མཱར་ཀུ་ལེའུ་ 13

མཆོད་ཁང་ཞིག་སྟེ་མེདཔ་འགྱོ་འོང་ཟེར་བའི་སྐོར།

1ཡེ་ཤུ་མཆོད་ཁང་ནང་ལས་ཕྱི་ཁར་འཐོན་འབྱོནམ་ད་ སློབ་མ་གཅིག་གིས་ སློབ་དཔོན་གཟིགས་ལགས་ རྡོ་སྦོམ་དང་ ཁྱིམ་གྱི་བཀོད་པ་ ག་ཅི་དེས་ཅིག་བྱ་ཆི་ཆི་འདུག་ཟེར་ཞུ་ནུག 2ཡེ་ཤུ་གིས་ ཁྱེད་ཀྱིས་ཁྱིམ་སྦོམ་དགའ་ཏོག་ཏོ་ཚུ་མཐོང་ཅི་ག་ ད་དེ་ཚུ་ཤུལ་ལས་ རྡོ་བརྩེགས་བརྩེགསཔ་གཅིག་ཡང་མ་བཞག་པར་ མར་བརྡལ་བཀོ་འོང་ཟེར་གསུངས་ནུག།

གནས་སྟངས་མ་འདྲཝ་ཚུ་འབྱུང་ནི་ཨིན་པའི་སྐོར།

3དེ་ལས་ཡེ་ཤུ་ཨ་རུ་ར་ཤིང་གི་སྒང་གུ་ལས་ཞལ་ཕར་མཆོད་ཁང་ཁ་ཐུག་ལུ་གཟིགས་ཏེ་ བཞུགས་པའི་སྐབས་ལུ་ པེ་ཏྲོ་ ཡ་ཀོབ་དང་ ཡོ་ཧ་ནཱན་དང་ ཨཱན་དྲུ་གིས་ ག་ཡང་མེདཔ་ད་ ཁོ་བཞུགས་སར་བཅར་ཏེ། 4ཧེ་མ་མཆོད་ཁང་གི་སྐོར་ལས་གསུངས་མིའི་ལོ་རྒྱུས་འདི་ཚུ་ དུས་ཚོད་ག་དེམ་ཅིག་ཁར་འབྱུང་ནི་ཨིན་ན་ རྟགས་མཚན་ག་ཅི་བཟུམ་འཐོནམ་ད་ ལཱ་དེ་ཚུ་ག་ར་དོན་ལས་རང་བྱུང་དོ་ཡོདཔ་ ག་དེ་སྦེ་ཤེས་ནི་ན་ ང་བཅས་ལུ་གསུངས་གནང་ལགས་ཟེར་ཞུ་ནུག 5དེ་ལས་ཡེ་ཤུ་གིས་ མི་ག་གིས་ཡང་ ཁྱེད་ལུ་མགུ་བསྐོར་ནང་བཙུགས་མ་བཅུག་ནི་གི་དོན་ལུ་ རིགཔ་བསྒྱིམ་སྟེ་སྡོད། 6ངེ་གི་མིང་ནང་ལུ་མི་ལེ་ཤ་གིས་ ང་ཨིན་ཟེར་སླབ་འཐོན་འོང་ ཨ་ནི་མི་ཚུ་གིས་ མི་ལེ་ཤ་ལུ་མགུ་བསྐོར་བརྐྱབ་འོང་། 7ཁྱེད་ཀྱི་སྦོ་ལོགས་ཁར་དང་ཐག་རིང་ས་ལས་ དམག་གི་ལོ་རྒྱུས་ཚུ་གོ་བའི་ཚེ་མ་འདྲོག་ཤིག་ འདི་ཚུ་འབྱུང་རང་འབྱུང་དགོ་ དེ་འབདཝ་ད་ ཨ་ནི་དུས་མཐའན་མཇུག་འདི་ལྷོདཔ་མེན། 8མི་རིགས་དང་མི་རིགས་ རྒྱལ་ཁབ་དང་རྒྱལ་ཁབ་དམག་བརྐྱབ་འོང་ ལུང་ཕྱོགས་སོ་སོ་ནང་ ས་ཡོམ་དང་མུ་གེ་དེ་ཚུ་འབྱུང་འོང་ དུས་ཚོད་དེའི་སྐབས་ཀྱི་ན་ཟུག་དེ་ ཨམ་སྲུ་ཨ་ལོ་མ་སྐྱེས་བའི་ཧེ་མ་ ན་ཟུག་འགོ་བཙུགས་དོཝ་བཟུམ་སྦེ་ འགོ་བཙུགས་འོང་། 9ཁྱེད་རང་རིགཔ་བསྒྱིམ་སྟེ་སྡོད་ མི་དེ་ཚུ་གིས་ཁྱེད་ལུ་ཁྲིམས་ཁང་ནང་འཁྱིད་བཀལ་འོང་ ཁྱེད་ལུ་ སི་ན་གོག་ནང་ལུ་དྲངས་འོང་ ངེའི་དོན་དག་ལས་སྦེ་ གཞུང་ཚབ་དང་རྒྱལཔོ་ཚུ་གི་སྐུ་མདུན་ལུ་འཁྱིད་བཀལ་ཏེ་ ངེ་གི་སྐོར་ལས་དཔང་པོ་འབད་འོང་། 10ཧེ་མ་རྒྱལ་ཁབ་དང་མི་རིགས་ག་ར་ལུ་ གཏམ་བཟང་འདི་བཤད་དེ་སླབ་བྱིན་དགོ། 11ཁོང་གིས་ཁྱེད་ལུ་ཁྲིམས་དཔྱད་པ་འཁྱིད་འགྱོ་བའི་དུས་ལུ་ ད་ཁོང་ལུ་ག་ཅི་སླབ་དགོ་ག་ཟེར་ ཧེ་མ་ལས་ཚ་གྱང་མ་ལང་པར་སྡོད་ འདི་གི་དུས་ཚོད་ལུ་ སེམས་ཁར་ག་འོང་མི་འདི་སླབ་བྱིན་ ག་ཅི་སྨོ་ཟེར་བ་ཅིན་ འདི་ཁྱོད་མེན་པར་དམ་པའི་ཐུགས་ཉིད་ཀྱིས་གསུངམ་ཨིན། 12དེ་ལས་ཕོ་རྒནམ་གིས་རང་གི་ནུ་གཅུང་ལུ་ རོགས་ཀྱི་ལག་པར་སྤྲོད་དེ་བསད་ནི་ཨིནམ་མ་ཚད་ ཨ་པ་གིས་ཡང་རང་གི་བུ་དང་བུམོ་ལུ་ རོགས་ཀྱི་ལག་པར་སྤྲོད་དེ་བསད་འོང་ དེ་ལས་ཨ་ལོ་ཚུ་གིས་ཡང་ ཕམ་ལུ་ངོ་རྒོལ་འབད་དེ་བསད་བཅུག་འོང་། 13ངེ་གི་དོན་ལས་སྦེ་ མི་གིས་ཁྱེད་ལུ་མི་དགའ་ དེ་འབདཝ་ད་ མི་ག་ར་འབད་རུང་ མཐའན་མཇུག་ཚུན་ཚོད་ལུ་ དད་པ་ནང་སྒྲིང་སྒྲིང་སྦེ་ སྡོད་མི་འདི་ལུ་སྐྱབས་མཛད་འོང་།།

