Maroko 10
10
Ai honita wahawama tamine
1Makobote mai yananamatasa, Yodeya‑ya mai tokoma, Yodaho Faha kowani‑kaya mai towaka, mai one dama kobonamake, Yeso mai‑ya kanawatomarine. Haa‑nima Yeso ene ne, mai dama mai kobona mai‑ya kanawatotene.
2Fariseo mai one kamake, mai atibodi yama‑ya dika,
“Yeso ati amosareya, ati oda miteya, oda weenebonane.” Mai atibodi ati namaroni.
“Yeso, maki fadi‑ya nofamare, honita wahawamebona ati ne, sibakare?” Fariseo mai ati na,
3“Hini yamata‑nima Mose ati namatati?” Yeso ati nemarine.
4 # 10:4 Mai honita wahawamabone, kofeno‑ka yo‑yose‑ya mai haana, dokometo‑ya mai wamana, makobote mai honita wahawamateni. “‘Dai honita wahawamabone, dai‑ka yibote‑ka yama hani‑ba dai daaniya, dai honita wahawamiya, yama sibaraboneni.’ Mose‑ka yama hani ati nineni.” Fariseo mai ati namaroni.
5Yeso ati yananamatase,
“Ai‑ka idi mai habi kita ihi mai honita wahawamabone‑ka yama hani tamine‑ya i‑di Mose kanahanomatane.
6Yama yanakani‑ya maki toha, fana toha na‑ya i‑di Deoso wamanematamonane.
7‘Maki fana‑ya famebona, badi, madi mai na, mai‑ya dabamaterene.
8Maki fadi‑bone‑ya fame, mai aboni ohariteboneni.’ Deoso‑ka yama hani ati neni.
Mai fama mai aboni ohariwahani.
9Deoso ati ene mai aboni ohariwama, Deoso ene dai arabanahi. Mai honita wahawamariyahi.” Yeso ati nemarine.
10Makobote yobe doro‑ya mai tokiyoma, Yeso‑ya mai da‑daba fai‑ya mai hiyaramaroni, fai ati‑ya mai mitamatasabonehe.
11Yeso ati yanane,
“Maki hini ene honita wahawameya, fana one‑ya famawaheya, ene ati kasiro, hiniya siwanane.
12Fana hini ihi honita wahawamiya, makobote maki owa‑ya famawahiya, ihi ati kasira, hiniya siwaneni.” Yeso ati nemarine.
Madehe tati‑ya Yeso boyone
13Madehe tati‑ya Yeso boyonebona madehe‑ya mai kakama, Yeso‑ya mai da‑daba mai‑ya mai awa, mai‑ya mai ati barinamaroni.
14Yeso hika mai da‑daba mai ati‑ya mite, yawe, ati yanane,
“Madehe dai ati baririyahi. Madehe owati‑ya nofa, madehe‑nima mai na Deoso ai nafi‑ka hidi kitabote tohawahe‑ya mai saweboneni.
15Owati amosa dai mitahi. Madehe owati‑ya nofa, fara‑nima mai ni awiriya, Deoso ai nafi‑ka hidi kitabote tohawahe‑ya mai sawiraboneni.” Yeso ati nemarine.
16Madehe‑ya Yeso diwakane, mai tati‑ya yehe fori, mai‑ya hiyare,
“Deoso dai‑ya kasomebonane.” Yeso ati nemarine.
Mai yahi hone dama mai tamine
17 # 10:17 Ai abaterabone‑kaya: Deoso tabaro tamine amane. Tabora one‑kaya mai tokabone, mai yananiya, maki kanani kamaki, Yeso yowi‑ya yobati‑kaya wai, ati yanane,
“Ayo, amosabote amatini. Hini yamata‑nima obati, ai abaterabone‑kaya osawebonehe?” Maki ati nemarine.
18“Amosabote owa‑mone tina, ai owa amosabote wadaterene. Deoso‑ta amosabotebisa amane.
19Deoso‑ka yama hani ati tiwata, ati timitahi,
‘Ai owa tinahabarihi, mai one‑ka yibote ti·aharihi, yama tibotiriyahi, ai owa ene tamine‑ya keyehe‑ya hiritirihi, yamata‑ka kiro tamine‑ya keyehe‑ya hiritirihi tinahi. Abi, ami mai na, mai tinofabisahi.’ Yama hani ati nineni.” Yeso ati nemarine.
