Matiye 9

Jeju aji dəw gə rɔ-ɛ uy

Mrk 2.1-12; Lug 5.17-26

1Jeju al to, gangə babo, aw ɓe lə-a. 2D-un dəw kara gə rɔ-ɛ uy wɔ gə tuwa baa ꞌɗe sə-a no-ɛ gə. Logə Jeju o takagə lə-je, ɗaa pa ar dəw gə rɔ-ɛ uy le na: Ngon-m, unda singa-i dɔ mar-ɛ gə, tar neɗaje gə kṵra̰y ɔr dɔ-i gə. 3Go tar gə Jeju pa be ɗaa, njekɔr gəl toronduje gə kɛm ꞌpa mə-je gə na: Dəw gə ar nee le taji Luba. 4Be ɓa, Jeju gə gərə kəji lə-je le təl pa ar-je na: Mba ɗi ɓa aw-je gə kəji tar gə kṵra̰y be mə-si gə wa? 5Pa tar kar dəw na: Tar neɗaje gə kṵra̰y ɔr dɔ-i gə ɓa to ɓəəl ya̰ ose, ꞌye gə na: Ḭ taar, un tuwa lə-i, ɓo n-nja ɓa to ɓəəl ya̰ wa? 6Be ɓa, mba kar-si ꞌgərə-je to gə ꞌma gə Ngon lə dəw m-aw gə singamongə dɔ nangə gə nee mba kɔr tar neɗaje gə kṵra̰y dɔ dəwje gə. Jeju pa ar dəw gə rɔ-ɛ uy le na: Ḭ un tuwa lə-i ɓo təl aw kəy lə-i. 7Be ɓa dəw gə rɔ-ɛ uy le ḭ taar aw ɓə lə-a gugu. 8Logə bula dəwje d-o be ɗaa, lo tar igi-je sɛl, ar d-ɔsə ne gaji Luba gə nje kar dəwje singamongə gə to gə be.

Jeju ɓar Matiye

Mrk 2.13-22; Lug 5.17-26

9Jeju ɔdə aw. Logə gə n-aw nday ɗaa, n-o dəw kara ri-a na Matiye, isi lo mbo̰ lar gədə ɓe gə. Jeju ɗe inga-a lo-e gə, pa ar-ɛ na: Ḭ ꞌɗe uwa go-m. Ɗaa Matiye ḭ taar aw sə-a.

10Go-e gə gugu, Jeju aw usa ne kəy lə Matiye gə ngan njenendoje lə-a ɗaa, njembo̰ lar gədə ɓeje gə njeneɗaje gə kṵra̰y gə kɛm kara ꞌɗe bula d-usa gə je ne naa gə kara baa. 11Logə Parijiyɛ̰je d-o to gə be ɗaa, ꞌpa d-ar ngan njenendoje lə-a na: Mba ɗi ɓa Njenetɔji lə-si usa ne naa gə gə njembo̰ lar gədə ɓeje, gə njeneɗaje gə kṵra̰y nəm wa? 12Logə tar-ɛ oso mbi Jeju gə ɗaa, pa ar-je na: Dəwje gə rɔ-je to gə maj-ɛ le ꞌsangə dɔgətoro ang, ngaa njerɔtoje ɓa. 13Aw-je aw sangəje mə tar gə na: Ko kəmtondoo ɓa m-njigi ɓo nepolo ang #9.13 1Sa 15.22 mba m-ɗe mba ɓar dəwje gə d-o rɔ-je gə dəwje gə gadə-gadə ang, ngaa m-ɗe mba njeneɗaje gə kṵra̰y.

14Be ɓa, ngan njenendoje lə Ja̰ Njeɗabatɛm ꞌɗe ꞌpa d-ar Jeju na: Sijee gə Parijiyɛ̰je j-a tɔl mə-si ɓo ɗaa, ngan njenendoje lə-i ꞌtɔl mə-je ɓo ang mba ɗi wa? 15Jeju təl ila-je kəne na: Njekuraje lə njetajene le, logə njetajene ga̰ gə je naa gə baa ɓi le, d-a ɗa rɔ-je gə ndoo ang, ngaa dɔ ndɔje a kasə gə, d-a kɔr ngaw jeneje ji-je gə ɗɔdə le ngaɓa dɔ ndɔ-ɛ əng le d-a tɔl mə-je ɓo ɓi. 16Dəw a kunja ta kubu gə sigi kila ne kəm kubu gə ləw ang, mba ta kubu gə sigi le a ndɔr ꞌye gə ləw kar-ɛ cil kar kəm-e a tadə ya̰ ja cibi. 17Dəw a kiya munduru kodo mə jo kodo gə ləw gə ang mba mii lə kodo le a tɔ jo, kar kodo ula nangə kəngəng-kəngəng. Ɓo bənəng ang nama, kodo nəm, jo nəm tɔ le, d-a to neje gə tuji gə kɔrɔ ja. Ngaa ɓo munduru kodo nama may kiya mə jo kodo gə sigi gə ja tɔ ɓa d-a kuwa naa gə maj-ɛ.

