Lúcas 5
5
Heta pira oike rédpe
1Ha ojehu ningo, Hesu oñembo’y jave hína pe yguasu Genesaret rembe’ýpe, hetãyguakuéra ojopypa ichupe ojapysaka porãségui Hesu Ñanderuete ñe’ẽ rehe.
2Ha’e ohecha mokõi canóa yguasu rembe’ýpe, ha ijarakuéra omopotĩvahína iredkuéra y rembe’ýpe.
3Upérõ Hesu oike peteĩme, Simon Pédro mba’épe, ha ojerure ichupe omomombyrymive hag̃ua yguasu rembe’ýgui, ha oguapy rire, ombo’e hetãyguakuérape pe canoapy guive.
4Oñe’ẽmba rire, he’i Simon Pédrope: Tereho pe y ipypukuvehápe ha peity pende red penohẽ hag̃ua pirakuéra.
5Simon Pédro katu he’i ichupe: Mbo’ehára, romba’apo ningo ange pyhare pukukue ha noronohẽi mba’evete, upéicharamo jepe aitýta che red Nde erégui oréve.
6Ha ojapopa rire hikuái Hesu ñe’ẽ, ojapyhy hetaiterei pira, omondoropa hag̃uáicha iredkuéra.
7Upémaramo ohenói iñirũnguérape opytáva y rembe’ýpe ou hag̃ua icanóape oipytyvõ hag̃ua avei ichupekuéra, ha oñembojávo omyenyhẽ pirágui mokõive canóa ombo’yguy hag̃uáicha.
8Ha Simon Pédro ohechávo ko’ã mba’e he’i Hesúpe: Eñemboyke chehegui, che Jára, che ningo peteĩ mba’evai apoha.
9Oñemondyipa ningo hikuái, ohecháva guive ko’ã piraita ha’ekuéra ojapyhyva’ekue.
10Umi ambue iñirũnguéra, Jacóbo ha Juan, Zebedéo ra’ykuéra, oñemondyipa avei hendivekuéra. Upérõ Hesu he’i Simon Pédrope: Ani rekyhyje, ko ára kóva guive oikóta ndehegui nde rapicha nohẽhára.
11Ha og̃uahẽvo y rembe’ýpe ohejapa oguerekóva guive ha oho Hesu Crísto rapykuéri.
Hesu Crísto omonguera peteĩ ilépravape
12Ha Hesu oĩ jave hína peteĩ távape, og̃uahẽ hendápe peteĩ iléprava, ha ko kuimba’e ohechávo Hesúpe ojeity henondépe ha ojerure asy ichupe he’ívo: Che Jára, reipotárõ Nde ikatu chemonguera.
13Ha Hesu ipojái ha opoko hese he’ívo: Aipota, tanepotĩ ne mba’asy vaígui. Upevove ha’e okueraite imba’asygui.
14Hesu he’i ichupe: Ani remombe’u pe ojehúva ndéve, tereho uvei pa’i rendápe ejehechauka hag̃ua ha eikuave’ẽ umi mba’e Moises he’iukava’ekue techaukaha rupi, (Levítico 13,49; ha Levítico 14,10).
15Upéicharamo jepe oñemyasãive ohóvo herakuãguasu oparupiete, ha hetãyguakuéra aty atýpe og̃uahẽ Hesu rendápe ohendu ha oñemonguerauka hag̃ua imba’asykuéragui.
16Hesu katu oho desiértope oñembo’e hag̃ua.
17Ha ojehu ningo peteĩ árape Hesu oporombo’e jave hína, oñembyaty avei heta fariseokuéra ha umi oporombo’éva Moises rembiapoukapykuéra ouva’ekue avei Hesu rendápe Galiléagui, Judágui ha Jerusaléngui ha oguapy hikuái ijypýpe. Ha Ñanderuete pu’aka oĩ Hesu ndive, Ha’e oporomonguerapa hag̃ua.
18Ha mbovymi kuimba’e ogueru peteĩ ijapávape, oñenovahína hupápe, ha oñeha’ãmba omog̃uahẽ hag̃ua ichupe Hesu renondépe.
19Upeichavéramo jepe ndojohúi hikuái peteĩ tape, oñembyaty hetaitereígui hetãyguakuéra Hesu jerekuévo, upémaramo ojupi hikuái pe óga ape ári oipe’a hag̃ua umi téja ha omboguejy hag̃ua pe ijapáva hupa reheve Hesu oĩháme, hetãyguakuéra mbytépe.
