മര്‌ക്കോസു 6
6
സൊന്ത ഊരുഗാറാര് ഏസ്സ്‌ന തള്ള്‌ന്റാര്
1പ്‌റ ഏസ്സ് അദ്‌ലിന്ത് തന്ന് സൊന്ത പട്ടണാക്ക് പോനാന്. ഒപ്പ തന്ന് സൊല്ലുപഡി നഡാക്ക്‌ന്റവാര്‌മ് പോനാര്. 2ഒയിവു നാള് ഏസ്സ് എഗുദാര് പരേസുവ ബീ്ഡ്‌ക്ക് പോയി ആള്‌ഗാള്‌ന പഡിസ്യ പ്‌ഡിത്താന്. അയാള് പഡുസുവ ബുദ്ദിനായന കേ്ട്ട് എഞ്ചോ ആള്‌ഗാള് അദിസ്യപട്ട് പോനാര്.
അവാര് ഇത്തെ കേ്ട്ടാര്: <<ഇയാള്‌ക്ക് ഇദെല്ല ഏദ്‌ലിന്ത് കെ്ഡേത്ത്‌ദ്? ഇയാള്‌ക്ക് എത്ത്‌റ ബുദ്ദി? ഇയാള് എത്തെ ഈ അദിസ്യഗാളെല്ല ഗേന്റാന്? 3ഇയാള് ഒന്റു ആസാരി ഗിലാസ ഗേന്റാനല്ല? ഇയാള് മറിയാക്ക് പ്‌റാന്തവാനല്ല? ആക്കോവു, ജോസെ, ജൂദാന്, സീമോനു ഇവാരെല്ല ഇയാള് തമ്പ്യാമല്ല? ഇയാള് തങ്ക്യാമ്‌മ് നമ്മോഡാത്തെ ഇര്‌ക്ക്‌ന്റാരൊ?>> എന്റ് സൊല്ലി അവാര് ഏസ്സ്‌ന ബെലേക്ക് എ്ഡ്‌ക്കാലെ.
4ഏസ്സ് അവാര്‌ക്ക് ഇത്തെ സൊന്നാന്: <<ഒന്റു സാമിദാസ്‌ന തന്ന് സൊന്ത പട്ടണാത്ത്‌ലവാരമ് സൊന്ത ബീ്ഡ്‌ലവാര്‌മ് സൊന്ത ജാദിഗാറാര്‌മ് മദ്‌സുവാദില്ലെ. ആന ഒച്ചാരി എ്ഡേലവാര് അയാള്‌ന മദ്‌സുവാര്.>> 5ഏസ്സ് അദ്‌ല് ഒന്റുറാഡ് നോയിഗാറാര്‌ന കയി ബെത്ത് തെ്ള്‌സ്‌നാന്. ബേ്റെ അദിസ്യ ഒന്റുമു അദ്‌ല് ഏസ്സ്‌ക്ക് ഗേയ മുഡ്യാലെ. 6അവാര്‌ക്ക് നമ്പിക്കെ ഇല്ലത്താദ്‌നാലെ ഏസ്സ് അദിസ്യപട്ടാന്.
തന്ന് സൊല്ലുപഡി നഡാക്ക്‌ന്റവാര്‌ന സൊല്ലി ബ്‌ഡ്‌ന്റാന്
പിന്നെ ഏസ്സ് സുറ്റുമു ഇര്‌ക്കുവ ഊരുഗാള്‌ക്ക് പോയി ആള്‌ഗാള്‌ന പഡിസിന്താന്. 7പ്‌റ തന്ന് സൊല്ലുപഡി നഡാക്കുവ പന്നന്റ് ആള്‌ഗാള്‌ന തന്ന് പട്ട്‌ക്ക് ബ്‌ളിത്ത് അവാര്‌ന റാഡ് റാഡാളായി പ്‌റ്‌ത്ത് സൊല്ലി ബ്‌ട്ടാന്. തട്ടിര്‌ക്കുവ കെ്ട്ടജാദിഗാള്‌നെല്ല തട്ടിസിതള്ള്യാമ് അവാര്‌ക്ക് അദിഗര കൊഡുത്താന്.
