മര്‌ക്കോസു 10
10
ആളാന്‌പെ്ണ്ട് പ്‌റ്‌വാദ്‌ന പറ്റി ഏസ്സ് പഡ്‌സ്‌ന്റാന്
1ഏസ്സ് അദ്‌ലിന്ത് പ്‌റപട്ട് ഓറ്‌ദ്ദാന് ബാനിക്ക് അക്കരെ ഇര്‌ക്കുവ എഗുദ നാഡ് സാരി പോനാന്. പിന്നേമ് മൊത്തന ആള്‌ഗാള് അയാള് പട്ട്‌ക്ക് ബന്തെജ്ജ്‌നാര്. എന്നാല്‌ക്ക്‌മ് ഗേവ പാസെ താന് അവാര്‌ക്ക് ബുദ്ദിനായ സൊല്ല്യ പ്‌ഡിത്താന്.
2അയി സമ്യ ലേസ പരിസാര് അയാള് പട്ട്‌ക്ക് ബന്ത് അയാള്‌ന സിക്ക്‌സ്യ ബേ്ണ്ടി: <<ഒരുത്താന് തന്ന് പെ്ണ്ട്‌ന ബ്‌ഡുവാദ് എഗുദാര് സട്ടപഡി നായഗ?>> എന്റ് കേ്ട്ടാര്.
3<<മോസെ നിമാക്ക് എന്ത് സട്ട തന്ത്‌റ്‌ന്റാന്>> എന്റ് ഏസ്സ് അവാര്‌ന കേ്ട്ടാന്.
4<<പെ്ണ്ട്‌ന ബ്‌ഡ്‌ന്റെ എന്റ് ആളാന് എ്ള്‌ദികൊഡുത്തു പെ്ണ്ട്‌ന ബ്‌ഡ്യ മോസെ സൊല്ലിര്‌ക്ക്‌ന്റാന്>> എന്റ് പരിസാര് സൊന്നാര്.
5ഏസ്സ് അവാര്‌ക്ക്: <<നിമാക്കിര്‌ക്കുവ മരനെഞ്ച്‌ന നെനേത്ത്‌ത്തെ മോസെ അയി സട്ടാന നിമാക്ക് എ്ള്‌ദി തന്താദ്. 6സാമി എല്ലാദ്‌നാമ് ദ്‌ട്ട്‌സ്‌ഗാട്ടി <അവാര്‌ന ഗണ്ട്‌മ് പെ്ണ്ണ്‌മ് ആയിത്തെ ഉണ്ടാക്ക്‌നാന്.>#ഉറുപത്തി 1:27 7<ഇദ്‌നാലെ മന്‌സാന് അപ്പാന്‌നാമ് അവ്വെനാമ് പ്‌റ്‌ന്ത് പെ്ണ്ടോഡ എജേവാന്. 8അത്തെ അവാര് ഒന്റാവാര്.>#ഉറുപത്തി 2:24 അദ്‌നാലെ അവാര് ഇന്നി റാഡല്ല, ഒന്റുത്തെ. 9സാമി ഒന്റായി സേത്ത്‌നാദ്‌ന മന്‌സാന് പ്‌റ്‌ക്ക ബേ്ഡ>> എന്റ് സൊന്നാന്.
10ബീ്ഡ്‌ല് ഇര്‌ക്കാട്ടി ഈ കാര്യന പറ്റി സൊല്ലുപഡി നഡാക്ക്‌ന്റവാര് പിന്നേമ് ഏസ്സ്‌ന കേ്ട്ടാര്. 11ഏസ്സ് അവാര്‌ക്ക്: <<സൊന്ത പെ്ണ്ട്‌ന ബ്‌ട്ട് ബേ്റെ ഒന്റൊരുത്തിന പോയി എ്ഡ്‌ക്ക്‌ന്റവാന് ബ്‌ട്ട് തള്ള്‌ന പെ്ണ്ട്‌ന ബേസ്യാഡ്‌ന്റാന്. 12അദേപാസെ ആളാന്‌ന ബ്‌ട്ട് ബേ്റെ ഒന്റൊരുത്താന്‌ന പോയി എ്ഡ്‌ക്ക്‌ന്റവാള്‌മ് ബേസ്യാഡ്‌ന്റാള്>> എന്റ് സൊന്നാന്.
