Lugu 13
13
Pilad rəndə dəwje gə dɔ nangə gə Galile
1Dɔ ndɔ-ɛ gə əng le, dəwje gə kɛm ꞌɗe pa d-ar Jeju to gə Pilad ar rəndə dəwje gə Galile, d-ar məsə-je polo naa gə məsə daje gə d-un nepolo d-ar Luba. 2Jeju ila-je kəne na: Se, əjije to gə dəwje gə Galile nee le ꞌɗa neɗa gə kṵra̰y d-unda dəwje gə Galile gə kɛm, ɓa ꞌrəndə neje to gə be wa? 3Bənəng ang baa, m-pa m-ar-si, ngaa to gə ɓo ꞌturuje kəji lə-si ang nama, a kuyje to gə bənəng ja tɔ. 4Ose dəwje gə dɔg gə gir-je gə ji nay joo gə ndogo kəy gə Silohe cɛdə unda-je tɔl-je nee le, se ꞌto njeneɗaje gə kṵra̰y d-unda dəw mə ɓeje gə Jerujalɛm wa? 5Bənəng ang baa, m-pa m-ar-si, ngaa to gə ɓo ꞌturuje kəji lə-si ang nama, a kuyje to gə bənəng ja tɔ.
6Jeju pa gusutar ja cibi na: Jingaw kara ꞌmaa kagə tungu mə ndɔ gə lə-a. Logə n-ɗe mba ko se kand-e to wa? Ɗaa n-inga ang. 7Be ɓa, n-pa n-ar njengəm ndɔ na: As ɓal munda gə m-ɗe mba kunja kandə tungu nee ɗaa kand-e godo. ꞌTunga-a gə ɗangə mba n-ta lo baa ja. 8Njengəm ndɔ təl ila-a kəne na: ꞌƁəə-mje, ḭya̰-a kəm ɓal kara arə si j-o, m-a kuru gəl-e gugu mbugu, ɗaa m-a kum kad kəne. 9A ɓo may boy nama, n-a kandə ɓal gə ɗangə, a ɓo be ang nama a tuga-a kila-a kɔrɔ ɓi.
Jeju aji jene njeməndə
10Ndɔ kara be to ndɔ kuwa kɔr, Jeju aw tɔji ne mə kəy nendo gə kara. 11Ɗaa jene kara gə to njerɔko̰ asə ɓal dɔg gir-e gə ji nay joo isi kəne əng tɔ. Njil gə kṵra̰y uwa-a ɗug-e, ɗaa n-asə nduji rɔ-ɛ rad ang. 12Logə Jeju a jene le jii ɗaa, ɓar-ɛ ngaɓa pa ar-ɛ na: Jene, rɔko̰ ɔr ji-a rɔ-i gə. 13Ɗaa n-ila ji-a dɔ-ɛ gə. Lo-e gə nee ja, jene le nduji rɔ-ɛ ngaɓa ɔsə gaji Luba. 14Ngaa, mə njeko̰ dɔ kəy nendo o̰-ɛ dɔ Jeju gə ɔji dɔ kaji gə aji jene gə ndɔ kuwa kɔr. Be ɓa, n-pa n-ar bula dəwje na: Ndɔ gə kar ꞌɗaje kula kəne ḭ misa̰, ꞌɗeje gə ndɔ-ɛ nee ar-je d-aji-si, ɓo gə ndɔ kuwa kɔr ang. 15Jeju ila-a kəne na: Njetar mulaje, ndɔ kuwa kɔr ja ɓa, dəwje gə kɛm horo-si gə ꞌtudu mangə ose kororo ta bəgərə nekusa gə d-ar aw ay man ang wa? 16Ngaɓa jene gə nee le, to ngon ka Abəraham, ꞌSu uwa ɗug-e asə ɓal dɔg gə gir-e gə ji nay joo ngaa nee ja, to may mba tud-e kila-a taar gə ndɔ kuwa kɔr ang wa? 17Logə Jeju pa tar to gə be ɗaa, rɔ kul ɗa nje kəm tarje lə-a, ɗaa rɔ bula dəwje tɔ̰y ləl-je mba neje gə may gə Jeju ɗa.
Gusutar gə ɔji dɔ kandə mutarədə
Mat 13.31-32; Mrk 4.30-32
18Jeju pa ar-je na: Ɓeko̰ lə Luba ta naa gə ɗi wa? Se ɗi ɓa m-a kuwa kɔj-e ne wa? 19Ɓeko̰ lə Luba ta naa gə kandə kam nay gə ri-a na mutarədə gə dəw un aw dubu mə ndɔ gə lə-a; tɔgə ɗaa təl to kagə kam nay gə bo, ɗaa əlje gə dara ɗa kəy ba̰-ɛ̰je gə.
