Marcos 4
4
Ne pobaridꞌebema
(Mateo 13:1-9; Lucas 8:4-8)
1Jesús wakusa miã ũrãgꞌasia do jedꞌea õbꞌʉ maẽ doya. Izhira zhãrã bioba bʉredrʉsidꞌa, mawũẽ jãbadꞌe edꞌa wãpe do jedꞌea õbꞌʉ maẽ jãbadꞌe jewedꞌasia. Waya zhãrã kꞌobꞌera nʉmesia doya.
2Mawũẽ miã ũrãgꞌabʉrʉta ne bio jarakꞌasia, izhi miã ũrãgꞌabʉrʉra mawũãsia: 3Ũrĩũdua, ne ubarita ne podꞌe wãsia. 4Ne pobʉrʉdꞌera ʉ̃kʉrʉ odꞌe bꞌaesia, mawũẽ ibana zepe misidꞌa. 5Ʉ̃kʉrʉ mongꞌaradꞌe bꞌaesia egoro bio ne ẽã maẽ, mawũẽ ĩñabasia pĩwĩsia egorota eidꞌu ẽãba. 6Mawũãmina ʉ̃madau ʉ̃tʉ zebʉrʉba basia, aramaʉ̃ne kꞌarra ne ẽba bagusia. 7Ʉ̃kʉrʉ bꞌaesia ʉrʉdꞌe, mawũẽ ʉrʉ waribʉrʉba ãnatʉ beasia, mawũẽ zau ẽbasia. 8Mawũãmina ʉ̃kʉrʉ egoro biadꞌe bꞌaepe zausia, aramaʉ̃ne pĩwĩpe waribʉrʉba zausia ta treintadꞌe, ta sesentadꞌe, ta cienne abꞌa abꞌakꞌa.
9Maʉ̃ta jarape mawũãsia: Ne ũrĩ bꞌʉbara maʉ̃ta kĩrãkuita ũrĩdua.
Kꞌãrẽã ne bio jaradꞌa
(Mateo 13:10-17; Lucas 8:9-10)
10Zhãrã wãbʉdaba Jesús dobꞌa chubꞌei izhi kꞌaita kꞌobꞌebara izha jʉrʉkuadꞌata doce bawarauba widꞌisidꞌa ne jarakꞌabʉrʉra sãwũãta. 11Mawũẽ mawũãsia: Daizezebara marãã kꞌawuabi nʉmʉã izhita Nokꞌodꞌebema kꞌawuabi ẽã bꞌadꞌata, mawũãmina izhidꞌebema ĩjã ẽã bꞌeara ne biodꞌeba jaraibara ne jõma. 12Akʉ bꞌeidꞌu sãwũãta kꞌawua ẽã akʉ bꞌeamarẽã, ũrĩ bꞌeidꞌu sãwũãta kꞌawua ẽã ũrĩ bꞌeamarẽã. Mawũã bꞌedꞌebara kꞌazhiruara ãmape Daizezera pẽwãna ẽã izha bedꞌea ne ẽã bꞌʉkuaira kꞌazhiruata biodꞌeba.
Jesúsba sãwũãta jaradꞌa ne pobaridꞌebemata
(Mateo 13:18-23; Lucas 8:11-15)
13Mawũãpe mawũãsia: ¿Marãbara sãwũãta kꞌawuadꞌa ẽka mʉã mawũã ne jarakꞌabʉrʉra? ¿Sãwũã jõma bia kꞌawuadꞌaipe mʉã ne bio jarakꞌabʉrʉra? 14Ne pobarira Daizeze bedꞌeata jarabarita maʉ̃ã. 15Ne ta pobʉrʉdꞌe odꞌe bꞌaedꞌara Daizeze bedꞌeata ũrĩbadata maʉ̃ã. Mawũãmina ũrĩpe duanebʉdadꞌera ãtõmiãta zepe bedꞌeata ãzha ũrĩnata ãĩ eda bꞌʉa ãzhi sodꞌeba. 16Ne ta pobʉrʉdꞌe mongꞌaradꞌe bꞌaedꞌara Daizeze bedꞌeata ũrĩbadata maʉ̃ã, aramaʉ̃tara sobia ũrĩbada. 17Mawũãmina bia kꞌarra jidadꞌa ẽãba dããrã zrogꞌadꞌa ẽã, mawũẽ zuburiabʉdadꞌera, o Daizeze bedꞌeata ĩjã bꞌʉ kꞌarea zuburia obʉdadꞌera ĩjã ẽã kenabꞌaribada. 18Ne ta pobʉrʉdꞌe ʉrʉdꞌe bꞌaedꞌara Daizeze bedꞌeata ũrĩbadata maʉ̃ã. 19Mawũãmina naʉ̃ ẽjũãnebemata krĩcha duane bꞌʉa, aramaʉ̃ne sãwũã ne bio erubꞌaita krĩcha nʉmʉbara sewa bꞌʉa, aramaʉ̃ne ne awʉrʉta bio erubꞌa krĩñaĩnebemata ãzhidꞌe edꞌa zekuabʉrʉba Daizeze bedꞌeara kenabꞌaribiga bꞌʉa, aramaʉ̃ne zau eaba ẽã. 20Ne ta pobʉrʉdꞌe egoro biadꞌe bꞌaedꞌara Daizeze bedꞌeata ũrĩbadata maʉ̃ã, ĩjãbʉdaba zaubada, mawũẽ eaba bꞌʉa treintadꞌe, sesentadꞌe, cienne abꞌa abꞌakꞌa.
