ലൂക്കോസു 13
13
പാവ ഗേവാദ്‌ന ബ്‌ട്ട് സാമിസാരി തിര്‌ഗ്‌ന്
1അയി ഗളിഗേല് അദ്‌ലിന്ത ലേസ ആള്‌ഗാള്: <<ഗലീലഗാറാര്‌ല് ലേസ ആള്‌ഗാള് സാമിക്ക് പലി കൊഡുത്തു കൊണ്ട്‌റ്‌ക്കാട്ടി പീലത്തോസു അവാര്‌ന അദ്‌ല് ബെത്ത് താനെ കൊന്റാന്>> എന്റ് ഏസ്സ്‌ക്ക് സൊന്നാര്. 2ഏസ്സ് അവാര്‌ക്ക്: <<അയി ഗലീലഗാറാര്‌ക്ക് ഇത്തെ സാവു ബന്താദ്‌നാലെ അവാര് എല്ലാ ഗലീലഗാറാര്‌ക്ക്‌മ് ബ്‌ഡ പാവ ഗേന്റവാരായി ഇന്താരെന്റ് നിമ്മ നെനേക്ക്‌ന്റ്‌റ?>> 3<<ഇല്ലെ, പാവ ഗേവാദ്‌ന ബ്‌ട്ട് സാമിസാരി തിര്‌ഗാദെ പോന നിമ്മാമ് അദേപാസെത്തെ കെ്ട്ട് പോവുറു എന്റ് നാന് നിമാക്ക് സൊന്റെ. 4അല്ല, സീലോഗാമ് മണ്ടഗ ഇ്ഡിന്ത് ബ്‌ന്ത് സത്ത് പോന പദ്‌നെ്ട്ടാള് എര്‌സലേമ്‌ലിന്ത എല്ലാ ആള്‌ഗാള്‌നാമ് ബ്‌ഡ കുറ്റഗാറാര് ആയിന്താര് എന്റ് നിമ്മ നെനേക്ക്‌ന്റ്‌റ? 5ഇല്ലെ, പാവ ഗേവാദ്‌ന ബ്‌ട്ട് സാമിസാരി തിര്‌ഗാദെ പോന നിമ്മാമ് അദേപാസെത്തെ കെ്ട്ട് പോവുറു എന്റ് നാന് നിമാക്ക് സൊന്റെ>> എന്റ് സൊന്നാന്.
6ഏസ്സ് അവാര്‌ക്ക് ഒന്റു കദെ സൊന്നാന്: <<ഒരുത്താന്‌ക്ക് തന്ന് മുന്തിരി ദോട്ടാത്ത്‌ല് നാട്ടി ബെത്തിന്ത ഒന്റു അത്തി മര ഇന്ത്‌ദ്. അദ്‌ല് കായി പ്‌ഡിത്ത്‌റ്‌ന്റ എന്റ് നോഡികൊണ്ടു നഡാന്താന്. ആന കായി പ്‌ഡിക്കാഗേ ഇല്ലെ. 7അയി കാഡ്‌ഗാറാന് കാഡ്‌കാവഗാറാന്‌ക്ക്: <ഈ അത്തി മര കായി പ്‌ഡിക്ക്‌ന്റ എന്റ് നാന് മൂറു ബര്‌സ്സ നോഡി നഡാക്ക്‌ന്റെ. ആന കായി പ്‌ഡിക്കുവാദേ ഇല്ലെ. അദ്‌നാലെ ഈ മരാന ബെ്ട്ടി തള്ള്, ബെ്റ്‌ദെന്ത്‌ക്ക് അയി മരന മണ്ണ്‌ല് ബെത്ത്‌റ്‌ക്കുവാദ്> എന്റ് സൊന്നാന്.
8അദ്‌ക്ക് അയി കാവഗാറാന്: <പണ്ണാഡി, നാന് അയി മരാക്ക് സുറ്റീല് സെത്തി അണിമാഡി ബള ഇക്കി നോഡുന്റെ. അദ്‌നാലെ ഈ ബര്‌സ്സ ഗുഡി ഇര്‌ക്കുഡൊ. 9അഡ്‌ത്ത ബര്‌സ്സ കായിപ്‌ഡിത്തദാന നല്ലാദ്. കായിപ്‌ഡിക്കാദെ പോന ബെ്ട്ടി തള്ള്‌ല> >>.
