മര്‌ക്കോസു 1
1
ഏസ്സ് ബന്റാന്
1ഇദ് സാമിമഗാന്#1:1സാമിമഗാന് മുദാല് എ്ള്‌ദി ബെത്തിന്താദ്‌ന നോഡി എ്ള്‌ദ്‌ന പഗ്‌ദി കായിദാല് സാമിമഗാന് എന്റ് ഇല്ലെ ഏസ്സ് ക്‌റ്‌സ്‌ത്ത്‌ന പറ്റി സൊല്ല്യ പോവ നല്ല സേദി.
2സാമി സൊന്നാദ്‌ന ഏസ്സയ്യാവു എന്നുവ സാമിദാസ്#1:2സാമിദാസ് സാമിക്ക് സൊല്ല്യ ഇര്‌ക്കുവ കാര്യഗാള്‌ന ആള്‌ഗാള്‌ക്ക് സൊല്ലുവ ആള്‌ത്തെ സാമിദാസ്. ഇയാള്‌ന സാമിത്തെ തെരിന്തെ്ഡ്‌ത്ത് ഇര്‌ക്കുവാദ്. മുന്തെ കാലാത്ത്‌ല് നഡാന്താദ്‌ന പറ്റിമ് ഇന്നാല് നഡാക്കുവാദ്‌ന പറ്റിമ് ഇന്നി നഡാക്ക്യ പോവാദ്‌ന പറ്റിമ് അയാള് ആള്‌ഗാള്‌ക്ക് സൊല്ലുവാന്. എ്ള്‌ദി ബെത്തിന്ത പാസെ ഇദ് തുഡാങ്ക്‌റ്റ്:
<<ആണ്ടവാന്‌ക്ക് ബട്ടെ മാഡ്യ
എന്ന് സേദിഗാറാന്‌ന നാന് ആണ്ടവാന്‌ക്ക് മുദാല് സൊല്ലി ബ്‌ഡ്‌വെ.>>#മലാക്കി 3:1
3<<ബെ്ട്ടെകാഡ്‌ല് ആലാത്താലാത്ത് ഒരുത്താന് സൊല്ലുന്റാന്:
<ആണ്ടവാന് ബന്റാന്, ബട്ടെ മാഡി ബെയിന്;
ബട്ടെന നലമായി മാഡി ബെയിന്.> >>#ഏസ്സയ്യാവു 40:3
4അദേപാസെ ഓഗന്നാന്#1:4ഓഗന്നാന് മുദാല് എ്ള്‌ദി ബെത്തിന്താദ്‌ന നോഡി എ്ള്‌ദ്‌ന പഗ്‌ദി കായിദാല് <<നീര്‌ല് മുളുഗുസുവ ഓഗന്നാന്>> എന്റ് ഇര്‌ന്റ്. ബെ്ട്ടെകാഡ്‌ക്ക് ബന്ത് ആള്‌ഗാള്‌ന നീര്‌ക്ക് മുളിഗിസി#1:4മുളിഗിസി കൊണ്ടുമുഒന്റാള് ഗേന്ത തെറ്റ്‌കുറ്റഗാള്‌ക്ക് പൊറിമെ കെ്ഡേക്ക്യ അദ്‌നെല്ല നേരെ സൊല്ലി തെ്റിന്ത് തള്ളുഡൊ. ഇത്തെ സുത്താപ്പ് കെ്ഡേത്ത ആള്‌ന നീര്‌ക്ക് മുളുഗുസുഡൊ. അദ്‌ക്ക്‌ത്തെ ഓഗന്നാന് ആള്‌ഗാള്‌ന നീര്‌ല് മുളുഗുസുവാദ്. കൊണ്ടുമു <<നിമ്മ പാവ ഗേവാദ്‌ന തള്ളി നീര്‌ക്ക് മുളിഗി ഇ്ളാഗുഡൊ. അന്നാപ്പ് സാമി നിമ്മ് പാവാന പൊറുക്കുവാന്>> എന്റ് ആള്‌ഗാള്‌ക്ക് ആലാത്താലാത്ത് സൊല്ലികൊണ്ട്‌മ് ഇന്താന്. 5എഗുദ നാഡ്‌ലവാര് ഒട്ടുക്കുമു എര്‌സലേമ്‌ലവാര് ഒട്ടുക്കുമു അയാള് പട്ട്‌ക്ക് ബന്താര്. ബന്ത ആള്‌ഗാള് ഒട്ടുക്കു തമ്മ ഗേന്ത പാവാനെല്ല നേരെ സൊന്നാര്. അദുക്കുള അയാള് അവാര്‌ന ഓറ്‌ദ്ദാന് ബാനില് മുളുഗുസ്‌നാന്. 