Lugu 22
22
D-ula ꞌmɔdəməri dɔ Jeju gə
Mat 26.1-5,14-16; Mrk 14.1-2,10-11
1Ndɔ ɗa nay mbə gə guway kodo godo kəne, gə ɓar-ɛ na Pagə, nay dəb baa. 2Buba njekapoloje gə njekɔr gəl toronduje ꞌsangə gusu gə d-a tɔl ne Jeju ngaa ꞌɓəəl dəw mə ɓeje. 3Ɗaa ꞌSu andə mə Judas gə ri-a na Isikariyɔdə gə to kara lə nje gə dɔg gə gir-je gə joo le, 4ɔdə aw gɔl tar gə buba njekapoloje gə mbay dɔ njeɗɔje gə mba kinga gusu gə a kula-a ne mə ji-je gə. 5ꞌJeje rɔ-je ləl-je ɗaa d-unda ndu-je naa gə mba kar-ɛ lar. 6N-njigi kəne ɗaa n-sangə ɗəw gə may gə n-a kila-a ne mə ji-je gə lokiya gə.
Jeju ar-je ꞌgɔl Pagə
Mat 26.17-19; Mrk 14.12-16
7Ndɔ ɗa nay mbə, gə guway kodo godo kəne le asə gə mba kar ꞌtɔl ngon badəm gə kar ɗa Pagə. 8Jeju ula Piyɛr gə Ja̰ ɗaa, pa ar-je na: Awje, aw ꞌgɔlje Pagə ar-je-si j-usaje. 9ꞌDəji-e na: Lo gə ɗa ɓa ꞌnjigi kar-si ja gɔl kəne wa? 10N-ila-je kəne na: Logə aw andə-je pədə gə mə ɓebo gə nama, a kingaje dəw gə jingaw kara gə odo jo man dɔ-ɛ gə ɗaa, uwaje go-e, awje kəy gə n-andə kəne. 11A paje kar-je njekəy gə nee le na: Njenetɔji dəji-i na: Mə kəy gə ɗa ɓa m-a kusa Pagə kəne gə ngan njenendoje lə-m wa? 12Ɗaa dəw nee le a tɔji-si mə kəy gə dɔ mar-ɛ gə taar, gə tadə pəji-pəji gə neje tɔ̰y kəne. Lo-e gə nee le ɓa a gɔlje nekusa kəne. 13D-aw d-inga neje to gə n-pa ne n-ar-je le ja, ɗaa d-uwa dɔ gɔl Pagə le naa gə jəbə.
14Logə kar asə ɗaa, n-isi ta ka nekusa gə, gə njeka̰ykulaje lə-a naa gə kara baa. 15Ɗaa n-pa n-ar-je na: M-njigi ya̰ gə mba kusa gə si Pagə ne kede nam ɓa kar-m m-o ꞌməsərə ɓi. 16Be ɓa m-pa m-ar-si, m-a kusa Pagə gə ɗangə ang saar ce ne ye gə a to mə Ɓeko̰ gə lə Luba. 17N-un ngo nekay ɗaa n-ar oyo Luba ngaɓa n-pa na: ꞌTaje ɓo ꞌkayje naa horo-si gə. 18M-pa m-ar-si to gə un kud-e ɓogəne le, m-a kay gə si man bḭyə̰ nee ang gə dɔbo̰ ja saar ndɔ gə ɓeko̰ lə Luba a ɗe.
19Cibi, Jeju un mbə, ɗaa ar oyo Luba ngaɓa uwa cɛdə dana ula ar-je pa ne tar t-ɛ gə na: ꞌYe gə nee to gə darɔ-m gə m-un m-ar-sisəy. ꞌƊaje ne gə nee le oleje ne mə-si dɔ-m gə. 20Ɗəw kara baa, go nekusa gə ɗaa, n-un nekay, n-ɗa to gə mar-ɛ gə kede le ja cibi ɗaa n-pa na: Nekay gə nee le to kone gə sigi ɗəw gə lə məsə-m gə kay nangə mba tar lə-si.
