Luka 21

Madakwa məkəs duwa matawak ŋa, a ndəv aba à dukw

məfara ŋana aɗaba Mbulum a

Markus 12:41-44

1Aləka Yesuw a fə̀r ikaba ya ka, aka ŋgat a gà ɓəzla limana duwa a riŋ, ti dzèye a siŋgwe məfara ŋa, a sahər ana i batsah ga Mbulum ata ya. 2Ama a ŋgat a madakwa məkəs duwa a riŋ matawak ŋa mbaŋa. A dza aɗəm i ŋgar ka, kur siŋgwe sula. Ama siŋgwe ata ka, kalkal siysiy ilik a pəra. 3Yesuw a ŋgatar kataya ka, a gwaɗa a tar: «Iye ihər i tsik a kurum a nda ndzer, madakwa məkəs aaha matawak ŋa ya, aka dza aɗəm dukw məfara ŋa aaha aɗaba Mbulum a ka, a za biy gà mìsle ŋgiɗ fit. 4Aɗaba gà mìsle ŋgiɗ tə dzaya aɗəm ka, asiŋ ŋa a riŋ aà tar hinne, à ndìv a tsa. Ama madakwa məkəs aaha a dza aɗəm i ŋgar ka, dukw ana a riŋ ihər a ndze a dər dze ya.»

Yesuw a ɗif à ga Mbulum batsah ŋa ana

ti ta mbezle a dər mba ya

Mata 24:1-2; Markus 13:1-2

5Gà asiŋ gà mburma a riŋ əŋgal ti tsik aà ga Mbulum batsah ŋa ata, ta gwa: «Ga aaha a tsahən ka, hinne nda gà kur ana tə zlàzl dər a tekeɗe, tìtiw tìtiw lele, dite nda gà dukw ana tə dzaya a Mbulum məfara ŋa aà megemir ga ata ya.» 6Ama Yesuw a gwaɗa a tar: «A pat ŋgiɗ ka, ki ŋgetwim a a kur ika gər biy ŋgiɗ asa tsa. Ti ta mbezle a dər mba ka, leheɗ leheɗ kweleŋ fètìte.»

Mandəva gər ahəɗ ana à ndìv a ya

Mata 24:3-14; Markus 13:3-13

7Gà mburma ana tar riŋ i təv ŋgar ata ya, tə tsam ahər, ta gwaɗar: «Əbay, ndeɗime na bazlam yak ata kà tsik a, a ta ge a ba dze ya? Dite meme na mìi sir a dər ka, gà dukw ata tàa à mege ba ya?» 8Yesuw a gwaɗa a tar aaka: «Gwim metsehe lele, wura ma ta baza a kurum za tsa. Aɗaba gà mburma hinne ti dere a a təv kurum a, ti zle akaba a zləm gà, dite ta gweɗe a kurum a, ku weke: <Iye ka, ŋgat ŋa, araha pat ŋa aka sle kuɗa.> Ama ka, ka tə zazamum tar tsa. 9Aləka na kàa tsarakum gà gùvəl nda gà mburma ana ti neyeba a are ya, aka ndzera ka, ka ta gwim magəɗa ɓav tsa asa. Aɗaba gà dukw ata, say ta ge a ba fit dzekwiŋ. Ama mandəvandəv gər ahəɗ ka, aka sle zukw tsa na taŋa ya.»

