མཱར་ཀུ་ལེའུ་ 11

ཡེ་ཤུ་རྟེན་འབྲེལ་གྱི་ཚུལ་ལུ་ ཡེ་རུ་ཤ་ལེམ་ལུ་བྱོན་པའི་སྐོར།

1ཁོང་ ཡེ་རུ་ཤ་ལེམ་ལུ་འབྱོནམ་ད་ ཨ་རུ་ར་ཤིང་གི་སྒང་གུ་ ཡོད་མིའི་གཡུས་ཚན་ བཱེད་ཕ་གེ་དང་ བེ་ཐ་ནི་ཡ་ལུ་ཕེབས་ད་ ཁོ་རང་གི་སློབ་མ་གཉིས་ལུ། 2ང་བཅས་ཀྱི་གདོང་ཁར་ལས་ཡོད་མིའི་གཡུས་ཚན་འདི་ནང་སོང་ ཕར་ལྷོདཔ་ད་དེ་འཕྲོ་ལས་ཁྱེད་ཀྱིས་ དུས་ནམ་ཡང་མ་བཞོན་མིའི་བོང་ཀུ་ཕྱུག་ཀུ་ ཐགཔ་བཏགས་བཞག་བཞགཔ་གཅིག་མཐོང་འོང་ འདི་ཐགཔ་འཁྱོལ་ཏེ་ནཱ་འཁྱིད་ཤོག 3ག་དེམ་ཅིག་སྦེ་ མི་གཞན་གྱིས་ ཁྱེད་ལུ་ག་ཅི་འབདཝ་སྨོ་ཟེར་འདྲི་བ་ཅིན་ གཙོ་བོ་ལུ་ཁག་ཆེ་བས་ ཁོ་གིས་མགྱོགས་པར་ལོག་སྟེ་ ནཱ་གཏང་འོང་ཟེར་སླབ་ཟེར་གསུངས་ནུག 4དེ་ལས་ཁོང་གཉིས་སོངམ་ད་ ལམ་གྱི་ཟུར་ཁར་ཁྱིམ་གཅིག་གི་སྒོ་ཁར་ བོང་ཀུ་ཕྱུག་ཀུ་ཐགཔ་བཏགས་བཞག་བཞགཔ་འདི་དང་འཕྱད་དེ་ ཁོང་གིས་ཐགཔ་འདི་འཁྱོལཝ་ད། 5མི་ལ་ལུ་གིས་བོང་ཀུ་ཕྱུག་ཀུ་ཐགཔ་འཁྱོལ་ཏེ་ ཁྱེད་ག་ཅི་འབདཝ་སྨོ་ཟེར་ཁོང་ལུ་དྲིཝ་ད། 6ཡེ་ཤུ་གིས་གསུངས་དོཝ་བཟུམ་སྦེ་རང་ མི་ཚུ་ལུ་སླབ་ནུག་ དེ་ལས་མི་ཚུ་གིས་གཏང་ནུག 7ཁོང་གིས་བོང་ཀུ་ཕྱུག་ཀུ་འདི་ ཡེ་ཤུ་གི་སྐུ་མདུན་ལུ་འཁྱིད་བཀལ་སྦེ་ ཁོང་རང་གི་བགོ་ལ་ བོང་ཀུ་ཕྱུག་ཀུ་དེ་གུ་སྒ་ཁེབས་བརྐྱབས་ཏེ་ ཡེ་ཤུ་དེ་གུ་ཆིབས་ནུག 8མི་ལེ་ཤ་གིས་ཁོ་བྱོན་སའི་ལམ་བདའ་སྟེ་ ཁོང་རང་གི་བགོ་ལ་འཐིང་ ལ་ལུ་གིས་ཞིང་ཁར་ལས་ ཤིང་གི་ཞལ་ལག་བཏོགས་ཏེ་འཐིང་ཕུལ་ནུག 9ཡེ་ཤུ་གི་སྐུ་མདུན་ལས་འགྱོ་མི་དང་སྐུ་རྒྱབ་ལས་འོང་མིའི་ག་ར་གིས་ ཧོ་སཱན་ན་#༡༡:༩། འདི་གི་དོན་དག་དེ་ སྐྱབས་སུ་ཆེ་ཟེརཝ་ཨིན་མས། གཙོ་བོ་གི་མཚན་ནང་བྱོན་མི་འདི་བྱིན་རླབས་ཅན་ཨིན། 10ང་བཅས་ཀྱི་ཕ་བརྒྱུད་རྒྱལཔོ་ ད་བིད་ཀྱི་རྒྱལ་སྲིད་ལུ་ བྱིན་རླབས་གནང་བར་ཤོག་ ག་ར་ལས་མཐོ་བའི་ཞིང་ཁམས་ལུ་བཞུགས་མི་ལུ་ ཧོ་སཱན་ན་ཟེར་སྐད་བརྐྱབས་ཏེ་སོང་ནུག 11ཡེ་རུ་ཤ་ལེམ་ལུ་ཕེབས་ད་ མཆོད་ཁང་ནང་བྱོན་ཏེ་ ཕར་དང་ཚུར་ག་ར་ལུ་གཟིགས་ནུག་ དེ་འབདཝ་ད་ ནམ་ཕྱི་སོང་ནི་འདི་གིས་ ཁོ་རང་གི་སློབ་མ་བཅུ་གཉིས་དང་གཅིག་ཁར་ བེ་ཐ་ནི་ཡ་གཡུས་ཚན་ནང་བྱོན་ནུག།