21Ngaa oje: Dəw gə njekun dɔ-m le, usa sə-m ne naa gə mə ka gə kara baa nee. 22Tɔgərɔ ja, ꞌma gə Ngon lə dəw m-a kuy to gə ꞌgɔl ne kede. Ngaa tuji a kuba dəw gə a kun dɔ-m. 23Ɗaa d-un kudu dəji naa tar gə yo gə nee, se na ja horo-si gə ɓa a to nje ɗa ne gə nee le wa?
Na ɓa to dəw gə bo wa?
Mat 20.24-28; 19.28; Mrk 10.41-45
24D-un kudu ma̰y naa tar gə mba gərə se na ɓa to dəw gə bo horo-je gə wa? 25Jeju pa ar-je na: Mbayje gə dɔ nangə nee ꞌɗa rɔ-je gə ꞌɓəə dəwje, ngaɓa njeko̰ ɓeje nee le ꞌɗa rɔ-je d-ar ꞌɓar-je gə nje ɗa mayje. 26Ngaa kar-sisəy a to gə bənəng ang, may kar dəw gə to ɓəəl horo-si gə nama ta toro dəw gə nay ngon baa ɓi, ngaɓa dəw gə njeko̰ dɔ-si təl to ngon njekula lə-si tɔ. 27Na ja ɓa to dəw gə to ɓəəl ya̰ wa, to dəw gə nje kisi ta ka nekusa gə ose dəw gə njekay nekusa wa? Se to dəw gə nje kisi ta ka nekusa gə ang wa? Ngaa, ꞌma le, m-ga̰ horo-si m-to gə ngon njekula.
28Sisəy le, ꞌtoje nje gə d-uwa sə-m gədərə dan nenaje gə ce dɔ-m gə. 29Ɗaa ꞌma le, m-uwa dɔ gɔl Ɓeko̰ m-ɔji ne dɔ-si to gə bɔy uwa dɔ gɔl-ɛ ɔji ne dɔ-m ꞌma tɔ. 30Be ɓa, a kusaje gə a kayje sə-m naa gə kara baa mə ɓeko̰ gə lə-m, ngaɓa a kisije dɔ ngəndəngje gə mba gangə tar dɔ gəl kuji Ijirayɛlje gə dɔg gə gir-e gə joo.
31Simo, Simo, a o, ꞌSu naji-si gə mba rundu-si to gə jene rundu ne waa mə bḭḭ gə be. 32Ngaa ꞌma ɗaa, m-dəji Luba mba-i mba kar takagə lə-i unda nangə ang. Ɗaa ꞌi, lo gə ꞌtəl um sə-m naa gə nama, ꞌi ngaɓa a kula jingaw mə ngan ko̰-ije gə.
33Piyɛr pa ar Jeju na: Mbayɓe, le kəm kaw sə-i naa gə kara baa kəy kula kara, m-a kaw sə-i nəm, kəm kuy sə-i kara, m-ar ngɔdərɔ gə mba kuy sə-i nəm tɔ. 34Jeju pa na: M-pa m-ar-i o, Piyɛr, logə a kar ɓogəne le, nam ɓa kar kura̰ a kila mbərə ɗaa, a ma̰y tar gɔl munda na ꞌgərə-m ang.
35Ɗaa n-pa n-ar-je na: Logə m-ula-si, gə awje gə lar, gə ɓɔl, gə sabɔgɔ ang le se, ne kara lal-si wa? D-ila kəne na: Ne lal-si ang. 36Cibi, n-pa n-ar-je na: Ɓisine ɗaa a to gə bənəng ngaa, dəw gə ɓo lar lə-a ga̰ nama uwa ji-a gə kɛgə ɗəw kara baa, dəw gə ɓo ɓɔl lə-a ga̰ nama ula sɔl-ɛ gə; ngaa ɓo dəw gə kiya bayi lə-a godo nama, may kar laɓə kubu lə-a gə boy yul ꞌta ne lar ndogo ne uwa ji-a gə. 37Mba, m-pa m-ar-si, may kar ne gə Mbede pa tar-ɛ ɔji dɔ-m na: ꞌTura-a horo nje tɔl dəwje gə. Tar nee le oso kəne paragə ɓa. 38ꞌPaje na, Mbayɓe, a o, kiya bay joo ja to nee. N-ila-je kəne na: Asə mbagə.