6ഓഗന്നാന് ഒട്ടഗ തുപ്പുഡുലു മാഡ്‌ന ഉഡുപ്പുന ഇക്കിന്താന്; ഇ്ഡ്‌പ്പ്‌ക്ക് ഒന്റു തോലു കച്ചെനാമ് കെ്ട്ടിന്താന്; അയാള് മുട്ടിരിനാമ് തേന്‌നാമ് തിന്റ് പജ്യാറിന്താന്. 7<<എനാന ബ്‌ഡ അദിഗര ഇര്‌ക്ക്‌ന്റവാന് എന്ന് പിന്ന്‌ക്ക് ബരുവാന്; അയാള് ഇക്കിര്‌ക്കുവ സെര്‌പ്പ് കണ്ണിന ബഗ്ഗി ഉക്ക്യ ഗുഡി എനാക്ക് തഗ്‌ദില്ലെ. 8നാന് നിമാന നീര്‌ക്ക് മുളുഗുസ്‌ന്റെ; ആന അയാള് നിമാന സാമിനിഗാല്‌ല് മുളുഗുസുവാന്>> എന്റ് ഓഗന്നാന് സൊന്നാന്.
ഏസ്സ്‌ന നീര്‌ക്ക് മുളുഗുസുവാദ്‌മ് സോദണെപഡുവാദ്‌മ്
9അയി കാലാത്ത്‌ല് ഏസ്സ് ഗലീല ദേസാത്ത്‌ലിര്‌ക്കുവ നസറേത്ത് ഊരുലിന്ത് ഓഗന്നാന് പട്ട്‌ക്ക് ബന്താന്. അയാള് ഏസ്സ്‌ന ഓറ്‌ദ്ദാന് ബാനില് മുളുഗുസുനാന്. 10ഏസ്സ് മഡുവുലിന്ത് ഏ്ട്ടിക്ക് ഏ്റ്‌നാദ്‌മ് അന്നാല് താനെ ബാന് ത്‌റാന്ത് സാമിനിഗാല് സോറെ പക്കിന പാസെ തന്ന് കുദ്ദാക്ക് ഏ്റുവാദ്‌ന അയാള് കണ്ടാന്. 11<<നീ എന്ന് മഗാന്‌ത്തെ, നാന് നിനാന സീവാന്‌പഡ്‌ന്റെ. നിന്ന്‌നാലെ എന്ന് മനേസ്സ് തെ്ളിന്ത്‌ദ്>> എന്റ് മേലോഗാത്ത്‌ലിന്ത് ഒന്റു ജദ്ദാമ് കേ്ട്ട്‌ദ്.
12പ്‌റ സാമിനിഗാല് ഏസ്സ്‌ന ഒന്റു ബെ്ട്ടെകാഡ്‌ക്ക് പോയ നത്ത്‌റ്റ്. 13നാപ്പദ് നാള് അയി ബെ്ട്ടെകാഡ്‌ല് ഏസ്സ് സോലെ ബേ്ണ്ട്‌ഗാളോഡൊപ്പ ഇന്താന്. സെയിത്താന് ബന്ത് അയാള്‌ന സോദണെ ഗേന്ത്‌കൊണ്ടിന്താന്. അയി സമ്യ സാമിദൂദാര്‌ഗാള് ബന്ത് ഏസ്സ്‌ന നോഡി നഡാന്താര്.
ഏസ്സ് നാക്ക് മീന് പ്‌ഡിക്ക്‌ന്റവാര്‌ന ബ്‌ളിക്ക്‌ന്റാന്
14അദ്‌ക്ക് പ്‌റ ഓഗന്നാന്‌ന ജെയില്‌ക്ക് അഡേത്താര്. ഏസ്സ് ഗലീല നാഡ്‌ക്ക് പോയി സാമി ആള്യ പോവ കാലന പറ്റി സൊല്ലുവ നല്ല സേദിന സൊല്ലി കൊഡുത്താന്. 15<<ഈത്തെ തഗ്‌ന്ത സമ്യ; സാമി ആളുവാദ് ബര്യ പക്ക ആയിര്‌ക്ക്‌ന്റ്. അദ്‌നാലെ പാവ ഗേവാദ്‌ന തള്ളി ഈ നല്ല സേദിന നമ്പ്‌ന്>> എന്റ് അയാള് സൊന്നാന്.
