Marəke 15

Jeju ar no ngɔ gangə tar gə lə Jiibije

Mat 27.1-2; Lug 22.66-71

1Gə ndɔɔ-sḭ ja baa, Buba njekapoloje, gə buba ɓeje, gə njekɔr gəl toronduje gə nje gə no ngɔ gangə tar gə lə Jiibije tɔ̰y d-uwa dɔ naa d-unda ndu-je naa gə. Logə ꞌtɔ Jeju ɗɔdə ɗaa, d-aw sə-a d-aw d-ula-a ji Pilad gə.

Jeju ar no Pilad gə

Mat 27.1-2,11-14; Lug 23.1-5; Ja̰ 18.28-38

2Pilad dəji-e tar na: ꞌTo mbay lə Jiibije wa? Jeju ila-a kəne na: ꞌI ja ꞌpa. 3Buba njekapoloje gangə tarje bula d-um ta Jeju gə. 4Pilad dəji-e to gə ɗangə na: Tar neje tɔ̰y gə ꞌgangə d-um ta-i gə nee le, a kila kəne kara ang wa? 5Ngaa Jeju ar t-ɛ munduru, ar lo tar igi Pilad sɛl.

6Ndɔ ɗa nay ja taar nama, Pilad ɔr dəw kara gə dəwje ꞌdəji-e horo nje gə ꞌto kəy kula gə, ila-a taar-taar. 7Dəw kara ri-a na Barabas je gə njekuraje lə-a d-umje kəy kula gə gə nje gə ꞌɗa dɔ ngang gə njeko̰ ɓeje ꞌtɔl ne dəw. 8Bula dəwje d-aw ꞌdəji-e to to gə n-ɗa ne gə je kede-kede le. 9Pilad ila-je kəne na: ꞌNjigi-je kar m-ɔr mbay lə Jiibije ɓa m-ila taar m-ar-si wa? 10Mba n-gərə to gə nər mə ɓa buba njekapoloje d-uwa ne Jeju d-ula-a ji-a gə. 11Ngaa buba njekapoloje ꞌsula dəwje kar ꞌdəji Pilad d-ar-ɛ ɔr Barabas ɓa ila-a taar. 12Pilad təl pa to gə ɗangə na: Ɗi ɓa ꞌnjigije kar-m ɗa gə dəw gə ꞌɓar-ɛje mbay le Jiibije le wa? 13ꞌTəl d-uru ꞌkuwi na: ꞌƁər-e kagə dəsə gə ja! 14Pilad pa ar-je na: Ngaa ɗi ɓa to ne gə kṵra̰y gə n-ɗa wa? Ɗaa ꞌtəl d-uru ꞌkuwi gə singa-je ja cibi na: ꞌƁər-e kagə dəsə gə! 15Pilad njigi mba may ta kəm bula dəwje gə le ɗaa, ɔr Barabas ila-a taar ɗaa, ar-je ꞌlabə Jeju gə ndəy abəlay ɗaa ula-a ji-je gə mba kar-je ꞌɓər-e kagə dəsə gə.

16Njeɗɔje d-aw gə Jeju kəy mbay gə, nadə gangə tar gə ngaɓa ꞌɓar njeɗɔje gə kɛm tɔ̰y. 17D-ula-a kubu gə boy gə kasə rog-rog, d-uji kun gə jɔgə d-ula dɔ-ɛ gə. 18Cibi ɓa, d-odo ji-je d-o-e na: J-o si ɓa ɓo, mbay lə Jiibije! 19Ngaɓa d-unda dɔ-ɛ gə ndəy kɔb, ꞌcibi yoro dɔ-ɛ gə ngaɓa d-um məkəji, ꞌdəbə no-je nangə no-ɛ gə. 20Go kogo gə kogo-e ɗaa ꞌtəl d-ɔr kubu gə boy gə kasə rog-rog gə ꞌdəb-e ne le, ngaɓa ꞌtəl d-ula-a kubuje lə-a ɗaa d-aw sə-a mba kaw ɓər-e kagə dəsə gə.

