñehendúi máramo oñemonguera hague peteĩ hesatũva’ekuépe onace guive.

33Ko Hesu kóva ndoúi rire Ñanderuetégui mba’evete ndaikatuiva’erãmo’ã ojapo.

34Upérõ umi fariséo ha Judayguakuéra he’i ichupe: Angaipa reheve ningo renace, ha nde piko orembo’éta. Ha omosẽ hikuái ichupe okápe.

Pe hesatũva ojerovia Hesu rehe

35Hesu ohendúra’e pe hesatũva’ekuépe oñemosẽ hague okápe, ha ojohúvo ichupe oporandu: Rejeroviápa yvyarigua Ra’y rehe.

36Ha ha’e he’i: Mávapa ha’e, karai, ajerovia hag̃ua hese.

37Ha Hesu he’i ichupe: Rema’ẽreína hese, ko oñe’ẽva nendive ha’ehína.

38Upérõ pe hesatũva’ekue he’i: Ajerovia, che Jára. Ha omomba’eguasu ichupe.

39Ha Hesu he’i: Aporombojovake hag̃ua ningo aju ko yvy ape ári, umi ohecha’ỹva ohecha hag̃ua, ha umi ohecháva hesatũ hag̃ua opytávo.

40Ha umi fariséo oĩvahína hendive upépe, ohendúvo péva, oporandu hikuái ichupe: Ore piko oreresatũ avei.

41Hesu ombohovái ichupekuéra he’ívo: Peneresatũ rire napeneangaipaiva’erãmo’ã. Ko’ág̃a peẽ pejégui ore rohecha porãroína upévare pene angaipa oĩ gueteri penderehe.

Currently Selected:

Juan 9: ÑÑP2015

Highlight

Copy