16ഏസ്സ് ഗലീല കഡാലോരമേലെ നഡാന്ത് പോഗാട്ടി സീമോനുമു അയാള് തമ്പി അന്ത്‌റാസ്‌മ് കഡാല്‌ല് ബലെ ഇക്കുവാദ്‌ന കണ്ടാന്. അവാര് റാഡാള്‌മ് മീന് പ്‌ഡിക്ക്‌ന്റവാര് ആയിന്താര്. 17ഏസ്സ് അവാര്‌ക്ക്: <<എന്ന് പിന്ന്‌ക്ക് ബാന്; നാന് നിമാന മീന് പ്‌ഡിക്ക്‌ന്റവാരല്ല, സാമി ആളുവ കാലാക്ക് മന്‌സാര്‌ഗാള്‌ന സേത്ത്‌ന്റവാര് മാഡുവെ>> എന്റ് സൊന്നാന്. 18അന്നാല് താനെ അവാര് ബലെന തള്ളി ഏസ്സ് പിന്ന്‌ക്ക് പോനാര്.
19അദ്‌ലിന്ത് ലേസ അത്തഗ പോഗാട്ടി ആക്കോവുമു അയാള് തമ്പി ഓഗന്നാന്‌മ് തോണിലിന്ത് ബലെ അണിമാഡുവാദ്‌ന കണ്ടാന്. ഇവാര് റാഡാള്‌മ് സെവേദി മഗനച്ചനാര് ആയിന്താര്. 20ഏസ്സ് അവാര്‌നാമ് അന്നാല് താനെ ബ്‌ളിത്താന്. അവാര് അപ്പനച്ചാന്‌ന തോണിലിന്ത കൂലിഗാറരോഡ ബ്‌ട്ട്‌തള്ളി ഏസ്സ് പിന്ന്‌ക്ക് പോനാര്.
കെ്ട്ടജാദി തട്ടിര്‌ന്റവാന്‌ന ഏസ്സ് തെ്ള്‌സ്‌ന്റാന്
21ഏസ്സ്‌മ് തന്ന് സൊല്ലുപഡി നഡാക്ക്‌ന്റവാര്‌മ് കവറ്‌ണഗൂമു പട്ടണാക്ക് പോനാര്. ഒയിവു നാള്#1:21ഒയിവു നാള് എഗുദാര് സാമി കുമ്മുഡുവ നാള്. ബാരാത്ത്‌ല ഏ്ള് നാള്‌ല കഡേസി നാള്‌ത്തെ ഇദ്. ഏസ്സ് അദ്‌ലിര്‌ക്കുവ എഗുദാര് പരേസുവ ബീ്ഡ്‌ക്ക് പോയി സാമി സേദിന പഡിസിന്താന്. 22അയാള് സൊന്ന ബുദ്ദിനായന കേ്ട്ട് ആള്‌ഗാള് അദിസ്യപട്ടാര്. ബേദബാത്ത്യനാമ്‌ഗാള്‌ന പാസെ അല്ല ഏസ്സ് ബുദ്ദിനായ സൊന്നാദ്; അദിഗരത്തോഡാത്തെ അയാള് ബുദ്ദിനായ സൊന്നാദ്. 23ഏസ്സ് എഗുദാര് പരേസുവ ബീ്ഡ്‌ല് ഇര്‌ക്കാട്ടി കെ്ട്ടജാദി തട്ടിന്ത ഒരുത്താന് അയി ബീ്ഡ്‌ലിന്താന്. 24<<നസറേത്ത്‌ഗാറാന് ഏസ്സേ, നിനാക്ക് എമ്മോഡ എന്ത് കാര്യ? നീ എമാന കെ്ഡിസ്യ ബന്ത്‌റ്‌ന്റായ? നീ ആരെന്റ് എനാക്ക് തെരിമ്. സാമി പട്ട്‌ലിന്ത് ബന്ത പച്ചെപാലഗാന്‌ത്തെ>> എന്റ് അയാള് ദൊഡ്ഡാക്ക് സൊന്നാന്.
25<<സപ്പെന്റിര്; അയാള്‌ന ബ്‌ട്ട് ഇ്റാഗി പൊ>> എന്റ് ഏസ്സ് കെ്ട്ടജാദിന മെ്റ്‌ട്ട്‌നാന്. 26അദുക്കുള കെ്ട്ടജാദി അയാള്‌ന മണ്ണ്‌ക്ക് ബീ്ക്കി ഇ്ള്‌ത്ത് കൊണ്ടു ദൊഡ്ഡാദ്‌ക്ക് അഗാറി ബ്‌ന്ത് ഇ്റാഗി പോറ്റു.