Njeɗɔje ꞌɓərə Jeju kagə dəsə gə

Mat 27.32-44; Lug 23.26-43; Ja̰ 19.16-24

21Dəw kara ḭ ndɔɔ ɗaa, d-uwa-a gə singa d-ar-ɛ odo kagə dəsə lə Jeju, ri-a na Simo gə ɓe lə-a Sirɛn, bɔ Alɛgəjandərə-je je gə Rupus; 22ɗaa d-aw gə Jeju lo gə ri-a na Gɔləgota, gə kɔr m-e na: Lo Ka dɔ. 23D-ar-ɛ man bḭyə̰ gə ꞌpolo gə no kagə gə ꞌɓar-ɛ mirə kar-ɛ n-ay ɗaa n-mbadə kɔ̰y. 24Logə ꞌɓər-e kagə dəsə gə ɗɔdə ɗaa ꞌɗa ꞌya̰a̰ ꞌkay ne naa kubuje lə-a mba gərə ne ꞌye gə na-na kara a ta. 25To kar gə ji nay kara gə gə ndɔɔ siḭ ɓa ɓər-e nee kagə dəsə gə. 26D-unja ne bəgərə gə ꞌtɔji ne gəl tar gə d-ila dɔ-ɛ gə na: Mbay le Jiibije. 27ꞌƁər-e kagə dəsə gə gə gayimje joo mbɔr-ɛ gə, dəw gə kara dɔ ji kɔl-ɛ gə, ꞌye gə kara dɔ ji gəl-e gə tɔ. 28Be ɓa mba kar tar gə mbede pa aw ne lo-e gə: ꞌTura-a horo njeneɗaje gə kṵra̰y. 29Nje nday ɗəw booje ꞌtaj-ɛ ꞌtuga ne dɔ-je, ꞌpa na: ꞌI gə na a cḭ kəy lə Luba, ɗaa ndɔ munda baa ja a təl kunda gugu le, 30aji darɔ-i ngaa ləma! To gə ɓo ꞌto ngon lə Luba ja nama, ḭ kagə dəsə gə ꞌɗisi nangə! 31Ɗəw kara baa, buba njekapoloje gə njekɔr gəl toronduje d-unda-a ꞌkogo ne horo-je gə ngaɓa ꞌpa na: N-aji dəwje gə ɗangə, ɗaa n-asə kaji darɔ-ɛ ang! 32May kar Kirisi, mbay lə Ijirayɛlje le, ḭ kagə dəsə gə uru nangə ngaa, mba kar-si j-o ɓo j-a ta ne kagə. Nje gə ꞌɓərə-je sə-a kagə dəsə gə le kara ꞌtaj-ɛ tɔ.

33Logə kar ar lum dɔ gə saar ce ne kar gə ila mbɔr-ɛ gə ja cil ciməri oso dɔ nangə nee tɔ̰y. 34Ngaɓa dɔ kar munda gə dɔ lokul le, Jeju uru ꞌkuwi gə singa to gə boy na: Eli, Eli, lama sabakətani, gə m-e na: Luba lə-m, Luba lə-m, mba ɗi ɓa mbadə-m wa? 35Nje gə kɛm horo dəwje gə d-ar lo-e gə le d-o ndu-e ɗaa ꞌpa na: Oje, n-aw n-ɓar Eli. 36Dəw kara a̰y ngɔdə aw ula nekibi man mə man bḭyə̰ gə masə gə, ɔsə ta kɔb gə ɗe ula ta Jeju gə mba kar ibi, ɗaa pa na: Ar-je bənəng, j-a koje, se Eli a ɗe kun-e kur-e nangə wa? 37Jeju ila ndu-e nangə ɓolong ɗaa kəm lə-a ce. 38Bal dɔ kubu gə ꞌgangə ne mə kəy lə Luba dana ḭ taar ja cir njarara uru nangə. 39Njekun dɔ njeɗɔje gə tɔl gə ar no Jeju gə le, o pa ce gə kəm lə-a ce, ɗaa pa na: Dəw gə nee le to Ngon lə Luba ja tɔgərɔ. 40Jeneje kara d-ar dɔ ji ndə̰w̰ ɓa d-a lo. Horo-je gə le Məri gə Magədala, gə Məri gə ko̰ Jagə gə ngon, gə Jose, gə Salome, 41gə ꞌjeje nee le ɓa logə Jeju ga̰ ne Galile ɓi le, ꞌnja sə-a ngaɓa ꞌla sə-a nəm tɔ, cibi nje gə kɛm bula gə d-aw sə-a Jerujalɛm.

ꞌDubu Jeju

Mat 27.57-61; Lug 23.50-55; Ja̰ 19.38-42

42Kar kumatagə gə to ndɔ gɔl rɔ, mba kar lo kar-ɛ nama a to ndɔ kuwa kɔr le, asə ɗɔdə ɗaa, 43Jəjəb gə Arimate, gə to dəw gə d-ila kuji dɔ-ɛ gə, ngaɓa n-to kara lə nje gə no ngɔ gangə tar gə lə Jiibije, gə ye ja kara aw ngina ɓeko̰ lə Luba tɔ le ɗe. N-aw n-inga Pilad, n-dəj-e nin Jeju le. 44Lo tar igi Pilad sɛl mba kuy gə n-uy gə tɔg-ɛ baa nam, ɗaa ula ɓar njekun dɔ njeɗɔje ngaɓa dəji-e se n-uy ləw baa wa? 45Logə njekun dɔ njeɗɔje le ɗe pa ar-ɛ ɗaa n-un ɗəw n-ar Jəjəb n-ar un nin le. 46Jəjəb aw ndogo ta kubu gə nda, ɗaa ɔr nin Jeju le, ɓiri gə ta kubu ngaɓa aw dubu-e buwa gə ꞌsɔɔ mə ər gə, ɗaa n-nduburu pil ər n-ila t-ɛ gə. 47Məri gə Magədala je gə Məri ko̰ Jose-je d-ar d-o lo gə d-ila-a kəne.

Currently Selected:

Marəke 15: lap

Highlight

Copy