ഗൂനു ബ്‌ന്തിന്ത ഒന്റൊരുത്തിന ഏസ്സ് തെ്ള്‌സ്‌ന്റാന്
10എഗുദാര് ബെത്ത്‌റ്‌ക്കുവ ഒന്റു ഒയിവു നാള് ഏസ്സ് എഗുദാര് പരേസുവ ബീ്ഡ്‌ല് പഡിസികൊണ്ടിന്താന്. 11കെ്ട്ടജാദി തട്ടി പദ്‌നെ്ട്ട് ബര്‌സ്സ ഗൂനു ബ്‌ന്തിന്ത ഒന്റൊരുത്തി അദ്‌ലിന്താള്. അവാള് സെറ്റെ ഗുഡി നേരെ നില്ല്യ മുഡ്യാത്തവാള് ആയിന്താള്. 12ഏസ്സ് അവാള്‌ന കണ്ട് അര്‌ഗെ ബ്‌ളിത്ത്: <<അമ്മെ, നിനാക്ക് തട്ടിന്ത നോയി തീന്ത്‌റ്‌ക്ക്‌ന്റ്>> എന്റ് സൊന്നാന്. 13പ്‌റ അവാള്‌ക്ക് കയിന ബെത്താന്. അന്നാല് താനെ അവാള് നേരെ നിന്റ് സാമി ദൊഡ്ഡവാന്‌ത്തെ എന്റ് സൊന്നാള്.
14ഏസ്സ് അവാള്‌ന എഗുദാര് ബെത്ത്‌റ്‌ക്കുവ ഒയിവു നാള് തെ്ള്‌സ്‌നാദ്‌നാലെ എഗുദാര് പരേസുവ ബീ്ഡ്‌ല കാര്യഗാള്‌ന നോഡുന്റവാന്‌ക്ക് മൊനെ ബന്ത്: <<ഗിലാസ ഗേയ ആറ് നാള് ഇര്‌ക്ക്‌ന്റല്ല, അദുക്കുള ബന്ത് നോയിന തെ്ള്‌സ്‌ന്, എഗുദാര് ബെത്ത്‌റ്‌ക്കുവ ഒയിവു നാള് പാങ്കില്ലെ>> എന്റ് ആള്‌ഗാള്‌ക്ക് സൊന്നാന്.
15അദുക്കുള ആണ്ടവാന് അവാന്‌ക്ക്: <<ബക്‌തിഗാറാരായി നഡിക്ക്‌ന്റവാരെ, നിമ്മ ഒന്റൊന്റാള് എഗുദാര് ബെത്ത്‌റ്‌ക്കുവ ഒയിവു നാള് ഓരിനാഗൊ, കള്‌ദെനാഗൊ പട്ടിലിന്ത് ബ്‌ഡിസ്യെ്ഡ്‌ത്ത് പോയി നീരൂട്ടുസുവാദില്ലേഗ? 16ആന പദ്‌നെ്ട്ട് ബര്‌സ്സ സെയിത്താന് നോയി ബീ്ക്കി ബെത്തിന്ത ഈ അവുറഗാമ് മഗാള്‌ന എഗുദാര് ബെത്ത്‌റ്‌ക്കുവ ഒയിവു നാള് തെ്ളിസി ബ്‌ഡുവാദ് കുറ്റല്ല?>> എന്റ് സൊന്നാന്.
17ഏസ്സ് ഈ കാര്യന സൊല്ലുഗാട്ടി അയാളോഡ പഗെ ഇന്തവാരൊട്ടുക്കു നാണഗെ്ട്ടാര്. ആന ആള്‌ഗാളെല്ല ഏസ്സ് ഗേന്ത ഈ അദിസ്യപട്ട കാര്യഗാള്‌നൊട്ടുക്കു കണ്ട് പിര്യപൊങ്കുനാര്.
