Marcos 1

Juan Burukꞌoemiã miã ũrãgꞌadꞌa

(Mateo 3:1-12; Lucas 3:1-9, 15-17; Juan 1:19-28)

1Jesucristodꞌebemata bedꞌea biata mʉãrã jẽdeba bꞌʉya, izhira Daizeze Warra. 2Izhi na zokꞌadꞌaira zhi bꞌʉmata Daizezeba bedꞌeata jarabibariba Isaíaba mawũãsia:

Mʉ bedꞌeata jarabarita mʉã bʉ na zokꞌaya, maʉ̃bara bia ẽãrã idu bꞌʉdꞌaita bꞌeabiya bʉ uru na.

3Maʉ̃ nemi jĩgua bedꞌeabʉrʉta drua drudrua tabꞌʉ maẽ mawũãña: Bia ẽãrã ãmabʉdaba araa obʉdakꞌaudua Nokꞌo zei ota, jipa obʉdakꞌaudua izhi zei ota. (Malaquías 3:1; Isaías 40:3)

4Mawũã jaradꞌadꞌe Juanbara drua drudrua tabꞌʉ maẽ zhãrã buru kꞌoekua nʉmasia, maʉ̃nerã jarakꞌa nʉmasia buru kꞌoebʉdaba kꞌazhiruara ãmape Daizezeta pẽwãnamarẽã, bedꞌea ne ẽã duanebimarẽã kꞌazhiruata biodꞌeba. 5Izhima ze nʉmasia Judea druadꞌe bꞌeta, Jerusalénne bꞌeta. Jordán dodꞌe Juanʉã zhi buru kꞌoebisidꞌa ãzhi kꞌazhiruata jara. 6Juanbara jʉ̃ bꞌasia camello kꞌara omata, ne e omaba kʉrrʉ tãjʉ̃ bꞌasia, kꞌo bꞌasia adꞌichichita, do bꞌasia urrajõta. 7Maʉ̃nerã mawũã bazhia: Mʉ tẽã urua mʉ audre zhi zromata, nezokꞌaba obari kĩrãkꞌara mʉãrã bꞌarrupe ẽnaĩne bꞌʉ ẽã maʉ̃ba jẽrũne jʉ̃ bꞌʉra. 8Mʉãrã wãrãnebai marã baniãba buru kꞌoe bꞌʉa, mawũãmina marã izhara Jawurebiata diaya.

Jesús buru kꞌoedꞌa

(Mateo 3:13-17; Lucas 3:21-22)

9Jari ewadera pʉwʉrʉ Galilea druadꞌebema Nazaret abada maẽba Jesús zebʉrʉdꞌera Juanba buru kꞌoesia Jordán dodꞌe. 10Maʉ̃ne doedꞌauba drua wãta taidꞌe, bãjã ewa dogꞌota ũdubʉrʉdꞌera Jawurebia Daizezedꞌeta ũdusia pusirã kĩrãkꞌa izhi ʉ̃rʉ̃ uruta. 11Maʉ̃ne Daizezeta bãjãneba bedꞌeabʉrʉta mawũãsia: Bʉra mʉ Warra mʉãrã kʉãgꞌa, mʉrã bʉ kꞌarea sobia bꞌʉa.

Ãtõmiãba Jesús wãẽãbiya nʉmana

(Mateo 4:1-11; Lucas 4:1-13)

12Jesús mobebʉrʉ Jawurebia Daizezedꞌeba drua drudrua tabꞌʉidꞌu edesia. 13Mama drua drudrua tabꞌʉ maẽ bꞌasia ewari cuarenta, maʉ̃ne ãtõmiãba wãẽãbiya nʉmasia. Maʉ̃nerã nendʉwʉrʉ meãbema meũsiata bꞌe bawara bꞌʉdꞌe ángelerãba kꞌareba eruduanasia.