20“Ayo, Deoso‑ka yama hani ati‑nima oteni. Madehe ohi‑ya Deoso ati‑ya okadabateni.” Maki ati nemarine.
21Maki‑ya Yeso nofe, ati yanane,
“Tika yama ohare hasinineni. Tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nemarine.
22Yeso ati‑ya mite, noko yawe, atibodi a‑arire, tokomemarine. Hika yama dama toha, hika yama‑ya kayawemarine.
23Yeso kiinawame, hika mai da‑daba mai‑ya hiyare,
“Mai yahi hone dama toha, Deoso ai nafi‑ka hidi kitabote tohawahe‑ya mai dami sawiraboneni.” Yeso ati nemarine.
24Yeso ati‑ya mai mita,
“Ka!” Mai atibodi ati namaroni.
Yeso ati yananamatase,
“Oka madehe‑nima dai na, owati dai mitahi. Deoso ai nafi‑ka hidi kitabote tohawahe‑ya mai dami sawiraboneni.
25Akoye hodone‑ya kamero tokiyomaterene. Fara‑nima mai naboneni. Mai yahi hone dama Deoso ai nafi‑ka hidi kitabote tohawahebona‑ya mai dami sawiraboneni.” Yeso ati nemarine.
26Yeso ati‑ya mai mita, mai atibodi yama‑ya kadika,
“Ka! Ebeni‑ke sawibati?” Mai ati namaroni.
27Yeso mai‑ya nokotonihi, ati yanane,
“Hini ai ene ai sawiteraboneni. Deoso ene ai one sawibisaboneni. Deoso ene kitabotebisa amane.” Yeso ati nemarine.
28Bedoro ati yanane,
“Ayo, oda‑ka yama nafi towadakosa, tiwa‑ya oda honita dababisineni.” Bedoro ati nemarine.
29Yeso ati yanane,
“Owati amosa dai mitahi. Deoso ati amosabote tamine‑ya mai kaminabone, owati‑ya mai tokadaba na, fara ihi mai‑ka yama nafi‑ya mai tonawadakosa, mai ihi manakone wadaboneni. Mai‑ka yobe, mai‑ka fadara, mai‑ka ayo, mai‑ka asima, mai‑ka abi, mai‑ka ami, mai‑ka madehe, mai na, mai tonokosa, fara ihi mai manakone wadaboneni.
30 # 10:30 Mai abateraboneni: Deoso tabaro‑ya mai ya‑yaini fawaterabone tamine amani. Mai ihi amosa 100 kana manakone‑nima manakone naboneni. Bofe‑ya mai winanasa niya mai ihi amosa manakone kote‑ya mai kayafaboneni. Yobe toha, mai‑ka ayo mai toha, mai‑ka asima mai toha, mai‑ka ami mai toha, mai‑ka madehe toha, fadara toha na‑ya, mai one kayafaboneni. Bofe‑ya mai winanasa niya yama towe‑ya mai one kayafahare, mai‑ya mai one bisinaboneni. Makobote mai abateraboneni.
31Bofe‑ya hidi webote mai toha Deoso tabaro‑ya mai bi‑bidi na mai tohabisaba awineni. Bofe‑ya mai bi‑bidi na mai toha Deoso tabaro‑ya hidi mai ba‑basi na mai tohawahaba awineni.” Yeso ati nemarine.
Yeso abebona, hini tamine‑ya hiyare
32Yerosare hawi‑ya mai yakana, Yeso dai tohe, nowati‑ya mai dama mai tokomakemaroni. Yerosare‑ya Yeso tokebona‑ya mai one dama mai awa, mai‑ya yama yofinamaroni. Hika mai da‑daba mai atibodi yama‑ya kadikamaroni. Mai dama ati mai himitarebona hika mai 12 kana mai‑ya haane, mai‑ya hiyare,
33“Yerosare‑ya ai tokabone, ai koboniya, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha na, dai‑ka Ayo neme‑ke‑ya mai watiya, mai ati hinahabeya, kofeno‑ya mai hiwakamebonane.
34Owa‑ya mai hahakana, owa‑ya mai fironaboneni. Owa‑ya mai bisiniya, owa‑ya mai nanahababoneni. Dai amoni 3 kani‑ya dai‑ka Ayo neme‑ke kitamebonane.” Yeso ati nematane.
