ഓഗന്നാന് 15
15
മുന്തിരി കൊഡിമ് സില്ല്‌ഗാള്‌മ്
1<<നാന് നേര്‌മാന മുന്തിരി കൊഡിമ് എന്ന് അപ്പാന് ദോട്ടഗാറാന്‌മ്‌ത്തെ. 2എന്നോഡിന്ത് മൊളേത്ത് കായി ബ്‌ഡാത്ത സില്ല്‌ഗാള്‌ന ഒട്ടുക്കുമു ദോട്ടഗാറാന് ബെ്ട്ടി തള്ള്‌ന്റാന്. കായി ബ്‌ഡുവ സില്ല്‌നെല്ലെ മൊത്തനാക്ക് കായി ബ്‌ഡ്യ ബേ്ണ്ടി അയാള് കപാത്ത് എ്ഡ്‌ത്ത് ബ്‌ഡ്‌ന്റാന്. 3നാന് നിമാക്ക് സൊന്ന നായഗാള്‌നാലെ നിമ്മ മുദാല് താനെ സുത്താപ്പുള്ളവാര് ആയിര്‌ന്റ്‌റ്. 4എന്നോഡൊപ്പ ഒന്റായി ഇര്‌ന്, അന്നാപ്പ് നാന് നിമ്മോഡൊപ്പ ഒന്റായിര്‌ക്കുവെ. സില്ല്‌ഗാള്‌ക്ക് മുന്തിരി കൊഡില് മൂണ്ട്‌റ്‌ക്കാദെ കണ്ട് അയാള്‌ക്ക് താനെ കായി ബ്‌ഡ്യ മുഡ്യാമാട്ട. അദേപാസെ നിമ്മ എന്നോഡ ഒന്റായി ഇര്‌ക്കദെ പോന നിമാക്ക് കായി ബ്‌ഡ്യ മുഡ്യാമാട്ട.
5നാന് മുന്തിരി കൊഡിമ് നിമ്മ സില്ല്‌ഗാള്‌മ്‌ത്തെ. ഒരുത്താന് എന്ന് കുള്ളുക്കുമു നാന് അവാന് കുള്ളുക്കുമു ഇന്തദാന അയാള് മൊത്തന കായി ബ്‌ഡുവാന്. എനാന തളളി നിമാക്ക് ഒന്റുമു ഗേയ മുഡ്യാമാട്ട. 6ആരാറ്റ എന്ന് കുള്ളുക്കു ഇര്‌ക്കദെ പോന അയാള്‌ന മുറുത്തു തള്ള്‌ന ഒന്റു സില്ല്‌ന പാസെ എ്ഡ്‌ത്ത് ബെ്ളിഗെ തള്ളുവാര്. അദ് ഉണാങ്കി തള്ള്‌മ്. അദ്‌നെല്ല പൊറിക്കി സേത്തി തീക്ക് ഇക്കുവാര്, അദ് ബെന്ത് പോമു. 7നിമ്മ എന്ന് കുള്ളുക്കുമു നാന് സൊന്ന നായഗാള് നിമ്മ് കുള്ളുക്കുമു ഇന്തദാന നിമ്മ ആസെപഡുവ എന്താറ്റന കേ്ള്‌ന്, അദ് നിമാക്ക് കെ്ഡേക്ക്‌മ്. 8നിമ്മ മൊത്തനാക്ക് കായി ബ്‌ഡ്‌ഗാട്ടി നിമ്മ എന്ന് സൊല്ലുപഡി നഡാക്ക്‌ന്റവാര് ആവുറു. അത്തെ എന്നപ്പാന്‌ക്ക് മദ്‌പ്പ് കെ്ഡേക്ക്‌ന്റ്.