Jeju dəji Luba dɔ wuri
Mat 26.36-46; Mrk 14.32-42
39N-ce mə ɓe gə, n-ɔdə n-aw dɔ wuri gə kagə gə ri-a na Olibiye ar kəne, gə go pa ji ɓe ɗ-ɛ lə-a ɗaa, ngan njenendoje lə-a ꞌndole go-e. 40N-ce lo-e gə ne ɗaa, n-pa n-ar-je na: ꞌDəjije Luba mba kar-si osoje dan nena gə ang. 41Ɗaa, ꞌne n-ɔr rɔ-ɛ n-aw nganga̰ əw ɓəəl asə naa gə lo koso lə kɔr ər gə d-ila be, n-um məkəji-e nangə ɗaa n-dəji Luba na: 42Bɔy, to gə ɓo ꞌnjigi nama, ɔsə nekay ꞌməsərə nee ta-m gə ngərəng gə ɗangə. Be ja kara, to mə njigi lə-m ꞌma ang, ngaa may kar-i ꞌi ja ꞌɗa mə njigi lə-i. 43Be ɓa anji gə dara kara ce ula njingaw m-e gə. 44M-e gangə man bad ɗaa n-dəji Luba gə singa-a n-ar tədə gə ta naa gə kɔr məsə tal rɔ-ɛ ndəy nangə. 45Logə n-uba nangə n-ḭ lo dəji Luba gə ɗaa, n-aw dɔ-ɛ gə ɓə lə ngan njenendoje lə-a, ɗaa n-inga-je dɔ ɓi gə mbalang mba mə kila kasə unda-je ila-je mbarag. 46N-pa n-ar-je na: ꞌCibije mba ɗi wa? Ḭje taar ɓo ꞌdəjije Luba mba kar-si osoje dan nenaje gə ang.
D-uwa Jeju
Mat 26.47-56; Mrk 14.43-49
47Logə n-aw n-pa tar t-ɛ gə baa ɓi ja ɗaa, bula dəwje ꞌce pɔɔ. ꞌNe gə ɓar-ɛ Judas gə Isikariyɔdə, kara lə ngan njenendoje gə dɔg gə gir-je gə joo ɓa ɔr no-je; n-ɗe rɔ Jeju gə ɗaa, n-uwa n-to mbi-a pu-pu. 48Jeju pa ar-ɛ na: Judas, ɗəw to mbi ɓa un ne dɔ-m ꞌma gə Ngon lə dəw wa? 49Logə gə ngan njenendoje lə Jeju d-o ne gə a kaw nday le ɗaa, ꞌpa d-ar-ɛ na: Mbayɓe, j-a kila ɗɔ gə kiya bayi wa? 50Ɗaa, dəw kara gə ar horo nje gə d-ar kəne, tuga mbi ngon njekula lə buba njekapolo bad gangə. 51Ngaa Jeju un tar pa na: Ar-je be, asə mbagə ngaa. N-ula ji-a n-ɔr ne mbi dəw le ɗaa, təl rɛ̰ lo-e gə gugu mbia̰w̰.
52Jeju pa ar nje gə ꞌɗe mba kuwa-a, ꞌje gə buba njekapoloje, gə njekɔr no njeɗɔje gə kəy gə lə Luba gə buba ɓeje le na: ꞌƊeje gə kiya bayje gə guruje ɓa uwa-mje ne to gə d-uwa ne gayim be. 53ꞌMa le m-ga̰ gə si gə ndɔje tɔ̰y mə kəy gə lə Luba, ngaa uwa-mje ang. Ɓisine ɗaa, to kar lə-si nəm, to singamongə lə cil ciməri tɔ.