Jeju tɔji singamongə dɔ yo gə gə dɔ rɔko̰ gə

Mrk 5.22-23; Lug 8.43-48

18Logə Jeju aw pa tar be ɗaa, njeko̰ dɔ kəy nendo kara ɗe unda ꞌburamba no-ɛ gə ngaɓa pa na: Ngon-m gə jene uy ɓisine ja ɓi, ɓo ɗe aw ila ji-i dɔ-ɛ nama na təl kisi kəm baa. 19Jeju uba nangə ḭ taar aw sə-a gə ngan njenendoje lə-a naa gə.

20Jene kara gə məsə ɗe rɔ-ɛ gə asə ɓal dɔg gə gir-e gə joo ja, ngə̰y gugu uwa ta njəbə kubu lə Jeju, 21Mba jene le pa mə kəji gə lə-a na: To gə ɓo kubu lə-a ja baa m-ula ji-m m-ɔr ne kɛ̰rɛ̰ng be kara, m-a kaji. 22Jeju turu kəm-e o-e ɗaa pa ar-ɛ na: Ngon-m, unda singa-i dɔ mar-ɛ gə, takagə lə-i aji-i. Ɗaa jene le aji gə dɔ kar-ɛ gə əng ja.

23Logə Jeju ɗe mə kəy gə lə njeko̰ dɔ kəy nendo le ɗaa, o njekɛm bulaje cibi bula dəwje gə d-ar d-unda bangə ɗaa pa ar-je na: 24ꞌƊəmje gə gugu, ngon gə jene ne le uy ang, n-to n-aw cibi baa. Ngaa dəwje ꞌtəl ꞌkogo Jeju. 25Logə ꞌtɔbə bula dəwje d-ar ꞌce ɗaga ɗaa, Jeju andə kəy, uwa ji ngon gə jene le ɗaa ngon le ḭ taar. 26Tar-ɛ ta lo dɔ nangə ɓe gə lə-je tɔ̰y.

Jeju aji nje kəm tɔje joo

27Logə Jeju ɔdə lo-e gə nee ɗaa, nje kəm tɔje joo d-uru ꞌkuwi ꞌndole ne go-e na: Ngon ka Dabidi, o kəmtondoo lə-si! 28Jeju aw saar ce kəy ɗaa, nje kəm tɔje le ꞌɗe d-isi mbɔr-ɛ gə ɗaa n-dəji-je na: ꞌGərəje gə maj-ɛ dɔ ɓəngərə si gə to gə m-asə mba la gə si wa? ꞌTəl d-ila-a kəne na oyo, Mbayɓe. 29Be ɓa Jeju ula ji-a ɔr ne kəm-je ngaɓa pa na: May kar takagə lə-si ɗa ne ar-si. 30Ɗaa gə lo-e gə əng ja kəm-je cɛ̰ ar-je d-o lo. Ngaɓa Jeju təl ndəji-je na: Əwje rɔ-si pa kar dəw o. 31Ngaa ce gə ce-je ɗaga be ja ɗaa ꞌpaje tar-ɛ pə-pə d-ar ta lo tɔ̰y.

32Logə nje kəm tɔje d-aw ce mba kaw ɗaa, ꞌɗe gə dəw gə njil gə kṵra̰y ɗa ɓe m-e gə ar-ɛ təl to gɔdə d-ar Jeju. 33Logə Jeju tɔbə njil gə kṵra̰y le ɗaa, dəw le pa tar gə maj-ɛ. Ne gə Jeju ɗa le dum dɔ dəwje ar-je ꞌpa na: Ndɔ kara ja j-o ne gə to gə be dɔ nangə gə Ijirayɛl ang. 34Ngaa Parijiyɛ̰je ɗaa ꞌpa na: Mbay lə njilje gə kṵra̰y ɓa ar-ɛ singa n-tɔbə ne njilje gə kṵra̰y.

JEJU PA TAR GƏ NJEKA̰Y KULAJE GƏ DƆG GƏ GIR-JE GƏ JOO

Jeju mbərə ngan njekulaje

Mrk 3.6-19; Lug 6.12-16; 10.2

35Jeju nja gə ɓeboje tɔ̰y gə ngan ɓeje, tɔji dəwje ne kəy nendoje gə, ila mbərə Tar gə May gə ɔji dɔ ɓeko̰ nəm ɓa, aji njerɔko̰je ɓədə-ɓədə gə njeməndəje ɓədə-ɓədə nəm tɔ.

36Logə Jeju un kəm-e o bula dəwje ɗaa, o kəmtondoo lə-je, mba d-ɔr ngaɓa singa-je ɔr, ar ꞌnja to gə badəmje gə njekuulje-je godo be. 37Be ɓa Jeju təl pa ar ngan njenendoje lə-a na: Ko gə asə kunja le bo ya̰, ngaa njekunja-aje ꞌnjɛbərɛ baa. 38May kar-si ꞌdəjije Mbayɓe ar-ɛje ula njekunja koje mə ndɔɔ gə.

Currently Selected:

Matiye 9: lap

Highlight

Copy