20Jeju təl pa ar-je ja cibi: Se ɗi ɓa m-a kuwa kɔji ne ɓeko̰ lə Luba wa? 21Ɓeko̰ lə Luba ta naa gə guway kodo gə jene un um mə nduji gə d-ɔji ngo munda mba mbo̰y ne saar kar ḭ tɔ̰y.
Ta ɗəw gə njondəro̰
Mat 7.13-14
22Jeju nday mə ɓeboje gə, gə ngan ɓeje ngaɓa tɔji ne dəwje gə ɗəw-ɗəw dɔ-ɛ gə Jerujalɛm.
23Dəw kara dəji Jeju na: Se Luba a kaji dəwje njɛɓərɛ baa wa? Jeju ila-je kəne: 24Uwaje rɔ-si kɔgərɔ andəje gə ta ɗəw kəy gə njondəro̰. M-pa m-ar-si, dəwje bula d-a sangə ɗəw mba kandə, ngaa d-a kasə ang. 25Logə njekəy ḭ taar udu ta kəy, ɗaa sisəy gə a karje ɗaga, a kundaje ta kəy ngaɓa a Paje na: Mbayɓe! Ɔr ta kəy ar-si, ɗaa n-a kila-si kəne na: Sisəy le, m-gərə-si ang. 26Be ɓa, a paje na: Sijee le, j-usa sə-i ne gə j-ay sə-i ne naa gə; ngaɓa ꞌi ja kara tɔji-si ne nadə ɓeje gə lə-si nəm tɔ. 27Cibi, n-a təl kila-je kəne na: M-gərə-si ang, ꞌtoje gə ɗa wa? Ɔdəje ta-m gə gə ɗangə, sisəy tɔ̰y ꞌtoje nje ɗa neje gə dɔ buguru. 28Lo-e gə nee le, a noje ngaɓa a kusaje ngangə si kəne pəgərə-pəgərə. Ɗaa, a koje Abəraham je gə Ijagə gə Jakobo, gə pajambərəje mə ɓeko̰ gə lə Luba. Ngaa sisəy le, Luba a tɔbə-si kum-si ɗaga. 29Dəwje d-a kḭ lo ce gə lə kar gə lo kuru nangə gə lə kar; d-a kḭ dɔ gəl gə dɔ kɔl d-a ɗe kisi ta ka nekusa gə mə ɓeko̰ gə le Luba. 30A oje, dəwje gə dɔ gugu le d-a təl to dəwje gə dɔngɔr ngaɓa nje gə dɔngɔr le d-a təl to dəwje gə dɔ gugu.
Jeju aw dɔ-ɛ gə Jerujalɛm
Mat 23.34-39
31Dɔ ndɔ-ɛ gə əng ja, parijiyɛ̰je gə kɛm ɗe d-inga Jeju pa d-ar-ɛ na: Ɔdə lo gə nee gə gə ɗangə mba mbay Erɔdə njigi tɔl-i. 32Jeju pa ar-je na: M-ula-si kar aw paje ar-je dəw gə nje ɗa gusu to gə nja nee le na: O, m-tɔbə njilje gə kṵra̰y, m-ɔr rɔko̰ rɔ dəwje gə ɓogəne gə bara, ndɔ gə njekum gə munda ɗaa m-a kunda ngang-ɛ. 33Ngaa, may kar-m m-nja kəm gə kede ɓogəne, bara gə ndɔ gə aw ɗe go-e gə; mba may kar pajambərə uy mə ɓe gə Jerujalɛm ja ɓa.
34Dəwje gə Jerujalɛm, dəwje gə Jerujalɛm, sisəy gə ꞌtoje nje tɔl pajambərəje ngaɓa nje gə Luba ula-je kara ꞌcilaje-je gə kɔr ər ꞌtɔlje-je, gɔl kandə gə m-njigi dəbə bagə-m dɔ-si gə to gə ko̰ kunja ula ne bəl jam dɔ ngan-ɛ gə be, ngaa ꞌnjigije ang. 35Be ɓa, oje: Luba mbadə ne kəy lə-si ar-ɛ uwa ngɔ mɔgɔgɔ, mba m-pa m-ar-si to gə aw gə kede əng a ko-mje ang saar kar ndɔ gə a paje na: Luba tɔr ndu-e dɔ dəw gə ɗe gə ri Mbayɓe.
Currently Selected:
Lugu 13: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