Jesús miã ũrãgꞌa jʉ̃drʉdꞌa

(Mateo 4:12-17; Lucas 4:14-15)

14Juan cárceldꞌe bꞌʉdꞌapeadꞌa tẽãne Jesús Galilea druaedꞌa wãsia bedꞌea biata jaradꞌe Daizezeta Nokꞌodꞌebemata. 15Maʉ̃nerã mawũãsia: Ewarira arabata Daizezeta Nokꞌodꞌebema kꞌaita basia. Mawũẽ kꞌazhiruara ãmape Daizezeta pẽwãũdua, izhidꞌebemata ĩjãũdua bedꞌea biata.

Jesúsba kĩmarẽ jʉrʉdꞌa bꞌeda beamiãrãta

(Mateo 4:18-22; Lucas 5:1-11)

16Galileadꞌebemata do jedꞌea õbꞌʉ doya Jesús taidꞌe ũdusia Simónta, zhi mebea Andrésta. Do jedꞌea õbꞌʉ maẽ atarraya bꞌari panasia bꞌeda beamiãta panasi baera. 17Maʉ̃ne Jesúsbara mawũãsia: Mʉ kꞌaidꞌu panadua, mʉnebemata ĩjãnamarẽã mʉã marã zhãrã ũrãgꞌabarita panabiya.

18Mawũãĩ ãzhara audre ẽãne atarraya kenabꞌaridꞌape kꞌaidꞌu jʉ̃drʉsidꞌa.

19Mamaʉ̃ba Jesús arana wãbʉrʉdꞌera ũdusia Jacobota, zhi mebea Juanta Zebedeo warrarãta. Jãbadꞌe panʉta atarraya tʉdꞌʉzoadꞌata araa jʉ̃kua panasia. 20Jesúsbara maʉ̃ne jʉrʉkuasia. Mawũẽ ãzhi zeze Zebedeota izha zokꞌa jʉre bꞌʉ bawara jãbadꞌe ãmaẽbʉdata kꞌaidꞌu jʉ̃drʉsidꞌa.

Jaita abꞌadꞌa

(Lucas 4:31-37)

21Jesús izha jʉrʉkuadꞌa bawara Capernaúm pʉwʉrʉedꞌa wãnape ẽnaʉ̃bada ewade de zhi jʉrebada maẽ edꞌa wãpe miã ũrãgꞌasia. 22Mawũã miã ũrãgꞌabʉrʉdꞌera bia akʉdruasidꞌa ãzhita ũrãgꞌabʉrʉ baera miã ũrãgꞌai zareata erubꞌʉdꞌeba, aramaʉ̃nerã ũrãgꞌa Moisédꞌe jarabada kĩrãkꞌa ẽbasia. 23Maʉ̃nerã de zhi jʉrebada maẽ ũmakĩrãta kꞌobꞌasia jai abꞌʉta, maʉ̃ jaidꞌeba bꞌia mawũãsia: 24¿Bʉra dai bawara kꞌãrẽta sãwũã bꞌʉ Jesús Nazaredꞌebema? ¿Bʉra zebʉrʉka dai ãrĩĩta? Bʉra kꞌaita mʉã kꞌawua bꞌʉa, bʉra Daizezedꞌea.

25Mawũãĩ Jesúsbara kẽã mawũãsia: ¡Chupearua, kꞌãʉ̃nebara ãĩ wãrũã!

26Mawũãĩ jaibara abꞌaedꞌa urebipe kꞌãbãẽã bꞌiape ãĩ wãsia maʉ̃nebara. 27Mawũẽ jõma perabʉdaba ãzhirãĩnu mawũãsidꞌa: ¿Naʉ̃ kꞌãrẽ zhi zromape? ¿Naʉ̃ ũrãgꞌara zhiwidꞌita kꞌãrẽ zhi zromape? Jaira zarea bara jʉrekua bꞌʉba izhi bedꞌeara aribꞌae panʉã. 28Maʉ̃neba Jesús ĩñabasia trʉ̃poasia Galilea drua jõma.

Jesúsba bꞌebidꞌa Simón pakꞌõrẽta

(Mateo 8:14-17; Lucas 4:38-41)

29De zhi jʉrebada maẽba Jesús ãĩ zepe Simónta, Andrésta panʉ dedꞌa wãsidꞌa Jacobo bawara, Juan bawara. 30Maʉ̃ne Simón pakꞌõrẽta tabꞌasia kʉwamiãba, mawũẽ aramaʉ̃ta Jesúa jarasidꞌa. 31Mawũẽ Jesúsbara orrape juwuadꞌe jidape piradrʉbisia. Mawũẽ kʉwamiãbara aramaʉ̃ta kenabꞌaribʉrʉba izhara ne jigasia

Jesúsba bꞌebikuadꞌa kꞌayarãta bio

32Keubʉrʉta ʉ̃madau bꞌaebʉrʉdꞌera Jesúsma wesidꞌa jõma kꞌayarãta, jai abꞌeta. 33Pʉwʉrʉdꞌebema jõma bʉredrʉsidꞌa puerta maẽ. 34Maʉ̃nerã bio bꞌebikuasia ne kĩrãtõnoãba kꞌaya bꞌeta, zhãrãnebara jaira bio ãĩ jʉrekuasia. Jaira bedꞌeabiga ẽbasia izhira kꞌaita kꞌawua bꞌe baera.

Jesús Galileadꞌe pʉrrʉa miã ũrãgꞌadꞌa

(Lucas 4:42-44)

35Daujawedꞌa wadꞌi pãrĩgua kꞌobꞌʉdꞌe Jesús piradrʉpe miõ ne ẽã maẽ wãpe mama zhiwidꞌisia. 36Simónbara jʉrʉsia izhi bawara bꞌe bawarauba.

37Ũdudꞌape mawũãsidꞌa: Bʉra jõmaʉ̃ba jʉrʉ panʉã.

38Mawũãnaĩ izhara mawũãsia: Pʉwʉrʉ arakꞌaita tabꞌe maẽ wãnaña. Daizeze bedꞌeara mʉãrã mamabidꞌa jaraibara, mʉrã maʉ̃ kꞌarea zesi baera.

39Aramaʉ̃ne de zhi jʉrebada nʉme maẽ miã ũrãgꞌasia Galilea drua jõma, ãĩ jʉrekua bꞌasia jaisidꞌa.

Jesúsba bꞌebidꞌa aidꞌaba kꞌaya bꞌʉta

(Mateo 8:1-4; Lucas 5:12-16)

40Jesúsma zesia aidꞌaba kꞌaya bꞌʉta, mobe zuburia bedꞌea sãkꞌokꞌodꞌe kꞌobꞌepe mawũãsia: Bʉa krĩñabʉrʉ mʉrã nene ẽã bꞌebirua.

41Mawũãĩ Jesúsbara izhira sozuburiape tõbꞌari mawũãsia: ¡Mʉãrã krĩña bꞌʉa, mawũẽ bʉra nene ẽã bꞌidꞌa!

42Mawũãbʉrʉdꞌera audre ẽãne ũmakĩrãnebara aidꞌara nebasia, mawũẽ nene ẽã bꞌesia. 43Mobebʉrʉ maʉ̃ta jara ẽbamarẽã jarape wãbibʉrʉta, 44mawũãsia: Bʉ kꞌãwũã bꞌebʉrʉta miõã jararãrũã, awuarabʉrʉ wãpe sacerdotea ũdubirua, mobe bʉzhi nene ẽã bꞌedꞌabari nendʉwʉrʉta babuedꞌamarẽã diadua, Moiséba jaradꞌa kĩrãkꞌa odua bʉ bꞌebʉrʉta ãzha kꞌawuadꞌamarẽã.

45Mawũãmina izhira wãpe izhi sãwũã bꞌebʉrʉta jõmaʉ̃ã jarasia. Mawũẽ Jesús ya baridu pʉwʉrʉdꞌe dajada edꞌa wã bꞌe ẽbasia, maʉ̃neba ãĩ miõ ne ẽã maẽ chubꞌe bꞌasia. Mawũãsiidꞌu baridu maẽba zhãrã izhima ze nʉmasia.

Currently Selected:

Marcos 1: cto

Highlight

Copy