മത്തായി 25
25
പത്ത് ബീ്ണ്യാര് കദെ
1<<സാമി ആളുവ കാല എന്നുവാദ് മാപ്‌ളെന കൂട്ടി ബര്യ ബ്‌ളാക്കെ്ഡ്‌ത്ത് പോവ പത്ത് ബീ്ണ്യാര്‌ക്ക് സമ. 2അവാര്‌ല് അയിദാള് ബുദ്ദില്ലത്തവാര്‌മ് അയിദാള് ബുദ്ദിന്തവാര്‌മ് ആയിന്താര്. 3ബുദ്ദില്ലത്തവാര് തമ്മ് ബ്‌ളാക്ക്‌ന എ്ഡ്‌ത്താര്, ആന എ്ണ്ണെഡ്‌ക്കാലെ. 4ആന ബുദ്ദിര്‌ന്റവാര് ബ്‌ളാക്ക്‌മ് തൊട്ടിക്ക് എ്ണ്ണേമ് എ്ഡ്‌ത്തന്താര്. 5അത്തെ അവാര് മാപ്‌ളെ ബര്യ ഗളിഗാഗാട്ടി എല്ലാവാര്‌മ് ഉറാക്ക് സൊക്കു തട്ടി ഉറാങ്കിന്താര്.
6നഡുഗൂറു ജാമാക്ക് <മാപ്‌ളെ ബന്റാന്, അയാള്‌ന കൂട്ടി ബര്യ പ്‌റപഡ്‌ന്> എന്റ് ഒന്റു ജദ്ദാറ്റ്.
7അദുക്കുള ബീ്ണ്യാര് എല്ലാവാര്‌മ് ഇ്ളാഗി തമ്മ് ബ്‌ളാക്ക്‌ഗാള്‌ന കത്ത്‌സ്‌നാര്. 8ആന ബുദ്ദില്ലത്തവാര് ബുദ്ദിര്‌ക്ക്‌ന്റവാര്‌ന: <എമ്മ് ബ്‌ളാക്ക് കെ്ട്ട് പോവാദ്‌നാലെ നിമ്മോഡ ഇര്‌ക്കുവ എ്ണ്ണേല് എമാക്ക്‌മ് ലേസ താന്> എന്റ് അവാര്‌ന കേ്ട്ടാര്.
9അദുക്കുള ബുദ്ദിര്‌ക്ക്‌ന്റവാര്: <എമാക്ക്‌മ് നിമാക്ക്‌മ് കൂഡി എ്ണ്ണെ തെഗേഗമാട്ട. അദ്‌നാലെ നിമ്മ എ്ണ്ണെ ബിക്ക്‌ന്റവാര് പട്ട്‌ക്ക് പോയി ബാങ്ക്‌ന്> എന്റ് സൊന്നാര്.
10അവാര് എ്ണ്ണെ ബാങ്ക്യ പോഗാട്ട്യെല്ല മാപ്‌ളെ ബന്താന്. ഒരിങ്കിന്ത ബീ്ണ്യാര് മാപ്‌ളോഡ കല്യണ ബിര്‌ന്ത്‌ക്ക് പോനാര്. അദ്‌ക്ക് പ്‌റ ബാസന അഡേത്താര്.
11അദ്‌ക്ക് പ്‌റ ബുദ്ദില്ലാത്ത ബീ്ണ്യാര് ബന്ത്: <പണ്ണാഡ്യെ, പണ്ണാഡ്യെ, എമ്മാമ് ഉളാക്ക് ബര്യ ബാസന ത്‌റാക്കുഡോമെ> എന്റ് സൊന്നാര്.
12അദ്‌ക്ക് അയാള്: <നിമാന എനാക്ക് തെര്യ എന്റ് നാന് സത്ത്യമായിമ് സൊന്റെ> എന്റ് സൊന്നാന്.