ཡེ་ཤུ་གིས་ཐུགས་སྨོན་གནང་སྟེ་ཅོང་སེ་ཤིང་སྐམ་པའི་སྐོར།

12འདི་གི་ནངས་པ་ ཁོང་ བེ་ཐ་ནི་ཡ་ལས་ལོག་འབྱོནམ་ད་ ཡེ་ཤུ་གསོལཝ་སྨྱུང་སྟེ། 13ཐག་རིང་ས་ལས་ འདབ་མ་ལེ་ཤ་ཡོད་མིའི་ཅོང་སེ་ཤིང་གཅིག་གཟིགས་ཏེ་ ཤིང་འདི་གི་གུ་ལུ་ ཤིང་འབྲས་མེད་ག་ཟེར་ཐུགས་བསམ་བཞེས་ཏེ་ སྦོ་ལོགས་ཁར་འབྱོནམ་ད་ དོག་མ་བཏག་ནི་གི་དུས་ཚོད་མེན་ནི་འདི་གིས་ ཤིང་འདི་གུ་ལུ་འདབ་མ་མ་གཏོགས་ གཞན་ག་ནི་ཡང་མ་ཐོབ་པས། 14ཁོ་གིས་ཤིང་འདི་ལུ་ དུས་ད་རེས་ལས་འགོ་བཙུགས་ཏེ་ ཁྱོད་ལས་ཤིང་འབྲས་ནམ་ཡང་ མི་གིས་ཟ་མ་བཅུག་ཟེར་གསུངསམ་ད་ ཁོ་གི་སློབ་མ་ཚུ་གིས་རྣ་བ་གོ་ནུག།

ཡེ་ཤུ་གིས་མཆོད་ཁང་ནང་ཚོང་བཙོང་མི་ཚུ་བཏོན་གཏང་པའི་སྐོར།

15ཡེ་རུ་ཤ་ལེམ་ལུ་ཕེབས་ད་ མཆོད་ཁང་ནང་བྱོན་ཏེ་ ཚོང་བཙོང་མི་དང་ཉོ་མི་ཚུ་ ཕྱི་ཁར་བཏོན་གཏང་ནུག་ དེ་ལས་དངུལ་བརྗེ་སོར་གྱི་ཚོང་རྐྱབ་མིའི་ཅོག་སྒྲོམ་དང་ བྱ་ཐི་ལི་རྒྱལམོ་གི་ཚོང་རྐྱབ་མིའི་རྐང་ཁྲི་འདི་ཚུ་ག་ར་ལྷོག་བཀོག་ནུག 16དེ་ལས་མི་ག་ར་མཆོད་ཁང་ནང་ལུ་ ད་རུང་ལོག་སྟེ་ཕར་ཚུར་འགྱོ་སྟེ་ཅ་ལ་ག་ཅི་ཡང་འབག་འགྱོ་ནི་མེད་ཟེར་བཀའ་གནང་ནུག 17དེ་ལས་ཁོ་གིས་ཁོང་ལུ་ཆོས་སྟོན་གནང་སྟེ་ གསུང་རབ་ནང་དཀོན་མཆོག་གིས།

ངེ་གི་ཁྱིམ་འདི་ མི་རིགས་ག་ར་གི་དོན་ལུ་ སྨོན་ལམ་བཏབ་སའི་ཁྱིམ་ཨིན་ཟེར་#༡༡:༡༧། ཨའི་ཟ་ཡ་ ༥༦:༧།

