ലൂക്കോസു ഈ ബൊക്കുന പറ്റി സ്‌ന്ന ഒന്റു സേദി
ഈ ബൊക്കുന പറ്റി സ്‌ന്ന ഒന്റു സേദി
ഏസ്സ് ക്‌റ്‌സ്‌ത്ത് പെ്ളേപ്പ്‌ന പറ്റി ഒന്റൊന്റായി എ്ഡ്‌ത്ത് സൊല്ലുവ പുദ്യ ഒപ്പന്താത്ത്‌ല നാക്ക് ബൊക്കുഗാള്‌ല് ഒന്റുത്തെ ലൂക്കോസു എ്ള്‌ദ്‌ന നല്ല സേദി. ഏസ്സ് സത്ത പ്‌റാത്തെ മത്തായിമ് മര്‌ക്കോസുമു ലൂക്കോസുമു ഓഗന്നാന്‌മ് ഈ നല്ല സേദിഗാള് എ്ള്‌ദ്‌നാദ്. ഏസ്സ്‌ന പറ്റി സൊല്ലുവ നഡാന്ത കദെന താനേമല്ല, ഏസ്സ് സത്ത് ഉജുര്‌ളാഗ്‌ന പ്‌റ അയാള് സൊല്ലുപഡി നഡാക്കുവ അപ്പോസുത്തലാര് ഗേന്താദ്‌ന പറ്റി <<അപ്പോസുത്തലാര് ഗേന്ത ഗിലാസഗാള്>> എന്നുവ ബൊക്കു ഗുഡി ലൂക്കോസു എ്ള്‌ദിര്‌ക്ക്‌ന്റാന്. ലൂക്കോസു എ്ള്‌ദ്‌ന നല്ല സേദി എന്നാല് എ്ള്‌ദ്‌നാദ് എന്റൊ ഏദ്‌ല് ബെത്ത് എ്ള്‌ദ്‌നാദ് എന്റൊ സൊക്കാന പുരുപ്പില്ലെ. ആന മൊത്തന ബേദബാത്ത്യനാമ് കണാക്ക്‌ല് ഏസ്സ് ക്‌റ്‌സ്‌ത്ത് പ്‌റാന്ത പ്‌റ ഒപ്പതപ്പ എ്ള്‌വാദ് ബര്‌സ്സാക്ക് പ്‌റാത്തെ ഇദ് എ്ള്‌ദിര്‌ക്കുവാദ് എന്റ് നെനേക്ക്‌ന്റാര്.
ലൂക്കോസു എന്നുവ ബയിദ്യാന്‌ത്തെ എ്ള്‌ദ്‌നവാന്. അയാള് എ്ള്‌ദിര്‌ക്കുവ എ്ള്‌ത്ത്‌നാമ് അയാള് എ്ള്‌ദിര്‌ക്കുവ നായ ദിന്‌സ്‌നാമ് നോഡുഗാട്ടി എ്ള്‌ദ്‌നവാന് പഡിപ്പ്‌ഗാറാന്‌ത്തെ എന്റ് നെപ്പ്‌കെ്ഡേക്ക്‌മ്. ഇദ്‌ന ബെത്ത് പഡിക്ക്‌ന്റവാര്‌ക്ക് മ്‌ഗ്‌ന്ത ദിന്‌സ്‌ല് ഉവഗരപഡ്യ ബേ്ണ്ടി ഏസ്സ് ക്‌റ്‌സ്‌ത്ത് പെ്ളേപ്പ്‌ന പറ്റ്യുള്ള പുരുപ്പുള്ള ബിവരഗാള്, കാര്യഗാള് നഡാന്താദ്‌ക്ക് തഗ്‌ന്ത് എ്ള്‌ദ്യാത്തെ ലൂക്കോസു ആസെപട്ടാദ് (ലൂക്കോസു 1:1–3). അയാള് എഗുദാര് ജാദിക്ക് പഡാത്തവാനായിന്താന് (കൊലേസ്യഗാറാര് 4:10–14). അദ്‌നാലെത്തെ എഗുദാര്‌ന കാപാറ്റ്യ ബേ്ണ്ടി താനേമല്ല, എഗുദാരല്ലത്തവാര്‌നാമ് കാപാറ്റ്യ ബേ്ണ്ടിത്തെ ഏസ്സ് ബന്താദ് എന്റ് ലൂക്കോസു ഈ സേദില് സൊല്ലിര്‌ക്കുവാദ്. എഗുദാര് ജാദിക്ക് പഡാത്തവാര്‌ക്ക്‌മ് ഗുഡി നെപ്പ് കെ്ഡേക്കുവ ദിന്‌സ്‌ല്‌ത്തെ ഈ നല്ല സേദി അയാള് എ്ള്‌ദിര്‌ക്കുവാദ്. എഗുദാര് സട്ട്‌മെ്ട്ട്‌ന പറ്റി എ്ള്‌ദിര്‌ക്കുവാദ്‌ന നോഡുഗാട്ടി താനെ ഈ കാര്യന നലമായി തെരിമ് (ലൂക്കോസു 1:8).
