Marcos 10
10
Jesúsba jaradꞌa kĩma ãmaĩrã kꞌazhiruata
(Mateo 19:1-12; Lucas 16:18)
1Mama Capernaúm pʉwʉrʉdꞌebara Jesús wãbʉrʉta, Judea druaedꞌa wãsia do Jordán kĩrãrẽ. Mawũẽ zhãrãbara izhira wakusa bʉredrʉsidꞌa, mawũẽ wakusa miã ũrãgꞌasia izhi bꞌʉ kĩrãkꞌa. 2Maʉ̃ne fariseorãbara orradꞌape wãẽãbidꞌai kꞌarea widꞌisidꞌa zhũmakĩrãbara ãmasia bꞌʉ kꞌawuaita izhi wũẽrã. 3Mawũẽ Jesúsbara panaʉ̃ mawũãsia: ¿Moisébara sãwũã jarasi?
4Mawũãĩ ãzhara mawũãsidꞌa: Moisébara idaribisia ãmaĩnebemata kꞌarta diamarẽã aramaʉ̃ne ãmaĩta.
5Mawũãnaĩ Jesúsbara panaʉ̃ mawũãsia: Aribꞌaedꞌa ẽbaita marã sora zare baera mawũã bꞌʉsia. 6Mawũãmina jẽdeuba osidꞌera zhũmakĩrãta, wũẽrãta osia Daizezebara. 7Maʉ̃neba zhũmakĩrãbara ãmaẽ bꞌʉa zezera, papara, aramaʉ̃ne izhi wũẽrã ũme pane bꞌʉa. 8Aramaʉ̃ne ũmeta kꞌakua abꞌa pane bꞌʉa, mawũẽ ya ũme ẽã, awuarabʉrʉ kꞌakua abꞌabaia. 9Aramaʉ̃ne Daizezeba ãba bꞌʉdꞌara zhi ãmabiidꞌe bꞌʉ ẽã zhãrãbara.
10Izha jʉrʉkuadꞌabara dedꞌa maʉ̃ abꞌaʉta Jesúa widꞌisidꞌa. 11Mawũẽ mawũãsia: Bariduba izhi wũẽrãta ãmape awʉrʉta kꞌãĩbʉrʉra kꞌazhiruata oya zhi kĩma bĩ ẽã obʉrʉba. 12Wũẽrãba zhi kĩmata ãmape awʉrʉta kꞌãĩbʉrʉra kꞌazhiruata oya.
Jesúsba ibia jaradꞌa wũãwũãrãta
(Mateo 19:13-15; Lucas 18:15-17)
13Wũãwũãrãta Jesúsma wesidꞌa ibia jara tõbꞌarimarẽã. Mawũãmina izha jʉrʉkuadꞌabara kẽãsidꞌa zhi webʉdata. 14Jesúsba maʉ̃ta ũdui bĩ ẽãpe mawũãsia: Wũãwũãrã mʉma idu zebiudua, bueamarãũdua, naʉ̃rãne kĩrãkꞌa izhi krĩcha bꞌetrʉ Daizezeta Nokꞌodꞌebema. 15Mʉã wãrĩnu marãã jaraya, iabꞌaʉba Daizezeta Nokꞌodꞌebemata wũãwũãne kĩrãkꞌa krĩcha ẽbʉrʉ maʉ̃nebemanerã edꞌa wã ẽã.
16Mawũãpe wũãwũãrã juwuadꞌe edape juwua ãzhi ʉ̃rʉ̃ bꞌʉpe ibia jarasia.
Kũrãta bara bꞌadꞌa
(Mateo 19:16-30; Lucas 18:18-30)
17Jesús wãne iabꞌa wãẽba zepe izhi kĩrãbita sãkꞌokꞌodꞌe kꞌobꞌepe widꞌi mawũãsia: Miã Ũrãgꞌabari, bʉra biata bꞌʉa, ¿mʉãrã kꞌãrẽta oi barape Daizeze ũme bꞌai jõ ẽãta jidaira?
18Mawũãĩ Jesúsbara mawũãsia: ¿Bʉara mʉrã kꞌãrẽã biata jarabʉrʉ? Miõta biata bꞌʉ ẽã, awuarabʉrʉ biara abꞌabai bꞌʉa Daizezeta. 19Daizezeba aribꞌaemarẽã jara bꞌʉra bʉara kꞌawua bꞌʉta mawũã bꞌʉa: Kĩma ẽãta erukꞌãĩrãrũã. Miã bearãrũã. Nezrʉgarãrũã. Zhãrã ʉ̃rʉ̃ sewa nebʉrʉrãrũã. Zhãrãta sewarãrũã. Wawiarua bʉ zezera bʉ papara. 20Mawũãĩ kũrãbara mawũãsia: Miã Ũrãgꞌabari, mʉãrã maʉ̃ jõma aribꞌae bꞌʉa kũrã wedꞌauba. 21Mawũãĩ Jesúsbara ibiadꞌe akʉpe mawũãsia: Bʉara ne abꞌa aribꞌaeita wãẽã bꞌʉa. Mawũẽ wãpe, bʉzha ne erubꞌʉta jõma nendope, platara zuburia bꞌea diadua, mawũãrã ne biata erubꞌaya ʉ̃tre. Aramaʉ̃ne zepe mʉta pẽwãdua bebudꞌe basiidꞌu.
22Kũrãbara maʉ̃ bedꞌeata ũrĩpe sopua wãsia kꞌãbãẽã bara bꞌʉ baera.
23Mawũẽ Jesúsbara pʉrʉwa akʉpe izha jʉrʉkuadꞌaa mawũãsia: ¡Daizezeta Nokꞌodꞌebemane edꞌara borekea edꞌa wãna ẽã bara bꞌera!
24Izha jʉrʉkuadꞌara kꞌawua ẽã krĩchasidꞌa maʉ̃ta jarabʉrʉba, mawũẽ Jesúsbara wakusa mawũãsia: ¡Daizezeta Nokꞌodꞌebemane edꞌara borekea edꞌa wãna ẽã ne biota krĩcha bꞌera! 25Aguja uriadꞌe camellota audre bia berabꞌari bꞌeya bara bꞌʉta edꞌa wãĩ kꞌãñabara Daizezeta Nokꞌodꞌebemane.
26Mawũãĩ ãzhira wuaabʉrʉ kꞌawua ẽã krĩcha ãzhirãĩnu mawũãsidꞌa: ¿Bara bꞌʉsidꞌa mawũãbʉrʉ kꞌaita ẽdrʉipe?
27Maʉ̃ne Jesúsbara ãzhi akʉ mawũãsia: Ẽdrʉira zhãrãĩtara boreke ẽã, mawũãmina Daizezebara ẽdrʉbi bꞌeya, ne jõma boreke baera Daizezeitara.
28Mawũãĩ Pedroba mawũãsia: Daibara ne jõma ãmaẽsidꞌa, mobe bʉta pẽwã bꞌea.
29Mawũãĩ Jesúsbara panaʉ̃ mawũãsia: Mʉã wãrĩnu marãã jaraya, iabꞌaʉba deta ãmaẽrã, zhi mebẽrã zhũmakĩrãrãta, nawekꞌaurãta ãmaẽrã, zezeta, papata, wũẽrãta, warrarãta, druata, mʉ kꞌarea ãmaẽrã, bedꞌea biata mʉnebemata jarai kꞌarea ãmaẽrã, 30idꞌi ewade ãmaña jidama cien jidaya deta, mebẽrã zhũmakĩrãrãta, nawekꞌaurãta, paparãta, warrarãta, druata. Baridua zuburia odꞌaimina mawũã jidaya, aramaʉ̃ne ewari tẽã nʉmaĩta zeidꞌera jidaya Daizeze ũme bꞌai jõ ẽãta. 31Mawũãmina bio zhi zromata bꞌera zhi zroma ẽãta duaneña, waya zhi zroma ẽãta bꞌeta zhi zromata duaneña.
Jesúsba jarama ũbeata jaradꞌa izhi beadꞌaita
(Mateo 20:17-19; Lucas 18:31-34)
32Odꞌe wãsidꞌa wãrĩze wãta Jerusalén pʉwʉrʉedꞌa, Jesús na taidꞌe izha jʉrʉkuadꞌara pera kuatebasia, izhi kꞌaidꞌu wãbʉdara pera kuatebasia. Mawũẽ doce izha jʉrʉkuadꞌata wakusa awuara jʉre edape izhi sãwũã berabꞌariita jara mawũãsia: 33Dazhirã wãrĩze wã Jerusalén pʉwʉrʉedꞌa, mʉ Beubari Bape bꞌʉra maĩnu chãbꞌaridꞌaya sacerdoterã nokꞌorãta bꞌea, ũrãgꞌa Moisédꞌe jarabadata bꞌea, maʉ̃rãbara jaradꞌaya mʉrã beadꞌamarẽã, aramaʉ̃ne mʉrã chãbꞌaridꞌaya judíorã ẽãta bꞌea. 34Mʉrã ãzhima sewakꞌau bꞌʉdꞌeba udꞌaya, dau idꞌodꞌaya, aramaʉ̃ne beadꞌaya, mawũãmina ewari ũbeadꞌe beudꞌata piradrʉya.
Kꞌãrẽ widꞌidꞌapeadꞌa Jacoboba Juanba
(Mateo 20:20-28)
35Jacobo, Juan, Zebedeo warrarãba Jesús orradꞌape mawũãsidꞌa: Miã Ũrãgꞌabari, daibara krĩña panʉã bʉa aribꞌaeita daiba widꞌibʉdata.
36Mawũãnaĩ mawũãsia: ¿Mʉã kꞌãrẽta oita krĩña panʉ?
37Mawũãĩ mawũãsidꞌa: Bʉta Nokꞌota bꞌebʉrʉ maẽ daita nokꞌo babi jewedꞌabigarua abꞌa bʉ juwua araare, abꞌa bʉ juwua ãkꞌaare.
38Mawũãnaĩ Jesúsbara mawũãsia: Marãbara kꞌawuadꞌa ẽã kꞌãrẽ widꞌi panʉrã. ¿Marã zuburiaita panʉka mʉ zuburiai kĩrãkꞌara?
39Mawũãĩ ãzhara mawũãsidꞌa: Daibara bꞌedꞌaya.
Mawũãnaĩ Jesúsbara mawũãsia: Marã wãrĩnu mʉ zuburiai kĩrãkꞌara zuburiadꞌaya. 40Mawũãmina mʉ juwua araare, mʉ juwua ãkꞌaare jewedꞌabigaira mʉãrã diaidꞌe bꞌʉ ẽã, awuarabʉrʉ jewedꞌa paneña Daizezeba maʉ̃ĩta zhi aribꞌaemata.
41Zhi diezba maʉ̃ta ũrĩnaĩ kĩrũsidꞌa Jacoboa Juanʉã. 42Mawũẽ Jesúsbara trʉ̃kuape mawũãsia: Marãbara kꞌawua bꞌea naʉ̃ ẽjũãne nokꞌota bꞌebara zhãrã ãzhi edre erunʉmeã, zhi zromata bꞌera aramaʉ̃ne zhãrã ʉ̃rʉ̃ zarea nʉmeã. 43Mawũãmina marã mawũã duanaĩne bꞌʉ ẽã, awuarabʉrʉ marãnebema zhi zromata bꞌa krĩña bꞌʉra bꞌaibara dewaraurãta aribꞌaebarita. 44Marãnebema zhi zromata bꞌa krĩña bꞌʉra bꞌaibara jõmaʉ̃ nezokꞌata. 45Aramaʉ̃ kĩrãkꞌa mʉ Beubari Bape bꞌʉra ze ẽbasia zhãrãba aribꞌaedꞌamarẽã, awuarabʉrʉ zesia zhãrã aribꞌaeita, aramaʉ̃ne mʉ bebura diaya zhãrã jõmaʉ̃bari.
Bartimeo daʉbꞌerrea bꞌʉta ne ũdubidꞌa
(Mateo 20:29-34; Lucas 18:35-43)
46Jericó pʉwʉrʉedꞌa zekuape Jericódꞌeba Jesús izha jʉrʉkuadꞌa bawara wãbʉrʉdꞌera kꞌabanata kꞌaidꞌu wãsidꞌa, maʉ̃ne Bartimeo daʉbꞌerrea bꞌʉta Timeo warrata o kꞌaita jewedꞌa bꞌʉta nebari widꞌi bꞌasia. 47Maʉ̃ne Jesús Nazaredꞌebemata ũrĩĩ nemi jĩgua mawũãsia: ¡Jesús, bʉra rey Davidꞌeba uruta bꞌʉba mʉrã sozuburiarua!
48Mawũãĩ bioba kẽãsidꞌa chupeamarẽã, mawũãmina izhara audre bꞌia mawũãsia: ¡Bʉra Davidꞌeba uruta bꞌʉba mʉrã sozuburiarua!
49Mawũãĩ Jesús pi nʉmepe trʉ̃namarẽã jarabʉrʉba trʉ̃ mawũãsidꞌa: Wãniguarua, piradrʉrua, bʉra trʉ̃ kꞌobꞌʉa.
50Mawũãnaĩ wua ãnebꞌari bꞌʉta bꞌaribuepe piradrʉpe zesia Jesúsma. 51Mawũẽ Jesúsbara mawũãsia: ¿Bʉara mʉã kꞌãrẽta oita krĩñape?
Mawũãĩ daʉbꞌerrea bꞌʉbara mawũãsia: Miã Ũrãgꞌabari, mʉta ne ũdubirua.
52Mawũãĩ Jesúsbara mawũãsia: Wãrũã, bʉra soidꞌu kꞌobꞌʉba ẽdrʉbʉrʉa.
Audre ẽãne ne ũdusia, mawũẽ Jesús kꞌaidꞌu tebasia odꞌe.
Currently Selected:
Marcos 10: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