20Ha Hesu ohechávo ojerovia porãha hikuái he’i pe ijapávape: Nde kuimba’e, ne angaipa oñeperdonáma.
21Ha umi oporombo’éva Moises rembiapoukapy ha fariseokuéra ojepy’amongeta ha he’i: Máva piko kóva oñemoĩva Ñanderuete rendaguépe. Máva piko ikatu operdona kuimba’e ha kuña angaipakuéra, Ñanderuete añómante ikatu.
22Hesu oikuaapa voi ojepy’amongetáva hikuái, upévare he’i ichupekuéra: Mba’e piko pejepy’amongetapeína.
23Mba’épa hasyve ja’e hag̃ua ko kuimba’e kóvape: Ne rembiapo vai oñeperdonáma térã epu’ã ha eguata.
24Peikuaa porã hag̃ua pe yvyarigua Ra’y ipu’aka avei operdona hag̃ua angaipakuéra, Hesu he’i ijapávape: Che ha’e ndéve: Epu’ã, ehupi nde rupa ha tereho nde rógape.
25Upevove ha’e opu’ã opavave resa renondépe, ohupi hupa oñeno hague ijati’ýre, ha oho hógape omomba’eguasúvo Ñanderuetépe.
26Ha ambuekuéra ohecharamoite opytávo ha omomba’eguasu Ñanderuetépe ha kyhyjepópe he’i hikuái: Jahecháma peteĩ milágro, ikatu’ỹva ojeguerovia.
Hesu ohenói Levípe
27Ko’ã mba’e rire Hesu oho ha ojohúvo peteĩ impuésto mono’õ hára rehe, hérava Levi, oguapýva pe óga ryepýpe oñemono’õháme pe impuésto, he’i ichupe: Eju che rapykuéri.
28Ha Levi ohejapa imba’e, opu’ã ha oho Hesu rapykuéri.
29Uperire ko Levi, (hérava avei Matéo), ojapo peteĩ karuguasu hógape Hesúpe g̃uarã, ha heta impuésto mono’õhára ha ambuekuéra oñembyaty avei Levi rógape okaru hag̃ua.
30Ha umi fariséo ha kuatia haihára oñe’ẽngururu Hesu remimbo’ekuéra rehe, he’ívo: Mba’érehe piko peẽ pekaru ha pey’u impuésto mono’õhára ha mba’evai apohára ndive.
31Hesu katu ombohovái ichupekuéra he’ívo: Hesãiva noikotevẽi pohãnohára rehe, hasývante.
32Che ningo ndajúi ahenói hag̃ua heko jojávape, ajúnte ahenói hag̃ua umi mba’evai apohárape, opoi hag̃ua heko vaígui.
Hesu oporombo’e ajúno rehe
33Upérõ he’i hikuái Hesúpe: Mba’érehe piko Juan remimbo’ekuéra oajuna (ojeko’aku) heta jevy ha oñembo’e heta, upéicha avei fariseokuéra, ne remimbo’ekuéra katu okaru ha hoy’u tapia.
34Hesu ombohovái ichupekuéra: Ikatúnepa peẽ peje umi og̃uahẽvape mendahápe okaru’ỹ hag̃ua, pe menarã oĩ aja hendivekuéra.
35Og̃uahẽva’erã katu pe ára pe menarã ojeiva’erã ijapytégui, upérõ ha’ekuéra oajunava’erã avei katuete.
36Hesu omombe’u ichupekuéra peteĩ ñe’ẽ mbojoja: Avave nomoĩri peteĩ ao pyahu pehẽnguemi omyatyrõ hag̃ua peteĩ ao tuja osoro haguépe. Pe pehẽngue pyahu omondoro, ha oñembojehe’a ramo pe ao tujáva reheve ndo’a porãmo’ãi ojuehe.
37Ha avave nomoĩri víno pyahu mba’yru kavara pirekueguigua itujávape, ỹrõ pe víno pyahu omondorova’erã pe mba’yru itujávape, ha oñeñohẽ reívo oñehundi pe víno ha pe mba’yru itujáva avei.
38 Víno pyahu oñemoĩva’erã mba’yru kavara pirekueguigua ipyahúvape.
39Ha avave ho’úva pe víno tuja ndo’uséi pe ipyahúva, he’ígui ha’e: Pe itujáva iporãve pe ipyahúvagui.
Currently Selected:
Lúcas 5: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
