མཱར་ཀུ་ལེའུ་ 16

ཡེ་ཤུ་ལོག་ཡར་སྐུ་གསོན་པོ་སྦེ་ལྷོངས་པའི་སྐོར།

1ངལ་འཚོ་བའི་ཉིནམ་མཇུག་བསྡུ་སྟེ་ མཱིར་ཡམ་མག་ད་ལཱེན་དང་ ཡ་ཀོབ་ཀྱི་ཨའི་ མཱིར་ཡམ་ དེ་ལས་ སེ་ལོ་མེ་ཁོང་གསུམ་གྱིས་ ཡེ་ཤུ་གི་སྐུ་ཕུང་གུ་དབུར་ནི་སྦེ་ དྲི་བཟང་ཚུ་ཉོས་འབག་སྟེ། 2བདུན་ཕྲག་གི་ཉིནམ་དང་པ་ལུ་ དྲོ་པ་ཤར་དཀརཝ་ད་ ཁོང་ཕར་དུར་ཁུང་ནང་བལྟ་བ་སོང་ནུག 3ད་དུར་ཁུང་གི་ཁ་ལུ་ཡོད་མི་རྡོ་སྦོམ་འདི་ ག་གིས་ང་བཅས་ཀྱི་དོན་ལུ་ཕར་སྒྲིལ་བྱིན་འོང་ག་ཟེར་ ཁོང་རང་གཅིག་གིས་གཅིག་ལུ་སླབ་ཅི་རང་སོང་ནུག 4དེ་ལས་ཡར་བལྟཝ་ད་ དུར་ཁུང་གི་རྡོ་སྦོམ་འདི་ཕར་བསྒྲིལ་གཏང་དཔ་ཁོང་གིས་མཐོང་ནུག་ རྡོ་འདི་གནམ་མེད་ས་མེད་སྦོམ་གཅིག་ཨིན་མས། 5ཁོང་དུར་ཁུང་ནང་ན་འཛུལ་བལྟཝ་ད་ སྐུ་ཕུང་བཞག་སའི་གཡས་ཁ་ཐུག་ལས་མི་གཞོནམ་བགོ་ལ་དཀརཔོ་གྱོན་མི་གཅིག་ སྡོད་ས་མཐོང་སྟེ་ ཁོང་རྣམ་རྟོག་ལངས་ནུག 6དེ་འབདཝ་ད་ ཁོ་གིས་ཨམ་སྲུ་ཚུ་ལུ་ ཁྱེད་མ་འདྲོག་ ན་ཟ་རཱེད་ཀྱི་ཡེ་ཤུ་ ཁྲམ་ཤིང་གུ་བཀྲོངས་མི་ལུ་ འཚོལ་བ་འོངམ་ ང་གིས་ཤེས་ཅི་ ཁོ་སྐུ་གསོན་པོ་སྦེ་བཞེངས་གནང་ཡི་ ཁོ་ནཱ་ལུ་མེད་ ཁོ་གི་སྐུ་ཕུང་བཞག་ས་ལུ་བལྟ་ཞིག་ཟེར་གསུངས་ནུག 7ད་སོང་ཞིནམ་ད་ ཁོ་གི་སློབ་མ་གཞན་དང་ པེ་ཏྲོ་ལུ་ ཁོང་གི་ཧེ་མ་ལས་ ཁོ་ཕར་ ག་ལི་ལི་ལུ་བྱོན་དོ་ཟེར་སླབ་བྱིན་ ཁོ་གིས་ཧེ་མ་ཁྱེད་ལུ་གསུངས་དོཝ་བཟུམ་སྦེ་ ཁོ་ལུ་ཕར་མཇལ་འོང་ཟེར་གསུངས་ནུག 8དེ་ལས་ཁོང་སྒྱིད་ཐག་འདར་ཏེ་ དུར་ཁུང་ནང་ལས་ཐོན་ཏེ་བརྒྱུགས་སོང་ནུག་ དེ་ལས་ ཁོང་གནམ་མེད་ས་མེད་འདྲོགས་ཏེ་ གཞན་ལུ་ག་ནི་ཡང་མ་སླབ་པས།།

ཡེ་ཤུ་གིས་ མཱིར་ཡམ་མག་ད་ལཱེན་ལུ་ མཇལ་ཁ་གནང་ཡོད་པའི་སྐོར།

9ཡེ་ཤུ་ བདུན་ཕྲག་གི་ཉིནམ་དང་པའི་དྲོ་པ་ཧ་སག་སྟེ་ སྐུ་གསོན་པོ་སྦེ་ལྷོངས་པའི་ཤུལ་ལས་ མཱིར་ཡམ་མག་ད་ལཱེན་ ཟེར་མི་ཧེ་མ་ཡེ་ཤུ་གིས་ འདྲེ་གདོན་བདུན་བཏོན་བདའ་མིའི་ཨམ་འདི་ལུ་ མཇལ་ཁ་གནང་ནུག 10ཡེ་ཤུ་གི་ལྟོ་ཚང་ཚུ་མྱ་ངན་འབད་སྔུ་སྡོདཔ་ད་ མཱིར་ཡམ་སོང་སྟེ་ ཁོང་ཆ་ཁྱབ་ལུ་ཁ་འཐེན་སླབ་བྱིན་ནུག 11ཡེ་ཤུ་སྐུ་གསོན་པོ་སྦེ་བཞེངས་ཏེ་ མཱིར་ཡམ་དང་མཇལ་ནུག་ཟེར་གོ་རུང་ ཁོང་གིས་མོ་ལུ་བདེན་འཛིན་མ་རེ་བས།།

ཡེ་ཤུ་གིས་སློབ་མ་གཉིས་ལུ་མཇལ་ཁ་གནང་བའི་སྐོར།

12དེའི་ཤུལ་ལས་ སློབ་མ་གཉིས་གཡུས་ཁར་འགྱོཝ་ད་ ཡེ་ཤུ་སྐུ་གཟུགས་མ་འདྲཝ་སྦེ་གཞན་ལུ་འགྱུར་ཏེ་ ཁོང་དང་མཇལ་ནུག 13ཁོང་གཉིས་ལོག་སོང་སྟེ་ལྟོ་ཚང་ཚུ་ལུ་སླབ་ད་ ཁོང་གིས་བདེན་འཛིན་མ་རེ་བས།།

ཡེ་ཤུ་གིས་སློབ་མ་བཅུ་གཅིག་ལུ་མཇལ་ཁ་གནང་བའི་སྐོར།

14སློབ་མ་བཅུ་གཅིགཔ་བཞེས་སྒོ་ཟ་སྡོདཔ་ད་ ཡེ་ཤུ་ཁོང་སྡོད་ས་བྱོན་ཏེ་ ཁོ་གིས་ཁོང་ལུ་ཚོགས་བརྡ་གནང་ནུག་ ག་ཅི་སྨོ་ཟེར་བ་ཅིན་ ཁོང་དད་པ་མ་བསྐྱེདཔ་མ་ཚད་ མི་གཞན་གྱིས་ཁོ་སྐུ་གསོན་པོ་སྦེ་ལོང་སྟེ་ ང་བཅས་ཀྱིས་མཐོང་ཅི་ཟེར་སླབ་རུང་ ཁོང་གིས་བདེན་འཛིན་མ་རེ་བས་ ག་ཅི་སྨོ་ཟེར་བ་ཅིན་ ཁོང་སེམས་སྲ་ཀྲག་འབད་ནི་དེ་གིས་ཨིན་མས། 15དེ་ལས་ཁོ་གིས་སློབ་མ་ཚུ་ལུ་ འཛམ་བུ་གླིང་གི་ས་ཆ་ག་ར་ནང་སོང་སྟེ་ མི་རིགས་ག་ར་ལུ་གཏམ་བཟང་བཤད་དེ་སླབ་བྱིན། 16དད་པ་བསྐྱེད་དེ་ཁྲུས་གསོལ་ཞུ་མི་འདི་ཚུ་གིས་ཐར་པ་ཐོབ་འོང་ དེ་འབདཝ་ད་ དདཔ་མ་བསྐྱེད་མི་འདི་ལུ་ཆདཔ་བཀལ་འོང་། 17དད་པ་བསྐྱེད་མི་ཚུ་ལུ་རྟགས་མཚན་མ་འདྲཝ་སྟོན་ཚུགསཔ་སྦེ་མཛད་གནང་འོང་ འདི་ཚུ་གིས་ངེ་གི་མིང་ནང་ལུ་ འདྲེ་གདོན་བཏོན་བདའ་ཚུགསཔ་ ཁ་གསརཔ་མ་འདྲཝ་ཚུ་སླབ་ཚུགསཔ། 18སྦུལ་ལག་པར་ལེན་ཚུགསཔ་ དུག་གདུག་དྲགས་འཐུང་རུང་ མི་འདི་ལུ་གནོད་མི་ཚུགས་ དེ་ལས་ནདཔ་གུ་ལགཔ་བཀལཝ་ད་ ནདཔ་དྲགཔ་བཟོ་ཚུགསཔ་ཟེར་གསུངས་ནུག།

ཡེ་ཤུ་ཞིང་ཁམས་ལུ་འཐུ་བསྣམས་པའི་སྐོར།

19དེ་ཚུ་ག་ར་ཁོང་ལུ་གསུངས་ཚརཝ་ད་ གཙོ་བོ་ཡེ་ཤུ་ཞིང་ཁམས་ལུ་འཐུ་བསྣམས་ཏེ་ དཀོན་མཆོག་གི་ཕྱག་གཡས་ཁ་ཐུག་ལུ་བཞུགས་ནུག 20སློབ་མ་ཆ་ཁྱབ་འདི་ཁ་ལས་ལོངས་སོང་སྟེ་ ལུང་ཕྱོགས་ག་ར་ནང་གཏམ་བཟང་འདི་བཤདཔ་ད་ གཙོ་བོ་ཁོང་དང་མཉམ་ཕྱག་ལཱ་མཛད་དེ་ རྟགས་མཚན་མ་གཅིགཔ་ལེ་ཤ་ བཏོན་པའི་ཐོག་ལས་ གཏམ་བཟང་འདི་བདེན་པ་སྦེ་སྟོན་ཚུགས་ནུག། །།

Currently Selected:

མཱར་ཀུ་ལེའུ་ 16: dzoD

Highlight

Copy

Want to have your highlights saved across all your devices? Sign up or sign in

Learn More About རྫོང་ཁ་