മര്‌ക്കോസു 12
12
മുന്തിരി ദോട്ട കദെ
1അത്തെ ഏസ്സ് അവാര്‌ക്ക് കദെഗാള്‌ന സൊല്ലി കൊഡുത്തു കൊണ്ടു പഡിസ്യ പ്‌ഡിത്താന്. <<ഒരുത്താന് ഒന്റു മുന്തിരി ദോട്ട ഗേന്താന്. അയാള് അയി ദോട്ടാക്ക് സുറ്റീല് ബേലി കെ്ട്ടി മുന്തിരി സാര മെ്ട്ടി പെജേന്ത് എ്ഡ്‌ക്ക്യ അറേല് താനെ കൊദേന്ത് ഒന്റു കുയി മാഡി കാവ കാക്ക്യ ഒന്റു പന്താമ് ബെത്താന്. അദ്‌ക്ക് പ്‌റ ഗുത്തഗെഗാറാര്‌ക്ക് ദോട്ടന ഗുത്തഗേക്ക് കൊഡുത്തു തള്ളി ബേ്റെ നാഡ്‌ക്ക് പോനാന്. 2മുന്തിരി പഗ പറ്‌ക്കുവ ഗളിഗെ ആഗാട്ടി അയാള് തനാക്ക് കെ്ഡേക്കുവ പങ്ക്‌ന ബാങ്കി ബര്യ അയാള് തന്ന് ഗിലാസഗാറാന്‌ന ഗുത്തഗെഗാറാര് പട്ട്‌ക്ക് സൊല്ലി ബ്‌ട്ടാന്. 3ആന അവാര് അയാള്‌ന പ്‌ഡിത്ത് അഡ്യഡി എന്റ് അഡിത്ത് ഒന്റുമു കൊഡുക്കാദെ തിരിക്കി ബ്‌ട്ടാര്. 4പിന്നേമ് അയാള് ബേ്റൊന്റു ഗിലാസഗാറാന്‌ന സൊല്ലി ബ്‌ട്ടാന്. അവാര് അയാള് തലേന അഡിത്ത് ഗായ മാഡി അയാള്‌ന നാണഗെ്ഡ്‌സ്‌നാര്. 5അയാള് പിന്നെ ബേ്റൊന്റാള്‌ന ഗുഡി സൊല്ലി ബ്‌ട്ടാന്. അവാര് അയാള്‌ന കൊന്റു തള്ള്‌നാര്. അയാള് എഞ്ചോ ആള്‌ഗാള്‌ന സൊല്ലി ബ്‌ട്ടാന്. അവാര്‌ല് പഗിദ്യാള്‌ന അവാര് അഡിത്താര്, പഗിദ്യാള്‌ന അവാര് കൊന്റു തള്ള്‌നാര്.
6അവാര് പട്ട്‌ക്ക് സൊല്ലി ബ്‌ഡ്യ അയാള്‌ക്ക് ഇന്നി താന് അദിഗ സീവാന്‌പഡുവ തന്ന് മഗനച്ചാന് താനെത്തെ ഇന്താന്. <എന്ന് മഗാന്‌ന അവാര് മദ്‌സുവാര്> എന്റ് സൊല്ലി അയാള് തന്ന് മഗാന്‌നാമ് കഡേഗല അയി ഗുത്തഗെഗാറാര് പട്ട്‌ക്ക് സൊല്ലി ബ്‌ട്ടാന്.
7ആന ഗുത്തഗെഗാറാര് മഗാന്‌ന കാണ്‌ഗാട്ടി: <ഇവാന്‌ത്തെ ഈ ദോട്ടാക്ക് ഉരിമെഗാറാന്. അദ്‌നാലെ ബാന്, നമ്മ അയാള്‌ന കൊന്റു തള്ള്‌ല. അന്നാപ്പ്‌ത്തെ ഈ ദോട്ട നമാക്ക് കെ്ഡേക്ക്‌മ്> എന്റ് തമാക്ക് തമാക്ക് സൊന്നാര്. 8അത്തെ അവാര് അയാള്‌ന പ്‌ഡിത്ത് കൊന്റു എ്ഡ്‌ത്ത് മുന്തിരി ദോട്ടാക്ക് അച്ചാരി എ്റിന്ത് തള്ള്‌നാര്.