27ഇദ്‌ന കണ്ട് അദ്‌ലിന്ത ആള്‌ഗാളൊട്ടുക്കു അദിസ്യപട്ടാര്: <<ഇദെന്ത്? ഒന്റു പുദ്യ ബുദ്ദിനായ; കെ്ട്ടജാദിഗാള്‌ക്ക് അയാള് അദിഗരത്തോഡ കല്‌പനെ കൊഡുക്കുന്റാന്. അയാള് സൊല്ലുവാദ്‌നെല്ല അയി ജാദി അദേപാസെ കേ്ള്‌ക്ക്‌ന്റ്>> എന്റ് തമാക്ക് തമാക്ക് സൊന്നാര്. 28അത്തെ അയാള്‌ന പറ്റ്യുള്ള സേദി ഗലീല നാഡ്‌ലിര്‌ക്കുവ ജനഗാള് പൂര കേ്ട്ടാര്.
ഏസ്സ് മൊത്തന നോയിഗാറാര്‌ന തെ്ള്‌സ്‌ന്റാന്
29ഏസ്സ് ആക്കോവുമു ഓഗന്നാന്‌മോഡ എഗുദാര് പരേസുവ ബീ്ഡ്‌ലിന്ത് പ്‌റപട്ട് അന്ത്‌റാസ്‌മ് സീമോനുമു ബീ്ഡ്‌ക്ക് പോനാന്. 30അവാര് ബീ്ഡ്‌ക്ക് ബര്‌ഗാട്ടി അദ്‌ല് സീമോനു മാമ്യച്ചി പനി ആയി കെ്ഡെമേലെ ഇന്താള്. അദ്‌ലിന്തവാര് അവാള്‌ന പറ്റി ഏസ്സ്‌ക്ക് സൊന്നാര്. 31ഏസ്സ് അവാള് അര്‌ഗെ പോയി കയിന പ്‌ഡിത്ത് ഇ്ളാക്കി കുക്കാസ്‌നാന്. അദുക്കുള അവാള് പനി ബ്‌ട്ട്‌ദ്, അവാള്‌ക്ക് സുഗ കെ്ഡേത്ത്‌ദ്. പ്‌റ അവാള് അവാര്‌ക്ക് അട്ട്‌സുട്ടു കൊഡുത്താള്.
32അയി നാള് നേര ബ്‌ന്ത പ്‌റ പല നോയിഗാറാര്‌നാമ് കെ്ട്ടജാദി തട്ടിര്‌ന്റവാര്‌നാമ് ആള്‌ഗാള് ഏസ്സ് പട്ട്‌ക്ക് എ്ഡ്‌ത്ത് ബന്താര്. 33അയി പട്ടണാത്ത്‌ല് ഇര്‌ക്കുവ ആള്‌ഗാള് പൂര സീമോനു ബീ്ഡ് ബാസാക്ക് മുന്നുക്കു ബന്ത് തുമ്പിന്താര്. 34പല നോയിഗാള് ബന്ത് കജട്ട പട്ടിന്ത എഞ്ചോ ആള്‌ഗാള്‌ന ഏസ്സ് തെ്ള്‌സ്‌നാന്. എഞ്ചോ തട്ടിര്‌ക്കുവ കെ്ട്ടജാദിഗാള്‌നാമ് തട്ടിസി തള്ള്‌നാന്. ഏസ്സ് ആരെന്റ് അയി ജാദിഗാള്‌ക്ക് തെരിന്താദ്‌നാലെ അയാള് അയി ജാദിഗാള്‌ന നായനൊഡ്യ ബ്‌ഡാലെ.
ഏസ്സ് നല്ല സേദിന സൊന്റാന്
35മറ്‌നാള് ഏസ്സ് ബെ്ള്‌സാഗാത്ത മുദാല് താനെ ഇ്ളാഗി ഒന്റു ആളില്ലാത്ത പട്ട്‌ക്ക് പോയി പരേസികൊണ്ടിന്താന്. 36അയി സമ്യ സീമോനുമു അയാളൊപ്പ ഇന്തവാര്‌മ് ഏസ്സ്‌ന പരാക്ക്യ പോനാര്. 37<<ആള്‌ഗാളൊട്ടുക്കു നിനാനത്തെ പരാക്ക്‌ന്റാര്>> എന്റ് ഏസ്സ്‌ന പോയി കണ്ടപ്‌റ അവാര് സൊന്നാര്.
