മത്തായി 15
15
പാട്ടനാമ് ബെത്ത സട്ട
1അദ്‌ക്ക് പ്‌റ ലേസ പരിസാര്‌ഗാള്‌മ് ബേദബാത്ത്യനാമ്‌ഗാള്‌മ് എര്‌സലേമ്‌ലിന്ത് ഏസ്സ് പട്ട്‌ക്ക് ബന്ത്: 2<<നിന്ന് സൊല്ലുപഡി നഡാക്ക്‌ന്റവാര് പാട്ടനാമ് ബെത്ത സട്ട്‌മെ്ട്ട്‌പഡി നഡാക്കാദിര്‌ക്കുവാദ് എന്ത്‌ക്ക്? അവാര് തിന്നുവാദ്‌ക്ക് മുദാല് കയി കച്ചുവാദില്ല്യല്ല?>> എന്റ് സൊന്നാര്.
3അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<നിമ്മ് പാട്ടനാമ് ബെത്ത സട്ട്‌മെ്ട്ട്‌പഡി നഡാക്ക്യ ബേ്ണ്ടി നിമ്മ സാമി ബെത്ത സട്ടാക്ക് കെ്ട്ട്‌പട്ട് നഡാക്കാദിര്‌ക്കുവാദ് എന്ത്‌ക്ക്? 4<നീ നിന്ന് അവ്വ്യപ്പാന്‌ന മദ്‌സുഡൊ>#പയണ 20:12; മറിസി സൊല്ലുവ സട്ട 5:16 എന്റ്‌മ് <അപ്പാന്‌നാഗൊ അവ്വെനാഗൊ കുറ്റ സൊന്റവാന്‌ന കൊല്ലുഡൊ>#പയണ 21:17; ലേവ്യാര് 20:9 എന്റ്‌മ് സാമി സട്ട ബെത്ത് തന്ത്‌റ്‌ക്ക്‌ന്റാനല്ല? 5ആന നിമ്മാഗൊ: <നാന് നിമാക്ക് തര്യ ഇര്‌ക്കുവാദ്‌ന സാമിക്ക് നേര്‌സെ കൊഡുക്കുന്റെ> എന്റ് ഒരുത്താന് തന്ന് അപ്പാന്‌ക്കൊ അവ്വേക്കൊ സൊന്ന മദി, 6അയാള് അപ്പാന്‌ന മദ്‌സ് ബേ്ഡ എന്റ് സൊല്ലുന്റുറു. ഇത്തെ നിമ്മ് സട്ട്‌മെ്ട്ട്‌പഡി നഡാക്ക്യ ബേ്ണ്ടി സാമി ബെത്ത സട്ടന ബെലെ ഇല്ലത്താദ് മാഡ്‌ന്റ്‌റ്. 7ബക്‌തിഗാറാരായി നഡിക്ക്‌ന്റവാരെ, നിമാന പറ്റി ഏസ്സയ്യ സാമിദാസ് സൊല്ലിര്‌ക്കുവാദ് സെരിത്തെ.
8<ഇവാര് എനാന കുമ്മുഡുന്റാര് എന്റ് ബായില് സൊല്ലുവാദല്ലാദെ
നാന് ഇവാര് മനേസ്സ്‌ല് ഇല്ലെ,
9മന്‌സാന് ബെത്ത സട്ടഗാള്‌ന സാമി ബെത്ത സട്ടഗാള് എന്റ് സൊല്ലി പഡുസുവാദ്‌നാലെ
അവാര് ബെ്റ്‌ദേത്തെ എനാന കുമ്മുഡുന്റാര്.>#ഏസ്സയ്യാവു 29:13 >>
മന്‌സാന്‌ന സുത്താപ്പില്ലാത്തവാന് മാഡുവാദ്‌ന പറ്റി
10പ്‌റ ഏസ്സ് ആള്‌ഗാള്‌ന അര്‌ഗെ ബ്‌ളിത്ത് ബരിസ്സി അവാര്‌ക്ക്: <<നാന് സൊല്ലുവാദ്‌ന സൊക്കാന കേ്ട്ട് നെപ്പ്‌കെ്ഡേസ്‌ന്. 11മന്‌സാന്‌ന സുത്താപ്പില്ലാത്തവാന് മാഡുവാദ് ബായികുളാക്ക് പോവാദല്ല, ബായിലിന്ത് ബെ്ളിഗെ ബരുവാദ്‌ത്തെ>> എന്റ് സൊന്നാന്.
12അദുക്കുള സൊല്ലുപഡി നഡാക്ക്‌ന്റവാര് ഏസ്സ് പട്ട്‌ക്ക് ബന്ത്: <<പരിസാര് ഈ നായന കേ്ട്ട് മൊനേക്ക് തെ്ട്ട്‌നാര് എന്റ് നിനാക്ക് തെരിന്ത്‌ദ?>> എന്റ് കേ്ട്ടാര്.
13അദുക്കുള ഏസ്സ്: <<മേലോഗാത്ത്‌ല എന്ന് അപ്പാന് സാമി നാട്ടാത്ത സെ്ഡി ഒട്ടുക്കു ബേരോഡ പ്‌ഡാങ്കി തള്ള്‌മ്. 14അവാര്‌ന പറ്റി നിമ്മ നെനേക്ക ബേ്ഡ. അവാര് കുറുഡാരായിര്‌ക്കുവ തലെവാര്‌ഗാള്‌ത്തെ. ഒന്റു കുറുഡാന് ബേ്റെ ഒന്റു കുറുഡാന്‌ക്ക് ബട്ടെ കാട്ടി പോന റാഡാള്‌മ് കുയിക്ക് ബീ്വാരല്ല>> എന്റ് സൊന്നാന്.
15പത്ത്‌റോസു ഏസ്സ്‌ക്ക്: <<അയി കദെ അര്‌ത്തന സൊക്കാന എമാക്ക് സൊല്ലി തരുഡോമെ>> എന്റ് കേ്ട്ടാന്.
16അദ്‌ക്ക് ഏസ്സ് അവാര്‌ക്ക് ഇത്തെ സൊന്നാന്: <<നിമാക്ക് ഇന്നിമ് അദ്‌ഗാള്‌ന നെപ്പ്‌കെ്ഡേസ്യ മുഡിവാദില്ലേഗ? 17മന്‌സാന് ബായികുളാക്ക് പോവാദെല്ല ബേ്റ്‌കുളാക്ക് പോയി സരിഗലാത്ത്‌ലിന്ത് ബെ്ളിഗെ പോന്റു എന്റ് നിമാക്ക് നെപ്പ്‌കെ്ഡേക്കുവാദില്ലേഗ? 18ആന ബായിലിന്ത് ബെ്ളിഗെ ബരുവാദ് നെഞ്ച്‌കുളാക്കിന്ത് ബന്റ്. അദ് ഒന്റു മന്‌സാന്‌ന കെ്ഡ്‌സ്‌ന്റ്. 19അദ് എത്തെന്റ് സൊന്നദാന കെ്ട്ട എ്ണ്ണ, കൊലെ ഗേവാദ്, ബേസ്യാഡി നഡാക്കുവാദ്, ഗണ്ട്‌പെ്ണ്ണ് ആഡ്‌മാഡ്‌ന പാസെ ഏ്റി നഡാക്കുവാദ്, ത്‌റ്‌ഡുവാദ്, കുറ്റഗാറാര് അല്ലത്തവാര്‌ന കുറ്റഗാറാര് എന്റ് സൊല്ലുവാദ്, കുറ്റ സൊല്ലുവാദ്‌ഗാളെല്ല നെഞ്ച്‌കുളാക്കിന്ത് ബന്റ്. 20ഒന്റു മന്‌സാന്‌ന കെ്ഡ്‌സുവാദ് ഇദ്‌ഗാള്‌ത്തെ. കച്ചത്ത കയില് തിന്നുവാദ് മന്‌സാന്‌ന സുത്താപ്പില്ലാത്തവാന് മാഡുവാദില്ലെ.>>
കാനാന്‌ഗാറിസി നമ്പിക്കെ
21ഏസ്സ് അയി എ്ഡെന ബ്‌ട്ട് സോരു സീദോനു നാഡ്‌ക്ക് പോനാന്. 22അയി നാഡ്‌ലിന്ത് ഒന്റു കനാന്‌ഗാറ്‌സി ഏസ്സ് പട്ട്‌ക്ക് ബന്ത്: <<ആണ്ടവാനെ, ദാവീദ് കാല്‌ക്ക് പട്ടവാനെ, എനാന ഗവപഡുഡോമെ, എന്ന് മഗാള്‌ക്ക് കെ്ട്ടജാദി തട്ടി അവാള് അപ്പാര കൊഡിമെപഡ്‌ന്റാള്>> എന്റ് അഗാറി കൊണ്ടു സൊന്നാള്.
23ആന ഏസ്സ് അവാളോഡ ഒന്റുമു മ്‌ണ്ടാലെ. അദുക്കുള സൊല്ലുപഡി നഡാക്ക്‌ന്റവാര് ഏസ്സ് പട്ട്‌ക്ക് ബന്ത്: <<അവാള് അഗാറി കൊണ്ടു നമ്മ് പിന്ന്‌മേലെ ബന്റാള്. അവാള്‌ന സെറ്റെ സൊല്ലി ബ്‌ഡ്‌ഡോമെ>> എന്റ് ബേ്ണ്ട്‌നാര്.
24അദ്‌ക്ക് അയാള്: <<ഇസ്‌റവേല്‌ഗാറാര്‌ല് കാണദ്യാന കൊറ്യാഡ്‌ഗാള്‌ന പാസെ ഇര്‌ക്ക്‌ന്റവാര് പട്ട്‌ക്ക് താനെത്തെ എനാന സൊല്ലി ബ്‌ട്ട്‌റ്‌ക്കുവാദ്>> എന്റ് സൊന്നാന്.
25ആന അവാള് ഏസ്സ് പട്ട്‌ക്ക് ബന്ത് സന്തൂന്റിന്ത്: <<ആണ്ടവാനെ എനാന കയിതാങ്കുഡോമെ>> എന്റ് സൊന്നാള്.
26ഏസ്സ് അവാള്‌ക്ക്: <<മക്കാള് അഡേന എ്ഡ്‌ത്ത് നായി കുട്ടിഗാള്‌ക്ക് കൊഡുക്കുവാദ് നല്ലാദല്ല>> എന്റ് ബദ്‌ല് സൊന്നാന്.
27അദുക്കുള അവാള്: <<സെരിത്തെ ആണ്ടവാനെ, ആന നായി കുട്ടിഗാള് ഗുഡി സാക്ക്‌ന്റവാര് തീനി തിന്നുവ പീങ്കാത്ത്‌ലിന്ത് പൊഡിന്ത് അലേവ അഡെഗാള്‌ന തിന്ന്‌ന്റല്ല?>> എന്റ് സൊന്നാള്.
28അദുക്കുള ഏസ്സ് അവാള്‌ക്ക്: <<പെ്ണ്ണ്‌പ്‌ളേഗെ, നീ ദൊഡ്ഡ നമ്പിക്കെഗാറിസിത്തെ. നിന്ന് ആസെപഡി നിനാക്ക് നഡാക്കുഡൊ>> എന്റ് സൊന്നാന്. അയി ഗളിഗേല് താനെ അവാള് മഗളച്ചി തെ്ളിന്താള്.
ഏസ്സ് എഞ്ചോ ആള്‌ഗാള്‌ന തെ്ള്‌സ്‌ന്റാന്
29ഏസ്സ് അദ്‌ലിന്ത് പ്‌റപട്ട് ഗലീല കഡാലര്‌ഗെ പോയി ഒന്റു മലേക്ക് ഏ്റി അദ്‌ല് കുക്കാന്തിന്താന്. 30എഞ്ചോ ആള്‌ഗാള് മൊണ്ടിഗാള്‌നാമ്, കുറുഡാര്‌ഗാള്‌നാമ്, ഊമെഗാള്‌നാമ്, ഗൂനുബ്‌ന്തവാര്‌നാമ്, അത്തെ പല നോയിഗാറാര്‌നാമ് അയാള് പട്ട്‌ക്ക് എ്ഡ്‌ത്ത് ബന്ത് അയാള് കാല്‌ക്ക് ബെത്താര്. അയാള് അവാര്‌ന തെ്ള്‌സ്‌നാന്. 31ഊമെബ്‌ന്തവാര് നായനൊഡിവാദ്‌നാമ് ഗൂനുബ്‌ന്തവാര് തെ്ളിവാദ്‌നാമ്, മൊണ്ടിഗാള് നഡാക്കുവാദ്‌നാമ്, കുറുഡാര്‌ക്ക് കണ്ണ്‌കാട്ടുവാദ്‌നാമ് ആള്‌ഗാള് കണ്ട് അദിസ്യപട്ട്: <<ഇസ്‌റവേല് സാമി ദൊഡ്ഡവാന്‌ത്തെ>> എന്റ് സൊന്നാര്.
ഏസ്സ് നാലായിര ഗണ്ടാള്‌ഗാള്‌ക്ക് തീനി കൊഡുക്കുന്റാന്
32ഏസ്സ് തന്ന് സൊല്ലുപഡി നഡാക്ക്‌ന്റവാര്‌ന അര്‌ഗെ ബ്‌ളിത്ത്: <<ഈ ആള്‌ഗാള് ഇന്നാല് മൂറു നാളായി എന്നോഡൊപ്പ ഇര്‌ക്ക്‌ന്റാര്. അവാര്‌ക്ക് തിന്ന്യ ഒന്റുമു ഇല്ലത്താദ്‌നാലെ അവാര്‌ന നെനേത്ത് എനാക്ക് ബേ്റ്‌വേന്റ്. അവാര്‌ക്ക് തീനി കൊഡുക്കാദെ സൊല്ലി ബ്‌ഡ്യ എനാക്ക് മനേസ്സ്‌മില്ലെ. എന്ത്‌ക്കെന്റ് സൊന്ന അവാര് ബീ്ഡ്‌ക്ക് പോഗാട്ടി ബട്ടേല് ബെത്ത് തണാങ്കി തള്ളുവാര്>> എന്റ് സൊന്നാന്.
33സൊല്ലുപഡി നഡാക്ക്‌ന്റവാര് ഏസ്സ്‌ക്ക്: <<ഇഞ്ചൊന്റു ജനഗാള് തിന്നുവാദ്‌ക്ക് ബേ്ഡ്‌മാന അഡെ ഈ ഒന്റു കുട്ടി ആളില്ലാത്ത പട്ട്‌ല് ഏദ്‌ലിന്ത് കെ്ഡേക്ക്‌മ്?>> എന്റ് സൊന്നാര്.
34അദുക്കുള ഏസ്സ് അവാര്‌ക്ക്: <<നിമ്മോഡ എഞ്ച് അഡെ ഇര്‌ക്ക്‌ന്റ്?>> എന്റ് കേ്ട്ടാന്.
<<ഏ്ള്, ലേസ സ്‌ന്ന്‌സ്‌ന്ന മീന്‌ഗാള്‌മ് ഇര്‌ക്ക്‌ന്റ്>> എന്റ് സൊന്നാര്.
35ഏസ്സ് ആള്‌ഗാള്‌ന മണ്ണ്‌ക്ക് കുക്കാക്ക്യ സൊന്നാന്. 36അദ്‌ക്ക് പ്‌റ ഏസ്സ് അയി ഏ്ള് അഡെനാമ് മീന്‌നാമ് എ്ഡ്‌ത്ത് സാമിക്ക് നണ്ണി സൊല്ലി മുറുത്തു തന്ന് സൊല്ലുപഡി നഡാക്ക്‌ന്റവാര്‌ക്ക് കൊഡുത്താന്. അവാര് ആള്‌ഗാള്‌ക്ക് കൊഡുത്താര്. 37അവാരൊട്ടുക്കു ബേ്റ്‌തുമ്പ തിന്റാര്. പ്‌റ മിഞ്ച്‌ന അഡെ തുണ്ടുഗാള്‌ന സൊല്ലുപഡി നഡാക്ക്‌ന്റവാര് ഏ്ള് ബട്ടി തുമ്പിസി എ്ഡ്‌ത്താര്. 38തിന്റവാര് പെ്ണ്ണ്‌മക്കാള്‌നാമ് മക്കാള്‌ഗാള്‌നാമ് സേത്താദെ താനെ നാലായിര ഗണ്ടാള്‌ഗാള് ഇന്താര്. 39പ്‌റ ഏസ്സ് ആള്‌ഗാള്‌ന സൊല്ലി ബ്‌ട്ട്‌തള്ളി തോണിക്ക് ഏ്റി മഗദ ദേസാക്ക് പോനാന്.
Currently Selected:
മത്തായി 15: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