ഏസ്സ് മക്കാള്‌ഗാള്‌ക്ക് പരേസ്‌ന്റാന്
13ലേസ ആള്‌ഗാള് മക്കാള്‌ഗാള്‌ന കയി ബെത്ത് പരേസി ബ്‌ഡ്യ ഏസ്സ് പട്ട്‌ക്ക് എ്ഡ്‌ത്ത് ബന്താര്. ആന സൊല്ലുപഡി നഡാക്ക്‌ന്റവാര് അവാര്‌ന നൊഡിന്താര്. 14അദ്‌ന ഏസ്സ് കണ്ടിന്താന്. സൊല്ലുപഡി നഡാക്ക്‌ന്റവാര് അവാര്‌ന തഡ്‌ക്കുവാദ് ഏസ്സ്‌ക്ക് പ്‌ഡിക്കാലെ. അദ്‌നാലെ ഏസ്സ് അവാര്‌ക്ക് ഇത്തെ സൊന്നാന്: <<മക്കാള്‌ഗാള്‌ന എന്ന് പട്ട്‌ക്ക് എ്ഡ്‌ത്ത് ബര്യ ബ്‌ഡ്‌ന്. അവാര്‌ന തഡ്‌ക്കാദേന്. എന്ത്‌ക്കെന്റ് സൊന്ന ഇവാര്‌ന പാസെ ഇര്‌ക്ക്‌ന്റവാര്‌നാത്തെ സാമി ആളുവാദ്. 15സാമി ആളുവാദ്‌ന ഒന്റു പ്‌ള്ളെ എത്തെ തങ്കാരിക്ക്‌ന്റോ അദേപാസെ തങ്കാരിക്കുഡൊ. അല്ലത്തവാന് ആര്‌മ് സാമി ആളുവാദ്‌ന കാണമാട്ട്‌റ് എന്റ് നാന് സത്ത്യമായിമ് നിമാക്ക് സൊന്റെ.>> 16പ്‌റ ഏസ്സ് അയി മക്കാള്‌ഗാള്‌ന നെഞ്ച്‌ക്ക് അണേത്ത് തലേക്ക് കയി ബെത്ത് പരേസി ബ്‌ട്ടാന്.
ഒന്റു സൊത്തുഗാറാന് ഏസ്സ് പട്ട്‌ക്ക് ബന്റാന്
17ഏസ്സ് അദ്‌ലിന്ത് പോയ ഒരുങ്കാട്ട്യെല്ല സൊത്തുസുഗത്തോഡ ഇര്‌ക്കുവ ഒന്റൊരുത്താന് ബന്ത് ഏസ്സ് കാല്‌ക്ക് ബ്‌ന്ത്: <<നല്ല ഗുരുവെ, എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കെ്ഡേസ്യ നാന് എന്ത് ഗേയ?>> എന്റ് കേ്ട്ടാന്.
18അദുക്കുള ഏസ്സ് അയാള്‌ക്ക്: <<നീ എന്ത്‌ക്ക് എനാന നല്ലവാന് എന്റ് സൊന്നാദ്? ആര്‌മ് നല്ലവാരല്ല, സാമി താനെത്തെ നല്ലവാന്. 19<കൊലെഗേഗ ബേ്ഡ, ബേസ്യാഡ ബേ്ഡ, ത്‌റ്‌ഡ ബേ്ഡ, കുറ്റഗാറാര് അല്ലത്തവാര്‌ന കുറ്റഗാറാര് എന്റ് സൊല്ല ബേ്ഡ, ബഞ്ചിക്ക ബേ്ഡ, അവ്വ്യപ്പാന്‌ന മദ്‌സുഡൊ എന്റ് ബെത്ത്‌റ്‌ക്കുവ സട്ടഗാള്‌നെല്ല നിനാക്ക് തെരിമല്ല?>#പയണ 20:12; മറിസി സൊല്ലുവ സട്ട 5:16–20>> എന്റ് സൊന്നാന്.
20<<ഗുരുവെ, ഈ സട്ടഗാളെല്ല നാന് സ്‌റ്‌പ്പാത്ത്‌ലിന്തേ ഗേന്ത് ബന്റെ>> എന്റ് അയാള് ഏസ്സ്‌ക്ക് സൊന്നാന്.
21ഏസ്സ് പിര്യപിര്യത്തോഡ അയാള്‌ന നോഡികൊണ്ടു: <<നീ ഒന്റു കാര്യ ഗുഡി ഗേഡൊ; പോയി നിനാക്ക് ഇര്‌ക്കുവാദ്‌ന ഒട്ടുക്കു ബിറ്റ്, പണാന ഒന്റുമില്ലാത്തവാര്‌ക്ക് ദാന ഗേഡൊ. അന്നാപ്പ് മേലോഗാത്ത്‌ല് നിനാക്ക് സൊത്തു കെ്ഡേക്കുവു. പ്‌റ എന്ന് പിന്ന്‌ക്ക് ബരുഡൊ>> എന്റ് സൊന്നാന്.
22അയാള് ദൊഡ്ഡ പണഗാറാന് ആയിന്താദ്‌നാലെ അയാള് ഏസ്സ് സൊന്നാദ്‌ന കേ്ട്ട് ദുക്കപട്ട് മോന്തെ ബാഡി അദ്‌ലിന്ത് പോനാന്.
23ഏസ്സ് സുറ്റീല് നോഡുന പ്‌റ സൊല്ലുപഡി നഡാക്ക്‌ന്റവാര്‌ക്ക്: <<സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് പണഗാറാര്‌ക്ക് സെറ്റെ കഡ്‌പ്പാത്തെ>> എന്റ് സൊന്നാന്.
24സൊല്ലുപഡി നഡാക്ക്‌ന്റവാര് അയാള് നായന കേ്ട്ട് അദിസ്യപട്ടാര്. ഏസ്സ് പിന്നേമ് അവാര്‌ക്ക്: <<എന്ന് പ്‌ള്ളെഗാളെ, സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്റ സെരിക്ക്‌മ് കഡ്‌പ്പാത്തെ. 25ഒന്റു പണഗാറാന് സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് സെറ്റെ കഡ്‌പ്പാത്തെ. അദ്‌ന ബ്‌ഡ സൂഞ്ചി ഓട്ടെ മേലെ ഒന്റു ഒട്ടഗ നൊഗേവാദ് എത്ത്‌റാഗോ എ്ള്‌പ്പ!>> എന്റ് സൊന്നാന്.
26<<അത്ത്യാന ആര്‌ക്ക് തപ്പിസി കഡാക്ക്യ മുഡിമ്?>> എന്റ് അവാര് തമ്മ തമ്മ സൊല്ലി അദിസ്യപട്ടാര്.
27ഏസ്സ് അവാര്‌ന നോഡി, <<മന്‌സാന്‌ക്ക് അദ് മുഡ്യാമാട്ട, ആന സാമിക്ക് അത്ത്യല്ല. സാമിക്ക് എല്ലാമ് ഗേയ മുഡിവു>> എന്റ് സൊന്നാന്.
28<<എമാക്ക് ഇര്‌ക്കുവാദ്‌ന ഒട്ടുക്കു ബ്‌ട്ട് എമ്മ നിന്ന് പിന്ന്‌മേലെ ബന്ത്‌റ്‌ന്റേമ്>> എന്റ് പത്ത്‌റോസു ഏസ്സ്‌ക്ക് സൊന്നാന്.