9അന്നാപ്പ് അയി മുന്തിരി ദോട്ടഗാറാന് ഇന്നി എന്ത് ഗേവാന്? അയാള് പോയി അയി ഗുത്തഗെഗാറാര്‌ന കൊന്റു തള്ളി മുന്തിരി ദോട്ടന ബേ്റെ ആള്‌ഗാള്‌ക്ക് കൊഡുക്കുവാന്.
10<ബീ്ഡ് ഗിലാസ ഗേന്റവാര് മോസ എന്റ് തെ്റിന്ത് തള്ള്‌ന കല്ല്‌ത്തെ
ബീ്ഡ് എ്ഡ്‌ക്കാട്ടി എല്ലാ കല്ല്‌ഗാള്‌ന ബ്‌ഡ മുക്ക്യമാന കല്ല്#12:10 മുക്ക്യമാന കല്ല് ബേസ്‌മട്ട മൂലേലെ കല്ല് എന്റൊ കാവാഡിന പാസെ ഇര്‌ക്കുവ ബാസാക്ക് മേല് നഡ്‌ക്കെ ബെക്കുവ കല്ല് എന്റൊ ഇദ്‌ക്ക് അര്‌ത്ത ഇര്‌ക്ക്‌ന്റ്. നമ്മാള്‌ഗാള് ബീ്ഡ് എ്ഡ്‌ക്കാട്ടി പെര്‌ങ്കാന് കമ്പ് ബീ്ഡ്‌ന ഒറേപ്പ്‌ന മാഡി ബെക്കുവ പാസെ എഗുദാര് ബീ്ഡ് എ്ഡ്‌ക്കാട്ടി ഈ കല്ല്‌ത്തെ അവാര് ബീ്ഡ്‌ന ഒറേപ്പ് മാഡി ബെക്കുവാദ്. ആയി തള്ള്‌ട്ട്.
11ഇദ് ആണ്ടവാന്‌നാലെ നഡാന്ത്‌ദ്.
അദ് നമ്മ് കണ്ണ്‌ക്ക് അദിസ്യുള്ള കാര്യ ആയിര്‌ക്ക്‌ന്റ്>#സാമി പാട്ട് ബൊക്കു 118:22,23 എന്റ് സാമി ബൊക്കുലു എ്ള്‌ദിര്‌ക്കുവാദ്‌ന നിമ്മ പഡിക്കാലെഗ?>>
12ഏസ്സ് സൊന്ന കദെ തമാന പറ്റിത്തെ സൊന്നാദ് എന്റ് അവാര്‌ക്ക് ഒട്ടുക്കു തെരിന്ത്‌ദ്. അദ്‌നാലെ അവാര് ഏസ്സ്‌ന പ്‌ഡിക്ക്യ നോഡുനാര്. ആന ആള്‌ഗാള്‌ക്ക് അഞ്ചി അവാര് അയാള്‌ന ബ്‌ട്ട്‌തള്ളി പോനാര്.
എഗുദ തലെവാര്‌ഗാള് ഏസ്സ്‌ന സിക്ക്‌സ്യ ഓരാഡ്‌ന്റാര്
13എഗുദ തലെവാര്‌ഗാള് ഏസ്സ് സൊല്ലുവ നായാത്ത്‌ല് കുറ്റ കണ്ട്‌പ്‌ഡിക്ക്യ ലേസ പരിസാര്‌ഗാള്‌നാമ് എരോദ്യര്‌നാമ്#12:13എരോദ്യര്‌നാമ്എരോദ അന്തിപാസ് എന്നുവ രാജാവോഡ ഇന്ത് റോമ നാഡ് അദിഗാരിഗാള് സട്ടഗാള്‌ന കേ്ട്ട് നഡാന്തിന്ത എഗുദാര് കൂട്ടാത്തെ ഏരോദ്യാര്. അയാള് പട്ട്‌ക്ക് സൊല്ലി ബ്‌ട്ടാര്. 