Marəke 7
7
Parijiyɛ̰je gə nejiɓe
Mat 15.1-9; Lug 11.37-41
1 Parijiyɛ̰je gə njekɔr gəl toronduje gə kɛm gə d-ḭ Jerujalɛm ɗe d-isi gə Jeju. 2Ɗaa d-o ngan njenendoje lə Jeju gə kɛm d-usa mbə ji-je yoro baa, lal togo ji-je. 3Gə go nejiɓe lə nje gə ləw le ɗaa, Parijiyɛ̰je gə Jiibije tɔ̰y ꞌtogo ji-je gə maj-ɛ ɓa d-usa ne ne ɓi. 4Ngaɓa logə ɓo d-ḭ ɗaga ꞌɗe kəy nama ꞌtogo ji-je ɓa d-usa ne ɓi. Nejiɓeje gə to gə be le bula ɓe lə-je ya̰, to gə togo mə ngo kay ne, mə bayje gə mə sambɛ̰je. 5Parijiyɛ̰je je gə njekɔr gəl toronduje ꞌdəji Jeju na: Mba ɗi ɓa ngan njenendoje lə-i ꞌɗa nejiɓe lə nje gə ləw ang ɗaa d-usa ne gə ji-je yoro baa wa? 6Jeju ila-je kəne na: Ejay ila mbərə gə ɔji dɔ-si gə maj-ɛ ja, njetar mulaje, be ɓa ꞌɗa mə mbede gə na:
Dəwje gə nee le ꞌɗɔyi-m ta-je gə baa,
Ngaa mə-je to sə-m əw ya̰;
7 Polo-mje baa ja;
Mba ꞌtɔji neje
Gə to torondu dəwje baa ja.
8ꞌMbadəje ndu Luba, ɗaa nejiɓe lə dəwje ɓa oreje kəm-si kəne. 9N-təl pa n-ar-je ja cibi na: ꞌMbadəje ndu Luba gə maj-ɛ ja mba ngom ne nejiɓe lə-si. 10Mba Moyiji pa na: Ila ngon kuji dɔ bɔ-ije gə dɔ ko̰-ije gə, cibi dəw gə taji bɔ-ɛje ose ko̰-ɛje nama d-a tɔl-ɛ gə tɔl. 11Ngaa sisəy, ꞌpaje na: To gə ɓo dəw pa ar bɔ-ɛje ose ko̰-ɛje na: To ne gə kəm kar m-la ne sə-i ja ngaa, to kɔrəban gə m-e na to ne gə to mba Luba, 12ɗaa ḭya̰-je ɗəw kara kara ar-ɛje n-ɗa ne mba bɔ-ɛje ose mba ko̰-ɛje ang. 13Be ɓa ꞌuwaje nejiɓeje gə sisəy ja ꞌtɔjije naa gə kede-kede le, ꞌcḭje ne tar lə Luba. Ngaɓa ꞌɗaje neje gə kɛm gə to gə bənəng ya̰ ja cibi.
14Jeju təl ɓar bula dəwje ɗaa pa ar-je na: ꞌTugaje mbi-si tɔ̰y ɓo oje gə maj-ɛ. 15Ne kara ja gə a kḭ ɗaga kandə mə dəw gə kar-ɛ mina ne le godo; ngaa ne gə ḭ mə dəw gə le ɓa ɗa dəw ar-ɛ mina. 16To gə ɓo dəw gə mbi-a to mbi ko tar nama o. 17Logə n-ɔdə n-andə kəy, əw gə bula dəwje, ɗaa ngan njenendoje lə-a ꞌdəji-e gəl gusutar nee le. 18Jeju pa ar-je na: Sisəy ja kara awje lal gərə gəl ne ja ɓi wa? Ne gə a kḭ ɗaga kandə mə dəw gə kar-ɛ mina ne ang le ja, ꞌgərəje ne kara kəne ang wa? 19Mba ne nee le andə mə dəw gə kəy, dɔ ɓəngər-e gə ang, ne andə kəy bo sḭ-e gə, ngaɓa n-aw ne dɔ lo gə. N-pa to gə be mba pa ne gə ɗaga to gə nekusa tɔ̰y ja arə ngadə. 20N-pa na: Ne gə ḭ mə dəw gə ja ɓa ɗ-ɛ ar-ɛ mina. 21Mba mə dəw gə kəy, dɔ ɓəngər-e ja ɓa kəjije gə kṵra̰y, kaya, ɓogo, tɔl dəw, 22ɓogo lo to, ɓo lar, məndul, kunda gusu, dɔ godo, kəm kə̰y, taji Luba, kunda kar, gə mbə ḭ kəne. 23Neje gə kṵra̰y tɔ̰y nee le ḭ mə dəw gə ngaɓa ɗ-ɛ ar-ɛ mina ne.
Jene gə Kana
Mat 15.21-28
24Jeju ɔdə lo-e gə nee ɗaa aw dɔ nangə gə Tir. N-andə kəy kara be; ɗaa n-njigi kar dəw gərə ang, ngaa n-asə kisi lokiya gə ang. 25Mba jene kara, gə njil gə kṵra̰y ɗa ɓe mə ngon-e gə jene gə, o tar gə ɔji dɔ Jeju ɗaa, ɗe oso nangə no gɔl-ɛ gə.
26Jene nee le to gərɛk, gə ngira ḭ gə dɔ nangə gə Siri ɓeko̰ gə Penisi. N-dəj-e mba kar tɔbə njil gə kṵra̰y mə ngon-e gə jene gə. 27Jeju pa ar-ɛ na: Ḭya̰ nganje ja ar d-usa d-ar mə-je ti ɓa, mba may kun mbə ta nganje gə kila kar ngan bisije ang. 28Jene le ila-a kəne na: Tɔgərɔ ja, Mbayɓe, ngaa ngan bisije d-a kusa bum ne gə ce ta nganje um nangə kɔy yira nekusa ne gə tɔ. 29Ɗaa Jeju pa ar-ɛ na: Gə go tar gə nee ɗaa, aw, njil gə kṵra̰y le ce mə ngon-i gə le nam. 30Be ɓa logə n-ɔdə n-aw ɓə lə-a ɗaa, n-inga ngon-e dɔ cira gə, ngaɓa njil gə kṵra̰y le kara ce tɔgərɔ ja tɔ.
Njembikudu o tar
Mat 15.29-31
31Jeju ɔdə dɔ nangə gə Tir ɗaa təl gə ɗəw gə Sido̰ əər gə babo gə Galile, nday mə Ɓe mbo̰ gə Dɔg gə to Dekapɔl. 32ꞌƊe gə nje mbi kudu gə lo pa tar kədərə sə-a d-ar-ɛ, ɗaa ꞌɗ-ɛ kɔgərɔ mba kar n-ila ji-a dɔ-ɛ gə. 33Jeju uwa nje mbi kudu le aw sə-a əw gə bula dəwje, n-ula ngan ji-a mbi nje mbi kudu gə ngaɓa n-cibi yoro n-uwa ne ndo̰-ɛ̰; 34cibi n-un kəm-e gə dara, n-ila kəm po̰ ɗaa, n-pa na: Epata, gə m-e na: Mbi unja. 35Be ɓa ji naa gə nee ja mbi-a unja, ne gə tɔ ndo̰-ɛ̰ tudu warara, ar-ɛ n-pa tar gə maj-ɛ. 36Jeju un ndu ar-je mba kar ꞌpa tar-ɛ d-ar dəw ang, ngaa logə n-un ndu gə mong-e n-ar-je ja ngaɓa, ꞌpa tar le d-asə ne lo gə kede-kede. 37Lo tar igi dəwje sɛl ar ꞌpa na: Ne tɔ̰y gə n-ɗa ja may gə may dɔro, nje mbi kuduje ja kara d-o tar nəm, ngaɓa gɔdəje kara pa tar nəm tɔ.
Currently Selected:
Marəke 7: lap
Highlight
Share
Copy
Want to have your highlights saved across all your devices? Sign up or sign in
© 2020, ATALTRAB. All rights reserved