ലൂക്കോസു എ്ള്‌ദ്‌ന നല്ല സേദി മത്തായിമ് മര്‌ക്കോസുമു എ്ള്‌ദ്‌ന നല്ല സേദിഗാള്‌ക്ക് നല്ല ഒത്തു ബന്റ്. എന്ത്‌ക്കെന്റ് സൊന്ന അവാര് ഒന്റേ പാസെ ഇര്‌ക്കുവ കാര്യഗാള്‌ന ഒന്റേ ദിന്‌സ്‌ല്‌ത്തെ എ്ള്‌ദിര്‌ക്കുവാദ്. ഈ മൂറു നല്ല സേദിഗാള്‌ല് നീര്‌ക്ക് മുളുഗുസുവ ഓഗന്നാന് പ്‌റാക്കുവാദ്‌ന പറ്റി ലൂക്കോസുത്തെ നല്ല ബിവരത്തോഡ എ്ള്‌ദിര്‌ക്കുവാദ്. പാവാന പൊറുക്കുവാദ്‌ന പറ്റിമ് (3:3, 11:4, 17:3–4, 23:34, 24:27) പരേസുവാദ്‌ന പറ്റിമ് (3:21, 5:16, 6:12, 11:1–12, 22:32) ഗുഡി ലൂക്കോസു സൊന്റാന്.
ഈ ബൊക്കുലു അഡാങ്കിര്‌ക്കുവാദ്
ഈ നല്ല സേദിന പറ്റ്യുള്ള സ്‌ന്ന ഒന്റു സേദി1:1–4
ഏസ്സ്‌മ് നീര്‌ക്ക് മുളുഗുസുവ ഓഗന്നാന്‌മ് പ്‌റാന്ത് ബളാന്താദ്‌ന പറ്റി1:5—2:52
നീര്‌ക്ക് മുളുഗുസുവ ഓഗന്നാന് ഗേന്ത കാര്യഗാള്3:1–20
ഏസ്സ് നീര്‌ക്ക് മുളുഗുവാദ്‌മ് സോദണെപഡുവാദ്‌മ്3:21—4:13
ഏസ്സ് ഗലീലാല് എദ്‌ക്ക ഗേന്ത കാര്യഗാള്4:14—9:50
ഏസ്സ് ഗലീലാലിന്ത് എര്‌സലേമ് മാട്ട്‌ക്ക് പോവാദ്9:51—19:27
ഏസ്സ് സാവാദ്‌ക്ക് മുദാല് എര്‌സലേമ് പട്ടണാത്ത്‌ല്‌മ് അദ്‌ക്ക് ബെ്ളിഗേമ്19:28—23:56
ആണ്ടവാന് ഉജുര്‌ളാഗുവാദ്‌മ്, കണ്ണ്‌ക്ക് കാട്ടുവാദ്‌മ്, മേലോഗാക്ക് ഏ്റി പോവാദ്‌മ്24:1–53
Currently Selected:
ലൂക്കോസു ഈ ബൊക്കുന പറ്റി സ്‌ന്ന ഒന്റു സേദി: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute