Hechos 1
1
Daizezeba diaya adꞌa Jawurebiata
1Mʉã bedꞌeata naara bꞌʉsidꞌera Teófilo, mʉãrã jõma jarasia Jesúsba odꞌata izha jaradiadꞌata jẽdeuba. 2Daizezeba ʉ̃taa ededꞌabitabai jarasia. Ʉ̃taa wãĩ nawedꞌa Jawurebiadꞌeba jarakꞌasia izha zokꞌakuaita jʉrʉkuadꞌaba kꞌãrẽ odꞌaita. 3Beudꞌa tẽã maʉ̃rããbʉrʉ zokꞌai zhi ũdubima bio basia kꞌawuadꞌamarẽã wãrĩnu zokꞌai bꞌʉta. Zhi ũdubigasia ewari cuarenta, maʉ̃nerã jarakꞌa bꞌasia Daizezeta Nokꞌodꞌebemata.
4Ãba kꞌobꞌedꞌe mawũãsia: Wãrãũdua Jerusalénnebara, awuarabʉrʉ jʉ̃ãũdua mʉ Zezeba Jawurebia diaya adꞌata, maʉ̃ marãbara ũrĩsidꞌa mʉã jaradꞌata. 5Juanbara wãrãnebai zhãrã buru kꞌoesia baniãba, mawũãmina Daizezebara marãã diaya Jawurebiata ewari dããrã ẽãne.
Jesús ʉ̃taa wãna
6Mobebʉrʉ ãba kꞌopanʉbara widꞌi mawũãsidꞌa: Nokꞌó, ¿bʉra Israel bꞌe Nokꞌota bꞌeika idꞌi ewade?
7Mawũãnaĩ Jesúsbara mawũãsia: Ewarira marãba kꞌawuadꞌai barata nʉmʉ ẽã mʉ Zezeba kꞌãrẽ oita nʉmʉkꞌãrĩrã. 8Mawũãmina marãbara zareata jidadꞌaya Jawurebiata marãne edꞌa bꞌadꞌe zebʉrʉdꞌe, aramaʉ̃ne marãbara mʉnebemata jaradꞌaya Jerusalénne, Judea druadꞌe, Samaria druadꞌe, wawara druaza.
9Maʉ̃ta jarape kꞌobꞌʉta ãzha akʉ kꞌobꞌedꞌe Jesús ʉ̃taa jirabꞌari wãsia, aramaʉ̃ne jãrãrãne dogꞌoba ũdudꞌa ẽbasia.
10Aramaʉ̃ne ʉ̃taa wãta akʉ kꞌobꞌedꞌe ũmakĩrãrãta ũme ãzhi kꞌaita ʉ̃ta kꞌopanesia wua torro jʉ̃ panʉta. 11Maʉ̃rãbara mawũãsidꞌa: Galilea bidꞌarã, marãbara, ¿kꞌãrẽã ʉ̃taa akʉ kꞌobꞌe? Kꞌãʉ̃ Jesús Daizezeba marã maẽba ʉ̃taa edebʉrʉra, kꞌãʉ̃ abꞌaʉta kꞌãwũã zeya mazha ũdubʉda kĩrãkꞌa ʉ̃taa wãbʉrʉta.
Matía jʉrʉdꞌapeadꞌa Judabari
12Mobebʉrʉ Jesúsba zokꞌakuadꞌara Jerusalén pʉwʉrʉedꞌa jẽrũya wãsidꞌa Olivo kꞌatuma abada maẽba. Maʉ̃ kꞌatuma Jerusalén kꞌaita bꞌʉta ẽnaʉ̃bada ewade arakꞌaita wãbada kĩrãkꞌa bꞌʉa. 13Jerusalén jũẽkuape wãrĩzekuasia kʉdꞌa ʉ̃rʉ̃bemaĩnu. Mobe mama duanesia Pedrota, Jacobota, Juanta, Andrésta, Felipeta, Tomásta, Bartolométa, Mateota, Jacobo Alfeo warrata, Simón Zeloteta, Juda Jacobo warrata. 14Maʉ̃rãta baridua ãba zhiwidꞌi duanasia wũẽrãrã bawara, Jesús papa María bawara, Jesús mebẽrã bawara.
15Maʉ̃ ewade Pedrora mebẽrã ẽsadra piradrʉsia bedꞌeai kꞌarea, maʉ̃nerã ciento veinte kĩrãkꞌa zhi jʉre nʉmʉne mawũãsia: 16Mebẽrã, zhi bꞌʉmata arimaẽ berabꞌariita bara basia Jawurebiaba rey David idꞌeba jaradꞌata Judadꞌebemata, mawũẽ arimaẽ jʉre edesia Jesús jidadꞌapeadꞌara. 17Izhira dazhirãnebema basia, mawũẽ obꞌasia dazhirãba obꞌeta.
18Izha bia ẽãta odꞌaba plata jidadꞌabara edasia druata. Mama ʉ̃tʉba buruare bꞌaebʉrʉba bꞌi jẽsasia, mawũẽ izhi jʉ̃sira jõma peawesia. 19Jerusalénne bꞌebara maʉ̃ta kꞌawuadꞌape ãzhi bedꞌeadꞌe maʉ̃ druara trʉ̃gasidꞌa Acéldama, maʉ̃bara jara krĩña bꞌʉa Wa Druata. 20Maʉ̃ta zhi bꞌʉmata Salmo librodꞌe mawũã bꞌʉa:
Izhi bꞌadꞌa maẽ miõ ne ẽbaya, aramaʉ̃ne miõta bꞌa ẽbaya. (Salmos 69:25)
Dewara mawũã bꞌʉa:
Awʉrʉba oya izha obꞌadꞌara. (Salmos 109:8)
21Mawũẽ ũmakĩrãrã ewariza dazhirã bawara ãba bꞌedꞌebemata Judabari jʉrʉdꞌaya, Nokꞌo Jesús dazhirã bawara bꞌasidꞌebemata bꞌea. 22Juanba buru kꞌoesidꞌebemata bꞌeta dazhirã maẽba Jesús ʉ̃taa wãsiidꞌubemata bꞌea. Mawũẽ iabꞌa jʉrʉdꞌaya dazhirã bawarauba jaramarẽã Jesús beudꞌata piradrʉdꞌata.
23Mobebʉrʉ ũme kꞌopanʉsidꞌa. Abꞌa Joséta Barsabás abazhidꞌa, abꞌaʉta Justo basia, dewarabema Matía basia. 24Mobebʉrʉ zhiwidꞌi mawũãsidꞌa: Nokꞌó, bʉabʉrʉ jõmaʉ̃ sota ũdukꞌawua bꞌʉa, mawũẽ daia kꞌawuabirua naʉ̃rã ũmenebema bʉa sãʉ̃ta jʉrʉbʉrʉta. 25Mawũãrã bʉdꞌebemata jaramarẽã bʉa zokꞌadꞌata bꞌaya. Maʉ̃ta bꞌadꞌara Judara kꞌazhiruadꞌe bꞌaesia, aramaʉ̃ne tebʉedꞌa wãsia izhi bꞌaima.
26Mobebʉrʉ kꞌaita jʉrʉdꞌaidꞌebemata obʉdadꞌera Matíare bꞌaesia. Mawũẽ Jesúsba zokꞌakuadꞌata once bꞌe bawara bꞌʉsidꞌa.
Currently Selected:
Hechos 1: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
