ലൂക്കോസു 14
14
എഗുദാര് ബെത്ത്‌റ്‌ക്കുവ ഒയിവു നാള് ഏസ്സ് ഒന്റാള്‌ന തെ്ള്‌സ്‌ന്റാന്
1ഒന്റു ഒയിവു നാള് ഏസ്സ് പരിസാര് തലെവാര്‌ല് ഒരുത്താന് ബീ്ഡ്‌ക്ക് തിന്ന്യ പോനാന്. ആന അദ്‌ലിന്തവാര് അയാള് എന്ത് ഗേന്റാനൊ എന്റ് സൊക്കാന നോഡികൊണ്ടിന്താര്. 2ഒന്റു ഊത്ത നോയി ക്‌ഡാക്ക്‌ന്റവാന് ഏസ്സ് മുന്നുക്കു ഇന്താന്. 3അദ്‌ലിന്ത ബേദബാത്ത്യനാമ്‌ഗാള്‌ക്ക്‌മ് പരിസാര്‌ഗാള്‌ക്ക്‌മ് ഏസ്സ്: <<ഒയിവു നാള് ഒരുത്താന്‌ന തെ്ള്‌സുവാദ് സട്ടപഡി സെര്യൊ ഇല്ലെ കുറ്റഗാ?>> എന്റ് കേ്ട്ടാന്. 4ആന അവാര് ഒന്റുമു സൊല്ലാദെ സപ്പെന്റിന്താര്. അദുക്കുള ഏസ്സ്, അയി ഊത്ത നോയിഗാറാന്‌ക്ക് കയിന ബെത്ത് തെ്ളിസി സൊല്ലി ബ്‌ട്ടാന്. 5അദ്‌ക്ക് പ്‌റ ഏസ്സ്: <<നിമ്മ് കൂട്ടാത്ത്‌ല് ഒരുത്താന് മഗാനൊ, ഓരിമാഡൊ ഒയിവു നാള് കെ്ണേ്റ്‌ക്ക് ബ്‌ന്തദാന അന്നാല് താനെ അദ്‌ന ഏ്ട്ടിക്കേ്റ്‌സമാട്ട്‌റ?>> എന്റ് കേ്ട്ടാന്. 6അദ്‌ക്ക് അവാര്‌ക്ക് ബദ്‌ല് സൊല്ല്യ മുഡ്യാലെ.
ഏസ്സ് തണിമെന പറ്റിമ് തങ്കാരിക്കുവാദ്‌ന പറ്റിമ് സൊന്റാന്
7ബിര്‌ന്ത്‌ക്ക് ബന്തവാര് ദൊഡ്ഡുദൊഡ്ഡ ആള്‌ഗാള് കുക്കാക്കുവ പട്ട്‌ക്ക് പോയി കുക്കാക്ക്യപഡുവാദ്‌ന കണ്ട് അവാര്‌ക്ക് ഒന്റു കദെ ബ്‌ട്ടാന്: 8<<നിമാന ആരാറ്റ കല്യണാക്ക് ബ്‌ളിത്തദാന ദൊഡ്ഡുദൊഡ്ഡ ആള്‌ഗാള് കുക്കാക്കുവ പട്ട്‌ക്ക് പോയി കുക്കാക്കദേന്. അയാള് ഒന്റു സമ്യ നിമാന ബ്‌ഡ ദൊഡ്ഡുദൊഡ്ഡ ആള്‌ന ബ്‌ളിത്ത് ബരിസ്സിര്‌ക്കുവാന്. 9നിമാനാമ് അയാള്‌നാമ് ബ്‌ളിത്ത് ബര്‌സ്സ്‌നവാന് ബന്ത്: <ഇയാള്‌ന ഇദ്‌ക്ക് കുക്കാക്ക്യ ബ്‌ഡ്> എന്റ് നിനാക്ക് സൊന്നദാന നീ നാണനാണാത്ത് കഡേസി പോയി കുക്കാക്കുവായി. 10ആന നിമാന ആരാറ്റ ബിര്‌ന്ത്‌ക്ക് ബ്‌ളിത്തദാന ഒന്റേപെ്ട്ട് പിന്ന്‌ക്ക് പോയി കുക്കാക്കുഡൊ. അന്നാപ്പ് നിനാന ബ്‌ളിത്ത് ബര്‌സ്സ്‌നവാന് ബന്ത്: <അയ്യാ, ഇദാ, മുന്നുക്കു ബന്ത് കുക്കാ> എന്റ് സൊല്ലുവാന്. അദുക്കുള ബിര്‌ന്ത്‌ക്ക് ബന്ത എല്ലാ ആള്‌ഗാള് മുന്നുക്കു നിനാക്ക് മദ്‌പ്പ് കെ്ഡേക്ക്‌മ്. 11തനാന താനെ ദൊഡ്ഡവാന് മാഡ്‌ന്റവാന്‌ന സ്‌ന്നവാന് മാഡുവാന്. തനാന താനെ സ്‌ന്നവാന് മാഡ്‌ന്റവാന്‌ന ദൊഡ്ഡവാന് മാഡുവാന്.>>