ཡེ་ཤུ་གིས་ཤུལ་ལས་དུས་ངན་འབྱུང་འོང་ཟེར་བའི་སྐོར།

14དེ་ཚུ་ཁྱེད་ལྷག་མི་ཚུ་གིས་ཤེས་དགོ་ ཉིནམ་གཅིག་གི་ཚེ་ སྡོད་མ་ཆོག་པའི་ས་གནས་ལུ་ ཁམས་ལོག་སི་སི་གཅིག་ལོང་སྡོདཔ་མཐོང་འོང་ དེའི་སྐབས་ལུ་ ཡུ་དེ་ཡ་ལུང་ཕྱོགས་ལུ་སྡོད་མི་ག་ར་ ཨིན་ཅི་མིན་ཅི་སྒང་རི་ཁ་ཐུག་ལུ་འབྱོག་འགྱོ་དགོ། 15དེ་ལས་མི་ག་ར་འབད་རུང་ ཁྱིམ་ཐོག་གོང་མ་ཡོད་མི་གིས་ ཁྱིམ་གྱི་ནང་ན་ཅ་ལ་འཐུ་བ་མ་སོང་པར་ དེ་འཕྲོ་ལས་རང་འཐོན་འགྱོ་དགོ། 16དེ་ལས་ད་རུང་ ཞིང་ཁར་ལཱ་འབད་མི་དེ་གིས་ལོག་སྟེ་ བགོ་ལ་འཐུ་བ་མ་སོང་། 17དེའི་སྐབས་ལུ་ཨམ་སྲུ་ཨ་ལོ་སྐྱེ་ནི་ཡོད་མི་དང་ ཨ་ལོ་ཨོམ་འཐུང་ནི་ཡོད་མི་ཨའི་ཚུ་ལུ་ ག་དེམ་ཅིག་སྡུག་བསྔལ་འབྱུང་ནི་སྨོ། 18ད་འདི་གནམ་དགུན་ལུ་འབྱུང་མ་བཅུག་ནིའི་དོན་ལུ་ དཀོན་མཆོག་ལུ་སྨོན་ལམ་བཏབ། 19དེའི་སྐབས་ལུ་ སྡུག་བསྔལ་གནམ་མེད་ས་མེད་འབྱུང་ནི་ཨིན་ དེ་བཟུམ་གྱི་སྡུག་བསྔལ་ ཧེ་མ་འཇིག་རྟེན་བཀོད་པ་ལས་འགོ་བཙུགས་ཏེ་ ད་ཚུན་གྱི་བར་དུ་ དུས་ནམ་ཡང་དེ་བཟུམ་མ་བྱུང་ དེ་གི་ཤུལ་ལས་ཡང་དེ་བཟུམ་མི་འབྱུང་། 20གཙོ་བོ་གིས་དུས་ཚོད་འདི་ཐུང་ཀུ་མ་མཛད་པ་ཅིན་ མི་གཅིག་ཡང་མི་ལུསཔ་འོང་ དེ་འབདཝ་ད་ ཁོ་གིས་བཙག་འཐུ་མཛད་མི་ཚུ་གི་དོན་ལུ་ དུས་ཚོད་འདི་ཐུང་ཀུ་མཛད་གནང་འོང་། 21དེའི་ཚེ་ དཀོན་མཆོག་གིས་བཙག་འཐུ་མཛད་མི་ཁིརཱིས་ཨ་ཕ་བཞུགས་ནུག་ ཨ་ནཱ་བཞུགས་ནུག་ བལྟ་ཞིག་ཟེར་ མི་ག་གིས་ར་འབད་རུང་ ཁྱེད་ལུ་སླབ་པ་ཅིན་ འདི་ལུ་བདེན་འཛིན་མ་རེ། 22ཁིརཱིས་རྫུས་མ་དང་ ལུང་སྟོན་པ་རྫུས་མ་ཚུ་ལེ་ཤ་འོངས་ཏེ་ བཙག་འཐུ་མཛད་མི་ཚུ་ལུ་ འབད་ཚུགས་པ་ཅིན་ མགུ་བསྐོར་བརྐྱབ་ནི་གི་དོན་ལུ་ རྟགས་མ་གཅིགཔ་དང་རྫུ་འཕྲུལ་ཚུ་ལེ་ཤ་བཏོན་འོང་། 23དེ་ཚུ་ལས་རིགཔ་བསྒྱིམ་སྟེ་སྡོད་ འདི་གི་སྐོར་ལས་ ཧེ་མ་ལས་ང་གིས་ཁྱེད་ལུ་ག་ར་བཤད་དེ་སླབ་ཅི།།

བྱོན་པ་གཉིས་པ་ནང་རྟགས་མཚན་མ་འདྲཝ་འབྱུང་ནི་ཨིན་མིའི་སྐོར།

24དེའི་ཚེ་སྡུག་བསྔལ་འདི་བྱུང་མིའི་ཤུལ་ལས་ ཉིན་མིའི་འོད་བསྒྲིབས་ཏེ་གནག་དུང་དུ་འགྱོ་སྟེ་ ཟླཝ་གིས་ཡང་འོད་མི་བྱིན། 25གནམ་ཁ་ལས་སྐརམ་ཚུ་ཡང་ས་ཁར་བུད་དེ་ ཉིམ་དང་ཟླཝ་སྐརམ་ཚུ་གི་ཤུགས་དེ་ཡོམ་བརྐྱབ་འོང་། 26དེའི་ཚེ་ མི་ག་ར་གིས་ མིའི་བུ་ནམ་མཁའི་ས་སྨུག་ནང་ ཁོ་རང་གི་དབང་ཤུགས་དང་གཟི་བརྗིད་ཁྱབ་སྟེ་ བྱོན་ས་མཇལ་འོང་། 27དེ་ལས་ཁོ་གི་ཕོ་ཉ་ཚུ་ལུ་བཏང་སྟེ་ འཛམ་བུ་གླིང་གི་མཐའ་མ་ལས་བརྐྱབས་ཏེ་ ཕྱོགས་བཞི་ལས་སྦེ་ ནམ་མཁའི་མཐའན་མཇུག་ཚུན་ཚོད་ ཁོ་གིས་བཙག་འཐུ་མཛད་མི་ཚུ་ལུ་ གཅིག་ཁར་སྤུང་བ་གཏང་འོང་། 28ད་ཡོན་ཏན་ལྷབ་ནིའི་དོན་ལུ་ ཨ་ནི་ཅོང་སེ་ཤིང་ལུ་བལྟ་ དཔེར་ན་ནམ་སོ་ཁ་ ཅོང་སེ་ཤིང་གིས་རིགས་ཚུ་ལྕུག་གུ་རྒྱས་ འདབ་མ་གསརཔ་འཐོན་པའི་བསྒང་ལས་ ནམ་བྱཱར་སྦོ་ལོགས་ཁར་ལྷོདཔ་ཨིནམ་ཤེས། 29དཔེ་དེ་བཞིན་དུ་ ཁྱེད་ཀྱི་བལྟ་ས་ལུ་ མ་འདྲཝ་ལེ་ཤ་བྱུང་མི་ཚུ་མཐོངམ་ད་ ད་ཁོ་ནཱ་སྦོ་ལོགས་ཁར་ སྒོའི་རྩ་བར་ལྷོདཔ་ཨིནམ་ཤེས་འོང་། 30ད་ང་གིས་ཁྱེད་ལུ་དོན་དག་རང་སླབ་ཨིན་ ད་དེ་ཚུ་ག་ར་མ་བྱུང་བའི་བར་ན་ ཨ་ནི་མི་རབས་དེ་ཚུ་རབས་ཆད་དེ་མི་འགྱོ། 31དེ་འབདཝ་ད་ གནམ་དང་ས་གཉིས་ཡལ་འགྱོ་རུང་ ངེ་གི་གསུང་འདི་ཚུ་ དུས་ནམ་ཡང་ཡལ་མི་འགྱོ་ཟེར་གསུངས་ནུག།

