Maroko 3
3
Maki yehe moikaname
1Deoso‑ya mai hi‑hiyara‑ke yobe‑ya Yeso tokiyome, maki yehe moikaname itari‑ya Yeso awemarine.
2Yeso‑ya mai ka‑kako Yeso‑ya mai kakatomamaroni.
“Maki‑ya nakitameba awane. Sabado‑ya hinakitameya, ai weenebonane.” Mai atibodi ati namaroni.
3Maki‑ya Yeso hiyare,
“Tiwaamisiya, oda teberi‑ya tiwaahi.” Yeso ati ne,
maki kamemarine.
4Yeso mai‑ya hiyare,
“Eme Mose‑ka yama hani ati titi? Sabado‑ya ai owa ai nakitama, ai ati kasiramone dai ati na awini. Sabado‑ya ai owa ai nanahababisa, ai sibabisaramone dai ati na awini. Dai ati yananahi.” Yeso ati ne,
ati‑ya mai mita, mai ati yananami awiramaroni.
5Fariseo mai atibodi ati amosara, mai atibodi ati‑ya Yeso mite, yawe, mai nafi hiwakatome, maki‑ya hiyare,
“Tiwa yehe feotokanahi.” Yeso ati ne,
Yehe feotokaname, yehe amosawamemarine.
6Yeso ene‑ya fariseo mai awa, mai yawi kita, i‑di Erodi‑ka mai one‑ya mai hiyarabone mai tokamaroni, Yeso‑ya mai nanahababonehe.
Mai dama mai‑ya Yeso kanawato
7Yeso hika mai da‑daba mai eyehe Karireya‑ka faha widi‑ya mai tokamaroni. Karireya‑ka mai toha, Yodeya‑ka mai toha,
8Yerosare‑ka mai toha, Idomeya‑ka mai toha, Yodaho Faha kowani‑ka mai toha, Tiro‑ka mai toha, Sidoho‑ka mai toha, mai na, Yeso ene kite tamine‑ya mai mita, mai dama mai tokomakemaroni.
9Yeso hika mai‑ya yose,
“Kanawa dai kakamahi. Mai dama mai ihi yama howatokani awirini. Kanawa dori‑ya ofoyiya, mai ohiyaraboneni.” Yeso ati nemarine.
10Mai kiyana mai dama Yeso‑ya mai boyona, mai kitamamaroni. Mai kiyana mai dama mai kamakitasa, mai one‑ya mai keweni kita, Yeso‑ya mai boyonabonehe.
11Madi towe ai one‑ya mai foya, Yeso‑ya mai awa, madi mai ihi mai baki‑kaya mai wiya, mai ati yanana,
“Deoso Bidi amatini.” Mai ati na, mai ati damamaroni.
12Madi towe mai ati‑ya Yeso mite, ati yanane, ati kite,
“Owa tamine dai kaminariyahi.” Yeso ati ne,
ati damaharimarine, madi mai‑ya hiyareri.
Mai 12 kana mai‑ya Yeso kadike
13Adami webote‑ya Yeso tokomorose, hika mai‑bone mai‑ya haane, mai tokomakemaroni.
14Mai 12 kana mai‑ya Yeso kadike, fai‑ya mai dababone, Deoso ati‑ya mai kaminabonehe.
“Oka yo‑yose mai amani.” Yeso ati nemarine.
15Yeso ati ene madi towe mai‑ya mai kananiheboneni.
16Mai‑ya kadike, mai oni‑ya haanawahemarine. I‑di Simaho tohe, Yeso ati ene Simaho oni Bedoro tohawahemarine.
17Sebedeo bidi i‑di Tiyako, sohori i‑di Yowaho‑ya fama ne mai‑ya kadike, mai oni yati‑bone‑ya Yeso haanemarine. Mai oni yati Boanerekesi toha, ai ati‑ya Bahi ati‑nima dai nineni.
18I‑di Anidere, i‑di Firibi, i‑di Batoromeho, i‑di Mateo, i‑di Tome, Aofio bidi i‑di Tiyako, i‑di Tadeo, i‑di Simaho Seroti,
19i‑di Yoda Isikari·oti, mai na, mai‑ya Yeso kadikemarine. Yoda Isikari·oti i‑di Yeso‑ya kahabanawahemarine.
Beosibo Yeso‑ya foyemona
20Mai wini‑ke yobe‑ya Yeso tokomatase, mai dama mai kobonamake, mai tafabone, yobe kibe ene mai tafi awiramaroni.
21Yeso madi, Yeso sohori mai toha na, fai tamine‑ya mai mita, mai kamakemaroni, Yeso‑ya mai towakamabonehe.
“Mai dama mai ihi Yeso tafare, yama‑ya watomare awane.” Mai ati namaroni.
22Mose‑ka yama hani ati‑ya mai ka‑kamina Yerosare‑ya mai wi‑wina mai one kamake, Yeso tamine‑ya mai hiyara, mai ati yanana,
“Madi towe mai‑ka hidi, i‑di Beosibo Yeso‑ya foyane, madi mai‑ka hidi ati ene mai one‑ya Yeso kananihi, awane.” Mose‑ka yama hani ati‑ya mai ka‑kamina mai ati namaroni.
23Yeso mai‑ya kanawatobona mai‑ya himane, mai‑ya hiyare,
“‘Satanasi ene madi towe kananane.’ Dai ati na,
Satanasi hini hika‑ya kananiterene.
24Hidi webote hika mai dama mai ibi bisiniya, hidi webote kiti fawanebonane.
25Tabora ohare‑ka mai ibi toka toweya, mai nafi awimaraboneni.
26Satanasi‑ka mai ibi bisina‑mani, kiti fawane nane. Satanasi hini hika‑ya kananiterene.
27 # 3:27 Satanasi tamine amane. Satanasi‑ya Yeso wati hawa toheya, madi mai‑ya Yeso kananine. Ai owa kite hini tabaro‑ya wai, yehe honene mai hiyabaterene. Ai owa kite‑ya wati dai toheya, yehe yadihikaneya, yehe honene hiyabatene.
28Owati dai mitahi. Dai ene towe dama toha, dai ati towe dama toha na, makobote Deoso ati dai nofawahiya, dai ene manakone Deoso haanamaterebonane.
29Deoso‑ka Doni‑ya mai weena, mai ihi manakone wadabisateni. Mai ihi manakone fawateraboneni.” Yeso ati nemarine.
30Hibati‑ya mai one haa‑nima ati na,
“Madi towe Yeso‑ya foye awane.” Mai one ati na,
mai ati‑ya Yeso mite, mai ihi manakone fawaterabone tamine‑ya hiyaremarine.
Yeso madi, sohori mai na mai kamake
31Yeso madi, Yeso sohori mai na, mai kamake, yobe‑kaya mai tokiyomara, nokobi‑ya mai naha, mai‑ya mai hiyara,
“Yeso dai haanahi, oda tokomabonehe.” Mai ati namaroni.
32Mai dama Yeso yowi‑ya mai naha, mai ati yanana,
“Yeso, tika ami, tika soho mai eyehe kobona, tiwa‑ya mai haana, yobe fowari‑ya mai nahani.” Mai ati namaroni.
33Yeso ati yanane,
“Ebeni‑ka oka soho mai toha, ebeni‑ka oka ami tohaniti? Fara oka soho mai dama, oka ami mai damateni.” Yeso ati nemarine.
34Yeso yowi‑ya mai naha, mai‑ya Yeso kiikawame, mai‑ya hiyaramatase,
“Okomi, oka soho dai nineni.
35Deoso ati‑nima mai niya, okomi mai toha, oka soho mai toha, oka asima mai toha, mai nineni.” Yeso ati nemarine.
Currently Selected:
Maroko 3: jaaNT
Highlight
Share
Copy
Want to have your highlights saved across all your devices? Sign up or sign in
