Mateo 23
23
Yama‑ya mai watamone
1Mai dama mai toha, Yeso‑ya oda da‑daba oda toha na, oda‑ya hiyare,
2“Fariseo mai toha, Mose‑ka yama hani ati‑ya mai ka‑kamina mai toha na, Mose‑nima mai na, dai‑ka hidi mai amani.
3Mai ati dai tokadabiyahi. Mai ati‑ta dai tokadababisa, mai ihi‑nima dai ene riyahi. Hini mai ati‑nima mai ihi ni awirani.
4Yamasi kiba kanaha‑ya mai yaditona, mai one weyehinabonehe. Hini mai aboni yama‑ya mai weyeterani. Fara‑nima mai ati dami‑ya mai one tokadababone mai ati na, hini mai ati‑ya mai tokadabi awirani.
5 # 23:5 Yama hani wiye bide‑ya Yodeo mai sakoteni. Mai‑ka yama hani wiye ba‑basi na‑ya mai sako, mai‑ka bora fowari kawiya yabona,
‘Oda ene‑ya mai awa, oda‑ka bora‑ya mai awa niya, oda‑ya mai nofaboneni.’ Mai atibodi ati teni.
6Dai yorotokana, dai tafabone‑ya mai sawe, kadera amosabisa‑ya mai nahore, Deoso‑ya mai hi‑hiyara‑ke yobe‑ya mai sawe, kadera amosa‑ya mai nahoriteni, mai dai kahiyarabonehe.
7Oda‑ya ka‑kanawato webote amatini dai ati na, dai ati ene mai ya‑yaiteni. Dai‑ya mai nokotoniteni, mai dai kahiyarabonehe.
8Dai‑ya mai haana, ‘ka‑kanawato webote’ mai ati niya,
‘Haa‑nima dai ati riyahi.’ Dai ati nahi.
Fara hinama dai amani. Dai‑ya ka‑kanawato webote yokana oharine. Dai ibi haaniya, ‘ayo’, ‘soho’ dai ati nibisahi.
9Ai owa dai hiyariya,
‘Abi amosabote amatini.’ Dai ati riyahi.
Ai‑ka Abi amosabote yokana neme‑ya winane.
10 # 23:10 Wami hidi, tabora hidi mai na, mai tamine tohara. Ai atibodi‑ka hidi tamine amane. Ai atibodi‑ka hidi i‑di Deoso‑ka Ka‑kadika amane. Dai ibi hiyariya,
‘Oka hidi amatini.’ Dai ati riyahi,
dai‑ka hidi yokana ohari, i‑di Deoso‑ka Ka‑kadika amane.
11Dai‑ka hidi webote haa‑nima naho, mai nafi‑ya kasomaho.
12Hini mai‑ya mai kahiyara Deoso ene mai mai hinofaraboneni. Ai‑ya ai nokotonira, Deoso ai‑ya kahiyarabisebonane.
13Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Neme‑ke ai nafi‑ka hidi kitabote tohawahebona‑ya dai sawirabone, mai one sawebone mai ati na mai‑ya dai ati barinineni.
14Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Fana maki abe mai‑ka yobe‑ya dai kayafateni. Deoso‑ya dai hiyari yaboteni, dai‑ya mai awabonehe. Deoso dai‑ya weeni kitabisebonane.
15Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Tabora dami‑ya dai toka, hawi‑ya dai toka, faha kowani‑kaya dai toka, dai teni, dai‑nima mai one nawahabonehe. Satanasi ati dai nofa, dai ati ene Satanasi ati‑ya mai nofi ba‑basi neni.
16Ka! Yama‑ya dai watora mai dai kanawatoteni. Dai ene manakone wadani. Deoso‑ka yobe oni‑ya mai hirina,
‘Mai‑ka keyehe hini tohiya.’ Dai ati teni.
Deoso‑ka yobe‑ka oro oni‑ya mai hirina,
‘Dai ati‑nima dai nahi.’ Dai ati teni.
17Yama‑ya dai watoterani. Deoso‑ka yobe amosi ba‑basi, Deoso‑ka yobe‑ka oro amosi bi‑bidi teni. Deoso hini hika yobe‑ya kayawe, oro‑ya Deoso kayawi awirane.
18Deoso‑ka bani ai da‑daa‑ka mesa oni‑ya mai hirina,
‘Mai‑ka keyehe hini tohiya.’ Dai ati teni.
Deoso‑ka bani‑bona mesa‑ya sookari, bani oni‑ya mai hirina,
‘Dai ati‑nima dai nahi.’ Dai ati teni.
19Yama dai watoterani. Deoso‑ka mesa‑ya yama sookare‑ya Deoso kayawatene, mesa ihi. Bani‑ya Deoso kayawatere, hini hika mesa‑ya bani sookari‑ya kayawatene. Mesa amosi ba‑basi nibisa, mesa‑ya sookari amosi bi‑bidi nane.
20Deoso‑ka mesa oni‑ya mai hiri, Deoso‑ka bani oni‑ya mai hirina mai‑nima mai teni.
21Deoso‑ka yobe oni‑ya mai hiri, Deoso oni‑ya mai hirina mai‑nima mai teni.
22Deoso tabaro oni‑ya mai hiri, hidi‑ka kadera oni‑ya mai hiri, Deoso oni‑ya mai hiri na mai‑nima mai teni.
23Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Dai‑ka yamata ke‑ketehe kote‑ya Deoso‑ya dai daateni. Deoso ati owa dai tokadabara,
‘Mai ihi‑nima mai manakone daatinahi. Mai kitara mai tikasomahi. Tiwati‑nima tinahi.’ Deoso ati nematane.
Ati amosabote amane. Ati dai tokadabaterene. Deoso ati amosabote dai tokadabe, makobote Deoso‑ka yama‑bone dai daaniya, dai sibarineni.
24Yama dai watoterani. Yama hani ati i‑isi na dai nokotoni kita, tamine yokana‑ya dai mitaterani.
25Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Keneko mese dai sorona, keneko doro dai awara‑nima dai ene na, mai noki‑ya dai ene amosabisa, dai atibodi towe tohabisineni. Yama‑ya mai bo‑boti mai toha, hini mai‑ya mai no‑nokotoni mai toha na, mai atibodi ati‑nima dai atibodi ati neni.
26Fariseo dai toha, yama‑ya dai watora, keneko doro dai namosi baha, keneko mese dai namosahi. Ai atibodi amosi baha, ai ene amosahariteni.
27Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasiroteni. Dai ene manakone wadani. Ai temene mese‑ya mai tihitakana‑nima dai neni. Ai temene mese amosa, bodi‑kaya ai tone tohabisineni.
28Dai‑ya mai awa, dai atibodi amosamone mai ati na awineni. Dai atibodi towe hinama toha, mai ati‑nima dai atibodi terani.
29Ka! Mose‑ka yama hani ati‑ya dai ka‑kamina dai toha, fariseo dai toha na, dai ati kasironeni. Dai ene manakone wadani. Deoso ati‑ya mai mi‑mita‑mete mai tame yoberi‑ya dai wa‑wama, Deoso ati‑ya mai tokadabamaro mai tame‑ya yama amosa dai nawadateni.
30‘Hibati‑ya oda sawemete‑mani, oda‑ka idi ene‑nima oda ene ra nemeteni. Hibati‑ya oda sawemete‑mani, Deoso ati‑ya mai mi‑mita‑mete mai oda nanahabara nemeteni.’ Dai ati na, fara haa‑nima dai ati niya,
31‘Deoso ati‑ya mai mi‑mita‑mete mai‑ya oda‑ka idi nanahabematane.’ Dai ati nineni.
32Fara dai‑ka idi ene‑nima dai ene naboneni.
33Maka ihi‑nima dai ene na, maka yokana‑nima dai na, dai ene Deoso dai‑ya sarikanebonane.
34Deoso ati‑ya mai mi‑mita mai toha, yama‑ya mai wa‑wato mai toha, Mose‑ka yama hani ati‑ya mai ka‑kamina mai toha na, mai oyoseboneni. Oka yo‑yose mai one dai nanahaba, mai one awa‑ya dai nawaana naboneni. Deoso‑ya mai hi‑hiyara‑ke yobe‑ya oka mai one dai kosi, mai one dai kananihi naboneni.
35Dai‑ka idi mai ihi‑nima dai ene na, mai ihi nafi yorotokawama‑nima dai ene manakone naboneni. Oka mai ihi amosa mai‑ya dai‑ka idi mai nanahabameteni. Abeo‑ya nanahabi bahe, mai dami‑ya mai nanahabamaki, Barakiya bidi i‑di Sakariya‑ya Deoso‑ka yobe‑ya dai‑ka idi mai nanahaba nameteni.
36Owati amosa dai mitahi. Dai‑ka idi mai ihi yorotokana manakone‑nima dai ene manakone naboneni.
37Yerosare, tika mai ihi ohi·oneni. Tiwa‑kaya mai wi‑wina Deoso ati‑ya mai mi‑mita mai‑ya mai nanahabateni. Tika mai okasomabone ona, owati‑ya mai nofarani. Arakawa afe bodi‑ya bidi mai mookana, madi mai hikayawateni. Fara‑nima tika mai okayawabone ona, owa‑ya mai nofarani.
38Tika mai fawaniya, tika yobe honita tohawamebonane.
39Owati timitahi. Owa‑ya tika mai hiyara, eya mai ati naboneni.
‘Deoso tiwa‑ya yose, tiwa‑ya kasomayaho, oda ati nineni.’ Mai ati nabone,
mai ati ni awisari‑ya osawimatasaraboneni.” Yeso ati nemarine.
Currently Selected:
Mateo 23: jaaNT
Highlight
Share
Copy
Want to have your highlights saved across all your devices? Sign up or sign in