Ne jaradꞌa ĩbĩrãneba
(Mateo 5:15; Lucas 8:16-18)
21Dewara mawũãsia: ¿Ĩbĩrã kꞌoape baridu edre bꞌʉbadakꞌa o kꞌãĩbari maẽ edre bꞌʉbadakꞌa? ¿Awuarabʉrʉ ʉ̃tʉ bꞌʉbada ẽka? 22Aramaʉ̃ kĩrãkꞌa Daizezedꞌebema kꞌawuadꞌa ẽã nʉmʉrã kꞌawuadꞌa ẽã nʉma ẽã, miã chupea nʉmʉrã kꞌawuadꞌa ẽã nʉma ẽã. 23Ne ũrĩ bꞌʉbara maʉ̃ta kĩrãkuita ũrĩdua.
24Dewara mawũãsia: Mʉã jara bꞌʉta kĩrãkuita ũrĩũdua. Marãba kĩrãkuita nʉme zadꞌe kꞌawuabigaya, baribʉrʉ marãã ãmaña kꞌawuabiya. 25Zhi bude erubꞌʉaara audre kꞌawuabiya, mawũãmina zhi bude erubꞌʉ ẽãrã wĩka erubꞌʉsidꞌa jãrĩña.
Ne jaradꞌa ne ta waribaridꞌeba
26Jesúsbara dewara mawũãsia: Daizezeta Nokꞌodꞌebemata wari bꞌʉra ũmakĩrãba druadꞌe ne ta pobari kĩrãkꞌa bꞌʉa. 27Kꞌãĩ bꞌʉdꞌe, ʉ̃rʉ̃ma bꞌʉdꞌe, diamase, ewaridꞌe, ne tara pãwãrãpe wari bꞌʉa zhi podꞌabara sãwũãta kꞌawua ẽãne. 28Egoroba izhi dobꞌa pãwãrãbaria, naara wikupe zhi kʉ̃mʉta zaubaria, mobebʉrʉ zhi kʉ̃mʉne zhi taba birabaria. 29Aramaʉ̃ne zhi ta kuarabʉrʉdꞌera kucho zakeba bꞌʉabada bꞌʉaita arababʉrʉba.
Ne jaradꞌa mostaza tadꞌeba
(Mateo 13:31-32, 34-35; Lucas 13:18-19)
30Dewara Jesúsbara mawũãsia: ¿Kꞌãrẽ kĩrãkꞌa jaradꞌaipe Daizezeta Nokꞌodꞌebemata wari bꞌʉra? ¿Kꞌãrẽ ũme abꞌarika jaradꞌaipe? 31Mostaza tadꞌebema kĩrãkꞌa bꞌʉa, ubada ne ta jõmaʉ̃ kꞌãñabara audre wĩka kiruta bꞌʉta druadꞌe. 32Mawũãmina ubudadꞌera wari bꞌʉa, aramaʉ̃ne ne uta wuaabema kꞌãñabara audre zhi zromata nʉmebaria, tae jedꞌezoa nʉmebaria, mawũẽ ibanata zhi taeza de obada.
Jesúsba ne bio jaradꞌadꞌebema
(Mateo 13:34-35)
33Jesúsbara bedꞌeara mawũã ne biodꞌeba jarakꞌasia ũrĩ bꞌedꞌai bꞌʉdꞌe. 34Mawũã ne jarakꞌa ẽãrã bedꞌea ẽbasia, mawũãmina izha jʉrʉkuadꞌaa jõma bia jarakꞌa bꞌasia dobꞌaʉdꞌe.
Jesúsba taʉbidꞌa nanguta do bomatʉta
(Mateo 8:23-27; Lucas 8:22-25)
35Jari ewade keubʉrʉdꞌera izha jʉrʉkuadꞌaa Jesúsbara mawũãsia: Do jedꞌea õbꞌʉdꞌe kĩrãrã wãdrʉ.
36Kꞌabanata wãbidꞌape Jesús edesidꞌa jãba izhi kꞌobꞌadꞌadꞌe. Ãzhi daucha wãsia jãba awʉrʉrãsidꞌa. 37Maʉ̃ne nanguba do bomatʉbʉrʉba jãbadꞌe weabꞌari nabiru bʉsadꞌewasia. 38Maʉ̃ẽna Jesúra ãkidꞌaidꞌu burukꞌau kꞌãĩ nʉmasia. Mawũẽ ʉ̃rʉ̃manape mawũãsidꞌa: ¡Miã Ũrãgꞌabari! ¿bʉma kꞌãrẽ ẽka dazhirã tabodꞌora?
39Mawũãnaĩ Jesús piradrʉpe nanguta kẽãpe do jedꞌea õbꞌʉa mawũãsia: Chupearua, taurua.
Mawũẽ nangura tausia, aramaʉ̃ne jipa taukua nʉmaẽdasia. 40Mobebʉrʉ ãzhaa mawũãsia: ¿Kꞌãrẽã kꞌãwũã pera kꞌobꞌe? ¿Sãwũẽ soidꞌu kꞌopanʉ ẽpe?
41Ãzhira kꞌãbãẽã perabʉdaba ãzhirãĩnu mawũãsidꞌa: ¿Naʉ̃ kꞌaipe kꞌãwũã nanguba do jedꞌea õbꞌʉba izhi bedꞌeata aribꞌaebʉdara?
Currently Selected:
Marcos 4: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