8<<നിമ്മ പോഗാട്ടി കുത്തി നഡാക്കുവ ബഡ്യല്ലാദെ ബേ്റെ തിന്ന്യ തീനിഗാളൊ, ദറ്‌മ്മ ബാങ്കുവ പയ്യൊ, പണാഗൊ ഒന്റുമു എ്ഡ്‌ക്ക ബേ്ഡ. 9സെര്‌പ്പ് ഇക്ക്‌ല. ഇക്കിര്‌ക്കുവ സീലെസിലാപ്പ് താനെ മദി. 10ഏദാറ്റ ബീ്ഡ്‌ക്ക് പോയി എജ്ജ്‌നദാന അയി ഊരുന ബ്‌ട്ട് പോഗ മാട്ട്‌ക്ക് അയി ബീ്ഡ്‌ല് താനെ തങ്ക്‌ന്. 11ഏദാറ്റ ഊരുഗാറാര് നിമാന സേത്താദേമ് നിമ്മ സൊല്ലുവാദ്‌ന കേ്ള്‌ക്കാദേമ് ഇന്ത അയി ഊരുന ബ്‌ട്ട് തിരിഗി ബാന്. ഇത്തെ ഗേന്താദ്‌നാലെ അയി ഊരുഗാറാര്‌ക്ക് ബരുവ ദെ്ണ്ടണേക്ക് നിമ്മ ഇന്നി കുറ്റഗാറാരല്ല എന്റ് അവാര്‌ക്ക് താനെ തെര്യ ബേ്ണ്ടി നിമ്മ് കാല്‌ല ദൂളിന തട്ടി തള്ള്‌ന്>> എന്റ് ഏസ്സ് സൊന്നാന്.
12അത്തെ സൊല്ലുപഡി നഡാക്ക്‌ന്റവാര് അദ്‌ലിന്ത് ബേ്റെബേ്റെ ഊരുഗാള്‌ക്കെല്ല പോയി <<പാവ ഗേവാദ്‌ന തള്ളി സാമിസാരി തിര്‌ഗ്‌ന്>> എന്റ് സൊന്നാര്. 13തട്ടിന്ത എഞ്ചോ കെ്ട്ടജാദിഗാള്‌ന അവാര് തട്ടിസി തള്ള്‌നാര്. എഞ്ചോ നോയിഗാറാര്‌ന എ്ണ്ണെ#6:13എ്ണ്ണെഒലിവു മര പഗ ബെദേന ആട്ടി എ്ഡ്‌ക്കുവാദ്‌ത്തെ ഈ എ്ണ്ണെ. പൂസി തെ്ള്‌സ്‌നാര്.
ഓഗന്നാന്‌ന കൊല്ലുന്റാര്
14ഇത്തെ ഏസ്സ് പേര്‌കേ്ട്ടവാന് ആനാന്. എരോദ രാജാവുമു അയാള്‌ന പറ്റി കേ്ട്ടാന്. <<മുളുഗുസുവ ഓഗന്നാന് സത്തിന്ത് ഉജുര്‌ളാഗി ബന്ത്‌റ്‌ന്റാന്. അദ്‌നാലെത്തെ അയാള്‌ക്ക് ഈ അദിസ്യഗാള് ഗേവാദ്‌ക്കുള്ള സക്‌തിഗാള് ഇര്‌ക്കുവാദ്>> എന്റ് ലേസ ആള്‌ഗാള് സൊന്നാര്.
15<<ഇദ് ഏല്യാവു>> എന്റ്‌മ്, <<അല്ല മുന്തെല കാലാത്ത്‌ല സാമിദാസ്‌ഗാള്‌ന പാസെ ഒന്റു സാമിദാസ്>> എന്റ്‌മ് ആള്‌ഗാള് ഒന്റൊന്റു നായ സൊന്നാര്.
16ആന എരോദ രാജാവു ഇദ്‌നെല്ല കേ്ട്ട്: <<ഇദ് നാന് തലേന ബെ്ട്ടി കൊന്റ ഓഗന്നാന്‌ത്തെ ഉജുര്‌ളാഗി ബന്ത്‌റ്‌ന്റാന്>> എന്റ് സൊന്നാന്.