9അപ്പാന് സാമി എന്നോഡ സീവാന്‌ബെത്ത് നഡാക്കുവ പാസെ നാന്‌മ് നിമ്മോഡ സീവാന്‌ബെത്ത് നഡാക്ക്‌ന്റെ. നാന് നിമ്മോഡ ബെത്ത്‌റ്‌ക്കുവ സീവാന്‌ല് നിമ്മ ഇര്‌ന്. 10എന്ന് അപ്പാന് എനാന ഗേയ സൊന്ന കാര്യഗാള്‌ന അദേപാസെ നാന് ഗേന്ത് അയാള് എന്നോഡ ബെത്ത്‌റ്‌ക്കുവ സീവാന്‌ല് നാന് ഇര്‌ക്കുവ പാസെ നിമ്മാമ് നാന് ഗേയ സൊന്ന കാര്യഗാള്‌ന അദേപാസെ ഗേന്തദാന നാന് നിമ്മോഡ ബെത്ത്‌റ്‌ക്കുവ സീവാന്‌ല് നിമ്മ ഇര്‌ക്കുവുറു. 11എനാക്ക് ഇര്‌ക്കുവ പിര്യ നിമ്മ് കുള്ളുക്കു ഇര്‌ക്ക്യാമ് അത്തെ നിമാക്ക് ഇര്‌ക്കുവ പിര്യാക്ക് കൊറേവു ഒന്റുമു ബരാദിര്‌ക്ക്യാമ് നാന് ഇദ്‌ന നിമാക്ക് സൊല്ലിര്‌ക്ക്‌ന്റെ. 12നാന് നിമാന സീവാന് പട്ട പാസെ നിമ്മാമ് ആങ്കീങ്ക് സീവാന്‌പട്ട് നഡാക്കുഡൊ എന്റ്‌ത്തെ നാന് നിമാക്ക് തരുവ കല്‌പനെ. 13എ്ണേവുഗാറാര്‌ക്ക് ബേ്ണ്ടി ഉജുരുന കൊഡുക്കുവാദ്‌ത്തെ എല്ലാദ്‌ക്ക്‌മ് ബ്‌ഡ ദൊഡ്ഡ സീവാന്. 14നാന് നിമാക്ക് ഗേയ സൊന്നാദ്‌ന നിമ്മ ഗേന്തദാന നിമ്മ എന്ന് എ്ണേവുഗാറാര്‌ത്തെ. 15പണ്ണാഡി ഗേവാദ്‌ന ഗിലാസഗാറാന്‌ക്ക് തെര്യാത്താദ്‌നാലെ നാന് നിമാന ഗിലാസഗാറാര് എന്റ് ഇന്നി ബ്‌ളിക്കുവാദില്ലെ. നാന് എന്നപ്പാനോഡിന്ത് കേ്ട്ടാദ്‌നെല്ല നിമാക്ക് സൊല്ലി തന്താദ്‌നാലെ നിമാന എന്ന് എ്ണേവുഗാറാര് എന്റ് ബ്‌ളിത്ത്‌റ്‌ന്റെ. 16നിമ്മ എനാന തെരിന്തെ്ഡ്‌ക്കാലെ, നാന്‌ത്തെ നിമാന തെരിന്തെ്ഡ്‌ത്ത്‌റ്‌ക്കുവാദ്. നിമ്മ പോയി കായി ബ്‌ഡ്യാമ് അയി ബ്‌ഡുവ കായി എന്നാല്‌ക്ക്‌മ് കൊട്ടാദിര്‌ക്ക്യാമ് ബേ്ണ്ടി നാന് നിമാന എ്ഡ്‌ത്ത് ബെത്ത്‌റ്‌ക്ക്‌ന്റെ. അന്നാപ്പ് നിമ്മ എന്ന് പേര്‌ല് അപ്പാന് സാമ്യോഡ കേ്ള്‌ക്കുവാദ്‌ന ഒട്ടുക്കുമു അയാള് നിമാക്ക് തരുവാന്. 17നിമ്മ ആങ്കീങ്ക് സീവാന്‌ബെത്ത് നഡാക്കുഡൊ. ഇദ്‌ത്തെ നാന് നിമാക്ക് തരുവ കല്‌പനെ.>>
ഉലഗാത്ത്‌ലവാര് നിമാന തൊറേവാര്