14അവാര് ബന്ത് ഏസ്സ്‌ന ഇത്തെ കേ്ട്ടാര്: <<ഗുരുവെ നീ മന്‌സാര് എന്ത് നെനേക്ക്‌ന്റാര് എന്റ്‌ഗുഡി അഞ്ചാദെ സത്ത്യന നേരെ സൊല്ലുന്റവാന് എന്റ് എമാക്ക് തെരിവു. അദ്‌നാലെ മന്‌സാര് എത്തെ പെ്ളേത്ത് പോഡൊ എന്റ് സാമി സൊല്ലിര്‌ക്കുവാദ്‌ന ആര്‌നാമ് മൂഞ്ചിമുഗ നോഡാദെ നീ പഡ്‌സ്‌ന്റായി. എമ്മ ഒന്റു കേ്ള്‌ക്ക്‌ന്റേമ്, മോസെ ബെത്ത സാമി സട്ടപഡി റോമ നാഡ് രാജാവുക്കു കന്ത്യ കെ്ട്ടുവാദ് സെര്യ ഇല്ലെ തപ്പ? 15എമ്മ അദ് കൊഡുക്ക്യാഗ ഇല്ലെ ബേ്ഡാഗ?>>
ആന അവാര് തനാന സിക്ക്‌സ്യ നോഡുന്റാര് എന്റ് ഏസ്സ്‌ക്ക് തെരിന്ത്‌ദ്. <<നിമ്മ എനാന സോദണെ ഗേയ നോഡുവാദ് എന്ത്‌ക്ക്? ഒന്റു ബെ്ള്ളി പണ എ്ഡ്‌ത്ത് ബാന്; നാന് ഒന്റു നോഡുന്റെ>> എന്റ് ഏസ്സ് അവാര്‌ക്ക് സൊന്നാന്. 16അവാര് ഒന്റു ബെ്ള്ളി പണ എ്ഡ്‌ത്ത് ബന്താര്. <<ഈ പണാത്ത്‌ല് ഇര്‌ക്കുവ മൂഞ്ചിമ് പേര്‌മ് ആര്‌ത്ത്?>> എന്റ് ഏസ്സ് അവാര്‌ന കേ്ട്ടാന്.
<<റോമ നാഡ് രാജാവുത്തു>> എന്റ് അവാര് സൊന്നാര്.
17<<അത്ത്യാന, റോമ നാഡ് രാജാവുക്കു കൊഡുക്കുവാദ്‌ന റോമ നാഡ് രാജാവുക്കു കൊഡുനു, സാമിക്ക് കൊഡുക്കുവാദ്‌ന സാമിക്ക് കൊഡുനു>> എന്റ് ഏസ്സ് അവാര്‌ക്ക് സൊന്നാന്.
ഏസ്സ് സൊന്ന നായന കേ്ട്ട് അവാര് അന്തബ്‌ട്ടാര്.
സദൂക്ക്യാര് ഏസ്സ്‌ന സിക്ക്‌സ്യപഡ്‌ന്റാര്
18സത്തവാര് ഉജുര്‌ളാഗുവാദ് ഇല്ലെ എന്റ് സൊല്ലുവ സദൂക്ക്യാര് ഏസ്സ് പട്ട്‌ക്ക് ബന്ത് ഇത്തെ കേ്ട്ടാര്: 19<<ഗുരുവെ, ഒന്റു ഒരുത്താന് പെ്ണ്ണെ്ഡ്‌ത്ത് മക്കാളില്ലാദെ സത്തദാന അയാള് അണ്ണാര്‌തമ്പ്യാര്‌ല് ആരാറ്റ അയി മ്‌ണ്ടേസി ആനവാള്‌ന കല്യണമാഡി സത്തവാന്‌ക്ക് മക്കാള്‌ഗാള്‌ന പ്‌റാത്തുഡൊ എന്റ് മോസെ എ്ള്‌ദി ബെത്ത്‌റ്‌ന്റാന്. 20ഒന്റു എ്ഡേല് ഏ്ള് അണ്ണാര്‌തമ്പ്യാര് ഇന്താര്. കോഡിലവാന് പെ്ണ്ണെ്ഡ്‌ത്ത് മക്കാള് പ്‌റാക്കാദെ സത്താന്. 