കഡ്‌ഗ് ബെദേത്ത്‌മ് പുളിമാവുത്തുമു കദെ
18പ്‌റസാരി ഏസ്സ് ഇത്തെ സൊന്നാന്: <<സാമി ആളുവാദ് ഏദ്‌ന പാസെ ഇര്‌ക്ക്‌മ്? അദ്‌ന ഏദ്‌ക്ക് എ്ണേത്ത് സൊല്ല്യാമ്? 19അദ്, ഒന്റു കാഡ്‌ഗാറാന് തന്ന് കാഡ്‌ക്ക് അലേത്ത ഒന്റു കഡ്‌ഗ് ബെദേക്ക് സമാത്തെ. അദ് മൊളേത്ത് ബളാന്ത് ദൊഡ്ഡ ഒന്റു സെ്ഡി ആന്റ്. ബാന്‌ല പക്കിഗാള്‌മ് ബന്ത് താറ്‌ക്ക്‌റാഗ ഗൂഡെ്ഡ്‌ത്ത്‌ദ്.>>
20ഏസ്സ് പിന്നേമ് അവാര്‌ക്ക് ഇത്തെ സൊന്നാന്: <<സാമി ആളുവാദ്‌ന നാന് ഏദ്‌ക്ക് എ്ണേത്ത് സൊല്ലുവെ? 21സാമി ആളുവാദ് എന്നുവാദ് ഒന്റൊരുത്തി മൊത്തന മാവുന എ്ഡ്‌ത്ത് കലേസി അദ്‌ക്ക് ലേസ പുളിത്ത മാവുന സേത്തി അദൊട്ടുക്കു പുളിക്ക മാട്ട്‌ക്ക് ബെക്കുവ പാസെത്തെ.>>
ഇ്ണ്‌ക്ക് ബാസ
22ഏസ്സ് എര്‌സലേമ്‌ക്ക് പോഗാട്ടി പോവ ബട്ടേലിര്‌ക്കുവ എല്ലാ പട്ടണഗാള്‌ക്ക്‌മ് ഊരുഗാള്‌ക്ക്‌മ് പോയി ആള്‌ഗാള്‌ന പഡ്‌സ്‌നാന്. 23അദുക്കുള ഒരുത്താന് ഏസ്സ്‌ന: <<ആണ്ടവാനെ, തപ്പിസി കഡാക്ക്‌ന്റവാര് ലേസ ആള്‌ഗാള്‌ത്തേഗ?>> എന്റ് കേ്ട്ടാന്.
അദുക്കുള ഏസ്സ് ഇത്തെ സൊന്നാന്: 24<<ഇ്ണ്‌ക്ക് ബാസമേലെ കഡാക്ക്യ ഓരാഡ്‌ന്, എന്ത്‌ക്കെന്റ് സൊന്ന എഞ്ചോ ആള്‌ഗാള് കഡാക്ക്യ ഓരാഡുവാര്. ആന അവാര്‌ക്ക് മുഡ്യാമാട്ട എന്റ് നാന് നിമാക്ക് സൊന്റെ. 25ബീ്ഡ്‌ഗാറാന് ഇ്ളാഗി ബാസന അഡേത്ത പ്‌റ ബെ്ളിഗിന്ത്: <പണ്ണാഡ്യെ, ബാസന സെറ്റെ ത്‌റാക്കുഡോമെ> എന്റ് നിമ്മ ബാസന കൊട്ടുവുറു.
ആന: <നിമ്മ ആര് എന്റൊ ഏദ്‌ലിന്ത് ബന്തവാര് എന്റൊ എനാക്ക് തെര്യ?> എന്റ് അയാള് സൊല്ലുവാന്.
26അദുക്കുള നിമ്മ: <നിന്ന് മുന്നുക്കു എമ്മ തിന്റ്‌മ് കുഡിത്ത്‌മ് ഇര്‌ക്ക്‌ന്റേമ്, എമ്മ് തെരുവുഗാള്‌ല് നീ എമാന പഡിസിമ് ഇര്‌ന്റായല്ല> എന്റ് സൊല്ല്യ പ്‌ഡിക്കുവുറു.
27ആന അയാള്: <നിമ്മ ആരെന്റൊ? നിമ്മ ഏദ്‌ലവാരെന്റൊ എനാക്ക് തെര്യ? കെ്ട്ടാദ് ഗേന്റവാരെ, എന്ന് പട്ട്‌ലിന്ത് പോനു> എന്റ് സൊല്ലുവാന്.
28അവുറഗാമ്‌മ്, ഇസഗാക്ക്‌മ്, ആക്കോവുമു, എല്ലാ സാമിദാസ്‌ഗാള്‌മ് സാമി ആളുവ നാഡ്‌ല് പന്തിക്കിര്‌ക്കുവാദ്‌ന നിമ്മ കാണ്‌ഗാട്ടി നിമ്മ കേ്യിന്ത്‌കൊണ്ടു പല്ല്‌ന ന്‌റ്‌ന്‌റ കഡിക്കുവുറു. അയി ഗളിഗെ നിമാന ബെ്ളിഗെ മുഡിക്കി ബ്‌ഡുവാന്. 29ക്‌ളാക്ക് സാരിന്ത്‌മ് മേക്ക് സാരിന്ത്‌മ് തെക്ക് സാരിന്ത്‌മ് ബഡാക്ക് സാരിന്ത്‌മ് എഞ്ചോ ആള്‌ഗാള് ബന്ത് സാമി ആളുവ കാലാത്ത്‌ല് പന്തിക്കിര്‌ക്കുവാര്. 30ഉജാന്തവാര് താന്തവാര്‌മ് താന്തവാര് ഉജാന്തവാര്‌മ് ആവാര്.>>
എര്‌സലേമ് പട്ടണോഡ ഏസ്സ്‌ക്ക് ഇര്‌ക്കുവ സീവാന്
31അയി ഗളിഗേല് താനെ ലേസ പരിസാര് ഏസ്സ് പട്ട്‌ക്ക് ബന്ത്: <<നീ ഇദ്‌ലിന്ത് പൊ, എരോദാവു നിനാന കൊല്ല്യ നോഡുന്റാന്>> എന്റ് സൊന്നാര്.
32അദുക്കുള ഏസ്സ് ഇത്തെ സൊന്നാന്: <<നിമ്മ പോയി അയി കുള്ളനരിന പാസെ ഇര്‌ക്ക്‌ന്റവാന്‌ക്ക്, ഇന്റ്‌മ് നാളേക്ക്‌മ് നാന് കെ്ട്ടജാദിഗാള്‌ന തട്ടിസിമ് തള്ളുവെ. നോയിഗാറാര്‌നാമ് തെ്ള്‌സുവെ. മൂറാവാദ് നാള് എന്ന് ഗിലാസാന ഗേന്ത്‌മ് മുഡിക്കുവെ. 33എന്റാല്‌മ് ഇന്റ്‌മ് നാളേക്ക്‌മ് നങ്കിക്ക്‌മ് നാന് പോവ പട്ട്‌ക്കെല്ല പോഡൊ. എന്ത്‌ക്കെന്റ് സൊന്ന എര്‌സലേമ്‌ല് ബെത്ത്‌ത്തെ സാമിദാസ്‌ഗാള്‌ന കൊന്റുറുക്കുവാദ്.
34എര്‌സലേമെ, എര്‌സലേമെ, നീ സാമിദാസ്‌ഗാള്‌ന കൊന്റവാള്‌മ് നിന്ന് പട്ട്‌ക്ക് സൊല്ലി ബ്‌ട്ട സേദിഗാറാര്‌ക്ക് കല്ലെ്റിന്തവാള്‌മ്‌ത്തെ. കോയി തന്ന് കുഞ്ചിഗാള്‌ന ഇ്റാക്കെ കുളാക്ക് സേത്തി ബെക്കുവ പാസെ നിന്ന് ജനഗാള്‌ന സേത്തി ബെക്ക്യ എനാക്ക് എത്ത്‌റാഗോ മനേസ്സിന്ത്‌ദ്. ആന നിനാക്ക് മനേസ്സിര്‌ക്കാലെ. 35അദ്‌നാലെ നിന്ന് ബീ്ഡ് ബ്‌ട്ടബീ്ഡായി ഒന്റുമില്ലദായിതള്ള്‌മ്. <ആണ്ടവാന് പേര്‌ല് ബന്റവാന് ബാഗ്യകേ്ട്ടവാന്>#സാമി പാട്ട് ബൊക്കു 118:26 എന്റ് നിമ്മ സൊല്ലമാട്ട്‌ക്ക് നിമ്മ ഇന്നി എനാന കാണമാട്ട്‌റ് എന്റ് നാന് നിമാക്ക് സൊന്റെ.>>
Currently Selected:
ലൂക്കോസു 13: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