13അദ്‌നാലെ അയി നാള്‌മ് ഗളിഗേമ് എന്നാല്‌ക്കെന്റ് തെര്യാത്താദ്‌നാലെ നിമ്മ സൊക്കാന സൂസാരിത്തിര്‌ന്.>>
മൂറു ഗിലാസഗാറാര് കദെ
14<<സാമി ആളുവാദ് എന്നുവാദ് ഇദ്‌ന പാസെത്തെ: ഒന്റൊരുത്താന് ദൂര നാഡ്‌ക്ക് പോഗാട്ടി തന്ന് മുദാല്‌ഗാള്‌ന നോഡി നഡാത്ത്യ ഗിലാസഗാറാര്‌ക്ക് ഒപ്പ്‌സി തള്ളി പോനാന്. 15ഒരുത്താന്‌ക്ക് അയിദ് താലന്ത്‌മ്, ഇന്ന്യൊന്റു ഒരുത്താന്‌ക്ക് റാഡ് താലന്ത്‌മ്, ബേ്റൊന്റൊരുത്താന്‌ക്ക് ഒന്റു താലന്ത്‌മ് ഇത്തെ അവനവാന്‌ക്ക് തഗ്‌ന്ത പാസെ കൊഡുത്തു തള്ളി അയാള് പ്‌റപട്ട് പോനാന്. 16അയിദ് താലന്ത് കെ്ഡേത്തവാന് സട്ടന പോയി അദ്‌ന ഏവര മാഡി ബേ്റെ അയിദ് താലന്ത് ഗുഡി കെ്ഡേസ്‌നാന്. 17അദേപാസെ റാഡ് താലന്ത് കെ്ഡേസ്‌നവാന്‌മ് അദ്‌ന ഏവര മാഡി ബേ്റെ റാഡ് താലന്ത് ഗുഡി കെ്ഡേസ്‌നാന്. 18ആന ഒന്റു താലന്ത് കെ്ഡേസ്‌നവാന് പോയി കുയി ബെ്ട്ടി തന്ന് പണ്ണാഡി താലന്ത്‌ന അദ്‌ക്ക് ഇക്കി ഒളിസി ബെത്താന്.
19ലേസ ബര്‌സ്സ കളിന്ത പ്‌റ അവാര് പണ്ണാഡി തിരിഗി ബന്ത് താന് കൊഡുത്ത താലന്ത്‌ന ബെത്ത് അവാര് എഞ്ച്‌ക്ക് സമ്പാരിത്താര് എന്റ് അവാര് ഒന്റൊന്റാള്‌നാമ് കേ്ട്ടാന്. 20അദുക്കുള അയിദ് താലന്ത് കെ്ഡേസ്‌നവാന് താന് അദ്‌ന ബെത്ത് സമ്പാരിത്ത ബേ്റെ അയിദ് താലന്ത്‌നാമ് എ്ഡ്‌ത്ത് ബന്ത്, <പണ്ണാഡ്യെ, അയിദ് താലന്തല്ല നീ എനാക്ക് നോഡി നഡാത്ത്യ തന്താദ്. നാന് അദ്‌ന ബെത്ത് ബേ്റെ അയിദ് താലന്ത് ഗുഡി കെ്ഡേസിര്‌ക്ക്‌ന്റെ> എന്റ് സൊന്നാന്.
21അദുക്കുള പണ്ണാഡി: <അ, നല്ലവാന്‌മ് നമ്പ്യ മുഡിന്റവാന്‌മാന ഗിലാസഗാറാ, നീ നലമായി ഗേന്ത്‌റ്‌ന്റായി. നീ സ്‌ന്ന കാര്യാത്ത്‌ല് ഗുഡി നമ്പ്യ മുഡിന്റവാന് ആയിര്‌ക്കുവാദ്‌നാലെ എഞ്ചോ കാര്യഗാള്‌ന നോഡി നഡാത്ത്യ നാന് നിനാന ബെക്കുവെ. ബന്ത് നിന്ന് പണ്ണാഡ്യാന എന്നൊപ്പ എജേന്ത് പിര്യപൊങ്കു> എന്റ് സൊന്നാന്. 22പ്‌റ റാഡ് താലന്ത് കെ്ഡേസ്‌വാന് അദ്‌ന ബെത്ത് കെ്ഡേസ്‌ന ബേ്റെ റാഡ് താലന്ത്‌ന ഗുഡി എ്ഡ്‌ത്ത് ബന്ത്: <പണ്ണാഡ്യെ, നീ എനാക്ക് റാഡ് താലന്തല്ല നോഡി നഡാത്ത്യ തന്താദ്. നാന് അദ്‌ന ബെത്ത് റാഡ് താലന്ത് ഗുഡി അദിഗ കെ്ഡേസിര്‌ക്ക്‌ന്റെ> എന്റ് സൊന്നാന്.