ག་གིས་ཡང་ཡེ་ཤུ་ནམ་བྱོན་འོང་ག་ཟེར་མ་ཤེས་པའི་སྐོར།

32དེ་འབདཝ་ད་ ཨ་ནི་མཐའན་མཇུག་གི་ཉིནམ་དང་ཆུ་ཚོད་དེ་ ནམ་འབྱུང་ནི་ཨིན་ན་ དེ་གི་སྐོར་ལས་ ཡབ་ཀྱིས་མ་གཏོགས་ གཞན་ཞིང་ཁམས་ཀྱི་ཕོ་ཉ་དང་སྲས་ ག་གིས་ཡང་མི་ཤེས། 33ད་རིགཔ་བསྒྱིམ་ དྲན་པ་བཏོན་ཏེ་སྡོད་ དུས་ཚོད་དེ་ག་དེམ་ཅིག་ཁར་འོང་ནི་ཨིན་ན་ ཁྱེད་ཀྱིས་མི་ཤེས། 34ད་དཔེ་གཅིག་འབད་བ་ཅིན་ མི་གཅིག་ཁོ་རང་གི་ཁྱིམ་ནང་ལས་ ས་ཕྱོགས་གཞན་ཁ་འགྱོ་བའི་སྐབས་ལུ་ ཁོ་རང་གིས་གཡོགཔོ་ཚུ་རེ་རེ་བཞིན་དུ་ རང་རང་སོ་སོའི་ལཱ་གི་འགན་ཁག་སྤྲོད་དེ་ སྒོ་སྲུང་དེ་ལུ་ཡང་ཉིན་མཚན་མེད་པར་ ན་འཐན་སྦེ་བལྟ་ཟེར་བཀོད་རྒྱ་བྱིནམ་དང་འདྲ་ཟེར་གསུངས་ནུག 35དཔེ་དེ་བཞིན་དུ་ ཁྱེད་ཀྱིས་ དྲན་པ་བཏོན་ཏེ་ན་འཐན་སྦེ་སྲུངས་ ག་ཅི་སྨོ་ཟེར་བ་ཅིན་ ཁྱིམ་གྱི་སྦྱིན་བདག་འདི་ ནམ་སྲོཔ་ད་འོང་ནི་ཨིན་ན་ ནམ་ཕྱེད་ལུ་འོང་ནི་ཨིན་ན་ བྱ་པོད་འབོཔ་ད་འོང་ནི་ཨིན་ན་ དྲོ་པ་ཧ་སག་སྟེ་འོང་ནི་ཨིན་ན་ ཁྱེད་ཀྱིས་མི་ཤེས། 36ད་ག་དེམ་ཅིག་སྦེ་དེ་འཕྲོ་ལས་སྦྱིན་བདག་འདི་འོང་པ་ཅིན་ ཁྱེད་གཉིད་ལོག་སྡོད་ཡོདཔ་མཐོང་ནི་གི་ཉེན་ཁ་ཡོད། 37ང་གིས་དྲན་པ་བཏོན་ཏེ་སྡོད་ཟེར་ ཁྱེད་རྐྱངམ་གཅིག་ལུ་སླབ་མེན་པར་ མི་ག་ར་གི་དོན་ལུ་སླབ་ཨིན་ཟེར་གསུངས་ནུག།

Currently Selected:

མཱར་ཀུ་ལེའུ་ 13: dzoD

Highlight

Copy