Roka 6
6
Ai‑ka Ayo sabado hidi amane
1Sabado one‑ya Yeso hika mai da‑daba mai eyehe fadara‑ya mai tokofarama, tiriko tati‑ya mai bakakasa, mai yahi‑ya mai wikohikawaha, mai hikabameteni.
2“Hini yamata ihi sabado‑ya tiriko tati‑ya dai bakakasiti? Sabado‑ya yama dai a‑ani amani.” Fariseo mai ati nameteni.
3Yeso ati yanane,
“Dafi tamine dai kadikaterini? Dafi, hika mai eyehe toke, mai fimi nafemetemoneni.
4 # 6:4 Dafi hika mai eyehe Deoso‑ka yama‑bone‑ya mai da‑daa mai tohi awirametemoneni. Deoso‑ka baho‑ya mai kaba, Deoso yawi awirematamonane. Deoso‑ka yobe‑ya Dafi tokiyome, Deoso‑ka baho‑ya yabe, baho‑ya towakame, hika mai eyehe baho‑ya kabematamonane. Deoso‑ka yama hani ati ihi Deoso‑ka baho‑ya mai one kabaterani. Deoso‑ka yama‑bone‑ya mai da‑daa mai hikababisateni.
5Dai‑ka Ayo neme‑ke sabado hidi amane.” Yeso ati nematane.
Yehe moikaname‑ya nakitame
6Sabado one‑ya Deoso‑ya mai hi‑hiyara‑ke yobe‑ya Yeso tokiyome, mai‑ya kanawatomatane. Yehe kanike moikaname itarimatane.
7Fariseo mai toha, Mose‑ka yama hani ati‑ya mai ka‑kamina mai toha, mai na, Yeso‑ya mai kakatoma,
“Maki‑ya nakitameba awane. Sabado‑ya hinakitameya, ai weenebonane.” Mai atibodi ati nameteni.
8Mai atibodi ati‑ya Yeso wato, yehe moikaname‑ya haane,
“Tiwaamisiya, oda teberi‑ya tiwaahi.” Ati nematane.
Waamise, mai noki‑ya waimatane.
9Yeso mai‑ya hiyare,
“Eme Mose‑ka yama hani ati titi? Sabado‑ya ai owa ai nakitama, ai ati kasiramone dai ati na awini. Sabado‑ya ai owa ai nanahababisa, ai sibabisaramone dai ati na awini. Dai ati yananahi.” Yeso ati nematane.
10Mai nafi‑ya kakatomi bide tohe, maki‑ya haanamatase,
“Tiwa yehe feotokanahi.” Yeso ati ne,
Yehe feotokaname, yehe amosawamematane.
11Ene mai hiawe, mai yawi kita,
“Yeso maanamare, hini yamata‑nima ai nibati?” Mai ibi hiyara mai ati nameteni.
Mai 12 kana mai‑ya kadike
12Makobote adami webote‑ya Yeso tokomorosematane, Deoso‑ya hiyarebonaha. Yama soki‑ya hiyaranabematane.
13Mahi kaki‑ya hika mai da‑daba mai‑ya haane, mai one 12 kana mai‑ya kadikematane, hika yo‑yose mai bonehe.
14Mai‑ya kadike: i‑di Simaho tohe, Yeso ati ene Simaho oni Bedoro tohawahene. Simaho sohori i‑di Anidere‑ya fama, i‑di Tiyako, i‑di Yowaho, i‑di Firibi, i‑di Batoromeho,
15i‑di Mateo, i‑di Tome, Aofio bidi i‑di Tiyako, i‑di Simaho Seroti,
16Tiyako bidi i‑di Yoda toha, i‑di Yoda Isikari·oti toha, mai na, mai‑ya Yeso kadikematane. Yoda Isikari·oti i‑di Yeso‑ya kahabanematane.
Yeso mai‑ya kanawato
17Yeso hika mai da‑daba mai eyehe kamatase, yama amosi‑ya mai nahomiya, Yeso‑ya mai da‑daba mai one dama naha, mai one kobonamake, Yodeya‑ka mai one toha, Yerosare‑ka mai one toha, faha webote widi‑ka mai one toha, mai nameteni.
18Yeso ati‑ya mai mitabone mai toha, Yeso mai hinakitamabone mai toha, mai na, mai sawemeteni. Madi towe mai sawi‑ka mai‑ya Yeso nakitamahari nematane.
19Yeso borone‑ya mai nafi boyoni nofa, mai kiyana Yeso‑ya mai boyona, mai kitamameteni.
Mai nafi‑ya Yeso kanawato
20Yeso hika mai da‑daba mai‑ya kiine, mai‑ya hiyare,
“Yama dama dai nokotonira Deoso dai‑ya kasomebona, Deoso ai nafi‑ka hidi kitabote tohawahe‑ya dai sawiwahaboneni.
21Dai fime Deoso dai‑ya kasomebona, dai korimanawahaboneni. Dai ohina Deoso dai‑ya kasomebona, dai ya‑yainawahaboneni.
22Dai‑ka Ayo neme‑ke‑ya dai nofa ihi dai‑ya mai kako, dai‑ya mai kananihe, dai‑ya mai wee na, Deoso dai‑ya kasomebona,
23 # 6:23 Yodeo mai ya‑yaini nafiya, mai yoranimisateni. dai ya‑yainahi. Dai ya‑yaini ihi dai yoranimisahi. Neme‑ya dai ene manakone nafe dai kayafaboneni. Hibati‑ya Deoso ati‑ya mai mi‑mita‑mete mai‑ya mai‑ka idi mai kakomete, dai‑ya mai kakomakineni.
24Ka! Dai‑ka yama dama‑ya dai nokotonihe dai‑ka yama hawa toha, neme‑kaya dai‑ka yama wadaraboneni.
25Ka! Dai korimana dai toha yamata dai nokotonihe dai fimiwahaboneni. Hibayata dai ya‑yaina dai toha, dai ohinabone, dai ohini nafiteboneni.
26 # 6:20-26 Hibayata‑ka yama dai nokotoniriyahi. Bofe‑ya ai sawi yabora, Deoso‑ka yama dai nokotonibisahi. Ka! Dai‑ya mai nafi nofa dai noko wadahi. Deoso ati tamine‑ya keyehe‑ya mai hirinamete mai‑ya mai‑ka idi mai nofameteni.
Dai‑ya mai ka‑kako mai‑ya dai nofahi
27Owati dai mitahi. Dai‑ya mai nofara mai dai nofiyahi. Dai‑ya mai ka‑kako mai dai kasomiyahi.
28Dai‑ya mai yoko mai‑ya dai kasomiyahi. Dai‑ya mai bisina mai tamine dai hiyarahi, Deoso mai‑ya kasomebonaha.
29Dai ebete‑ya batanariya, dai ebete fami‑ya batanariho. Dai‑ka bora neme‑ya mai kayafa, makobote bora one‑ya mai kayafamakiya, dai yawariyahi.
30‘Oka yama honita‑ba daatinahi.’ Mai ati na,
mai‑ka yama‑ba dai daaniyahi. Dai‑ka yama mai hibote‑ya dai haatonamakiriyahi.
31Hini tiwa‑ya tinofi‑nima mai one tinofahi. Hini tiwati koboni‑ka mai‑ya tikasomiyahi.
32Dai‑ya mai no‑nofa mai‑ya dai nofa, mai one‑ya dai nofariya, dai ene amosi awirani. Mai ati kasira hini mai one‑ya mai nofateni.
33Dai‑ya mai ka‑kasoma mai‑ya dai kasomiya, mai one‑ya dai kasomi awiriya, dai ene amosarani. Mai ati kasira hini mai one‑ya mai kasomateni.
34Dai‑ka yama‑bone mai daanamatasabone mai‑ya yama dai daa, yama mai daanamarabone mai‑ya yama dai daani awiriya, dai ene amosarani. Mai ati kasira hini mai one‑ya yama mai daateni, yama mai daanamakebonehe.
35Dai‑ta dai‑ya mai kako‑ya mai dai nofahi. Mai‑ka yama‑bone dai daana, manakone dai haatonamakiriyahi. Makobote Deoso dai‑ka yama manakone‑ya daanibisebonane. Haa‑nima dai niya, Deoso kitabote ene‑nima dai ene naboneni. Deoso ati‑ya mai nofara mai toha, hini mai‑ya mai nokotonihe mai toha, mai na, mai‑ya Deoso kasomatene.
36Ai‑ka Abi neme‑ke yawa kanibote re, ai‑ka Abi ene‑nima dai ene nahi.
Mai dai kakoriyahi
37Mai‑ya dai kakoriyahi. Mai dai nofiya, dai‑ya mai kakoraboneni.
“Towe amatini.” Dai ati riyahi.
“Towe amatini.” Dai ati niya,
“Towebisa dai amani.” Mai ati naba awineni.
Mai‑ya dai ati somawamiya, dai‑ya mai ati somawamaboneni.
38 # 6:37-38 Yeso hini ati‑ya kemo, Deoso tamine‑ya hiyare, ai ene amosa manakone Deoso daanebona, manakone fiyakanebonane. Mai‑ka yama‑bone‑ya dai daana, dai‑ka yama‑bone‑ya mai daanaboneni. Dai‑ka yama‑bone midikani amosiya, kisanisa, wiye kibawahabone, kibi fiyakanaboneni. Yama‑ya dai daani‑nima yama‑ya dai‑ya mai daanaboneni.” Yeso ati nematane.
39 # 6:39 Fariseo mai tosaware, mai ihi mai one tosawarihari teni. Mai‑ya kanawato, mai‑ya hiyare,
“Mai noki wadikimara hawi‑ya mai ibi yofikiterani. Mai noki wadikimara mai fami towaka, mai ibi yofikanabone mai ati na, hodi‑ya mai fami sonirisikimaboneni.
40Ai‑ya ka‑kanawato yama‑ya wato ba‑basi ne. Ai‑ya kanawato hawa toheya, ati‑nima ai ati naboneni.
41Dai owa ene dai kadiki nafimariyahi. Hini dai ene dai kadiki ba‑basi nibisahi. Awa hibakori dai owa noko‑ya boka, awa ibe dai noko‑ya foyana, awa hibakori‑ya dai bikanamaterani, awa ibe dai noko‑ya foyaro.
42‘Soho, awa hibakori tiwa noko‑ya boka, soba·onamaboneni.’ Titerani, tiwa noko‑ya awa ibe foyaro.
Mai ihi towe bide toha mai‑ya tikanawatoriyahi, tiwa ene towe ba‑basi naro. Towe amatini. Tiwa noko‑ka awa ibe sobatinamahi. Tiwa noko amosawamiya, mai‑ka awa hibakori sobatinamaneni. Tiwa ene amosawami bahiya, mai one‑ya tikanawatohi.
Awa bono hini ade‑ya yanateni
43Awa bono amosa‑ya awa bono towe yanarihi, awa bono kabara‑ya awa bono amosa yanarihi, teni.
44Bisina‑ya fiko yanarihi, atiwa‑ya ofa yanarihi, teni. Fara‑nima, mai ihi dai awiya, mai atibodi dai watoteni.
45Mai atibodi towe tohiya, mai ati towe tohaboneni. Mai atibodi amosiya, mai ati amosaboneni. Ai atibodi ati‑nima ai ati yanateni.
Yobe‑ya mai wa‑wama
46‘Ayo, oka hidi amatini.’ Hiniya dai ati niya,
owati‑ya dai tokadabara, owa‑ya dai ayoriyahi.
47Owa‑ya mai kama, owati‑ya mai mita, owati‑ya mai tokadaba na, haa‑nima mai teni.
48Ai owa hika yobe‑bona‑ya wamanane. Hika yobe ewene hodone kowi‑ya, yati webote mese‑ya yobe ewene waari, yobe hawa toheya, faha fowe nafe‑ya yobe wafi, yobe ewene hodone kowi, yobe wai kitane.
49 # 6:47-49 Faha fowe nafe Yeso ai ene‑ya kadikebona tamine amane. Yeso ati ai tokadaba ai ene‑ya Yeso kadikeya, ai‑ya weeni awirebonane. Yeso ati mai tokadabara mai ihi‑ya Yeso kadikeya, mai‑ya weeni kitebonane. Owati‑ya mai mitiya, owati‑ya mai tokadabara, haa‑nima mai nibisaboneni. Ai owa hika yobe‑bona‑ya wami mese‑ya wamane. Yobe hawa toheya, faha fowe nafe‑ya yobe wafi, yobe sone, yobe nafi aba kanibote nane.” Yeso ati nematane.
Currently Selected:
Roka 6: jaaNT
Highlight
Share
Copy
Want to have your highlights saved across all your devices? Sign up or sign in