38<<ബേ്റെ ഊരുഗാള്‌ക്കെല്ല പോയി നായ സൊല്ലുഡൊ; അദ്‌ക്ക് ബേ്ണ്ടിത്തെ നാന് ബന്ത്‌റ്‌ക്കുവാദ്. അദ്‌നാലെ നമ്മ ആങ്ക് പോഗാന്>> എന്റ് ഏസ്സ് സൊന്നാന്. 39അത്തെ ഏസ്സ് ഗലീല നാഡ്‌ല് എല്ലാ സാരിമ് പോയി എഗുദാര് പരേസുവ ബീ്ഡ്‌ക്ക്‌റാഗ ബുദ്ദിനായ സൊല്ലികൊണ്ടുമു തട്ടിര്‌ക്കുവ കെ്ട്ടജാദിഗാള്‌ന തട്ടിസി തള്ളികൊണ്ടുമു ഇന്താന്.
ഏസ്സ് ഒന്റു കുസുട്ട നോയിഗാറാന്‌ന തെ്ള്‌സ്‌ന്റാന്
40ഒന്റു കുസുട്ട#1:40കുസുട്ട എഗുദാര് ഈ നോയിന സാമി തരുവ ദെ്ണ്ടണെ എന്റ് നെനേത്തിന്താര്. അവാര് ഈ നോയിഗാറാര്‌ന സുത്താപ്പില്ലാത്തവാര് എന്റ് സൊല്ലി ഊരുക്കു മെട്ട്‌സാദെ ഇന്താര്. ഈ നോയി ആരാറ്റ് ബ്‌ഡുവ നോയി അല്ല ഉരുവുലു തന്ന്‌പാഡ്‌ക്ക് ബരുവ നോയി. നോയിഗാറാന് ബന്ത് ഏസ്സ് കാല്‌ക്ക് ബ്‌ന്ത് <<നിനാക്ക് മനേസ്സിന്തദാന എനാന സുത്താപ്പിര്‌ക്ക്‌ന്റവാന് മാഡ്യ മുഡിമ്>> എന്റ് സൊന്നാന്.
41ഏസ്സ്‌ക്ക് അയാള്‌ന കണ്ട് ബേ്റ്‌വെന്ത്‌ദ്. ഏസ്സ് കയിന നീ്ട്ടി അയാള്‌ന അണ്ണി: <<എനാക്ക് മനേസ്സ് ഇര്‌ക്ക്‌ന്റ്; നീ സുത്താപ്പാഗ്>> എന്റ് സൊന്നാന്. 42അന്നാല് താനെ നോയി തെ്ളിന്ത്, അയാള് നലമായി ആനാന്.
43-44ഏസ്സ് അയാള്‌ന നല്ല മെ്റ്‌ട്ട്‌നാന്. <<നോഡു, ഇദ്‌ന ആര്‌ക്ക്‌മ് കണ്ടിപ്പായി സൊല്ലാദെ. ആന നീ പോയി നിനാന താനെ എഗുദാര് പൂസാരിക്ക് കാട്ട്. അദ്‌ക്ക് പ്‌റ നീ സുത്താപ്പാനായി എന്റ് അഡ്‌ത്തവാര് കാണ്യ ബേ്ണ്ടി മോസെ സൊന്ന നേര്‌സെന കൊഡു>> എന്റ് സൊല്ലി ബ്‌ട്ടാന്. 45ആന അയാള് അദ്‌ലിന്ത് പോനാദ്‌മ് അന്നാല് താനെ ഇദ്‌ന പറ്റി ആള്‌ഗാള്‌ക്ക് പൂര സൊല്ലി പജാത്ത്‌നാന്. അത്തെ ഏസ്സ്‌ക്ക് എ്ദ്‌ക്ക പട്ടണാക്ക് പോയ മുഡ്യാദെ പോറ്റു. അത്തെ ആഗാട്ടി ഏസ്സ് ആളില്ലാത്ത ഒന്റു എ്ഡേക്ക് പോയി ഇന്താന്. അത്തെ പോയിന്ത് ഗുഡി എല്ലാ മുക്കു മൂലേലിന്ത് ആള്‌ഗാള് ഏസ്സ് പട്ട്‌ക്ക് ബന്ത് കൊണ്ടിന്താര്.
Currently Selected:
മര്‌ക്കോസു 1: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