Piyɛr ma̰y tar
Ja̰ 18.13-27
54D-uwa-a ɗaa d-aw sə-a kəy lə buba njekapolo. Piyɛr ndole go-je dɔ ji ndə̰w̰. 55ꞌYɛl pər tabidi d-aw njibi ɗaa, Piyɛr kara ɗe isi horo-je gə tɔ.
56Ngon njekula gə jene kara o-e ta pər gə n-isi n-aw n-njibi pər ɗaa, a-e jii ngaɓa pa na: Dəw gə isi nee le to, nje kar Jeju tɔ. 57Ngaa Piyɛr ma̰y na: Jene, ꞌma m-gər-e ang. 58Ɓəəl go-e gə ɗaa, dəw gə ɗangə kara o-e ɗa pa na: ꞌI kara, ꞌto kara lə dəwje gə nee le tɔ. Piyɛr ila-a kəne na: ꞌMa ang baa. 59Kuru lo əw asə ne gə kar kara be go-e gə ɗaa, ngon njekula gə ɗangə kara ar dɔ-ɛ gə njiriri pa na: Tɔgərɔ, dəw gə neɗa ga̰ sə-a ja, ngaɓa n-to gə dəw gə dɔ nangə gə Galile ja cibi tɔ. 60Piyɛr ila kəne na: M-gərə mə tar gə ꞌnjigi pa le ang baa. N-aw pa tar le t-ɛ gə gə pa ja baa ɓi ɗaa, gə ngɔdə baa, kura̰ ila mbərə ɗɔdə ngaa. 61Mbayɓe kəl go-e a Piyɛr jii, ɗaa mə Piyɛr ole dɔ tar gə Mbayɓe pa sə-a na: Nam ɓa kar kura̰ ila mbərə ɓogəne le, a ma̰y tar gɔl munda na ꞌgərə-m ang. 62Be ɓa, n-ɔsə lo n-ce ɗaga ngaɓa n-no ɓəgəgə-ɓəgəgə.
63Dəwje gə d-a dɔ Jeju ꞌkogo-e ngaɓa ꞌkunda nəm. 64ꞌTɔ kəm-e gə ta ne ngaɓa ꞌdəji-e na: Na ɓa unda-i nee wa? ꞌGərə ɓo ꞌpa. 65ꞌPa tarje gə kṵra̰y ɓədə-ɓədə dɔ-ɛ gə.
66Logə lo ar ɗaa, lo kuwa dɔ naa lə buba ɓeje, gə buba njekapoloje gə njekɔr gəl toronduje d-uwa dɔ naa ɗaa, d-aw gə Jeju no ngɔ gangə tar gə lə Jiibije, 67ɗaa ꞌdəji-e na: ꞌPa ar-si j-o, ꞌto Kirisi wa? N-ila-je kəne na: To gə ɓo m-pa m-ar-si kara, a taje kagə-m ang; 68ngaɓa to gə ɓo m-dəji-si tar kara, a kila-mje kəne ang tɔ. 69Ngaa un kud-e ɓogəne le, ꞌma gə Ngon lə dəw m-a kisi dɔ ji kɔl Luba gə njesingamongə gə. 70D-unda ndu-je naa gə tɔ̰y ꞌdəji-e na: Ɗaa ꞌto Ngon lə Luba ngaa kən wa? N-ila-je kəne na: Sisəy ja ꞌpaje ta-si gə əng. To ꞌma ja. 71Be ɓa, ꞌpa na: A ɗi cibi ɓa j-a dəji tar naji mb-ɛ wa? Jeje ja jo tar le t-ɛ gə nam ngaa.
