Ja̰ 2

Lo ta naa gə ɓe gə Kana

1Ndɔ gə njekum gə munda ɗaa, dəwje d-aw ta naa mə ɓe gə Kana dɔ nangə gə Galile. Ko̰ Jeju je kara ga̰ kəne tɔ. 2Jeju je gə ngan njenendoje lə-a kara ꞌɓar-je lo ta naa gə nee le tɔ. 3Logə kodo lə-je ɗunga tɔ̰y ɗaa, ko̰ Jeju je ɗe pa ar Jeju na: Kodo lə-je godo. 4Jeju pa ar-ɛ na: Jene, ɗi ɓa ꞌnjigi wa? Kar lə-m asə ang ɓi. 5Be ɓa ko̰ Jeju-je pa ar ngan njekulaje na: Ɓo n-pa tar n-ar-si nama ꞌɗaje ne kula. 6Lo-e gə əng le, dura kum man togo rɔ lə Jiibije misa̰ to kəne. Jo kum manje nee le, kara nama m-e asə lidiri tɔl kara je əng be. 7Jeju pa ar ngan njekulaje na: ꞌToje man umje mə duraje gə nee, ɗaa ꞌto man d-ar ɗusu duraje le tub-tub. 8Jeju təl pa ar-je na: Ɔrəje man nee le awje ne ar-je njeko̰ dɔ nekusa. Ɗaa d-ɔr d-aw ne tɔ. 9Logə njeko̰ dɔ nekusa le na ɗaa, man le təl kodo, ɗaa n-gərə lo gə d-ḭ ne kəne ang, ngaa ngan njekulaje gə to man le ja baa ꞌgərə lo-e njeko̰ dɔ nekusa dəji njetajene le tɔ. 10Ɗaa n-pa n-ar-ɛ na: Kodo gə ləl be le d-ar dəwje d-ay kede njɛng ɗa-je nam ngaɓa d-ar-je ye gə ləl ang ɓi, ngaa ꞌi ngom kodo gə ləl saar ce ɓisine.

11Ye gə nee ɓa to gə kun kudu netɔjije gə Jeju ɗa mə ɓe gə Kana, dɔ nangə gə Galile. Jeju tɔji rɔnduba lə-a gə ɗaga, ɗaa ngan njenendoje lə-a ꞌta ne kag-ɛ.

12Go-e gə ɗaa, Jeju je gə ko̰-ɛje, gə ngan ko̰-ɛje, gə ngan njenendoje lə-a d-ɔdə d-aw mə ɓe gə Kapɛrənom, ɗaa d-isi kəne ꞌɗa ndɔ bula ang baa.

Jeju tɔbə nje ɗabə neje mə kəy gə lə Luba

Mrk 11.15-18; Mat 12.38-40; Lug 19.45-46

13Ndɔ Pagə lə Jiibije nay dəb ɗaa, Jeju ɔdə aw mə ɓe gə Jerujalɛm. 14N-inga njenɗabə mangəje, gə badəmje, gə dərje, ngaɓa njembəl larje d-isi nangə ta kəy gə lə Luba ta ne ndogo gə lə-je. 15Jeju un ndəy tɔbə neje tɔ̰y mə kəy gə lə Luba um-je ɗaga, gə mangəje, gə badəmje lə-je; ngaɓa n-ja̰rɛ̰ lar lə njembəl larje kɔrɔ, n-kunda ne bəgərə ɗabə neje lə-je n-tila. 16Cibi Jeju təl pa ar nje ɗabə dərje na: Odoje neje gə nee gə tɔg-ɛ lo gə nee gə gə ɗaga, ꞌɗaje kəy lə Bɔy gə kəy ne ndogo ang. 17Mə ngan njenendoje lə-a ole dɔ tar gə ꞌɗa mə mbede gə na:

Njigi gə m-njigi kəy lə-i le o̰ dɔ ɓəngərə-m to gə pər be.

18Jiibije d-un tar pa d-ar Jeju na: ꞌƊa netɔji kara no-sijee gə nee ja, ꞌtɔji-si ne to gə singa-i gə kar ɗa ne gə ꞌɗa nee le ga̰. 19Jeju təl ila-je kəne na: ꞌTɔje kəy lə Luba gə nee le, ɗaa ndɔ munda ja ꞌma kar-ɛ təl ḭ tar gugu. 20Jiibije ꞌpa d-ar Jeju na: Kəy gə nee gə ɓal dɔg sɔɔ gə gir-e gə misa̰ ɓa d-unda tɔl ja, ꞌi na ndɔ munda baa ja a kar-ɛ təl ḭ taar. 21Ngaa Jeju pa tar ɔji ne dɔ kəy lə Luba gə to darɔ-ɛ. 22Logə Jeju ce mə buwa yo gə ngaɓa mə ngan njenendoje lə-a ole dɔ tar gə nee le ɓa ꞌta ne kagə tar gə mbede pa nəm, gə dɔ tarje gə lə-a gə n-pa nəm tɔ.

23Logə Jeju isi mə ɓe gə Jerujalɛm, mba ɗa nay pagə le, dəwje bula ya̰ ꞌta kagə gə ri-a, mba d-o netɔjije gə n-ɗa. 24Ngaa Jeju ḭya̰ m-e yag ar-je ang, mba gərə-je tɔ̰y, 25ngaɓa mba Jeju gərə dɔ ɓəngərə dəw gə maj-ɛ le ɗaa, n-njigi kar dəw gə ɗangə ɓa ɗe pa tar naji lə-a ar-ɛ ang.

Currently Selected:

Ja̰ 2: lap

Highlight

Copy