Hidi ba‑basi nebona tamine
35Sebedeo bidi i‑di Tiyako, Tiyako sohori i‑di Yowaho‑ya fame, Yeso‑ya mai hiyara,
“Ayo, oda ati timitahi. Yama oda haanabone, oda ati tinofakaribana?” Mai ati nameteni.
36“Yama dai nofa tamine omitabone, owa‑ya dai kaminahi.” Yeso ati nematane.
37“Oda nafi‑ka hidi kitabote tihawahiya, tika yo‑yose oda fama oda kiti na‑nafi nabone, tiwa yehe kanika‑ya oda owa itari, tiwa yehe sayo‑kaya oda owa itari nebonane. Tiwati ihi haa‑nima oda nahi.” Mai ati nameteni.
38“Yama dai haana dai wato awirini. Yama ofe‑bone dai fawa, owa‑ya mai habanirisabone, dai‑ya mai habanirisanibana?” Yeso ati nematane.
39 # 10:38-39 “Yama ofe‑bone” toha “Owa‑ya mai habanirisabone” toha na, Yeso ati ne, Yeso‑ya mai bisi, Yeso‑ya mai nanahaba nabone tamine‑ya Yeso hiyarematamonane. “Hehe, haa‑nima oda naboneni, sibarini.” Mai ati nameteni.
“Yama ofe‑bone‑nima dai fawamakeboneni. Owa‑ya mai habanirisi‑nima dai‑ya mai habanirisamakeboneni.
40Deoso ati ene owa mano kanika‑kaya ai owa itari, owa mano sayo‑kaya ai owa itari nebona, mai oni hawa tohineni. Fara mai i‑itari‑bone‑ka dai‑ya daa·oteraboneni.” Yeso ati nematane.
41I‑di Tiyako, i‑di Yowaho mai ati tamine‑ya mai one 10 kana mita, mai yawameteni.
42Yeso hika mai da‑daba mai‑ya haane, mai‑ya hiyare,
“Bara mai‑ka hidi mai one‑ya mai kasomaterani. Mai ati ihi mai mai hinarifateni.
43Mai‑nima dai riyahi. Hidi tihabone tina, dai one tikasomabisahi.
44Mai‑ka webote tihabone tina, mai nafi tikasomabisahi.
45Dai‑ka Ayo neme‑ke‑nima dai nahi. Owa dai narifara, dai‑ya onarifabisateni. Mai dama mai ihi manakone‑ya onahababone, o·ababoneni.” Yeso ati nematane.
Batimeo tamine
46Sidadi oni Yeriko‑ya mai kobona, Yeriko‑ya mai fiyakanabone, Yeso hika mai da‑daba mai toha, mai one dama mai toha na, Yeriko‑ya mai fiyakani yanatoniya, maki ati yananemarine. Maki noko towe tohe, oni Batimeo tohe, badi oni Timeo toha nemarine. Batimeo hiniya mai‑ka yinero‑ya haane, hawi fowari‑ya itemarine.
47Mai one ati yanana,
“Yeso Nasare‑ke ai‑ya fiyakanane.” Mai ati namaroni.
Mai ati‑ya Batimeo mite, ati yanane,
“Yeso, oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati ne,
48“Tiwati fawanahi.” Mai dama mai ati namaroni.
Batimeo haani kitawahe,
“Oda‑ka hidi amatini. I‑di Dafi‑ka nodi amatini. Owa tikasomahi.” Batimeo ati nemarine.
49Yeso maaname, ati yanane,
“Dai haanaho.” Ati ne,
maki‑ya mai haana, mai ati yanana,
“Ya‑yaitinahi. Tiwaamisahi. Yeso tiwa‑ya haane.” Mai ati namaroni.
50Yoranimise, hika bora one mese‑ka‑ya sotatonemarine, Yeso‑ya tokomakibonaha.
51Maki‑ya Yeso hiyare,
“Hini yamata‑ya tiwati koboniti?” Yeso ati ne,
“Ayo, owa noko amosawamabone, onani.” Batimeo ati nemarine.
52“Sibarini, tika yobe‑ya tikamahi. Owati tinofa ihi tiwa noko amosawamawahineni.” Yeso ati nemarine.
Batimeo noko amosawame, yama‑ya awawahe, Yeso‑ya sawiwahemarine.
Currently Selected:
Maroko 10: jaaNT
Highlight
Share
Copy
Want to have your highlights saved across all your devices? Sign up or sign in