བྲིས་ཏེ་མིན་འདུག་ག་ དེ་འབདཝ་ད་ཁྱེད་ཀྱིས་ ཨརཝ་གི་ཚང་བཟུམ་སྦེ་ བཟོ་བཞགཔ་ཨིན་མས་ཟེར་གསུངས་ནུག 18བླ་ཆེན་དང་ བཀའ་ཁྲིམས་ཀྱི་སློབ་དཔོན་ཚུ་ དེ་གོཝ་ད་ ཁོང་གིས་ཡེ་ཤུ་བཀྲོང་ནི་འབད་ གནས་སྐབས་བསྒྱིར་སྡོད་ནུག་ དེ་འབདཝ་ད་ ཡེ་ཤུ་བལྟ་འདྲོགས་ནུག་ ག་ཅི་སྨོ་ཟེར་བ་ཅིན་ མི་དམངས་ག་ར་ཁོ་གིས་སྟོན་གནང་མིའི་ཆོས་ལུ་བལྟ་སྟེ་ ཧ་ལསཔ་ཨིན་མས། 19དེ་ལས་ནམ་སྲོ་ནི་འབདཝ་ད་ ཡེ་ཤུ་ཁྲོམ་གྱི་ཕྱི་ཁར་ཐོན་བྱོན་ནུག།

དད་པ་བསྐྱེད་ནི་དང་བཀའ་དྲིན་བསྐྱང་ནི་གཙོ་བོ་བསྟེན་དགོ་པའི་སྐོར།

20དེ་གི་ནངས་པ་དྲོ་པ་ཁོང་ལམ་འདི་ལས་རང་ལོག་འབྱོནམ་ད་ ཧེ་མ་གི་ཅོང་སེ་ཤིང་འདི་ ར་ཏོ་ལས་རང་སྐམ་སོངམ་ ཁོང་གིས་མཐོང་ནུག 21དེ་བསྒང་ པེ་ཏྲོ་གིས་སེམས་ཁར་དྲན་ཏེ་ཡེ་ཤུ་ལུ་ རབ་བི་གཟིགས་ལགས་ ནཱ་གིས་ཐུགས་སྨོན་གནང་མིའི་ཤིང་འདི་ ར་ཏོ་ལས་རང་སྐམ་སོང་ནུག་ཟེར་ཞུཝ་ད། 22དེའི་ལན་ལུ་ཡེ་ཤུ་གིས་ དཀོན་མཆོག་ལུ་དད་པ་བསྐྱེད། 23ང་གིས་ཁྱེད་ལུ་དོན་དག་རང་སླབ་དོ་ མི་ག་ར་འབད་རུང་ སེམས་ཁར་ཐེ་ཚོམ་མ་བསྐྱེད་པར་ རང་གི་དོན་དག་གྲུབ་ཚུགས་མནོ་སྟེ་ ཨ་ནི་སྒང་འདི་ལུ་ མར་རྒྱ་མཚོ་ནང་མཆོངས་ཟེར་སླབ་པ་ཅིན་ འདི་ཐད་རི་བ་རི་གྲུབ་འོང་ཟེར་གསུངས་ནུག 24དེ་གིས་འབད་ ང་གིས་སླབ་དོ་ སྨོན་ལམ་ནང་ག་ཅི་རང་ཞུ་རུང་ འདི་ག་ར་ང་གིས་ཐོབ་མནོ་སྟེ་དད་པ་བསྐྱེད་པ་ཅིན་ ཁྱེད་ཀྱིས་ཞུ་མི་འདི་ག་ར་གནང་འོང་། 25ད་རུང་ཁྱེད་ཀྱིས་སྨོན་ལམ་ཞུ་ནི་གི་དོན་ལུ་ ཡར་ལོངམ་ད་ མི་གཞན་གྱིས་རང་ལུ་ ཟོགཔོ་ག་ཅི་རང་འབད་འབདཝ་ཡོད་རུང་ འདི་སེམས་ཁར་མ་བཞག་པར་ བཀའ་དྲིན་བསྐྱང་ དེ་ལས་ཞིང་ཁམས་ལུ་བཞུགས་མིའི་ཡབ་ཀྱིས་ཡང་ ཁྱེད་ཀྱི་སྡིག་པ་ལུ་བཀའ་དྲིན་བསྐྱང་འོང་། 26ག་དེམ་ཅིག་སྦེ་ མི་གཞན་གྱི་སྡིག་པ་ལུ་བཀའ་དྲིན་བསྐྱང་མ་ཚུགས་པ་ཅིན་ ཡར་ཞིང་ཁམས་ལུ་བཞུགས་མི་ཡབ་ཀྱིས་ ཁྱོད་ཀྱི་སྡིག་པ་ལུ་ཡང་བཀའ་དྲིན་མི་བསྐྱང་ཟེར་གསུངས་ནུག།