18<<ഉലഗാത്ത്‌ല ആള്‌ഗാള് നിമാന തൊറേന്ത് തള്ള്‌നദാന അവാര് മുദാല് എനാന തൊറേന്ത് തള്ള്‌നാര് എന്റ് നെനേന്. 19നിമ്മ ഉലഗാക്ക് പട്ടവാര് ആയിന്തദാന അവാര് നിമാന തമാക്ക് സൊന്ത എന്റ് സൊല്ലി സീവാന്‌ബെത്തിന്ത്‌റ്‌ക്കുവാര്. ആന നിമ്മ ഉലഗാക്ക് പട്ടവാര് അല്ലത്താദ്‌നലേമ് നാന് നിമാന ഉലഗാത്ത്‌ലിന്ത് തെരിന്തെ്ഡ്‌ത്താദ്‌നാലേമ് അവാര് നിമാന തൊറേന്ത് തള്ള്‌ന്റാര്. 20<ഗിലാസഗാറാന് തന്ന് പണ്ണാഡിന ബ്‌ഡ ദൊഡ്ഡവാനല്ല>#ഓഗന്നാന് 13:16 എന്റ് നിമാക്ക് സൊന്ന നായന നെനേത്ത്‌റ്‌ന്. അവാര് എനാന കൊഡിമെപഡ്‌സ്‌നാര്, അത്ത്യാന നിമാനാമ് കൊഡിമെപഡുസുവാര്, അവാര് എന്ന് സൊല്ലുപഡി നഡാന്തിന്തദാന നിമ്മ് സൊല്ലുപഡിമ് നഡാക്കുവാര്. 21എന്റാല്‌മ് എനാന സൊല്ലി ബ്‌ട്ടവാന്‌ന അവാര്‌ക്ക് തെര്യാത്താദ്‌നാലേമ് നിമ്മ എന്ന് ആള്‌ഗാള് ആനാദ്‌നാലേമ് ഇദൊട്ടുക്കു നിമാക്ക്‌മ് അവാര് ഗേവാര്. 22നാന് ബന്ത് അവാരോഡ നായനൊഡ്യാദെ ഇന്തിന്ത അവാര്‌ക്ക് പാവ ഇല്ലാദിന്ത്‌റ്‌ക്ക്‌മ്. ആന ഇന്നി മേല് എന്തൊന്റുക്കു സാട്ടിക്കി അവാര് ഗേവ പാവാത്ത്‌ലിന്ത് തപ്പിസി കഡാക്ക്യ അവാര്‌ക്ക് മുഡ്യാമാട്ട. 23എനാന തൊറേന്റവാര് എന്നപ്പാന് സാമിനാമ് തൊറേന്റാര്. 24ബേ്റെ ആര്‌മ് ഗേഗാത്ത കാര്യഗാള്‌ന അവാര് പട്ട്‌ല് നാന് ഗേഗാദിന്തിന്തദാന അവാര്‌ക്ക് പാവ ഇല്ലാദിന്ത്‌റ്‌ക്ക്‌മ്. ആന ഇന്നാല് ഈ കാര്യഗാള്‌നെല്ല അവാര് കണ്ട്‌മ് ഇര്‌ന്റാര്, എനനാമ് എന്നപ്പാന് സാമിനാമ് തൊറേന്ത്‌മ് ഇര്‌ന്റാര്. 25<അവാര് ബെ്റ്‌ദേക്കെല്ല എനാന തൊറേന്ത് തള്ള്‌നാര്>#സാമി പാട്ട് ബൊക്കു 35:19; 69:4 എന്റ് അവാര്‌ക്ക് ഇര്‌ക്കുവ സാമി സട്ടാത്ത്‌ല് എ്ള്‌ദിര്‌ക്കുവാദ് അദേപാസെ നഡാക്ക്യാത്തെ ഇത്ത്യാനാദ്.
26സാമിന പറ്റ്യുള്ള സത്ത്യന കാട്ടി തരുവ സാമിനിഗാല് എന്റ് സൊല്ലുവ തൊണെഗാറാന്‌ന നാന് സാമി പട്ട്‌ലിന്ത് നിമ്മ് പട്ട്‌ക്ക് സൊല്ലി ബ്‌ഡ്‌വെ. അയാള് സാമി പട്ട്‌ലിന്ത് നിമ്മ് പട്ട്‌ക്ക് ബന്ത് നാന് ആരെന്റ് സൊല്ലി തരുവാന്. 27നിമ്മാമ് മുദാലിന്തെ എന്നോഡ ഇര്‌ക്കുവാദ്‌നാലെ നാന് ആരെന്റ് സൊല്ലുനു.>>
Currently Selected:
ഓഗന്നാന് 15: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