Currently Selected:
Lugu 22: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
Lugu 22
22
D-ula ꞌmɔdəməri dɔ Jeju gə
Mat 26.1-5,14-16; Mrk 14.1-2,10-11
1Ndɔ ɗa nay mbə gə guway kodo godo kəne, gə ɓar-ɛ na Pagə, nay dəb baa. 2Buba njekapoloje gə njekɔr gəl toronduje ꞌsangə gusu gə d-a tɔl ne Jeju ngaa ꞌɓəəl dəw mə ɓeje. 3Ɗaa ꞌSu andə mə Judas gə ri-a na Isikariyɔdə gə to kara lə nje gə dɔg gə gir-je gə joo le, 4ɔdə aw gɔl tar gə buba njekapoloje gə mbay dɔ njeɗɔje gə mba kinga gusu gə a kula-a ne mə ji-je gə. 5ꞌJeje rɔ-je ləl-je ɗaa d-unda ndu-je naa gə mba kar-ɛ lar. 6N-njigi kəne ɗaa n-sangə ɗəw gə may gə n-a kila-a ne mə ji-je gə lokiya gə.
Jeju ar-je ꞌgɔl Pagə
Mat 26.17-19; Mrk 14.12-16
7Ndɔ ɗa nay mbə, gə guway kodo godo kəne le asə gə mba kar ꞌtɔl ngon badəm gə kar ɗa Pagə. 8Jeju ula Piyɛr gə Ja̰ ɗaa, pa ar-je na: Awje, aw ꞌgɔlje Pagə ar-je-si j-usaje. 9ꞌDəji-e na: Lo gə ɗa ɓa ꞌnjigi kar-si ja gɔl kəne wa? 10N-ila-je kəne na: Logə aw andə-je pədə gə mə ɓebo gə nama, a kingaje dəw gə jingaw kara gə odo jo man dɔ-ɛ gə ɗaa, uwaje go-e, awje kəy gə n-andə kəne. 11A paje kar-je njekəy gə nee le na: Njenetɔji dəji-i na: Mə kəy gə ɗa ɓa m-a kusa Pagə kəne gə ngan njenendoje lə-m wa? 12Ɗaa dəw nee le a tɔji-si mə kəy gə dɔ mar-ɛ gə taar, gə tadə pəji-pəji gə neje tɔ̰y kəne. Lo-e gə nee le ɓa a gɔlje nekusa kəne. 13D-aw d-inga neje to gə n-pa ne n-ar-je le ja, ɗaa d-uwa dɔ gɔl Pagə le naa gə jəbə.
14Logə kar asə ɗaa, n-isi ta ka nekusa gə, gə njeka̰ykulaje lə-a naa gə kara baa. 15Ɗaa n-pa n-ar-je na: M-njigi ya̰ gə mba kusa gə si Pagə ne kede nam ɓa kar-m m-o ꞌməsərə ɓi. 16Be ɓa m-pa m-ar-si, m-a kusa Pagə gə ɗangə ang saar ce ne ye gə a to mə Ɓeko̰ gə lə Luba. 17N-un ngo nekay ɗaa n-ar oyo Luba ngaɓa n-pa na: ꞌTaje ɓo ꞌkayje naa horo-si gə. 18M-pa m-ar-si to gə un kud-e ɓogəne le, m-a kay gə si man bḭyə̰ nee ang gə dɔbo̰ ja saar ndɔ gə ɓeko̰ lə Luba a ɗe.
19Cibi, Jeju un mbə, ɗaa ar oyo Luba ngaɓa uwa cɛdə dana ula ar-je pa ne tar t-ɛ gə na: ꞌYe gə nee to gə darɔ-m gə m-un m-ar-sisəy. ꞌƊaje ne gə nee le oleje ne mə-si dɔ-m gə. 20Ɗəw kara baa, go nekusa gə ɗaa, n-un nekay, n-ɗa to gə mar-ɛ gə kede le ja cibi ɗaa n-pa na: Nekay gə nee le to kone gə sigi ɗəw gə lə məsə-m gə kay nangə mba tar lə-si.
21Ngaa oje: Dəw gə njekun dɔ-m le, usa sə-m ne naa gə mə ka gə kara baa nee. 22Tɔgərɔ ja, ꞌma gə Ngon lə dəw m-a kuy to gə ꞌgɔl ne kede. Ngaa tuji a kuba dəw gə a kun dɔ-m. 23Ɗaa d-un kudu dəji naa tar gə yo gə nee, se na ja horo-si gə ɓa a to nje ɗa ne gə nee le wa?
Na ɓa to dəw gə bo wa?
Mat 20.24-28; 19.28; Mrk 10.41-45
24D-un kudu ma̰y naa tar gə mba gərə se na ɓa to dəw gə bo horo-je gə wa? 25Jeju pa ar-je na: Mbayje gə dɔ nangə nee ꞌɗa rɔ-je gə ꞌɓəə dəwje, ngaɓa njeko̰ ɓeje nee le ꞌɗa rɔ-je d-ar ꞌɓar-je gə nje ɗa mayje. 26Ngaa kar-sisəy a to gə bənəng ang, may kar dəw gə to ɓəəl horo-si gə nama ta toro dəw gə nay ngon baa ɓi, ngaɓa dəw gə njeko̰ dɔ-si təl to ngon njekula lə-si tɔ. 27Na ja ɓa to dəw gə to ɓəəl ya̰ wa, to dəw gə nje kisi ta ka nekusa gə ose dəw gə njekay nekusa wa? Se to dəw gə nje kisi ta ka nekusa gə ang wa? Ngaa, ꞌma le, m-ga̰ horo-si m-to gə ngon njekula.
28Sisəy le, ꞌtoje nje gə d-uwa sə-m gədərə dan nenaje gə ce dɔ-m gə. 29Ɗaa ꞌma le, m-uwa dɔ gɔl Ɓeko̰ m-ɔji ne dɔ-si to gə bɔy uwa dɔ gɔl-ɛ ɔji ne dɔ-m ꞌma tɔ. 30Be ɓa, a kusaje gə a kayje sə-m naa gə kara baa mə ɓeko̰ gə lə-m, ngaɓa a kisije dɔ ngəndəngje gə mba gangə tar dɔ gəl kuji Ijirayɛlje gə dɔg gə gir-e gə joo.
31Simo, Simo, a o, ꞌSu naji-si gə mba rundu-si to gə jene rundu ne waa mə bḭḭ gə be. 32Ngaa ꞌma ɗaa, m-dəji Luba mba-i mba kar takagə lə-i unda nangə ang. Ɗaa ꞌi, lo gə ꞌtəl um sə-m naa gə nama, ꞌi ngaɓa a kula jingaw mə ngan ko̰-ije gə.
33Piyɛr pa ar Jeju na: Mbayɓe, le kəm kaw sə-i naa gə kara baa kəy kula kara, m-a kaw sə-i nəm, kəm kuy sə-i kara, m-ar ngɔdərɔ gə mba kuy sə-i nəm tɔ. 34Jeju pa na: M-pa m-ar-i o, Piyɛr, logə a kar ɓogəne le, nam ɓa kar kura̰ a kila mbərə ɗaa, a ma̰y tar gɔl munda na ꞌgərə-m ang.