29ഏസ്സ് അവാര്‌ക്ക് ഇത്തെ സൊന്നാന്: <<നാന് സത്ത്യമായി നിമാക്ക് സൊന്റെ, എനാക്ക്‌മ് നല്ല സേദിക്ക്‌മ് ബേ്ണ്ടി സൊന്ത കാഡ്‌ബീ്ഡ്‌നാഗോ, അണ്ണാര്‌തമ്പ്യാര്‌നാഗോ, അക്ക്യാര്‌തങ്ക്യാര്‌നാഗോ, അവ്വ്യപ്പാന്‌നാഗോ, മക്കാള്‌നഗൊ ബ്‌ട്ട്‌തള്ള്‌നവാര്‌ക്ക് 30ഈ ലോഗാത്ത്‌ല് താനെ ബ്‌ട്ട്‌തള്ള്‌നാദ്‌ന ബ്‌ഡ അളാവുക്കു മീ്റി കാഡ്‌ബീഡ്‌ഗാള്‌മ്, അണ്ണാര്‌തമ്പ്യാര്‌ഗാള്‌മ്, അക്ക്യാര്‌തങ്ക്യാര്‌ഗാള്‌മ്, അവ്വ്യപ്പനാമ്‌ഗാള്‌മ്, മക്കാള്‌ഗാള്‌മ് കെ്ഡേക്ക്‌മ്. അദ്‌ക്കൊപ്പ കജട്ടഗാള്‌മ് അവാര്‌ക്ക് ഇര്‌ക്കുവു. ഇന്നി ബരുവ ഉലഗാത്ത്‌ല് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌മ് അവാര്‌ക്ക് കെ്ഡേക്ക്‌മ്. 31ആന ഇന്നാല് ഉജാന്ത്‌റ്‌ന്റവാര്‌ല് പല ആള്‌ഗാള്‌മ് താന്തവാര് ആവാര്, ഇന്നാല് താന്ത്‌റ്‌ന്റവാര്‌ല് പല ആള്‌ഗാള്‌മ് ഉജാന്തവാര് ആവാര്.>>
ഏസ്സ് താന് സാവാദ്‌ന പറ്റി പിന്നേമ് സൊന്റാന്
32ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് എര്‌സലേമ്‌ക്ക് പോയി കൊണ്ടിന്താര്. സൊല്ലുപഡി നഡാക്ക്‌ന്റവാര് മുന്നുക്കു ഏസ്സ് നഡാന്തിന്താന്. അയി സൊല്ലുപഡിക്ക് നഡാക്ക്‌ന്റവാര് അദിസ്യാമ് പട്ടിന്താര്. അവാര് പിന്ന്‌ക്ക് ബന്ത ആള്‌ഗാള്‌ക്ക് അഞ്ചിക്കേമ് പ്‌ഡിത്തിന്ത്‌ദ്. ഏസ്സ് സൊല്ലുപഡി നഡാക്കുവ പന്നന്റാള്‌ഗാള്‌ന പിന്നേമ് അലാക്ക കൂട്ടി പോയി തനാക്ക് നഡാക്ക്യ പോവ കാര്യഗാള്‌ന പറ്റി സൊല്ല്യ പ്‌ഡിത്താന്. 33<<ഇദാ, നമ്മ എര്‌സലേമ്‌ക്ക് പോന്റാമ്. അദ്‌ല് മന്‌സാനായി പ്‌റാന്തവാന് എഗുദാര് പൂസാരി തലെവാര്‌ഗാള്‌മ് ബേദബാത്ത്യനാമ്‌ഗാള്‌മ് കയിക്ക് സിക്കുവാന്. അവാര് അയാള്‌ന കൊല്ല്യ ബിദിത്ത് എഗുദാരല്ലാത്ത ജാദിഗാള് കയിക്ക് ബ്‌ട്ട് കൊഡുക്കുവാര്. 34അവാര് അയാള്‌ന നാണഗെ്ഡിസിമ് മോന്തേക്ക് തുപ്പിമ്, സാട്ടെവാര്‌ല് അഡിത്ത്‌മ് ഗേന്ത പ്‌റ കൊല്ലുവാര്. ആന അയാള് മൂറാവാദ് നാള് ഉജുര്‌ളാഗുവാന്>>
ആക്കോവുമു ഓഗന്നാന്‌മ് ഏസ്സോഡ ഉദാവി കേ്ള്‌ക്ക്‌ന്റാര്
35ആക്കോവുമു ഓഗന്നാന്‌മ് സെവേദി മഗനച്ചനാര് ആയിന്താര്. ഇവാര് ഏസ്സ് പട്ട്‌ക്ക് ബന്ത്: <<ഗുരുവെ എമ്മ നെനേക്കുവ കാര്യന നീ ഗേന്ത് തരുഡൊ>> എന്റ് ഏസ്സ്‌ന കേ്ട്ടാര്.
36<<നാന് നിമാക്ക് എന്ത് ഗേന്ത് തരുഡൊ എന്റ് നിമ്മ ആസെപഡ്‌ന്റ്‌റ്?>> എന്റ് ഏസ്സ് അവാര്‌ന കേ്ട്ടാന്.
