Maroko 8
8
4.000 mai kana mai‑ya Yeso natafe
1Mahi owa‑ya mai dama mai sawe, mai tafe wadara, Yeso hika mai da‑daba mai‑ya haane, mai‑ya hiyare,
2“Ai‑ya mai sa‑sawi mai okasomaboneni. Ai amoni 3 kani‑ya ai‑ya mai sawe mai tafe wadarani.
3Mai one wini yaka, mai tabori‑ya mai oyoseya, fimi ihi hawi bai‑ya mai abariyahi.” Yeso ati nemarine.
4Yeso‑ya mai da‑daba mai ati yanana,
“Hini yamata‑nima ai nibati? Yobe wadare‑ya ai naha, haa‑ya yamata ai kanikaterani.” Mai ati namaroni.
5“Dai‑ka baho emeniti?” Yeso ati ne,
“Oda‑ka baho 7 kana tohani.” Mai ati namaroni.
6Yeso ati ene mai nafi nahokosamaroni. Baho tamine‑ya Deoso‑ya hiyare, baho‑ya kebi, hika mai da‑daba mai‑ya baho‑ya daane, mai dami‑ya mai daahinamaroni.
7Mai‑ka aba bidi mai fa‑famaraba na mai tamine‑ya Deoso‑ya hiyare, ati ene mai dami‑ya mai daahinamaroni.
8Mai dama mai tafa, mai korimana, tefe kote hasina mai teehina, hisiri kiba 7 tohamaroni.
9Mai dama, 4.000 mai toha, mai tabori‑ya mai‑ya yosemarine.
10Yeso hika mai da‑daba mai‑ya dabe, kanawa dori‑ya mai foyama, Damanota‑kaya mai tokamaroni.
Yeso ene kitabote‑ya mai awabone
11Fariseo mai kamake, Yeso‑ya mai hiyara,
“Deoso‑ka tihamone tina, neme‑ya tiwa ene kitabote oda awaboneni.” Mai ati namaroni, fai‑ya mai weenabonehe.
12Mai ati‑ya Yeso mite, atibodi yawe, ati yanane,
“Hini yamata ihi owa ene kitabote dai awabone, dai ati niti? Deoso ene dai awateraboneni.” Yeso ati nemarine.
13Makobote kanawa‑ya Yeso mai eyehe foyame, kowani‑kaya mai beretokawamamaroni.
Deoso tamine‑ya keyehe‑ya mai hirina
14Yeso‑ya mai da‑daba baho‑ya mai ati kadamowama, kanawa dori‑ya baho ohare sawemeteni.
15 # 8:15-16 Baho ai wamanabone, farina tiriko femeto‑ya ai ketehe. Yeso hini ati yokana‑ya kemore‑mana, eya ati nane, “Baho‑ya femeto daba, dodama‑nima mai‑ka keyehena mai one nofawahani. Fara mai‑ka keyehe dai nofariyahi.” Yeso mai‑ya hiyare,
“Dai noko wadahi. Fariseo mai toha, Erodi toha ne, mai‑ka femeto‑ya dai arabanahi.” Yeso ati nematane.
16Yeso‑ya mai da‑daba Yeso ati‑ya mai mita, mai ibi hiyara,
“Ai‑ka baho wadara tamine‑ya Yeso hiyarane.” Mai ati nameteni.
17Mai ati‑ya Yeso wato, mai‑ya hiyare,
“Ka! Baho yokana tamine‑ya ohiyari awirani. Yama dai wato kanibote rani, dai habo kitaro.
18Dai noko toha, owa ene dai awa, dai narabo toha, owati‑ya dai mitabisa na, owati‑ya dai watora awineni. Owa ene dai awa, dai ati kadamowamarimana awineni.
19Mai dama 5.000 mai toha baho 5 kana‑ya mai onatafa, mai korimanama, yama kaba kote hasina dai teena, hisiri emeniti?” Yeso ati ne,
“Hisiri kiba 12 tohani.” Mai ati nameteni.
20“4.000 mai kana baho 7 kana‑ya mai onatafa, mai korimana, yama kaba kote dama hasina, hisiri‑ya dai teena, hisiri emeniti?” Yeso ati ne,
“Hisiri kiba 7 tohani.” Mai ati nameteni.
21“Owati‑ya dai watoraba awineni.” Ati nematane.
Maki noko‑ya Yeso kasome
22Besaida‑ya mai kobona, Yeso‑ya mai awa, maki noko wadare‑ya mai kakama, Yeso‑ya mai hiyara,
“Maki boyotinebona oda kakamani.” Mai ati namaroni.
23Maki yehe‑ya Yeso damane, yobe awire‑kaya maki‑ya towake, maki noko bodi‑ya Yeso iridi fene‑ya hiditokane, maki tati‑ya boyone, ati yanane,
“Tiwa noko amosawamini?” Yeso ati nematane.
24Maki yama‑ya awe, ati yanane,
“Ai one oawini, awa‑nima mai‑nima ne mai yakanaro.” Maki ati nematane.
25Maki noko bodi‑ya Yeso boyonamatase, noko amosawami nafiwahe, yama nafi‑ya awi amosawahematane.
26Yeso ati yanane,
“Tika yobe‑ya tikamahi. Mai tabori‑ya tikariyahi.” Ati nematane.
Yeso i‑di Deoso‑ka Ka‑kadika amane
27Sesareya Firibo‑ya tabora bide dama toha, fara‑ya Yeso hika mai da‑daba mai eyehe toke, hawi‑ya mai yakana, mai‑ya hiyare,
“Owa tamine‑ya mai hiyara, eme mai ati niti?” Yeso ati ne,
28“‘Yowaho Batita amane.’ Mai one ati nihi,
‘I‑di Eriya amane.’ Mai one ati nihi,
‘Deoso ati‑ya mai mi‑mita‑mete mai‑ka owa amane.’ Mai one ati nihi teni.” Yeso‑ya mai da‑daba mai ati nameteni.
29“Dai‑ta eme dai ati niti?” Yeso ati ne,
“Deoso‑ka Ka‑kadika amatini.” Bedoro ati ne,
30“Hehe, fara ama·oni. Hiniya owa tamine dai hiyarariyahi.” Yeso ati nematane.
Yeso abebona
31Yeso hini tamine‑bona‑ya kamine,
“Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya kitamebonane.” Yeso ati nematane.
32Yeso hini tamine‑ya hiyare, mai hinahabebona hini‑ya kemo awirematane. Ati‑ya i‑di Bedoro mite, ahiyata‑ya Yeso‑ya towake, fai‑ya weenematane.
33Bedoro‑ya Yeso hiyarebona, kiinawame, hika mai da‑daba mai one‑ya noko tokome, ati yanane,
“Satanasi ati‑nima tiwati nineni. Owa‑ya tiwati baririyahi. Deoso‑ka yama nokotini awira, hini tiwatibodi ati‑ya nokotinibisineni.” Yeso ati nematane.
34Yeso‑ya mai da‑daba mai toha, mai one dama toha na, mai‑ya Yeso haane, mai‑ya hiyare,
“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.” Yeso ati nemarine.
35 # 8:35 Dai abarabone yama hani ati na, Deoso tabaro‑ya dai ya‑yainabone tamine amani. “Deoso ati amosabote ati dai nofa, owa‑ya dai nofa, dai na, dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.
36Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni.
37Yinero‑ya ai atibodi manakone abaterani.
38Bofe‑ya mai wi‑wina yama dama‑ya mai nokotonihe, Deoso ati‑ya mai tokadabara dai‑ya mai weeni awirabone dai ati na, owa‑ya dai nofarihi, owati‑ya dai nofarihi dai niya, okomatasiya, dai‑ya onofahariraboneni. Okomatasiya, Okobi wehene owa‑ya sawi, Okobi‑ka yo‑yose mai amosabote owa‑ya mai sawi naboneni.” Yeso ati nematane.
Currently Selected:
Maroko 8: jaaNT
Highlight
Share
Copy
Want to have your highlights saved across all your devices? Sign up or sign in