12പ്‌റസാരി ഏസ്സ് തനാന ബിര്‌ന്ത്‌ക്ക് ബ്‌ളിത്ത പരിസാന്‌ക്ക്: <<നീ ബിര്‌ന്ത്‌ക്ക് ആള്‌ഗാള്‌ന ബ്‌ളിക്കാട്ടി എ്ണേവുഗാറാര്‌നാഗോ, അണ്ണാര്‌തമ്പ്യാര്‌നാഗോ, അര്‌ഗെ ഇര്‌ക്കുവ പണഗാറാര്‌നാഗൊ ബ്‌ളിക്കാദെ. അവാര് നിനാനാമ് ആങ്ക് ബ്‌ളിത്ത് ബിര്‌ന്ത് അട്ട് തരുവാര്. അത്തെ നിനാക്ക്‌മ് തിരിക്കി കെ്ഡേക്ക്‌മ്. 13ആന നീ ബിര്‌ന്തട്ട് കൊഡുക്കാട്ടി ഏ്ളെഗാള്‌നാമ്, കയിമൊണ്ടിഗാള്‌നാമ്, കാല്‌മൊണ്ടിഗാള്‌നാമ്, കുറുഡാര്‌ഗാള്‌നാമ് ബ്‌ളിത്ത് ബര്‌സ്സ്, 14അന്നാപ്പ് നീ ബാഗ്യകേ്ട്ടവാന് ആവായി. എന്ത്‌ക്കെന്റ് സൊന്ന നീ അവാര്‌ക്ക് ബിര്‌ന്തട്ട് കൊഡുത്ത പാസെ നിനാക്ക് ബിര്‌ന്തട്ട് തര്യ അവാര് കയില് ഒന്റുമില്ലെ. നേര്‌മെഗാറാര്‌മ് ഉജുര്‌ളാഗുവ ഗളിഗേക്ക് അദുക്കുള്ള കൂലി സാമി നിനാക്ക് തരുവാന്>> എന്റ് സൊന്നാന്.
ദൊഡ്ഡ ഒന്റു ബിര്‌ന്ത്‌ന പറ്റി ഏസ്സ് സൊന്റാന്
15ഏസ്സോഡൊപ്പ പന്തിക്കിന്തവാര്‌ല് ഒരുത്താന് ഇദ്‌ന കേ്ട്ടിന്ത്: <<സാമി ആളുവ നാഡ്‌ല് പന്തിക്കിന്ത് തീനി തിന്റവാന് ബാഗ്യഗാറാന്‌ത്തെ>> എന്റ് സൊന്നാന്. 16അദുക്കുള ഏസ്സ് അയാള്‌ക്ക് ഇത്തെ സൊന്നാന്: <<ഒന്റൊരുത്താന് ദൊഡ്ഡ ഒന്റു ബിര്‌ന്തട്ട് ബെത്ത് പല ആള്‌ഗാള്‌നാമ് ബ്‌ളിത്ത് ബരിസ്സ്യ സൊന്നാന്. 17പന്തിക്കിര്‌ക്കുവ ഗളിഗെ ആഗാട്ടി <എല്ലാമ് ഒരിങ്കിര്‌ക്ക്‌ന്റ്, ഇന്നി ബാന്> എന്റ് ബിര്‌ന്ത്‌ക്ക് ബ്‌ളിത്തവാര്‌ന കൂട്ടി ബര്യ അയാള് തന്ന് ഗിലാസഗാറാന്‌ന സൊല്ലി ബ്‌ട്ടാന്. 18ആന അവാര് ഒട്ടുക്കു ബിര്‌ന്ത്‌ക്ക് പോഗാദെ തപ്പിസ്യ ബേ്ണ്ടി ഇത്തെ ഒന്റൊന്റു നായഗാള് സൊല്ല്യ പ്‌ഡിത്താര്. മുദാല്‌ലവാന് അയാള്‌ക്ക്: <നാന് ഒന്റഞ്ചല ബൂമി ബാങ്കിര്‌ക്ക്‌ന്റെ. അദ്‌നൊന്റു പോയി എനാക്ക് നോഡുഡൊ. അദ്‌നാലെ എനാന സെറ്റെ പൊറുക്കുഡോമെ> എന്റ് സൊന്നാന്. 19ബേ്റെ ഒന്റൊരുത്താന്: <നാന് അയിദ് ജോഡി ഏര് മാഡ്‌ന ബാങ്കിര്‌ക്ക്‌ന്റെ, ഏദേദ് നല്ലാദെന്റ് പോയി ഗിലാസ ഗേസി നോഡുഡൊ. അദ്‌നാലെ എനാന സെറ്റെ പൊറുക്കുഡോമെ> എന്റ് സൊന്നാന്. 20ബേ്റെ ഒന്റൊരുത്താന്: <നാന് ഇന്നാല്‌ത്തെ കല്യണ മുഡിത്ത്‌റ്‌ന്റെ. അദ്‌നാലെ എനാക്ക് ബര്യ മുഡ്യാമാട്ട> എന്റ് സൊന്നാന്. 21അയാള് തിരിഗി പോയി തന്ന് പണ്ണാഡിക്ക് ഇദ്‌നൊട്ടുക്കു സൊന്നാന്. അദുക്കുള ബിര്‌ന്ത്‌ക്ക് ആള്‌ഗാള്‌ന ബ്‌ളിത്ത ബീ്ഡ്‌ഗാറാന്‌ക്ക് മൊനെ ബന്ത് തന്ന് ഗിലാസഗാറാന്‌ക്ക്: <നീ ബേഗ പോയി പട്ടണാത്ത്‌ല ബട്ടേക്ക്‌റാഗാമ് തെരുവുക്ക്‌റാഗാമ് ഇര്‌ക്കുവ ഏ്ളെമോളെഗാള്‌നാമ്, കുറുഡാര്‌ഗാള്‌നാമ്, കയിമൊണ്ടി കാല്‌മൊണ്ടിഗാള്‌നാമ് കാലില്ലാത്തവാര്‌ഗാള്‌നാമ് കൂട്ടി ബാ> എന്റ് സൊന്നാന്. 22അത്തെ അയി ഗിലാസഗാറാന് തന്ന് പണ്ണാഡി സൊന്ന പാസെ ഗേന്താന്. പ്‌റ പണ്ണാഡിക്ക്: <പണ്ണാഡി, ആന ഇന്നിമ് എ്ഡെ ഇര്‌ക്ക്‌ന്റ്> എന്റ് സൊന്നാന്. 23അദുക്കുള അയി പണ്ണാഡി തന്ന് ഗിലാസഗാറാന്‌ക്ക്: <നീ പട്ടണാത്ത്‌ല പെര്‌വട്ടേക്ക്‌റാഗാമ് സില്ല് ബട്ടേക്ക്‌റാഗാമ് പോയി കണ്ണ്‌ക്ക് കണ്ടവാര്‌നെല്ല നത്തിനറാട്ടി കൂട്ടി ബന്ത് ബീ്ഡ്‌ക്ക് തുമ്പുസു. 24നാന് മുദാല് ബ്‌ളിത്തവാര് ആര്‌മ് നാന് കൊഡുക്കുവ ബിര്‌ന്ത്‌ന രുജിരുജ്യ തിന്നമാട്ടാര് എന്റ് നിമാക്ക് സൊന്റെ.> >>
സൊല്ലുപഡി നഡാക്കുവാദ്‌ക്കുള്ള ബുദ്ദിമുട്ടു
25ദൊഡ്ഡ ഒന്റു ജനകൂട്ട ഏസ്സോഡൊപ്പ പോയി കൊണ്ടിന്താര്. അദുക്കുള ഏസ്സ് അവാര് സാരി തിരിഗിന്ത് ഇത്തെ സൊന്നാന്: 26<<എന്ന് പട്ട്‌ക്ക് ബന്ത് എന്ന് സൊല്ലുപഡി നഡാക്ക്യ ആസെപഡ്‌ന്റവാന് എനാന ബ്‌ഡ തന്ന് അവ്വ്യപ്പാന്‌നാഗോ, പെ്ണ്ട്‌പ്‌ള്ളെഗാള്‌നാഗൊ, അണ്ണാര്‌തമ്പ്യാര്‌ഗാള്‌നാഗൊ, അക്ക്യാര്‌തങ്ക്യാര്‌ഗാള്‌നാഗൊ, തന്നുജുരുനാഗൊ സീവാന്‌ബെത്ത് നഡാക്കുവദാന അയാള്‌ക്ക് എന്ന് സൊല്ലുപഡിക്ക് നഡാക്ക്‌ന്റവാന് ആയ മുഡ്യാമാട്ട. 27എന്ന് പേര്‌ല് എന്ത് കജട്ട ബന്താല്‌മ് അദ്‌ന താങ്കി കൊണ്ടു എന്ന് പിന്ന്‌മേലെ ബര്യ മുഡ്യാത്തവാന്‌ക്ക്‌മ് എന്ന് സൊല്ലുപഡി നഡാക്ക്‌ന്റവാനായ മുഡ്യാമാട്ട.
28നിമ്മ് കൂട്ടാത്ത്‌ല് ഒന്റാള് ദൊഡ്ഡ ഒന്റു ബീ്ഡ് കെ്ട്ട്യ നെനേത്തദാന മുദാല് കുക്കാന്ത് അദ് ഗേന്ത് മുഡിക്ക്യ എഞ്ച്‌ക്ക് ബര്‌മെന്റ് കണാക്ക് മാഡി നോഡുവാദില്ലേഗ? 29അത്തെ നോഡാദെ പോന ബീ്ഡ് കെ്ട്ട്യ പ്‌ഡിത്ത പ്‌റ ഗേന്ത് മുഡിക്ക്യ മുഡ്യാദെ പോന കാണ്‌ന്റവാരെല്ല, നാണഗെ്ഡ്‌സുവാര്. 30<ഇയാള് കെ്ട്ട്യ പ്‌ഡിത്താന്, ആന കെ്ട്ടി മുഡിക്ക്യ മുഡ്യാലെ> എന്റ് അവാര് സൊല്ലുവാര്.
31ഒന്റു രാജാവു ബേ്റെ ഒന്റു രാജാവുന ജുദ്ദ ഗേയ പഡ്‌ഗാട്ടി മുദാല് കുക്കാന്ത് പത്തായിര പട്ടളഗാറാര്‌ന ബെത്ത് ഇര്‌വദായിര പട്ടളഗാറാരോഡ ബരുവ രാജാവുന ജുദ്ദ ഗേയ പറ്റ്‌മ എന്റ് നെനേത്ത് നോഡമാട്ടാന? 32പറ്റാദെ പോന അയി രാജാവു ജുദ്ദാക്ക് ബരുവ ഇന്ന്യൊന്റു രാജാവുക്കു ദൂരാത്ത്‌ലിര്‌ക്കാട്ടി താനെ ആള് ബ്‌ട്ട് നമ്മ സെറ്റെ ആങ്കീങ്ക് ജുദ്ദ ഗേഗബേ്ഡ എന്റ് സൊല്ല്യ സൊല്ലുവാന്. 33അദേപാസെത്തെ നിമ്മ് കൂട്ടാത്ത്‌ല് ആരാറ്റ തനാക്കിര്‌ക്കുവാദ്‌ന പൂര ബ്‌ഡാദെ പോന എന്ന് സൊല്ലുപഡി നഡാക്ക്‌ന്റവാനായി ഇര്‌ക്കമാട്ടാന്.>>
ഗുണ ഇല്ലാത്ത ഉപ്പു
34<<ഉപ്പു നല്ലാദ്‌ത്തെ. ആന ഉപ്പുക്കിര്‌ക്കുവ ഗുണ ഇല്ലാദ്യാന പിന്നെ എത്തെ അദ്‌ക്കിര്‌ക്കുവ ഗുണ മാഡ്യ മുഡിമ്? 35അദ് മണ്ണ്‌ക്ക്‌മ് ബളാക്ക്‌മ് ഉവഗരപഡമാട്ട. നിമ്മ അദ്‌ന ബെ്ളിഗെ ബീസ്യെ്റിവുറു. നാന് സൊല്ലുവാദ്‌ന കേ്ള്‌ക്ക്യ മനേസ്സിര്‌ക്ക്‌ന്റവാന് കേ്ള്‌ക്കുഡൊ.>>
Currently Selected:
ലൂക്കോസു 14: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
