Ja̰ 9

Jeju aji dəw gə d-uji-e gə nje kəm tɔ

Mrk 8.22-25; 10.46-52

1Jeju aw nday ɗaa, o dəw kara gə kəm-e tɔ mə ko̰-ɛje gə nam ɓa d-uji-e d-ila-a nangə. 2Ngan njenendoje lə-a ꞌdəji-e na: Njenetɔji, na ngaɓa ɗa neɗa gə kṵra̰y ɓa kar d-uji-e ne gə nje kəm tɔ wa? ꞌNe ja ose nje kuj-eje wa? 3Jeju ila kəne na: ꞌNe ang nəm ɓa, nje kuj-eje ꞌɗa neɗa gə kṵra̰y ang nəm tɔ. Ngaa to to gə be gə mba kar Luba tɔji ne kula ɗ-ɛje gə ɗaga ɗəw gə lə-a. 4Logə kar to baa ɓi le, may kar j-a ɗa kula lə nje kula-m le ɓa; londul nama dəw a kasə ɗa kula ang. 5Logə m-ga̰ dɔ nangə gə nee ɓi le ɗaa, m-to gə lokarə gə dɔ nangə gə nee.

6Go tar gə n-pa nee ɗaa, Jeju cibi yoro nangə lɔy ne bɔrɔ ngaɓa radə kəm nje kəm tɔ gə le; 7ɗaa n-pa n-ar-ɛ na: Aw togo kəm-i man dangə gə to Silohe. Silohe le kɔr gəl-e na Njeka̰y kula. Nje kəm tɔ le aw togo kəm-e kəne. Ɗəm lə-a gə gugu ɗa n-o lo borong-borong. 8Nje baa ta kəyje lə-a gə nje gə ꞌgər-e dɔ ndɔ gə kede gə njenekɔy le, ꞌpa na: ꞌNe gə nee le ɓa n-isi kagə ɗəw boo n-kɔy ne le ang wa? 9Nje gə kɛm ꞌpa na: To gə ꞌne ja. Nje gə ɗangə tɔ ɗaa ꞌpa na: Ə̰ə̰ə̰, ngaa to gə nje ta sə-a naa baa. Ngaa nje kəm tɔ le ja pa gə t-ɛ na: To gə ꞌma ja. 10Be ɓa ꞌpa d-ar-ɛ na: Ngaa ɗaa kəm-i le unja to gə ban wa? 11N-ila kəne na: Dəw gə ri-a na Jeju le ɓa lɔy bɔrɔ uwa ne kəm ɗaa pa ar-m na: Aw Silohe ɓo ꞌtogo kəm-i. Be ɓa m-aw kəne m-togo kəm-m ɗaa m-o lo borong-borong. 12ꞌDəji-e na: ꞌNe nee le, n-ga̰ ɗa wa? N-ila kəne na: M-gərə ang.

13D-uwa dəw gə kede to nje kəm tɔ nee le d-aw sə-a ɓə lə Parijiyɛ̰je. 14Ngaa ndɔ gə Jeju lɔy bɔrɔ radə ne kəm-e ar-ɛ n-o lo le to ndɔ kuwa kɔr lə Jiibije ɓa kən. 15Parijiyɛ̰je ꞌtəl ꞌdəji-e kar-je to gə ɗangə ja cibi na ɗa to gə ban ɓa n-o lo wa? N-ila-je kəne na: N-ɗa bɔrɔ n-radə ne kəm-m ngaɓa m-togo ɗaa m-o lo borong-borong. 16Horo Parijiyɛ̰je gə le, nje gə naaje ꞌpa na: Dəw gə nee le ḭ rɔ Luba ang baa, mba n-ila kuji dɔ ndɔ kuwa kɔr gə ang. Nje gə ɗangə ꞌpa na: Dəw gə njeneɗa gə kṵra̰y a ɗa ban ɓa a kasə ɗa netɔjije gə to gə be wa? Ɗaa kay naa ɗe to horo-je gə 17Be ɓa ꞌtəl ꞌdəji nje kəm tɔ le to gə ɗangə ja cibi na: ꞌI ja le se, ꞌpa na ban ɔji dɔ dəw gə nee le, mba kəm-i gə n-ar-ɛ o lo le wa? N-ila kəne na: N-to gə pajambərə.

