Lugu 21

Nenuji lə njekəy kinga

Mrk 12.41-44

1Jeju un kəm-e gə tar ɗaa o dəwje gə ꞌto njenekingaje d-um nenuji lə-je mə ka nebaw gə. 2N-o jene dangə gə kara ɗe tɔ, to jene nduba gə um ngan lar joo. 3Ɗaa n-pa na: Tɔgərɔ, m-pa m-ar-si, jene nduba gə njendoo gə kən le um unda nje gə kɛm tɔ̰y 4Mba ꞌjeje tɔ̰y nee le, d-un ta nekinga lə-je gə kay nangə pɔ-pɔ gə d-aw ndoo-e ang baa d-ar; ngaa ꞌne le ɓɛl ne gə kar n-gədə ne rɔ-ɛ ja n-un ɗɔdə n-ila.

Ɓebo gə Jerujalɛm tuji. Ɗe lə Ngon lə dəw

Mat 24.1-2; Mrk 13.1-2

5To gə je gə kɛm ꞌpa tar gə ɔji dɔ kəy gə lə Luba ɗaa, ərje gə ꞌgɔl ne m-e d-ar to pə̰ ngaɓa gə neje gə d-ar Luba ɗaa, Jeju pa na: 6Neje tɔ̰y gə oje gə kəm-si gə to pə̰ nee le, mə ndɔje gə aw ɗe əng le, kɔr ər kara baa ja kara a nay dɔ mar-ɛ gə ang: d-a rundu neje tɔ̰y nangə pulug-pulug.

7ꞌDəji-e na: Njenetɔji, ndɔ gə ɗa ɓa neje nee le a ɗe wa? Ngaɓa ɗi ɓa a tɔji kar dəw gərə to gə neje nee le aw ɗe wa? 8N-pa na: Undaje kəm karə dɔ rɔ-si gə mba kar dəw ərə si ar-si ꞌndəəm-je ang, mba dəwje bula d-a ɗe gə ri-m, ngaɓa d-a pa na: To gə ꞌma ja. Cibi d-a pa na: Dɔ kar asə ngaa; nama ꞌndoleje go-je ang. 9Logə a koje tar ɗɔje, gə dəwje gə d-a kḭ kila ɗɔ dɔ naa gə gə yo gə nee nama, ar-je njil-si ce ang. Mba, may kar neje nee le nday kede nam ja ɓa, ngaa a to ɗudu ndɔ ja gə ngɔdə bənəng baa ang. 10Be ɓa, n-pa n-ar-je na: Gəl kuji dəwje d-a ɗɔ naa, gə ɓeko̰je d-a ɗɔ naa. 11Dɔ nangə a yəgə yig-yig, gə loje ɓədə-ɓədə le, lo tɔgə a koso, ɓo a ko̰, ngaɓa neje gə to ɓəəl ya̰ a ɗa ne mə dara gə, ngaɓa gə netɔjije gə bo-bo d-a tɔji rɔ-je mə dara gə tɔ.

12Ngaa nam ɓa kar neje nee nday nama, d-a tuwa-si mba kula kəm-si ndoo, d-a kun dɔ-si mə kəy nendoje gə, d-a tuwa-si kum-si kəy kula gə, d-a kaw gə si no mbayje gə, gə no njeko̰ ɓe gə mba tar lə-m. 13Ye gə nee ɓa a kar-si ɗəw mba kar-si ꞌpaje ne tar naji lə-m. 14Undaje mə-si to gə sisəy ɓa a kəji-je tar gə a paje gə mba ta ne dɔ rɔ-si ang. 15Mba ꞌma ja m-a kar-si tar gə a paje gə kəm karə gə dəw kara horo nje kəm tarje gə lə-si a kasə mba cila ne kəm tar lə-si ose gə mba kar ne gədərə no-si gə ang. 16Njekuji-sijee ja kara d-a kun dɔ-si, ngaɓa ngan ko̰-si, njeba-ɛje lə-si gə njekuraje lə-si kara d-a kun dɔ-si tɔ. D-a kun dɔ nje gə kɛm bula horo-si gə kar ꞌtɔl-je. 17Dəwje tɔ̰y d-a njigi-si ang gə kɔrɔ mba tar lə-m. 18Ngaa bḭ dɔ-si kara ja baa kara a cɛdə kɛ̰ng koso nangə. 19Uwaje gədərə ɓa a kingaje təbə ɓi.

20Logə a koje njeɗɔje d-a ta mə ɓe gə Jerujalɛm tɔlɛ-tɔlɛ ɗaa, may kar-si ꞌgərəje to gə kar tuji lə-a asə ngaa. 21Be ɓa, nje gə d-isi dɔ nangə gə Jude nama, kar d-a̰y dɔ-je gə dɔ ərje gə; nje gə d-a kisi mə ɓe gə nama, kar ꞌce gə ɗaga; nje gə d-ar mə ndɔɔ gə muu nama, kar ꞌtəl d-andə mə ɓe gə ang ngaa. 22Mba a to ndɔje gə kar dal ba̰a̰, mba kar neje gə ꞌɗa mə Mbede gə le, aw ne lo-e gə bɛrɛrɛ. 23Nekəmandoo a to kar jeneje gə d-a kaw kɛ̰m gə nje gə nganje d-aw d-il mba, mba nekəmandoo gə bo a koso mə ɓe ngaɓa wungu a koso dɔ dəw mə ɓeje gə nee tɔ. 24D-a tɔl-je gə kiya bayi nəm, d-a kuwa-je ɓərə kaw gə je gəl kuji dəwje gə tɔ̰y, ɗaa njeba̰a̰je d-a lagə ɓe gə Jerujalɛm gə gɔl-je lag-lag saar, mba kar dɔ kar gə d-uwa d-ɔji ne dɔ gəl kuji dəwje asə.

25Netɔjije a to kəm kar gə, gə nay gə ndɛ̰ndərɛ̰ndɛ̰je, ngaɓa dɔ nangə nee, nama mə gəl kuji dəwje a polo wus-wus, ɓəəl a kunda-je bad gangə-je mba gir babo gə a ɓar ngaɓa ꞌpagəm lə-a gə a tunga; 26dəwje d-a kuy yo ɓəəl ɔji dɔ neje gə a ɗe dɔ dəwje gə dɔ nangə nee; mba neje gə to ɓəəl to ɓəəl gə dara kara d-a yəgə nəm tɔ 27Be ɓa d-a ko-m ꞌma Ngon lə dəw m-a kar dɔ kil gə lə nji gə dara mba ɗe gə singamongə ngaɓa gə ndogo lə-m gə boy. 28Logə neje nee a kun kudu mba ɗa ne nama ar-je dɔ gɔl si gə ɓo ɔrəje dɔ-si gə taar mba kar ta dɔ-si nay dəb baa ngaa.

29Ɗaa n-pa tar gə gusutar mar-ɛ n-ar-je na: Oje kagə tungu gə kagəje gə kɛm tɔ̰y: 30Logə ɓo d-unjḭ nam ɗaa sisəy ja kara ꞌgərəje to gə nay ɓar nay njɛ̰ baa ngaa. 31Ɗəw kara baa, to gə sisəy kara, logə a koje neje gə əng le ɗaa, may kar-si ꞌgərəje to gə ɓeko̰ le Luba nay dəb baa ngaa. 32Tɔgərɔ ja, m-pa m-ar-si, gəl kuji dəwje gə ɓogəne d-a kuy ɗunga ang ja neje tɔ̰y nee le a ɗe. 33Dara je gə nangə d-a nday ngaa tar lə-m a nday ang.

34Undaje kəm karə dɔ rɔ-si gə, ɓo ar-je mə-si to gə dɔ gə nekay mbə gə, gə nekusa gə gə ka guru gə ja kara baa ang, mba kar uwa-si ɓərə ang, ngaɓa gə tar kəjije gə ɔji dɔ kisi kəm baa gə mba kar ndo-ɛ nee le uba-si nangə bus ang. 35Mba n-a ce dɔ dəwje gə tɔ̰y gə d-isi dɔ nangə nee, to gə d-ila ne ɗɛngə be; 36Ɔsəje kəm-si kɔrə ɓo ꞌdəjije Luba gə karje ja tɔ̰y, mba kar d-ɔr-si d-unda si gə kəm-e mba kar-si ꞌce-je nee ta neje gə a ɗe dɔ ndɔ gə bara gə, ngaɓa gə mba kar ar-je ne dɔ gɔl si gə njang no Ngon lə dəw gə.

37Jeju ɗa ndɔ kara dum mə kəy gə lə Luba tɔji ne kəne ngaa lo gə lo aw ndul ɗaa, n-ce n-aw dɔ wuri gə kagə olibiyeje d-ar kəne n-to kəne. 38Ɗaa dəw mə ɓeje ja tɔ̰y ꞌɗe gə ji dɔɔɓe baa d-inga-a mə kəy gə lə Luba mba tuga mbi-je ko ne tar lə-a.

Currently Selected:

Lugu 21: lap

Highlight

Copy