Yuhana 16

1I tsik a kurum a kataya ka, dite i təv ana gà mburma ti sèwèr a kurum a are ya ka, ka ta miyakum à megìse iye i gəzləŋ kurum a tsa. 2Ti ti delewere a kurum i ga mahàmà a Mbulum tar a. Pat ŋa a riŋ a ndzere a ka, wura à kiɗ a aà kurum a, a gweɗe a, i ge taŋa ka, dukw ana a tsahən aà Mbulum a. 3Ti ta ge a kataya ka, aɗaba ana tə sər Tsir gà tsiye, dite ka, tə sər iye tsa mbaŋa ya. 4Ama i tsik a kurum kataya ka, dite i təv ana gà pat ŋa tàa ndzera, tì sèwèr a kurum are kamala taŋa ya ka, ki sirwim a dər, a tsik a mər ka, ndzer kaɗəŋ.»

Mege megemir Mezite Mesife Mbulum

Yesuw a gwaɗa a tar asa: «I gəs metsike a kurum daga piŋŋe tsəka, aɗaba ana iye riŋ i təv kurum mba ya. 5Ama kinehe ka, i tsik a kurum a aba ya, aɗaba ana i de a aà kurum a, i de a a təv wele ana a slərra iye ya. Ama wura ilik i təv kurum a, a ta gweɗiŋ a ka, ki de a a ŋga tsa. 6Matsəɓatsəɓ i gəzləŋ kurum ivaɗ, aɗaba ana i gwaɗa a kurum ka, i de a aà kurum a ya. 7Ama dzùmar zləm, gəsum dukw ana i tsik a kurum a ya ka, ndzer kaɗəŋ. A ge a kurum a ŋgwal ŋa ka, na Yàa da à kurum a ivaɗ, aɗaba ana Yàa da tsəka, mala mazlàkà kurum ata a dere a a təv kurum a asa tsa. Ama na Yàa da ka, i slirre a təv kurum a.

8Na aka dara ka, a ɗif a à ndzer ŋa a gà mburma ana ti zezem a gər ahəɗ a, dite ti sir aaba a i bakal tar ana ta ge a ya, nda gà i dukw ana ŋgwal ŋa ika miɗ Mbulum a. Ti sir a mbaŋa ka, Mbulum na à ses a ikaba seriye tar a. 9A ti ɗe a ter a dər ka, tar gà ɓəzla bakal, aɗaba ana tàa gəs iye nda gəzləŋ tar tsiye. 10A ti ɗe a ter a asa ka, iye na ŋgwal ŋa ndzer ika miɗ Mbulum a. Ti sir a taŋa ka, aɗaba ana iye ihər i de a a təv Tsir gà, ki ta ŋgetwim a asa tsiye. 11Dite a ti ɗe a ter a dər asa mbaŋa ka, Mbulum na a ti ses a ikaba seriye tar a ya, aɗaba ti sir a ka, seriye aka mbər megìse Əbay gər ahəɗ aaha kinehe ya.

12Taŋa gà dukw a riŋ aà metsike a kurum ka, hinne asa, ama ki slwim a aà mesire kinehe zukw tsa. 13Na Mezite Mesife Mbulum ata a ɗif a à ndzer a mburma ya, aka dara ka, a ɗif a kurum a à ndzer ŋgar ata aka gər duwa tserdze kuɗa. A ta fèfil a ka, nda ndzəɗa ŋgar tsa. Ama a ti tsik a kurum a ka, dukw ana a tsarakara i təv Tsir gà ya, dite à ta me a kurum a à gà dukw ana ti ta ge a ba ika miɗ mba ya mbaŋa. 14Gà mburma tì zlibe a à iye, aɗaba ŋgat, agəra ana a tsarakara bazlam i təv ga ya, dite na à me a kurum a dər a. 15Dukw ana i ahər Tsir gà tserdze ya ka, biy gà mbaŋa. Aɗaba taŋa, i gwa: Dukw ana Mezite Mesife Mbulum à me a kurum a dər a ka, i təv ga ya na a tsarakara ya.»

Matsəɓatsəɓ a ti ne a maŋgayaba

16Yesuw a gwaɗa a tar asa: «I huɗ mendze zaakwa ya ka, ki ta ŋgetwimiŋ a asa tsa, dite i huɗ mendze zaakwa ya asa ka, ki ta ŋgetwimiŋ a asa.»