37<<നീ അദിഗരത്തോഡ ആള്യ പോവ നാഡ്‌ല് നീ കുക്കാക്കുവ പട്ട്‌ല്, എമ്മ റാഡാള്‌ല് ഒരുത്താന്‌ന നിന്ന് ബലസാരിമ്, ഒരുത്താന്‌ന നിന്ന് ഇ്ഡസാരിമ്#10:37ഒരുത്താന്‌ന നിന്ന് ബലസാരിമ്, ഒരുത്താന്‌ന നിന്ന് ഇ്ഡസാരിമ്ഒന്റു രാജ്യാത്ത്‌ല ദൊഡ്ഡുദൊഡ്ഡ ആള്‌ഗാള് രാജാവുക്കു ഇ്ഡസാരിമ് ബലസാരിമ്‌ത്തെ കുക്കാക്കുവാദ്. കുക്കാക്ക്യ ബ്‌ഡ്‌ഡോമെ>> എന്റ് അവാര് സൊന്നാര്.
38<<നിമ്മ കേ്ള്‌ക്കുവാദ് എന്ത്‌ന എന്റ് നിമാക്ക് തെരിവാദില്ലെ. നാന് കുഡിക്ക്യ പോവ കജട്ട സെമ്പ്‌ലിന്ത് നിമാക്ക് കുഡിക്ക്യ മുഡിമ? നാന് മുളുഗ്യ പോവ കജട്ടാക്ക് നിമാക്ക് മുളുഗ്യ മുഡിമ?>> എന്റ് ഏസ്സ് അവാര്‌ന കേ്ട്ടാന്.
39<<എമാക്ക് മുഡിമ്>> എന്റ് അവാര് സൊന്നാര്. ഏസ്സ് അവാര്‌ക്ക്: <<സെരി, നാന് കുഡിക്ക്യ പോവ കജട്ട സെമ്പ്‌ലിന്ത് നിമ്മ കുഡിക്കുവുറു. നാന് മുളുഗ്യ ഇര്‌ക്കുവ കജട്ടാക്ക് നിമ്മ മുളുഗുവുറു. 40എന്റാല്‌മ് എന്ന് ഇ്ഡസാരിമ് ബലസാരിമ് കുക്കാസുവാദ്‌ക്കുള്ള അദിഗര എന്ന് കയില് ഇല്ലെ; അദ് സാമി ആര്‌ക്ക് കൊഡുക്ക്യ ബെത്ത്‌റ്‌ന്റാനൊ അവാര്‌ക്ക് കെ്ഡേക്കുവു>> എന്റ് സൊന്നാന്.
41സൊല്ലുപഡി നഡാക്കുവ ബേ്റെ പത്താള്‌ഗാള് അദ്‌ന കേ്ട്ട് ആക്കോവുനാമ്, ഓഗന്നാന്‌നാമ് മൊനേക്ക് തെ്ട്ട്‌നാര്. 42ഏസ്സ് അവാര്‌നെല്ല അര്‌ഗെ ബ്‌ളിത്ത് ഇത്തെ സൊല്ലി കൊഡുത്താന്: <<തമാക്ക് തലെവാര്‌ഗാള് എന്റ് നെനേക്കുവ ലേസ ആള്‌ഗാള് എഗുദാര് അല്ലാത്ത ഒന്റൊന്റു ജാദിഗാള്‌ക്ക് ഇര്‌ക്ക്‌ന്റാര്. അയി തലെവാര്‌ഗാള് തമ്മ് സൊല്ലുലു ആള്‌ഗാള് നഡാക്കുഡൊ എന്റ് ആസെപഡ്‌ന്റാര്. അവാര് തമ്മ് എല്ലാ അദിഗരനാമ് ജനഗാള്‌ക്ക് കാട്ട്‌ന്റാര് എന്റ്‌മ് നിമാക്ക് തെരിന്റ്. 43ആന നിമ്മ അവാര്‌ന പാസെ ആയ പാങ്കില്ലെ. നിമാക്ക് ആര്‌ക്കാറ്റ ദൊഡ്ഡവാനായ ആസെ ഇന്തദാന അയാള് എല്ലാര്‌ക്ക്‌മ് ഗിലാസഗാറാന് ആയിര്‌ക്കുഡൊ. 44നിമ്മ് കൂട്ടാത്ത്‌ല് ആരാറ്റ മുമ്പാനായിര്‌ക്ക്യ ആസെപട്ടദാന അയാള് എല്ലാ ആള്‌ഗാള്‌ക്ക്‌മ് അഡിമെ ആയിര്‌ക്കുഡൊ. 