Marcos 6

Jesús wãna Nazaret pʉwʉrʉedꞌa

(Mateo 13:53-58; Lucas 4:16-30)

1Jesús mamaʉ̃bara wãsia izhi druaedꞌa, kꞌaidꞌu wãsidꞌa izha jʉrʉkuadꞌara. 2Ẽnaʉ̃bada ewarita araa zebʉrʉdꞌera miã ũrãgꞌasia de zhi jʉrebada maẽ, maʉ̃ta bioba ũrĩnaĩ bia akʉdrua mawũãsidꞌa: ¿Naʉ̃ sãmaʉ̃ba kꞌãwũã nʉmʉ? ¿Naʉ̃bara krĩchara sãmaʉ̃ba kꞌãwũã erubꞌʉ, sãwũã ũdudꞌakꞌata okua bꞌʉ? 3¿Naʉ̃ ẽka de obarita María waura? ¿Zhi mebẽrã Jacobota, Joséta, Judata, Simónta duanu ẽka? ¿Zhi nawekꞌaurãsidꞌa nama dazhirãne edꞌa duanu ẽka?

Aramaʉ̃ne Jesúsdꞌebema ĩjãna ẽbasia.

4Mawũẽ Jesúsbara mawũãsia: Daizezeba bedꞌeata jarabibarira baridu maẽ wawiabada, awuarabʉrʉ wawiadꞌa ẽã izhi druadꞌebʉrʉ, zhi mebẽrãne edꞌabʉrʉ, izhi dedꞌabʉrʉ.

5Mamarã ũdudꞌakꞌara o ẽbasia, awuarabʉrʉ kꞌayarãtrʉ ʉ̃kʉrʉ bꞌebikuasia juwua ãzhi ʉ̃rʉ̃ bꞌʉkua. 6Kꞌawua ẽã krĩcha bꞌesia izhidꞌebema ĩjãna ẽãba izhi ʉreta bꞌebara.

Kꞌãrẽ obigadꞌa doce jʉrʉkuadꞌata

(Mateo 10:5-15; Lucas 9:1-6)

Jesús pʉrrʉasia pʉwʉrʉ zake arakꞌaita tabꞌe maẽ miã ũrãgꞌa. 7Maʉ̃nerã ãba trʉ̃kuasia doceta, mobe zokꞌakuasia ũme ũmekꞌa, zareata dedꞌekasia jai bꞌe ʉ̃rʉ̃. 8Jarakꞌasia odꞌera miã kꞌãrẽta ededꞌa ẽbamarẽã, awuarabʉrʉ jarasia ededꞌamarẽã barrata. Miã ededꞌa ẽbamarẽã jarasia talegota, miã zhikota, miã platata. 9Awuarabʉrʉ jarasia jʉ̃namarẽã sandaliata, mobe ededꞌa ẽbamarẽã wua trokꞌa jʉ̃ĩta. 10Mobe mawũãsia: Baridu maẽ deidꞌu wãbʉdadꞌera mama kꞌãĩũdua mamaʉ̃ba wãnañeẽna. 11Baridu maẽ marãta bia edadꞌa ẽbʉrʉ, miã marã bedꞌeata ũrĩna ẽbʉrʉ, mamaʉ̃bara ãĩ wãbʉdata egoro jarra marã jẽrũnebema niãweudua. Aramaʉ̃ne kꞌawuabidꞌaya ãzhira Daizezebara pua kꞌawua oita. Mʉã wãrĩnu marãã jaraya, Daizezeba kꞌawua obʉrʉ ewadera Sodoma pʉwʉrʉdꞌe, Gomorra pʉwʉrʉdꞌe bꞌeadꞌara yarebai zuburia bꞌeabiya maʉ̃ pʉwʉrʉdꞌe bꞌe kꞌãñabara.

12Jesúsba jʉrʉkuadꞌara wãnape zhãrã bꞌea jara jʉ̃drʉsidꞌa kꞌazhiruara ãmape Daizezeta pẽwãnamarẽã. 13Jaira bio ãĩ jʉrekuasidꞌa, nendragꞌaba bewatʉ kꞌayarã bio bꞌebikuasidꞌa.

Juan Burukꞌoemiã beabidꞌadꞌebema

(Mateo 14:1-12; Lucas 9:7-9)

14Rey Herodebara Jesús jarabʉdata ũrĩsia baridu maẽ trʉ̃poa nʉmʉba. Ʉ̃kʉrʉbara mawũãsidꞌa: Juan Burukꞌoemiã beudꞌata piradrʉbʉrʉa, maʉ̃neba ũdudꞌakꞌata okuaita zarea nʉmʉã.

15Waya ʉ̃kʉrʉbara mawũãsidꞌa: Kꞌãʉ̃rã Elía. Dewaraurãbara mawũãsidꞌa: Kꞌãʉ̃rã Daizezeba bedꞌeata jarabibaria, Daizezeba bedꞌeata jarabibarirã bꞌeadꞌa kĩrãkꞌa bꞌʉa.

16Maʉ̃ta ũrĩpe Herodebara mawũãsia: Maʉ̃ Juan mʉã otatubidꞌata beudꞌata piradrʉbʉrʉa.