17Gà asiŋ ŋa ika magər gà ɓəzla mazazama ŋgat ata tə tsaraka kataya ka, ta gwaɗaba ika magər tar: «Dukula na a sasar aà megweɗe i huɗ bazlam ŋgar ata, a gwa ka: I huɗ mendze zaakwa ya ka, ki ta ŋgetwimiŋ a asa tsa, dite ka, i huɗ mendze zaakwa ya ka, ki ta ŋgetwimiŋ a asa ya? Dite biy na a gwa asa ka: Aɗaba ana i de a a təv Tsir gà ya asa dze ya? 18Dukula na a ne i huɗ mendze ata zaakwa a tsik a ya? Ama kà sərakwa dər dukw ana a sasar aà metsike ya tsa.» 19I huɗ bazlam tar ata ya ka, Yesuw a sər a taraha aka dukw ana a sàs a tar aà mewize aà ŋgat a. A gwaɗa a tar aaka: «I gwaɗa a kurum ka, i huɗ mendze zaakwa ya ka, ki ta ŋgetwimiŋ a asa tsa, dite i huɗ mendze zaakwa ya asa ka, ki ta ŋgetwimiŋ a ya. Ama bazlam ata i tsik a ana, a wise a kurum gər a? 20Iye ihər i tsik a kurum a nda ndzer, pàrsa iɗəm tsa: Ki gwim a arəv tur tur tur nda gà tuwa hinne, ama gà mburma ana ti zezem a gər ahəɗ a ka, ta ŋgeye a ba. Malahalah ŋa ka, ki gwim a arəv hinne, ama i dəba ŋa ya ka, arəv kurum ata a ne a maŋgayaba kuɗa. 21A ne kamala məkəs ana mawà kəla a dza ahər ba ya. Malahalah ŋa ka, arəv a de a ihər a hinne, aɗaba kəla ana a wir ahər a ya. Ama aləka aka wa ka, a ŋgeye a ba, aɗaba kəla ana a wa ya. Mawura ŋa ata aka mətsar gər tsara. 22Kamala taŋa ya, i təv kurum tekeɗe, kataya mbaŋa. Taŋa i təv kurum i faha ka, ki gwim a arəv hinne. Ama i dəba ŋa ya ka, ki ta ŋgetekewebe a asa. Ki ta ŋgeywim a ba hinne, dite wura ilik a sle a aà mazla aà kurum dukw maŋgayaba ata ya asa tsa.

23Pat ŋa aka ndzera ka, ki sirwim a lele, ki wizwim a aà iye duwa asa tsa. Iye ihər i tsik a kurum a nda ndzer, pàrsa iɗəm tsa: Dukw ana ki wizwim a aà Tsir gà tserdze nda zləm gà ya ka, a vile a kurum ŋa. 24Haa kinehe tekeɗe, kàa wizwim duwa nda zləm gà zukw tsa. Ama ka, wizwim ahər, a vile a kurum a dukw ana kà wizwim a, dite ka, maŋgayaba mà rah a gəzləŋ kurum tsìsl lele.»

Yesuw a mba aà gà dukw ana ika gər ahəɗ tserdze ya

25Yesuw a tsik a tar asa mbaŋa, a gwaɗa a tar: «I tsik a kurum gà dukw ata tserdze ya ka, mendzikiɗe ba duwa. Ama pat ŋgiɗ a ndzere a ka, i ta fèfil a kurum a bazlam mendzikiɗe ba duwa asa tsa. I ɗif a kurum a ka, à bazlam aka gər Tsir gà parakkà lele. 26Pat ŋa ata aka ndzera ka, ki ta wizwim a duwa aà Tsir gà nda zləm gà. Iye ihər i gweɗe a kurum ŋa, iye na i ta hemer a aɗaba kurum a tsa. 27Aɗaba ŋgat na a waya kurum a dukw ŋgar. A waya kurum ka, aɗaba ana kà wayum iye, kàa gəsum iye nda gəzləŋ, kà sərum dər, i dara ka, i təv ŋgar a ya. 28I dara i təv Tsir gà i mbulum a aka gər ahəɗ a. Kinehe ka, i de a ika gər ahəɗ a, i mbìɗ a gər a təv ŋgar asa.»

29Gà ɓəzla mazazama ŋgat ata tə tsaraka kataya ka, ta gwaɗar: «Araha, kàa fàfəl parakkà lele kuɗa, bazlam mendzikiɗe ba duwa iɗəm asa tsa. 30Kinehe mì sər ka, kà sər duwa tserdze, ku mege ələk wura a dzele a, a wiz aà kər a duwa ka, kàa mbər mesirer aakaha. Aɗaba taŋa na mì gəs kər nda gəzləŋ, mì sər, kà dara ka, i təv Mbulum a ya.» 31Yesuw a gwaɗa a tar aaka: «Kinehe ana, kàa gəsum iye nda gəzləŋ kuɗa dər a? 32Araha pat ŋa a deriŋa, àsla ka, aka ndzera aka ndəv, i təv ana sweyèh sweyèh ki tìzwim a ikaba ya tserdze, ku weke a de a a ma ŋgar, ki miyekwim a à iye à gər gà ilik a. Ama i ti ndze a ka, à gər gà ilik kaɗəŋ tsa, aɗaba Tsir gà a riŋ i təv ga hiywe. 33I tsik a kurum gà dukw ata tserdze ya ka, dite kà ndzakwa nda gà iye, ki ŋgetwim a matasla yam a gəzləŋ zayya lele. Ika gər ahəɗ ka, ki sèwèrwim a are. Ama kə̀la ka, arəv ma da aà kurum a tsa, gəsum gəzləŋ, aɗaba Yàa mba aà gà dukw ana ika gər ahəɗ tserdze ya.»

Currently Selected:

Yuhana 16: gnd

Highlight

Copy