23അദുക്കുള അയി പണ്ണാഡി: <അ, നല്ലവാന്‌മ് നമ്പ്യ മുഡിന്റവാന്‌മാന ഗിലാസഗാറാ, നീ നലമായി ഗേന്ത്‌റ്‌ന്റായി. നീ സ്‌ന്ന കാര്യാത്ത്‌ല് ഗുഡി നമ്പ്യ മുഡിന്റവാന് ആയിര്‌ക്കുവാദ്‌നാലെ എഞ്ചോ കാര്യഗാള്‌ന നോഡി നഡാത്ത്യ നാന് നിനാന ബെക്കുവെ. ബന്ത് നിന്ന് പണ്ണാഡ്യാന എന്നൊപ്പ എജേന്ത് പിര്യപൊങ്കു> എന്റ് സൊന്നാന്.
24അദ്‌ക്ക് പ്‌റ ഒന്റു താലന്ത് കെ്ഡേസ്‌നവാന് അര്‌ഗെ ബന്ത്: <പണ്ണാഡ്യെ, നീ നിനാത്തല്ലത്താദ്‌ന എ്ഡ്‌ക്ക്‌ന്റവാന്‌മ്, നീ ബെ്ളേക്കത്താദ്‌ന അറ്‌ത്തെ്ഡ്‌ക്ക്‌ന്റവാന്‌മ് ആയിര്‌ക്കുവ മര നെഞ്ച്‌ഗാറാന് എന്റ് എനാക്ക് തെരിന്ത്‌ദ്. 25അദ്‌നാലെ നാന് നിനാക്ക് അഞ്ചി പോയി നീ എനാക്ക് നോഡി നഡാത്ത്യ തന്ത താലന്ത്‌ന നാന് മണ്ണ്‌ക്ക് ഒളിസി ബെത്തിന്തെ. അദ്‌ന ഇദാ എ്ഡ്> എന്റ് സൊന്നാന്.
26അദുക്കുള അയി പണ്ണാഡി: <കേ്ഡ്‌ഗെ്ട്ടവാന്‌മ് കള്ളപ്‌ട്ടാന്‌മ് ആന ഗിലാസഗാറാ, നാന് എനാത്തല്ലത്താദ്‌ന എ്ഡ്‌ക്ക്‌ന്റവാന്‌മ്, നാന് ബെ്ളേക്കത്താദ്‌ന അറ്‌ത്തെ്ഡ്‌ക്ക്‌ന്റവാന്‌മ് എന്റ് നിനാക്ക് തെരിന്ത്‌ദ്. 27നീ എന്ന് താലന്ത്‌ന ഏവാരിഗാള്‌ക്ക് കൊഡുത്തിന്ത സെര്യായിന്ത്‌ദ്. അത്തെ കൊഡുത്തിന്ത നാന് ബന്ത് അയി താലന്ത്‌നാമ് അയി താലന്ത്‌ക്ക് കെ്ഡേക്കുവ ബഡ്ഡിനാമ് ഗുഡി ബാങ്കിന്ത്‌റ്‌ക്കുവേനല്ല?
28അദ്‌നാലെ അയോളോഡിന്ത് അയി താലന്ത്‌ന ബാങ്കി പത്ത് താലന്ത് ഇര്‌ക്ക്‌ന്റവാന്‌ക്ക് കൊഡുനു. 29എന്ത്‌ക്കെന്റ് സൊന്ന, ഇര്‌ക്ക്‌ന്റവാന്‌ക്ക് ഇര്‌ക്കുവാദ്‌ന ബ്‌ഡ സാമി മൊത്തന കൊഡുക്കുവാന്. അവാന്‌ക്ക് അളാവുക്കു മീ്റി കെ്ഡേക്ക്‌മ്. ലേസ ഇര്‌ക്ക്‌ന്റവാന്‌ക്ക് അയി ഇര്‌ക്കുവാദ്‌ന ഗുഡി സാമി എ്ഡ്‌ത്ത് തള്ളുവാന്. 30ആന ഈ ഒന്റുക്കുമു ഉവഗരില്ലാത്ത ഗിലാസഗാറാന്‌ന ബെ്ളിഗെ ഒന്റേപെ്ട്ട് ഇ്റ്‌ട്ടൂറിര്‌ക്കുവ പട്ട്‌ക്ക് എ്ഡ്‌ത്ത് പോയി എ്റിന്, അദ്‌ല് കേ്സിമ് ഇര്‌ക്ക്‌മ്, പല്ല്‌ന ന്‌റ്‌ന്‌റ കഡിക്കുവാദ്‌മ് ഇര്‌ക്ക്‌മ്> എന്റ് സൊന്നാന്.>>
ബിദി മുഡിക്കുവ നാള്
31<<മന്‌സാനായി പ്‌റാന്തവാന് തന്ന് മദ്‌പ്പ്‌ല് എല്ലാ സാമിദൂദാരോഡ ബര്‌ഗാട്ടി തന്ന് മദ്‌പ്പിര്‌ക്കുവ കുറിഞ്ചിക്ക് കുക്കാക്കുവാന്. 32അദ്‌ക്ക് പ്‌റ എല്ലാ ജാദിഗാള്‌നാമ് അയാള് മുന്നുക്കു ഒന്റായി കൂട്ടുവാര്. മാട്ട്യാന് കൊറ്യാഡ്‌ഗാള്‌നാമ് ആഡ്‌ഗാള്‌നാമ് അലാക്കലാക്ക പ്‌റ്‌ക്കുവ പാസെ അയാള് അവാര്‌ന പ്‌റ്‌ക്കുവാന്. 33അയാള് കൊറ്യാഡ്‌ഗാള്‌ന തന്ന് ബലസാരിമ് ആഡ്‌ഗാള്‌ന തന്ന് ഇ്ഡസാരിമ് നില്ല്‌സ്‌നാന്.
34അദ്‌ക്ക് പ്‌റ രാജാവു തന്ന് ബല സാരി ഇര്‌ക്ക്‌ന്റവാര്‌ക്ക്: <എന്നപ്പാനോഡിന്ത് ബര കെ്ഡേസിര്‌ക്ക്‌ന്റവാരെ, ഉലഗാന ഉണ്ടാക്ക്‌നാദ്‌ലിന്ത് നിമാക്ക് ബേ്ണ്ടി ഒരിക്കി ബെത്ത്‌റ്‌ക്കുവ സാമി ആളുവ നാഡ്‌ക്ക് ഉരിമെഗാറാരായ ബാന്. 35എനാക്ക് പജിപ്‌ഡിക്കാട്ടി നിമ്മ തിന്ന്യ തന്ത്‌റ്. എനാക്ക് നീരറാക്കെ എ്ഡ്‌ക്കാട്ടി കുഡിക്ക്യ നീര് തന്ത്‌റ്. നാന് നിമാക്ക് പളാക്കില്ലാത്തവാന് ആയിന്ത് ഗുഡി എനാന നിമ്മ തങ്കാരിത്ത്‌റ്. 36നാന് ബെ്റ്‌ദെകറി ഇര്‌ക്കാട്ടി നിമ്മ എനാക്ക് ഉഡുപ്പു ഇക്ക്‌സ്‌ന്‌റ്. നാന് നോയായി ഇര്‌ക്കാട്ടി നിമ്മ എനാന ഓരാഡ്‌ന്‌റ്. നാന് ജെയില്‌ല് ഇര്‌ക്കാട്ടി നിമ്മ എനാന നോഡ്യ ബന്ത്‌റ്> എന്റ് സൊല്ലുവാന്.
37അദുക്കുള നേര്‌മെഗാറാര്: <ആണ്ടവാനെ, നീ പജ്യോഡ ഇര്‌ക്കുവാദ്‌ന കണ്ട് എമ്മ എന്നാല് നിനാക്ക് തിന്ന്യ തന്തേമ്? നിനാക്ക് നീരറാക്കെ എ്ഡ്‌ത്ത്‌റ്‌ക്കുവാദ്‌ന കണ്ട് എമ്മ എന്നാല് നിനാക്ക് നീര് കുഡിക്ക്യ തന്തേമ്? 38എമ്മ എന്നാല് പളാക്കില്ലാത്ത നിനാന കണ്ട് തങ്കാരിത്തേമ്? നീ ബെ്റ്‌ദെകറി ഇര്‌ക്കുവാദ്‌ന കണ്ട് എമ്മ എന്നാല് നിനാക്ക് ഉഡുപ്പു ഇക്ക്‌സ്‌നേമ്? 39നീ നോയായി ഇര്‌ക്കുവാദ്‌നാമ് ജെയില്‌ല് ഇര്‌ക്കുവാദ്‌നാമ് കണ്ട് എമ്മ എന്നാല് നിനാന നോഡ്യ ബന്തേമ്?> എന്റ് സൊല്ലുവാര്.