21അയാള്‌ക്ക് അഡ്യാസാരിലവാന്‌മ് മ്‌ണ്ടേസിന എ്ഡ്‌ത്ത് മക്കാളില്ലാദെ സത്താന്. അദ്‌ക്ക് അഡ്യാസാരിലവാന്‌ക്ക്‌മ് അത്തേത്തെ ആറ്റ്. 22അത്തെ അണ്ണാര്‌തമ്പ്യാര് ഏ്ളാള്‌മ് അവാള്‌ന എ്ഡ്‌ത്ത് മക്കാളില്ലാദെ സത്താര്. കഡേഗല അവാള്‌മ് സത്താള്. 23സത്തവാര് ഉജുര്‌ളാഗാട്ടി അവാള് ആര്‌ക്ക് പെ്ണ്ടച്ചി ആവാള്? ഏ്ള് ആള്‌ക്ക്‌മ് പെ്ണ്ടച്ചി ആയിന്താളല്ല?>>
24ഏസ്സ് അവാര്‌ക്ക്: <<സാമി ബൊക്കുലു എ്ള്‌ദിര്‌ക്കുവാദ്‌നാമ് സാമിക്ക് എല്ലാമ് ഗേയ മുഡിമ് എന്റ്‌മ് നിമാക്ക് തെര്യാത്താദ്‌നാല്യല്ല നിമാക്ക് തപ്പ് ബന്ത്‌റ്‌ക്കുവാദ്. 25സത്തവാര് ഉജുര്‌ളാഗാട്ടി അവാര് പെ്ണ്ണെ്ഡ്‌ക്കുവാദില്ലെ, പെ്ണ്ണ് കൊഡുക്കുവാദ്‌മില്ലെ. മേലോഗാത്ത്‌ല ദൂദാര്‌ഗാള്‌ന പാസെത്തെ ഇര്‌ക്കുവാദ്. 26കത്തിക്കൊണ്ടു ഇര്‌ക്കുവ മുള്ളുഗുമ്പുലു സാമി ബെ്ളിപട്ടാദ്‌ന മോസെ എ്ള്‌ദി ബെത്ത്‌റ്‌ന്റാന്. അദ്‌ല് സത്തവാര് ഉജുര്‌ളാഗുവാദ്‌ന പറ്റി നിമ്മ പഡിക്കാലെഗ? അദ് ഇത്തേത്തെ: <നാന് അവുറഗാമ്‌ത്ത്‌മ് ഇസഗാക്ക്‌ത്ത്‌മ് ആക്കോവുത്തുമു സാമിത്തെ>#പയണ 3:6 എന്റ് സാമി മോസേക്ക് സൊന്നാന്. 27ഈ മൂറു പാട്ടനാമ് സത്തിന്താല്‌മ് അവാര് സാമിക്ക് ഉജുരോഡാത്തെ ഇര്‌ക്ക്‌ന്റാര്. ആന സാമി ഉജുരു ഇര്‌ക്ക്‌ന്റവാര് സാമിത്തെ; അല്ലാദെ സത്തവാര് സാമി അല്ല. നിമാക്ക് നേര്‌മായി തപ്പ് ബന്ത്‌ദ്>> എന്റ് സൊന്നാന്.
ദൊഡ്ഡ കല്‌പനെ ഏദ്?
28ഇത്തെ അവാര് തറ്‌ക്കി കൊണ്ടു ഇര്‌ക്കാട്ടി ബേദബാത്ത്യനാമ്‌ഗാള്‌ല് ഒന്റൊരുത്താന് ഏസ്സ് പട്ട്‌ക്ക് ബന്താന്. സദൂക്ക്യാര് കേ്ള്‌ക്കുവാദ്‌ക്ക് ഏസ്സ് തഗ്‌ന്ത ബദ്‌ല് സൊന്റാന് എന്റ് അയാള്‌ക്ക് തെരിന്ത്‌ദ്. <<എല്ലാ കല്‌പനെഗാള്‌ല് ബെത്ത് മുക്ക്യമാന കല്‌പനെ ഏദ്?>> എന്റ് അയാള് ഏസ്സ്‌ന കേ്ട്ടാന്.