17Mawũã jarasia Herodebara Juan jidadꞌe wãbipe cárceldꞌe cadenaba jʉ̃bidꞌaba, mawũã osia Herodía kꞌarea, maʉ̃ zhi mebea Felipe kĩmata izhi wũẽrã babisia. 18Maʉ̃neba Juanbara Herodea mawũã bazhia: Bʉzhi mebea kĩma bʉa erubꞌaira biga ẽã.

19Maʉ̃ kꞌarea Herodíabara juraba bea krĩña bꞌasimina bꞌe ẽbasia. 20Herodebara Juan wawia bꞌasia izha kꞌawua bꞌʉba biata Daizezeita bꞌʉta, mawũẽ idaribi ẽbasia. Juan bedꞌeata ũrĩbʉrʉdꞌera sãwũãĩ kꞌawua ẽã bꞌasimina ũrĩ krĩña ũrĩ bꞌasia. 21Mawũãmina ewarita zesia Herodíaba sãwũã beaita. Herode año cumpli nʉmʉ fiestadꞌe nekꞌobiga nʉmasia nokꞌorã izhi edre bꞌeta, nokꞌorã soldaorãneta, nokꞌorã Galileadꞌebemata. 22Maʉ̃ne Herodía kꞌauta edꞌa wãpe bairabʉrʉta Herodema bigata, biga basia izhi bawara nekꞌo kꞌobꞌeitabidꞌa. Mawũẽ reybara ãwũẽrãã mawũãsia: Bʉzha krĩñata mʉãã widꞌidua mʉãrã diaya.

23Mawũãpe kꞌãrẽ wãrĩnu diaita jarabʉrʉta mawũãsia: Jõma bʉa mʉãã widꞌibʉrʉra mʉãrã diaya, mʉã erunʉmʉta ẽsadrabidꞌa diaya.

24Mawũãĩ wãpe zhi papaa mawũãsia: ¿Mʉãrã kꞌãrẽta widꞌiipe?

Mawũãĩ zhi papabara mawũãsia: Widꞌidua Juan Burukꞌoemiã buruta.

25Mawũãĩ reyma ĩñabasia edꞌa wãpe widꞌi mawũãsia: Mʉãrã krĩña bꞌʉa kꞌãwũãwedꞌa epedꞌekꞌodꞌe bʉa mʉãã diaita Juan Burukꞌoemiã buruta.

26Mawũãĩ rey kꞌãbãẽã sopuasia, mawũãmina izhi bawara nekꞌo kꞌobꞌe kĩrãbita kꞌãrẽ wãrĩnu diaita jaradꞌaba dia krĩña ẽã nʉma ẽbasia. 27Mawũẽ aramaʉ̃ta reybara soldao abꞌa zokꞌabʉrʉta jarasia wemarẽã Juan buruta. 28Mawũãĩ soldao wãpe cárceldꞌe otatupe zhi buru epedꞌekꞌodꞌe wepe diasia ãwũẽrãã. Mawũẽ izhara diasia zhi papaa.

29Juanba jʉrʉkuadꞌaba maʉ̃ta ũrĩnaĩ zedꞌape zhi kꞌakua jirabꞌaridꞌape wuagꞌasidꞌa.

Nekꞌobigadꞌa cinco mil

(Mateo 14:13-21; Lucas 9:10-17; Juan 6:1-4)

30Jesúsba zokꞌakuadꞌara izhima ãba zekuape jõma nebʉrʉsidꞌa ãzha kꞌãrẽ odꞌata, ãzhi miã ũrãgꞌadꞌata.

31Jesúsbara mawũãsia: Zeudua, dazhirã bitabai miõ ne ẽãĩnu wãnaña, mobe wĩka ẽnaʉ̃ kꞌobꞌeaudua.

Mawũã jarasia zhãrã bio zepe wãpe nʉmʉba, maʉ̃ba ãzhira miã ewari ne ẽbasia nekꞌoisidꞌa. 32Aramaʉ̃ne ãzhi bitabai jãbadꞌe wãsidꞌa miõ ne ẽãĩnu. 33Mawũãmina wãnata bioba ũdubʉdadꞌera ãzhita kꞌawuasidꞌa, mawũẽ maĩnu bio jẽde wãsidꞌa pʉwʉrʉ tabꞌe maẽba, aramaʉ̃ne jũẽkuasia ãzhi jũẽĩ nawedꞌa, mawũẽ daucha zekuasia Jesús bawara. 34Jesús jãbadꞌeba udꞌubꞌaebʉrʉdꞌe kꞌabanata ũdui ãzhira sozuburiasia ovejarã kĩrãkꞌa bꞌeba ãzhi akʉbari ne ẽã, mawũẽ ũrãgꞌakuasia ne bio jara. 35Keudꞌe izha jʉrʉkuadꞌabara orradꞌape mawũãsidꞌa: Miõ ne ẽã maẽ kꞌobꞌedꞌe ewari ya keua. 36Wãbigarua wãnamarẽã meã bꞌema, pʉwʉrʉ zake arakꞌaita tabꞌema, aramaʉ̃ne edadꞌamarẽã zhikota, kꞌãrẽ kꞌoi ne ẽã bꞌea.

37Mawũãnaĩ Jesúsbara panaʉ̃ mawũãsia: Marãba nekꞌobigaudua.

Mawũãĩ ãzhara mawũãsidꞌa: ¿Daita wãnape denario docientoba pan edaira ewari dociento trajaidꞌe bꞌʉ ẽka aramaʉ̃ne nekꞌobigaira?

38Mawũãnaĩ izhara mawũãsia: ¿Marãbara pan sõmbe erubꞌe? Akʉdꞌe wãũdua.

Mawũãĩ wãnape kꞌawuadꞌape mawũãsidꞌa: Daibara erubꞌea pan juesoma bꞌeda ũme.

39Mawũãnaĩ jarasia biodꞌe jewedꞌabidꞌamarẽã poajãrã ʉ̃rʉ̃. 40Mawũẽ awuara awuarakꞌa jewedꞌasidꞌa cienne, cincuentadꞌe. 41Mobebʉrʉ jiraedasia pan juesomata bꞌeda ũmeta, mobe ʉ̃taa akʉ zhiwidꞌipe pan bꞌʉekuape izha jʉrʉkuadꞌaa diasia jedꞌekadꞌamarẽã. Bꞌeda ũmesidꞌa ãzhi jõmaʉ̃ĩta ãzhiza bꞌʉekuasia jedꞌekadꞌamarẽã. 42Aramaʉ̃ne jõma adꞌuba nekꞌosidꞌa. 43Pan zhi bꞌʉgʉzoamata bꞌeda adꞌubadꞌapeadꞌata jʉrepesidꞌa jamara doce bira. 44Zhi nekꞌodꞌapeadꞌara zhũmakĩrãrãta nʉmasia cinco mil.

Jesús tebadꞌa do ʉ̃rʉ̃

(Mateo 14:22-27; Juan 6:16-21)

45Mobebʉrʉ Jesúsbara izha jʉrʉkuadꞌara jãbadꞌe bꞌaribigape izhi naa wãbigasia Betsaida pʉwʉrʉedꞌa kĩrãrã, maʉ̃ẽna izhira wãta jara tebasia kꞌabanata kꞌobꞌea. 46Mawũã wãta jarakꞌa tebape kꞌatumaĩnu wãsia zhiwidꞌidꞌe. 47Diamase nʉmebʉrʉdꞌera jãbara do ẽsadra babʉrʉdꞌe izhira dobꞌa drua bꞌasia. 48Kꞌãbãẽã poea wigui barabꞌʉta ũdusia pʉ̃ãdrʉta ãzhi wãma nʉmʉ ẽãba, mawũẽ ʉ̃nadrʉ bodꞌodꞌe ãzhima zesia do ʉ̃rʉ̃ taidꞌe, aramaʉ̃ne jipa berabꞌarii basia. 49Do ʉ̃rʉ̃ taita ãzha ũdudꞌai beuwãrãta krĩchadꞌape bꞌiasidꞌa. 50Jõmaʉ̃ba ũdubʉdaba perasidꞌa. Mawũẽ aramaʉ̃ta ãzhi ũme bedꞌeabʉrʉta mawũãsia: ¡Wãniguaudua, mʉta taia, perarãũdua!

51Mawũãpe ãzhi bawara jãbadꞌe bꞌaribʉrʉdꞌera pʉ̃ãdrʉra tausia. Mawũẽ ãzhira kꞌãbãẽã perabʉdaba bia akʉdruasidꞌa. 52Aramaʉ̃nerã zhi zromata wadꞌi kꞌawuadꞌa ẽbasia pan wĩkaba kꞌabanata nekꞌobigadꞌamina, maʉ̃ne krĩchadꞌaira zare basia ãzhi sora.

Jesúsba bꞌebidꞌa kꞌayarãta Genesaredꞌe

(Mateo 14:34-36)

53Kĩrãrẽ chãbʉdadꞌera jũẽkuasia Genesaret druaidꞌu, jãbara jʉ̃ õbꞌʉsidꞌa doya. 54Jãbadꞌeba ãzhi udꞌubꞌaebʉdadꞌera zhãrãbara Jesúta ũdukꞌawasidꞌa. 55Mawũẽ wãẽbasidꞌa maʉ̃ drua jõmaʉ̃nebemata, baridu maẽba wesidꞌa kꞌaya bꞌeta jirabꞌadꞌe, izhi sãma bꞌʉta ũrĩbʉda maẽ. 56Izhi wãbʉrʉ maẽrã pʉwʉrʉ zakedꞌe o pʉwʉrʉ zromanebidꞌa, meã bꞌe maẽbidꞌa odꞌe bꞌʉkua jirpanesia kꞌaya bꞌeta, mawũẽ zuburia bedꞌeasidꞌa arigu idu tõbaribimarẽã izhi wua ita. Jõma zhi tõbꞌaribʉdara bꞌe tupudꞌeasia.

Currently Selected:

Marcos 6: cto

Highlight

Copy