40അദുക്കുള രാജാവു: <നാന് സത്ത്യമായിമ് നിമാക്ക് സൊല്ലുന്റെ, എന്ന് അണ്ണാര്‌തമ്പ്യാര്‌ന പാസെ ഇര്‌ക്കുവ ഈ സ്‌ന്നവാര്‌ക്ക് ബീസാക്ക് നിമ്മ ഗേന്ത കാര്യഗാളെല്ല എനാക്ക്‌ത്തെ ഗേന്താദ്> എന്റ് സൊല്ലുവാന്.
41അദ്‌ക്ക് പ്‌റ തന്ന് ഇ്ഡസാരിന്തവാര്‌ക്ക്: <സാപ്പ പ്‌ഡിത്തവാരേ, എനാന ബ്‌ട്ട് സെയിത്താന്‌ക്ക്‌മ് അയാള് ദൂദാര്‌ക്ക്‌മ് ഒരിക്കിര്‌ക്കുവ എന്നാല്‌ക്ക്‌മ് കെ്ഡാത്ത തീക്ക് പോനു. 42എനാക്ക് പജിപ്‌ഡിക്കാട്ടി നിമ്മ തിന്ന്യ തരാലെ. നീരറാക്കെ എ്ഡ്‌ക്കാട്ടി നിമ്മ എനാക്ക് കുഡിക്ക്യ നീര് തരാലെ. 43നാന് പളാക്കില്ലത്തവാനായി നിമ്മ പട്ട്‌ക്ക് ബന്തെ. നിമ്മ എനാന തങ്കാരിക്കാലെ. നാന് ബെ്റ്‌ദെകറി ഇന്തെ. നിമ്മ എനാക്ക് ഉഡുപ്പു ഇക്ക്‌സാലെ. നാന് നോയായി ഇര്‌ക്കാട്ടിമ് ജെയില്‌ല് ഇര്‌ക്കാട്ടിമ് നിമ്മ എനാന നോഡ്യ ബരാലെ> എന്റ് സൊല്ലുവാന്.
44അദുക്കുള അവാര്: <ആണ്ടവാനെ, നീ പജി ക്‌ഡാക്കുവാദ്‌നാമ്, നിനാക്ക് നീരറാക്കെ എ്ഡ്‌ക്കുവാദ്‌നാമ്, നിനാന പളാക്ക ഇല്ലത്തവാനായി ഇര്‌ക്കുവാദ്‌നാമ്, നീ ബെ്റ്‌ദെകറി ഇര്‌ക്കുവാദ്‌നാമ്, നീ നോയി ക്‌ഡാക്കുവാദ്‌നാമ്, ജെയില്‌ല് ഇര്‌ക്കുവാദ്‌നാമ് എമ്മ എന്നാല് കണ്ട് ഓരാഡാലെ?> എന്റ് സൊല്ലുവാര്.
45<ഈ സ്‌ന്നവാര്‌ല് ഒന്റാള്‌ക്ക് ബീസാക്ക് നിമ്മ ഗേഗാദിന്താദ് എനാക്ക് ഗേഗാത്താദ്‌ന പാസെത്തെ എന്റ് നാന് സത്ത്യമായി നിമാക്ക് സൊന്റെ> എന്റ് അവാന് സൊല്ലുവാന്.
46അത്തെ ഇത്തവാള്‌ഗാള്‌ക്ക് തീരാത്ത ദെ്ണ്ടണെ കെ്ഡേക്ക്‌മ്. ആന നേര്‌മെഗാറാര്‌ക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌മ് കെ്ഡേക്ക്‌മ്.>>
Currently Selected:
മത്തായി 25: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