35Ɗaa n-pa n-ar-je na: Logə m-ula-si, gə awje gə lar, gə ɓɔl, gə sabɔgɔ ang le se, ne kara lal-si wa? D-ila kəne na: Ne lal-si ang. 36Cibi, n-pa n-ar-je na: Ɓisine ɗaa a to gə bənəng ngaa, dəw gə ɓo lar lə-a ga̰ nama uwa ji-a gə kɛgə ɗəw kara baa, dəw gə ɓo ɓɔl lə-a ga̰ nama ula sɔl-ɛ gə; ngaa ɓo dəw gə kiya bayi lə-a godo nama, may kar laɓə kubu lə-a gə boy yul ꞌta ne lar ndogo ne uwa ji-a gə. 37Mba, m-pa m-ar-si, may kar ne gə Mbede pa tar-ɛ ɔji dɔ-m na: ꞌTura-a horo nje tɔl dəwje gə. Tar nee le oso kəne paragə ɓa. 38ꞌPaje na, Mbayɓe, a o, kiya bay joo ja to nee. N-ila-je kəne na: Asə mbagə.
Jeju dəji Luba dɔ wuri
Mat 26.36-46; Mrk 14.32-42
39N-ce mə ɓe gə, n-ɔdə n-aw dɔ wuri gə kagə gə ri-a na Olibiye ar kəne, gə go pa ji ɓe ɗ-ɛ lə-a ɗaa, ngan njenendoje lə-a ꞌndole go-e. 40N-ce lo-e gə ne ɗaa, n-pa n-ar-je na: ꞌDəjije Luba mba kar-si osoje dan nena gə ang. 41Ɗaa, ꞌne n-ɔr rɔ-ɛ n-aw nganga̰ əw ɓəəl asə naa gə lo koso lə kɔr ər gə d-ila be, n-um məkəji-e nangə ɗaa n-dəji Luba na: 42Bɔy, to gə ɓo ꞌnjigi nama, ɔsə nekay ꞌməsərə nee ta-m gə ngərəng gə ɗangə. Be ja kara, to mə njigi lə-m ꞌma ang, ngaa may kar-i ꞌi ja ꞌɗa mə njigi lə-i. 43Be ɓa anji gə dara kara ce ula njingaw m-e gə. 44M-e gangə man bad ɗaa n-dəji Luba gə singa-a n-ar tədə gə ta naa gə kɔr məsə tal rɔ-ɛ ndəy nangə. 45Logə n-uba nangə n-ḭ lo dəji Luba gə ɗaa, n-aw dɔ-ɛ gə ɓə lə ngan njenendoje lə-a, ɗaa n-inga-je dɔ ɓi gə mbalang mba mə kila kasə unda-je ila-je mbarag. 46N-pa n-ar-je na: ꞌCibije mba ɗi wa? Ḭje taar ɓo ꞌdəjije Luba mba kar-si osoje dan nenaje gə ang.
D-uwa Jeju
Mat 26.47-56; Mrk 14.43-49
47Logə n-aw n-pa tar t-ɛ gə baa ɓi ja ɗaa, bula dəwje ꞌce pɔɔ. ꞌNe gə ɓar-ɛ Judas gə Isikariyɔdə, kara lə ngan njenendoje gə dɔg gə gir-je gə joo ɓa ɔr no-je; n-ɗe rɔ Jeju gə ɗaa, n-uwa n-to mbi-a pu-pu. 48Jeju pa ar-ɛ na: Judas, ɗəw to mbi ɓa un ne dɔ-m ꞌma gə Ngon lə dəw wa? 49Logə gə ngan njenendoje lə Jeju d-o ne gə a kaw nday le ɗaa, ꞌpa d-ar-ɛ na: Mbayɓe, j-a kila ɗɔ gə kiya bayi wa? 50Ɗaa, dəw kara gə ar horo nje gə d-ar kəne, tuga mbi ngon njekula lə buba njekapolo bad gangə. 51Ngaa Jeju un tar pa na: Ar-je be, asə mbagə ngaa. N-ula ji-a n-ɔr ne mbi dəw le ɗaa, təl rɛ̰ lo-e gə gugu mbia̰w̰.
52Jeju pa ar nje gə ꞌɗe mba kuwa-a, ꞌje gə buba njekapoloje, gə njekɔr no njeɗɔje gə kəy gə lə Luba gə buba ɓeje le na: ꞌƊeje gə kiya bayje gə guruje ɓa uwa-mje ne to gə d-uwa ne gayim be. 53ꞌMa le m-ga̰ gə si gə ndɔje tɔ̰y mə kəy gə lə Luba, ngaa uwa-mje ang. Ɓisine ɗaa, to kar lə-si nəm, to singamongə lə cil ciməri tɔ.
Piyɛr ma̰y tar
Ja̰ 18.13-27
54D-uwa-a ɗaa d-aw sə-a kəy lə buba njekapolo. Piyɛr ndole go-je dɔ ji ndə̰w̰. 55ꞌYɛl pər tabidi d-aw njibi ɗaa, Piyɛr kara ɗe isi horo-je gə tɔ.
56Ngon njekula gə jene kara o-e ta pər gə n-isi n-aw n-njibi pər ɗaa, a-e jii ngaɓa pa na: Dəw gə isi nee le to, nje kar Jeju tɔ. 57Ngaa Piyɛr ma̰y na: Jene, ꞌma m-gər-e ang. 58Ɓəəl go-e gə ɗaa, dəw gə ɗangə kara o-e ɗa pa na: ꞌI kara, ꞌto kara lə dəwje gə nee le tɔ. Piyɛr ila-a kəne na: ꞌMa ang baa. 59Kuru lo əw asə ne gə kar kara be go-e gə ɗaa, ngon njekula gə ɗangə kara ar dɔ-ɛ gə njiriri pa na: Tɔgərɔ, dəw gə neɗa ga̰ sə-a ja, ngaɓa n-to gə dəw gə dɔ nangə gə Galile ja cibi tɔ. 60Piyɛr ila kəne na: M-gərə mə tar gə ꞌnjigi pa le ang baa. N-aw pa tar le t-ɛ gə gə pa ja baa ɓi ɗaa, gə ngɔdə baa, kura̰ ila mbərə ɗɔdə ngaa. 61Mbayɓe kəl go-e a Piyɛr jii, ɗaa mə Piyɛr ole dɔ tar gə Mbayɓe pa sə-a na: Nam ɓa kar kura̰ ila mbərə ɓogəne le, a ma̰y tar gɔl munda na ꞌgərə-m ang. 62Be ɓa, n-ɔsə lo n-ce ɗaga ngaɓa n-no ɓəgəgə-ɓəgəgə.
63Dəwje gə d-a dɔ Jeju ꞌkogo-e ngaɓa ꞌkunda nəm. 64ꞌTɔ kəm-e gə ta ne ngaɓa ꞌdəji-e na: Na ɓa unda-i nee wa? ꞌGərə ɓo ꞌpa. 65ꞌPa tarje gə kṵra̰y ɓədə-ɓədə dɔ-ɛ gə.
66Logə lo ar ɗaa, lo kuwa dɔ naa lə buba ɓeje, gə buba njekapoloje gə njekɔr gəl toronduje d-uwa dɔ naa ɗaa, d-aw gə Jeju no ngɔ gangə tar gə lə Jiibije, 67ɗaa ꞌdəji-e na: ꞌPa ar-si j-o, ꞌto Kirisi wa? N-ila-je kəne na: To gə ɓo m-pa m-ar-si kara, a taje kagə-m ang; 68ngaɓa to gə ɓo m-dəji-si tar kara, a kila-mje kəne ang tɔ. 69Ngaa un kud-e ɓogəne le, ꞌma gə Ngon lə dəw m-a kisi dɔ ji kɔl Luba gə njesingamongə gə. 70D-unda ndu-je naa gə tɔ̰y ꞌdəji-e na: Ɗaa ꞌto Ngon lə Luba ngaa kən wa? N-ila-je kəne na: Sisəy ja ꞌpaje ta-si gə əng. To ꞌma ja. 71Be ɓa, ꞌpa na: A ɗi cibi ɓa j-a dəji tar naji mb-ɛ wa? Jeje ja jo tar le t-ɛ gə nam ngaa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved