Marəke 2
2
Jeju aji dəw gə rɔ-ɛ uy
Mat 9.1-8; Lug 5.17-26
1Ɗa ndɔ njɛ̰ go-e gə ɗaa, Jeju təl ɗe mə ɓe gə Kapɛrənom, ɗaa d-o tar-ɛ to gə n-isi kəy əng, 2bula bo dəwje ꞌmbo̰ naa ya̰ ta ɗəw kəy gə ja kara nəm, ngaɓa n-aw n-pa tar lə Luba n-ar-je. 3Dəwje ꞌɗe gə dəw gə rɔ-ɛ uy wɔ d-ar-ɛ, jingawje sɔɔ ɓa d-un-e. 4Mba d-inga ɗəw kar ꞌce sə-a no-ɛ gə ang mba bula dəwje. Be ɓa, d-al dɔ kəy gə taar, ꞌkɔdɛ kəm kəy#2.4 Dɔ kəy gə dɔ nangə gə Ijirayɛl to to gə dɔ pal be. d-ɔji ne dɔ lo gə Jeju isi kəne ngaɓa ꞌtɔ kula ta tuwa gə njerɔko̰ to kəne ꞌɗisi-e ne nangə. 5Logə Jeju o takagə lə-je ɗaa, pa ar dəw gə rɔ-ɛ uy le na: Ngon-m, tar neɗaje gə kṵra̰y lə-i ɔr dɔ-i gə. 6Njekɔr gəl toronduje gə kɛm kara d-isi lo-e gə nee tɔ ɗaa, ꞌyṵrṵ tar mə-je gə na: 7Mba ɗi ja ɓa dəw gə nee pa ne tar to gə be wa? N-taji Luba. Na ɓa asə kɔr tar neɗaje gə kṵra̰y dɔ dəw gə wa? Se Luba ja gə kar-ɛ baa ang wa? 8Jeju gərə mə kəji lə-je ɗəw njil-e gə tɔg-ɛ baa ɗaa, pa ar-je na: Mba ɗi ja ɓa sisəy awje gə kəji tar gə be mə-si gə wa? 9Pa tar kar dəw gə rɔ-ɛ uy na: Tar neɗaje gə kṵra̰y ɔr dɔ-i gə ɓa to ɓəəl ya̰ ose, ꞌye gə na: Ḭ taar, un tuwa lə-i, ɓo ꞌnja ɓa to ɓəəl ya̰ wa? 10Be ɓa, mba kar-si ꞌgərəje to gə ꞌma gə Ngon lə dəw le m-aw gə singamongə dɔ nangə gə nee mba kɔr tar neɗaje gə kṵra̰y dɔ dəwje gə. 11Jeju pa ar dəw gə rɔ-ɛ uy le na: M-un ndu-m m-ar-i, ḭ taar, un tuwa lə-i, ɓo aw kəy lə-i. 12Ji naa gə nee ja, n-ḭ taar, n-un tuwa lə-a cibi n-ɔsə lo n-ce kəm dəwje gə tɔ̰y ja, n-ar lo tar igi-je sɛl, ɗaa d-ɔsə ne gaji Luba ꞌpa na: J-o ne gə to gə be ndɔ kara ang.
Jeju ɓar Lebi
Mat 9.9-13; Lug 5.27-32
13Jeju təl ce to gə ɗangə ər mbo kar man bo gə; bula dəwje tɔ̰y ja ꞌɗe ɓə lə-a ɗaa, n-tɔji-je ne. 14Logə Jeju aw nday ɗaa, o Lebi, ngon lə Aləpe, isi lo mbo̰ lar gədə ɓe gə. Jeju pa ar-ɛ na: Uwa go-m ɗaa Lebi ḭ taar aw sə-a. 15Logə Jeju isi ta ka nekusa gə mə kəy gə lə Lebi ɗaa, njembo̰ lar gədə ɓeje bula gə njeneɗaje gə kṵra̰y d-isi sə-a naa gə kara baa gə ngan njenendoje lə-a, mba dəwje gə to gə be gə d-uwa go-e le ꞌbula ya̰. 16Ngaɓa, njekɔr gəl toronduje gə horo Parijiyɛ̰je gə, d-o to gə Jeju isi aw usa ne gə njembo̰ lar gədə ɓeje ngaɓa gə njeneɗaje gə kṵra̰y naa gə ɗaa, ꞌpa d-ar ngan njenendoje lə-a na: Mba ɗi ɓa n-usa ne gə njembo̰ lar gədə ɓeje gə njeneɗaje gə kṵra̰y naa gə wa? 17Logə tar-ɛ oso mbi Jeju gə ɗaa, pa ar-je na: Dəwje gə rɔ-je to gə maj-ɛ le ꞌsangə dɔgətoro ang, ngaa njerɔtoje ɓa. M-ɗe mba ɓar dəwje gə gadə-gadə ang, ngaa mba njeneɗaje gə kṵra̰y.
18Ngan njenendoje lə Ja̰ Njeɗabatɛm gə Parijiyɛ̰je ꞌtɔl mə-je ɓo. Dəwje ꞌɗe ꞌpa d-ar Jeju na: Ɗa to gə ban ɓa ngan njenendoje lə Ja̰ gə nje kar Parijiyɛ̰je ꞌtɔl mə-je ɓo, ɗaa nje kar-ije mbadə tɔl mə-je ɓo wa? 19Jeju təl ila-je kəne na: Njekuraje lə njetajene le, se logə njetajene ga̰ gə je naa gə ja d-asə tɔl mə-je ɓo cibi wa? Logə njetajene nee le ga̰ gə je naa gə saar ɓi nama d-asə tɔl mə-je ɓo ang baa. 20Ngaa dɔ ndɔje a kasə gə, d-a kɔr ngaw jeneje ji-je gə ɗɔdə le ngaɓa dɔ ndɔ-ɛ əng le d-a tɔl mə-je ɓo ɓi. 21Dəw a kunja ta kubu gə sigi kila ne kəm kubu gə ləw ang; ɓo bənəng ang nama, ta kubu gə sigi le a ndɔr ꞌye gə ləw, kar-ɛ cir kar kəm-e a tadə ya̰ ja cibi. 22Dəw a kiya munduru kodo mə jo kodo gə ləw gə ang mba mii lə kodo a tɔ jo, kar kodo ula nangə kəngəng-kəngəng. Ɓo bənəng ang nama, kodo nəm, jo nəm tɔ le, d-a to neje gə tuji gə kɔrɔ ja. Ngaa, ɓo munduru kodo nama may kiya mə jo gə sigi gə ja tɔ.
Tar gə ɔji dɔ ndɔ kuwa kɔr
Mat 12.1-4; Lug 6.1-11
23Ndɔ kara be, to ndɔ kuwa kɔr ɗaa, Jeju nday mə ndɔ gə. Ngan njenendoje lə-a gə d-aw nja le ꞌcɛdə dɔ ko ji-je gə. 24Parijiyɛ̰je ꞌpa d-ar-ɛ na: O, mba ɗi ɓa ne gə to kəm ɗa ndɔ kuwa kɔr gə ang ɓa ꞌɗa wa? 25Jeju ila-je kəne na: Ne gə Dabidi ɗa, logə ꞌne je gə dəwje lə-a d-o ne gə d-a kusa ang ngaɓa ɓo ɔr-je le, se ꞌtura-je tar-ɛ mə mbede gə ang ja magə wa? 26Dɔ ndɔ gə lə buba njekapolo Abiyatar le, n-andə mə kəy gə lə Luba, ɗaa mbəje gə ꞌpolo ne Luba gə to kəm kar njekapoloje ja ɓa ꞌto njekusa-je le, n-usa ngaɓa n-təl n-ar dəwje lə-a kara d-usa tɔ. 27Cibi ɓa Jeju təl pa ar-je na: Ndɔ kuwa kɔr le to mba dəw, ɓo dəw ɓa to mba ndɔ kuwa kɔr ang, 28gəl-e gə nee le ɓa ꞌma gə Ngon lə dəw nee ja m-to nje ko̰ dɔ ndɔ kuwa kɔr.
Currently Selected:
Marəke 2: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