45എന്ത്‌ക്കെന്റ് സൊന്ന മന്‌സാനായി പ്‌റാന്തവാന് ബന്താദ് ആള്‌ഗാള് തനാന നോഡ്യമാഡ്യല്ല, ആള്‌ഗാള്‌ന നോഡ്യമാഡ്യാമ് എഞ്ചോ ആള്‌ഗാള് ഉജുരുന കെ്ഡേസ്യ ബേ്ണ്ടി തന്ന് ഉജുരുന കൊഡുക്ക്യ ബേ്ണ്ടിമ്‌ത്തെ ബന്താദ്. നിമ്മാമ് അദേപാസെത്തെ ആയിര്‌ക്കുഡൊ.>>
ഒന്റു കുറുഡാന്‌ന തെള്‌സ്‌ന്റാന്
46പ്‌റ അവാര് എരിഗോവു പട്ടണാക്ക് പോയി എജ്ജ്‌നാര്. പ്‌റ ഏസ്സ്‌മ്, സൊല്ലുപഡി നഡാക്ക്‌ന്റവാര്‌മ്, ബേ്റെ എഞ്ചോ ആള്‌ഗാള്‌മ് എരിഗോവുലിന്ത് പോയി കൊണ്ട്‌റ്‌ക്കാട്ടി തീമായി മഗാന് ബറ്‌ത്തിമായി എന്നുവ ഒന്റു കുറുഡാന് ബട്ട്യോരാത്ത്‌ല് കുക്കാന്ത് പിച്ചെഡ്‌ത്തിന്താന്. 47നസറേത്ത്‌ഗാറാന് ഏസ്സ് ബന്റാനെന്റ് ബട്ടെമേലെ പോന്റവാര് സൊല്ലുവാദ്‌ന അയാള് കേ്ട്ടാന്. <<ഏസ്സേ, ദാവീദ് കാല്‌ക്ക് പട്ടവാനെ, എനാന ഗവപഡുഡോമെ>> എന്റ് അയാള് ദൊഡ്ഡാദ്‌ക്ക് അഗാറ്യ പ്‌ഡിത്താന്.
48<<സപ്പെന്റിര്>> എന്റ് സൊല്ലി മൊത്തന ആള്‌ഗാള് അയി കുറുഡാന്‌ന നൊഡിന്താര്. ആന അയി കുറുഡാന്: <<ഏസ്സേ, ദാവീദ് കാല്‌ക്ക് പട്ടവാനെ, എനാന ഗവപഡുഡോമെ>> എന്റ് സേത്തി സേത്തി ആലാത്താന്.
49ഏസ്സ് അദ്‌ല് നിന്റ്: <<അയാള്‌ന ബ്‌ളിത്ത് ബാന്>> എന്റ് സൊന്നാന്. <<അഞ്ചാദെ ഇ്ളാഗ് അയാള് നിനാന ബ്‌ളിക്ക്‌ന്റാന്>> എന്റ് അവാര് അയാള്‌ന ബ്‌ളിത്താര്. 50അയാള് പൊദോണന ഇ്ളാഗി പൊദേത്തിന്ത സീലേന തെ്റിന്ത് തള്ളി ഏസ്സ് പട്ട്‌ക്ക് പോനാന്.
51<<നാന് നിനാക്ക് എന്ത് ഗേന്ത് തരുഡൊ എന്റ് നീ ആസെപഡ്‌ന്റായി?>> എന്റ് ഏസ്സ് അയാള്‌ന കേ്ട്ടാന്.
<<ഗുരുവെ, എനാക്ക് കണ്ണ് കാട്ടുഡൊ>> എന്റ് അയി കുറുഡാന് ഏസ്സ്‌ക്ക് സൊന്നാന്.
52അദുക്കുള ഏസ്സ് അയാള്‌ക്ക്: <<ഇന്നി നീ പൊ, നിന്ന് നമ്പിക്കെ നിനാന തെ്ളിസിര്‌ക്ക്‌ന്റ്>> എന്റ് സൊന്നാന്. അന്നാല് താനെ അയാള്‌ക്ക് കണ്ണ് കാട്ട്‌റ്റ്. പ്‌റ അയാള്‌മ് ഏസ്സ് പിന്ന്‌മേലെ പോനാന്.
Currently Selected:
മര്‌ക്കോസു 10: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