བླ་ཆེན་ཚུ་གིས་ཡེ་ཤུ་ལུ་དབང་ཚད་ཀྱི་སྐོར་ལས་དྲི་བ་དྲིས་བའི་སྐོར།

27ད་རུང་ཡེ་ཤུ་དང་ཁོ་རང་གི་སློབ་མ་ཚུ་ ཡེ་རུ་ཤ་ལེམ་ལུ་ཕེབས་ཏེ་ མཆོད་ཁང་ནང་ལུ་འབྱོནམ་ད་ བླ་ཆེན་དང་བཀའ་ཁྲིམས་ཀྱི་སློབ་དཔོན་ མི་དམངས་ཀྱི་འགོ་དཔོན་ཚུ་ ཁོ་གི་སྐུ་མདུན་ལུ་བཅར་ཏེ་ཞུ་ནུག 28ག་ཅི་གི་དབང་ཚད་ཀྱིས་ ཨ་ནི་དེ་ཚུ་འབདཝ་སྨོ་ དབང་ཚད་འདི་ག་གིས་བྱིན་བྱིནམ་སྨོ་ཟེར་སླབ་ད། 29ཡེ་ཤུ་གིས་ཁོང་ལུ་ ང་གིས་ཡང་ཁྱེད་ལུ་དྲི་བ་གཅིག་དྲི་ནི་ཨིན་ ཁྱེད་ཀྱིས་ང་ལུ་དེའི་ལན་སླབ་པ་ཅིན་ ང་གིས་ཡང་ག་གིས་དབང་ཚད་ནང་ཨ་ནི་དེ་ཚུ་འབདཝ་ཨིན་ན་ དེའི་ལན་སླབ་ནི་ཨིན་ཟེར་གསུངས་ནུག 30ཡོ་ཧ་ནཱན་གྱིས་ཁྲུས་གསོལ་བྱིན་ནི་གི་དབང་ཚད་དེ་ ཞིང་ཁམས་ལས་ཨིན་ན་ མི་ལས་ཨིན་ན་ ང་ལུ་ལན་སླབ་ཟེར་གསུངསམ་ད། 31ཁོང་རང་གི་སྦུག་ལུ་བསྟུན་གྲོས་བརྐྱབས་ཏེ་ ག་དེམ་ཅིག་སྦེ་ ང་བཅས་ཀྱིས་ཞིང་ཁམས་ལས་ཨིན་ཟེར་སླབ་པ་ཅིན་ ཁྱེད་ཀྱིས་ ཡོ་ཧ་ནཱན་ལུ་ག་ཅི་འབད་ཆ་མ་བཞགཔ་སྨོ་ཟེར་ ཁོ་གིས་སླབ་འོང་། 32དེ་ལས་ ག་དེམ་ཅིག་སྦེ་ ང་བཅས་ཀྱིས་མི་ལས་ཨིན་ཟེར་སླབ་པ་ཅིན་ མི་བཏུབ་པས་ཟེར་སླབ་ནུག་ ག་ཅི་སྨོ་ཟེར་བ་ཅིན་ ཁོང་མི་དམངས་ལུ་བལྟ་སྟེ་འདྲོགཔ་ཨིན་མས་ ཡོ་ཧ་ནཱན་འདི་ དོན་ལས་རང་ ལུང་སྟོན་པ་ངོ་མ་གཅིག་སྦེ་ མི་ག་ར་གིས་ཆ་བཞགཔ་མས་ཟེར་ ཁོང་གིས་ཤེས་ནུག 33དེ་འབདཝ་ལས་བརྟེན་ཏེ་ ཁོང་གིས་ལན་ འདི་ག་ལས་ཨིན་ན་ ང་བཅས་ཀྱིས་མི་ཤེས་པས་ཟེར་སླབ་ནུག་ དེ་ལས་ཡེ་ཤུ་གིས་ཡང་ཁོང་ལུ་ དེ་སྦེ་ཨིན་པ་ཅིན་ ང་ཡང་ག་གིས་དབང་ཚད་ནང་ལཱ་འདི་འབདཝ་ཨིན་ན་ ཁྱེད་ལུ་མི་སླབ་ཟེར་གསུངས་ནུག།

Currently Selected:

མཱར་ཀུ་ལེའུ་ 11: dzoD

Highlight

Copy

Want to have your highlights saved across all your devices? Sign up or sign in

Learn More About རྫོང་ཁ་