29ഏസ്സ് അവാര്‌ക്ക് ഇത്തെ സൊന്നാന്: << <ഇസ്‌റവേല്‌ഗാറാരെ കേ്ള്‌ന്! സാമി നമ്മ് ആണ്ടവാന്‌ത്തെ. ഈ സാമി ഒന്റേ ഒന്റു ആണ്ടവാന്‌ത്തെ. ഈ സാമി അല്ലാദെ ബേ്റെ ഒന്റു സാമി ഇല്ലെ. 30നമ്മ് ആണ്ടവാന് സാമിന നീ ഉജുരുക്കുജുര സീവാന്‌പഡുഡൊ. അദ് എത്തെ എന്റദാന, നമ്മ് സാമിനത്തെ മനേസ്സാറ സീവാന്‌പഡുഡൊ, നമ്മ് ഉജുരുന കൊഡുത്തുമു സാമിനത്തെ സീവാന്‌പഡുഡൊ, നമ്മ് സാമിനത്തെ എന്നാല്‌ക്ക്‌മ് നെനേക്കുഡൊ, നമ്മ് മുജുവുന ഒട്ടുക്കുമു സാമി ഗിലാസാക്ക്‌ത്തെ കൊഡുക്കുഡൊ.>#മറിസി സൊല്ലുവ സട്ട 6:4,5 ഈത്തെ മുക്ക്യമാന കല്‌പനെ. 31<നിനാന സീവാന്‌പഡുവ പാസെ അഡ്‌ത്തവാര്‌നാമ് സീവാന്‌പഡുഡൊ.>#ലേവ്യാര് 19:18 ഇദ്‌ത്തെ റണ്ടാവാദ് കല്‌പനെ. ഈ റാഡ് ദൊഡ്ഡ കല്‌പനെഗാള്‌ന ബ്‌ഡ ബേ്റെ ദൊഡ്ഡ കല്‌പനെഗാള് ഇല്ലെ.>>
32അയി ബേദബാത്ത്യാന് ഏസ്സ്‌ക്ക് ഇത്തെ സൊന്നാന്: <<ഗുരുവെ നീ സൊന്നാദ് സെരിത്തെ. സാമി ഒരുത്താന്‌ത്തെ. ഈ സാമി അല്ലാദെ ബേ്റെ സാമി ഇല്ലെ. 33നിന്ന് സാമി ആണ്ടവാന്‌ന എല്ലാദ്‌ന ബ്‌ഡ സീവാന്‌പഡുഡൊ. അദ് എത്തെ എന്റദാന, നമ്മ് സാമിനത്തെ മനേസ്സാറ സീവാന്‌പഡുഡൊ, നമ്മ് സാമിനത്തെ എന്നാല്‌ക്ക്‌മ് നെനേക്കുഡൊ, നമ്മ് മുജുവുന ഒട്ടുക്കുമു സാമി ഗിലാസാക്ക്‌ത്തെ കൊഡുക്കുഡൊ. നിനാന സീവാന്‌പഡുവ പാസെ താനെ അഡ്‌ത്തവാര്‌ന സീവാന്‌പഡുഡൊ. ഈ റാഡ് കല്‌പനെഗാള് പഡി നഡാക്കുവാദ്‌ത്തെ നേര്‌സെ പലി കൊഡുക്കുവാദ്‌ന ബ്‌ഡ ദൊഡ്ഡാദ്.>>
34അയാള് നല്ല ഓസണെ മാഡി ബദ്‌ല് സൊന്നാദ്‌ന കേ്ട്ട് ഏസ്സ് അയാള്‌ക്ക്: <<നീ സാമി ആളുവാദ്‌ക്ക് അര്‌ഗെ എജ്ജി ഇര്‌ക്ക്‌ന്റായി>> എന്റ് സൊന്നാന്. അദ്‌ക്ക് പ്‌റ ആര്‌മ് ഏസ്സോഡ എന്താറ്റ കേ്ള്‌ക്ക്യ ദയിര കാട്ടാലെ.
ക്‌റ്‌സ്‌ത്ത്‌ന പറ്റി കേ്ള്‌വി കേ്ള്‌ക്ക്‌ന്റാര്
35സാമിബീ്ഡ്‌ല് ഏസ്സ് പഡിസിര്‌ക്കാട്ടി: <<ക്‌റ്‌സ്‌ത്ത് ദാവീദ് കാല്‌ക്ക് പട്ടവാന് എന്റ് ബേദബാത്ത്യനാമ്‌ഗാള്‌ക്ക് എത്തെ സൊല്ല്യ മുഡിമ്?
36<സാമി എന്ന് ആണ്ടവാന്‌ക്ക്:
<<നാന് നിന്ന് പോട്ടിഗാറാന്‌ന നിന്ന് കാല്‌കഡി മാഡമാട്ട്‌ക്ക്
നീ എന്നോഡ ഒപ്പ ഇന്ത് ആളുഡൊ>> >#സാമി പാട്ട് ബൊക്കു 110:1 എന്റ് സാമിനിഗാല് ദാവീദ്‌ന സൊല്ലുസുറ്റു.
37ദാവീദ് താനെ ക്‌റ്‌സ്‌ത്ത്‌ന ആണ്ടവാന് എന്റ് ബ്‌ളിക്ക്‌ന്റാന്. പിന്നെ എത്തെ ക്‌റ്‌സ്‌ത്ത് ദാവീദ് കാല്‌ക്ക് പട്ടവാനാവാന്?>> എന്റ് കേ്ട്ടാന്.
ബേദബാത്ത്യനാമ് നായന സൂസാരിക്കുഡൊ
മൊത്തന ആള്‌ഗാള് ഏസ്സ് നായന പിര്യപിര്യാത്ത് കേ്ട്ടിന്താര്.
38ഏസ്സ് ബുദ്ദിനായ സൊല്ലി കൊഡുക്കാട്ടി അവാര്‌ക്ക്: <<ബേദബാത്ത്യനാമ്‌ഗാള്‌ന നിമ്മ സൂസാരിത്തിര്‌ന്. നല്ല നല്ല ജൊഗെ ഇക്കി നഡാക്ക്യാമ് സന്തേക്ക്‌റാഗ ഇര്‌ക്ക്‌ന്റവാര് മദ്‌പ്പ് കെ്ഡേസ്യാമ്, 39എഗുദാര് പരേസുവ ബീ്ഡ്‌ല് മുക്ക്യമാന എ്ഡേല് കുക്കാക്ക്യാമ്, ബിര്‌ന്ത് പട്ട്‌ല് എല്ലാര് മുന്നുക്കു ഇര്‌ക്ക്യാമ് അവാര് ആസെപഡ്‌ന്റാര്. 40അവാര് മ്‌ണ്ടേസ്യാര് മുദാല്‌മുമ്പുഗാള്‌ന ഊഗത്തോഡ ഏമാത്തി എ്ഡ്‌ക്ക്‌ന്റാര്. എന്റിന്ത് നല്ലവാര് എന്റ് കാട്ട്യ എഞ്ചോ ഗളിഗെ പരേസുവാര്. ബേ്റാള്‌ക്ക് കെ്ഡേക്കുവ ദെ്ണ്ടണെന ബ്‌ഡ ദൊഡ്ഡ ദെ്ണ്ടണെ അവാര്‌ക്ക് കെ്ഡേക്കുവു>> എന്റ് സൊന്നാന്.
മ്‌ണ്ടേസി കാണിക്കെ ഇക്ക്‌ന്റാള്
41ഏസ്സ് സാമിബീ്ഡ്‌ല ഉണ്ടിഗേക്ക് അര്‌ഗെ കുക്കാന്തിന്ത് ആള്‌ഗാള് കാണിക്കെ ഇക്കുവാദ്‌ന നോഡികൊണ്ടു ഇന്താന്. എഞ്ചോ പണഗാറാര് മൊത്തന പണഗാള് ഇക്ക്‌നാര്. 42ആന ഒന്റു ഏ്ളെ മ്‌ണ്ടേസി ബന്ത് ബെലെ കൊറേവിര്‌ക്കുവ റാഡ് ഒട്ടിപണ ഇക്ക്‌നാള്.
43ഏസ്സ് തന്ന് സൊല്ലുപഡി നഡാക്ക്‌ന്റവാര്‌ന അര്‌ഗെ ബ്‌ളിത്ത്: <<ആന ഈ ഏ്ളെ മ്‌ണ്ടേസി റാഡ് പണാത്തെ ഉണ്ടിഗേക്ക് ഇക്കിര്‌ന്റാള്. ആന എല്ലാര്‌ന ബ്‌ഡ അവാള് മൊത്തന ഇക്കിര്‌ന്റാള് എന്റ് നാന് സത്ത്യമായി നിമാക്ക് സൊന്റെ. 44ആള്‌ഗാളൊട്ടുക്കു തമ്മ് സൊത്തുലിന്ത്‌ത്തെ കാണിക്കെ ഇക്ക്‌നാര്. ആന ഈ ഏ്ളെ മ്‌ണ്ടേസി ഒന്റുമില്ലത്തവാളായിന്ത് ഗുഡി തനാക്ക് ഇര്‌ക്കുവാദ്‌ന ഒട്ടുക്കു ഇക്കിര്‌ന്റാള്. തനാക്ക് പെ്ളേക്ക്യ ഇര്‌ക്കുവാദ്‌ന പൂരാമ് ഇക്കിര്‌ന്റാള്>> എന്റ് സൊന്നാന്.
Currently Selected:
മര്‌ക്കോസു 12: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