10I dəba ŋa ya, a gwaɗa a tar asa: «Gà kwite ŋgiɗ pampam ta ge a gùvəl nda gà biy ŋgiɗ. Gà gawla Əbay ŋgiɗ ta ge a gùvəl nda gà biy ŋgiɗ pam asa. 11I gà kwite ŋgiɗ pampam, wàkit wàkit ahəɗ a ɓezle a nda medzedzere hinne. Gà may nda gà dukw məməta ŋgiɗ hinne ti ta geye a ba i gà kwite ŋgiɗ pampam, ku mege i ŋga tserdze. Ta ŋget a a gà dukw mene aà mburma ana gà bàba ŋa ya, aà gəza mbulum, ta ge a magəɗa hinne ya. 12Ama ələk gà dukw ata ti ti ndzere a ka, say gà mburma ta gese a kurum, tì sèwèr a kurum a are hinne məfara ŋa dzekwiŋ. Ti ti de à kurum a a ga mahàmà a Mbulum a, ta ge a kurum a seriye. I dəba ŋa ya, ti dze a kurum a daŋgay kuɗa, agəra iye. Ti de à kurum a aka miɗ gà ɓəzla makwàrà mburma, nda gà aka miɗ gà Əbay gà bàba ŋana mbaŋa. 13Dite i fataya ka, kurum tekeɗe, ki ŋgetwim a vatwa aà mege sida gà lele ika miɗ tar kuɗa. 14Ama mum aaba à arəv lele daga aà kinehe ya, ka tə dzalum duwa agəra bazlam ana ki ti tsikwim a ikaba ya tsa. 15Aɗaba iye ŋana i ti ɗif a kurum a à bazlam, nda metsehe ana ki ta bwim a dər aà gà ɓəzla gùvəl kurum a, dite ka, ti sle aà meŋgete a vatwa aà metsìkè kurum bazlam ŋgiɗ asa tsiye.

16Ku mege gà tsir kurum, nda gà damər dìnde kurum, nda gà gwala kurum, nda gà masla kurum tserdze tekeɗe, ti ta ge à kurum a ɗaf a gà ɓəzla gùvəl kurum. Ti ta bets a gà asiŋ ŋa ika magər kurum a. 17Gà mburma tserdze, ku weke tekeɗe, ti ne a kurum a are, aɗaba ana kurum gà mburma gà ya. 18Ama kəla ka, ambəz gər kurum ilik a dzeye a tsidze. 19Mərum aba lele, kərga taŋa ya na ki ta mbilwim a à ba kurum a.»

Yesuw a ɗif à kwite Yeruzalem, meme na a ta mbezle a ya

Mata 24:15-21; Markus 13:14-19

20«Na kàa ŋgatum a gà ɓəzla gùvəl, tàa lawara Yeruzalem ka, ki sirwim a dər ka, tàa à mimbezle dər kuɗa.*fa* 21A pat ata ka, say gà mburma ana i Yuda ya tserdze, tə̀ tə̀z ndàra aà kwite. Ama gà mburma ana i magər kwite Yeruzalem a tekeɗe, tə dara iɗəm a, tə da diriŋ. Dite gà na i dala ŋana ya tekeɗe ibam, tə tə da a magər kwite ata tsa mbaŋa asa. 22Aɗaba pat ata ka, pat ana Mbulum a ge a ter a seriye ya, dite dukw ana gà ɓəzla məma à guma ŋgar ti tsik akahər ata i wakita ŋgar a, ma ne ndzer kuɗa. 23Mesewere are ndeyndey ŋana ka, biy gà məkəs ana nda gà huɗ i gər a, kige tsa, nda gà na ika ahər a. Mesewere are ata a ta ge a riŋ hinne ika ahəɗ aaha, aɗaba Mbulum a ta pèt a à mege arəv ŋgar a təv gà mburma ana i faha ya. 24Gà mburma ata tə sər Mbulum tsiye, ti ta bets a gà asiŋ ŋa nda màsalamà, dite gà mìsle ŋgiɗ ta gese a tar, ti de à ter a ku mege aka ahəɗ awara tserdze. I dəba ŋa ya, ta mbìɗehe a ba a Yeruzalem, ti nis a à təv ata. Ti ndze a i fata, haa a təv ana pat tar aka ndəv a.»

Meme na *wur ana a dara i təv Mbulum a, a dere a ya

Mata 24:29-31; Markus 13:24-27

25Yesuw a gwaɗa a tar asa: «A pat ana gà dukw ata tàa dza ahər ba ya ka, gà duwa pampam ta pèt a aba i təv gà pat nda kiye, nda gà mawusawus a. Dite a ge a ka, huwwa kamala himbiɗ ana a ta ɓezle a à yam i duluv, a tsele akaba a ya. Magəɗa ŋa à slìɓe a za iba gà mburma ana ika gər ahəɗ tserdze ya, agəra gà dukw ata. 26Gà mburma ti ta mete a arəv fit agəra magəɗa gà dukw ata ti ta geye a ba ika gər ahəɗ a. Aɗaba gà dukw ana a riŋ madzàvà ŋa aà gəza mbulum a, ti lekeye à ba a gà gər ŋgwir ŋgwir ŋgwir ŋgwir. 27I dəba ŋa ya kuɗa ka, gà mburma ta ŋgetiŋŋa, a iye, wur ana a dara i təv Mbulum a. I dere a ka, nda hulɓukw a, nda ndzəɗa Mbulum a hinne, dite nda mezlibe gà ana tì zlibe a à iye ya. 28Aləka na kàa ŋgatum a gà dukw ata tàa dza ba aà madàra ka, hitswim, kà ndzəkum gər aà mbulum, kà mùm aaba aà arəv lele, aɗaba Mbulum aka à mimbile à kurum kuɗa na taŋa ya.»

Bazlam minew gùrùv ana a wiɗe a ya

Mata 24:32-35; Markus 13:28-31

29I dəba ŋa ya, Yesuw a tsik a tar bazlam ŋgiɗ ndaka bazlam minew pam asa. A gwaɗa a tar: «Samatum dizl ɗaf gùrùv aaha nda gà asiŋ gà dizl ɗaf ŋgiɗ pampam a kwaŋ. 30Aɗaba na kàa ŋgatum a tar, ta gègìriŋa, dite tì dze a ba aà mibìzè nda mewiɗe ka, ki sirwim a dər ndzer, taŋa ka, viye aka à mege. 31Kamala taŋa ya mbaŋa, na kàa ŋgatum a gà mesewere are nda gà dukw ata pampam tàa ndzera ka, ki sirwim a dər ndzer, mekwere Əbay Mbulum ana a kwere ya, aka à meslele mbaŋa. 32Iye ihər i tsik a kurum a nda ndzer: Gà mburma ana kinehe ya ka, ta mete a zukw tsa, say gà dukw ata tàa ndzera dzekwiŋ, dite ta metiŋa. 33Gà kuvəl mbulum nda gər ahəɗ ka, tì ndìviŋa. Ama bazlam gà ka, à ndìv a tsa, a ndze a aà biybiy.»

Ndzum nda metsehe

34«Gwim metsehe, kaslum ba kurum, ka ta kwayum tsa. Ka ta gwim məburnun tsa, dite ka tə dzalum gà gər aka dukw gər ahəɗ tsa asa. Aɗaba gà dukw ata na ta ge a madzək a metsehe kurum a. Na kàa kaslum ba tsa, dite kurum tekeɗe, aà gà dukw ata mbaŋa ka, pat ana a dere a ya ka, gər melek, ki sirwim a aà pat ŋa tsa. 35Aɗaba pat ata a lere a à mburma ana ika gər ahəɗ tserdze ya ka, kamala ɓele ana a mbezle a aka kwàhum a. 36Ka ndzwim are tsa, hamum kəla pat, dite ka, ka ŋgatum ndzəɗa aà mibe dər i təv gà dukw ata tserdze ti dere a ya. I dəba ŋa ya, ki ta hitswim a aka miɗ gà lele, iye, *wur ana a dara i təv Mbulum a kuɗa.»

37I huɗ mendze Yesuw ana a ndzawa i fataya ka, ndaàpat ŋana ka, a dzeŋgewa guma ŋgar a mburma i ga Mbulum batsah ŋana. Aləka hawa aka ge ka, a debe a a dìyes dizl ɗaf uliviye ata, aà mehinne i fata. 38Dite i mèkwède hedwe asa ka, gà mburma tserdze tə dawaha a ga Mbulum batsah ŋa ata, aà mandza zləm a dukw ana a tsik a ya.

Currently Selected:

Luka 21: gnd

Highlight

Copy