18Ngaa Jiibije ꞌta kagə to gə kede n-to nje kəm tɔ ɓa n-təl n-o lo ang baa. 19ꞌDəji nje kuj-eje tar gə nee na: Dəw gə nee le to ngon si gə sisəy ꞌpaje na uj-eje gə nje kəm tɔ le wa? Ngaa ɗa na ban ɓa ɓisine n-o lo wa? 20Nje kuj-eje d-ila-je kəne na: Ja gərə togə n-to ngon sijee gə j-uji-e gə nje kəm tɔ ja. 21Ye gə na ɗa na ban ɓa ɓisine n-o lo ose na ɓa ar kəm-e unja wa le ɗaa, sijee ja gərə ang baa. N-tɔgə n-asə mbagə ɗaa ꞌne ja ꞌdəj-eje oje nama n-a pa tar gə ɔji dɔ rɔ-ɛ. 22Nje kuj-eje ꞌpa tar to gə benəng mba ꞌɓəəl Jiibije. Jiibije d-o mə naa gə kede ɗɔdə mba kar to gə ɓo dəw kara pa na Jeju to gə Kirisi nama d-a tɔb-ɛ kəy nendo gə lə-je. 23Gəl-e gə nee ɓa, dəw nee le nje kuj-eje ꞌpa na: N-tɔgə n-asə mbagə, ꞌne ja ꞌdəj-eje. 24Parijiyɛ̰je ꞌɓar nje kəm tɔ le gə gɔl joo lə-a ɗaa ꞌpa d-ar-ɛ na: Ɔsə gaji Luba! Sijee j-a gərə to gə dəw gə nee le to gə njeneɗa gə kṵra̰y 25N-ila-je kəne na: To gə ɓo n-to njeneɗa gə kṵra̰y kara ꞌma m-gərə ang; ne kara baa gə m-gərə ɓa nee: Kede m-to gə nje kəm tɔ ɗaa ɓisine m-o lo. 26ꞌDəji-e na: N-ɗa sə-i ban wa? N-ɗa ban ɓa n-ar kəm-i unja wa? 27N-ila-je kəne na: Tar gə kən le m-pa m-ar-si ɗɔdə, ngaa sisəy ꞌtugaje mbi-si oje ne ang! Mba ɗi ɓa ꞌnjigije mba koje to gə ɗangə gɔl kara ɓi wa? Sisəy kara ꞌnjigije mba təl to gə ngan njenendoje lə-a tɔ wa? 28Be ɓa Parijiyɛ̰je ꞌtaj-ɛ ɗaa ꞌpa na: ꞌI ja ɓa ꞌto gə ngon njenendo lə-a; ngaa sijee le, ja to gə ngan njenendoje lə Moyiji. 29J-a gərə to gə Luba pa tar ar Moyiji, ngaa ye gə kən le, sijee ja gərə lo gə ye ḭ kəne ang. 30Dəw le ila-je kəne na: Ne gə to tar kəji ya̰ le, sisəy na ꞌgərəje lo gə n-ḭ kəne ang, ngaa gə n-ɗa n-ar kəm unja nee le tɔ. 31J-a gərə to gə Luba o ndu no lə njeneɗaje gə kṵra̰y ang; ngaa to gə ɓo dəw ndɔy Luba ngaɓa ɗa mə njigi lə-a nama, nj-ɛ nee le, Luba o ndu no lə-a ja. 32Ləw baa nee ja, dəw ja gə d-uji-e gə nje kəm tɔ le, ndɔ kara ꞌpa tar lə-a d-ar d-o to gə dəw ɗa kəm-e ar-ɛ unja ang ja saar. 33To gə ɓo dəw gə nee ḭ rɔ Luba gə ang nama, n-a kasə ɗa ne kara ang. 34D-ila-a kəne na: ꞌI gə d-uji-i gə nje neɗa gə kṵra̰y ja dɔngɔ doy d-ila-i nangə nee ja, ꞌI ngaa ꞌndo sijee ne wa; Ɗaa d-ɔs-ɛ d-ila-a ɗaga.

35Jeju o tar-ɛ to gə d-ɔs-ɛ d-ila-a ɗaga ngaɓa ye inga-a ɗaa dəji-e na: ꞌI le, ꞌta kagə Ngon lə dəw wa? 36Ɗaa ꞌne nee le n-ila kəne na: Mbayɓe, n-to gə na ɓa kar-m m-ta kag-ɛ wa? 37Jeju pa ar-ɛ na: O-e ngaa ɗaa, to gə ꞌne gə n-aw pa sə-i tar nee ja. 38Dəw le pa na: M-ta kagə ja, Mbayɓe, ɗaa n-ɔsə kəj-e nangə no-ɛ gə.

39Ngaɓa Jeju pa cibi na: ꞌMa le, gangə tar gə dɔ nangə gə nee le ɓa m-ɗe gə mb-ɛ, mba kar nje gə kəm-je o lo ang nama d-o lo, ngaɓa nje gə kəm-je o lo nama d-a təl to gə nje kəm tɔje. 40Parijiyɛ̰je gə d-ar sə-a d-o tarje gə nee le ɗaa ꞌdəji-e na: Ɗaa sijee kara ja to gə nje kəm tɔje tɔ wa? 41Jeju ila-je kəne na: To gə ɓo ꞌtoje gə nje kəm tɔje nama tar neɗa gə kṵra̰y a kuwa dɔ-si ang. Ngaa, ɓisine ɗaa ꞌpaje na: Sijee j-o lo! Be ɓa tar neɗa gə kṵra̰y lə-si uwa dɔ-si gə no.

Currently Selected:

Ja̰ 9: lap

Highlight

Copy