17-18ഈ എരോദ രാജാവു തന്ന് അണ്ണാന് പീലിപോസു പെ്ണ്ട് ഏരോദ്യന തന്ന് പെ്ണ്ടച്ച്യായി എ്ഡ്‌ത്തിന്താദ്‌നാലെ <<സൊന്ത അണ്ണാന് പെ്ണ്ട്‌ന നീ കല്യണ മാഡ്‌നാദ് സെര്യല്ല>> എന്റ് ഓഗന്നാന് എരോദാവുക്കു സൊല്ലിന്താന്. അദ്‌നാലെ എരോദ രാജാവു ഏരോദ്യ നെനേത്ത പാസെ അയാള്‌ന പ്‌ഡിത്ത് എ്ഡ്‌ത്ത് പോയി ജെയില്‌ക്ക് അഡേത്ത് ബെത്തിന്താന്. 19ഓഗന്നാനോഡ ഏരോദ്യ പോട്ടിപ്‌ഡിത്തിന്താള്. അദ്‌നാലെ അവാള് അയാള്‌ന കൊല്ലുഡൊ എന്റെല്ല നെനേത്ത് നോഡുനാള്. ആന മുഡ്യാദെ പോറ്റു. 20ഓഗന്നാന് നല്ലവാന്‌മ് നേര്‌മെഗാറാന്‌മ് എന്റ് എരോദ രാജാവുക്കു തെരിന്തിന്ത്‌ദ്. അദ്‌നാലെ ഓഗന്നാന്‌ന കൊല്ല്യ അയാള്‌ക്ക് അഞ്ചിക്കെ പ്‌ഡിത്തിന്ത്‌ദ്. അദ്‌ക്ക് എരോദ രാജാവു അയാള്‌ന നലമായി ബെത്തിന്താന്. ഓഗന്നാന് സൊല്ലുവാദ്‌ന കേ്ട്ട് എരോദ രാജാവു അങ്കലാപ്‌പട്ടാന്. ആനാല്‌മ് പിര്യപിര്യത്തോഡ ഓഗന്നാന് നായന കേ്ട്ടിന്താന്.
21അത്തെ ഇര്‌ക്കാട്ട്യെല്ല താന് ഗേയ ആസെപട്ടിന്താദ്‌ന ഗേവാദ്‌ക്കുള്ള ഒന്റു സമ്യ ഏരോദ്യാക്ക് കെ്ഡേത്ത്‌ദ്. എരോദ രാജാവു പ്‌റാന്ത നാള്‌ല് ഈ സമ്യ അവാള്‌ക്ക് കെ്ഡേത്ത്‌ദ്. അയി നാള് എരോദ രാജാവു സര്‌ക്കാര് ഗിലാസ ഗേവ ദൊഡ്ഡുദൊഡ്ഡ അദിഗാരിഗാള്‌ക്ക്‌മ്, പട്ടള തലെവാര്‌ഗാള്‌ക്ക്‌മ്, ഗലീല ഊരുലിര്‌ക്കുവ തലെവാര്‌ഗാള്‌ക്ക്‌മ് ഒന്റു ബിര്‌ന്തട്ട് കൊഡുത്താന്. 22ഈ സമ്യ ഏരോദ്യ മഗാള് ഉളാക്ക് പോയി ബിര്‌ന്ത്‌ഗാറാര് മുന്നുക്കു ബന്ത് ആട്ടാഡ്‌നാള്. അത്തെ ആഡി രാജാവുനാമ് ബിര്‌ന്ത്‌ക്ക് ബന്തിന്തവാര്‌നാമ് പിര്യപഡ്‌സ്‌നാള്.
അദുക്കുള <<നീ എന്ത്‌ന ആസെപട്ട് കേ്ട്ടാല്‌മ് അദ്‌ന നാന് നിനാക്ക് തരുവെ>> എന്റ് എരോദ രാജാവു അവാള്‌ക്ക് സൊന്നാന്. 23<<നീ എന്ത്‌ന കേ്ട്ടാല്‌മ് എന്ന് പഗ്‌ദി സീമെ നാഡ് താനെ ആനാല്‌മ് തരുവെ>> എന്റ് സത്ത്യ ഗേന്താന്.
24അവാള് ബെ്ളിഗെ പോയി താന് എന്ത്‌ന കേ്ള്‌ക്ക്യ എന്റ് അവ്വേസിന കേ്ട്ടാള്.
<<മുളുഗുസുവ ഓഗന്നാന് തലേന തര്യ സൊല്ലു>> എന്റ് ഏരോദ്യ സൊന്നാള്.
25അവാള് മഗളച്ചി സട്ടന രാജാവു പട്ട്‌ക്ക് പോയി <<ഇന്നാല് താനെ ഓഗന്നാന് തലേന ഒന്റു തട്ട്‌ക്കിക്കി തരുഡൊ>> എന്റ് സൊന്നാള്.
26ഇദ്‌ന കേ്ട്ട് എരോദ രാജാവുക്കു എത്തെത്തേഗൊ ആറ്റ്. അവാള് കേ്ള്‌ക്കുവാദ് എന്ത്‌നാമ് കൊഡുക്കുവേന് എന്റ്‌മ് രാജാവു ബാക്ക് കൊഡുത്തിന്താന്. ബിര്‌ന്ത്‌ക്ക് ബന്തവാര്‌മ് അദ്‌ന കേ്ട്ടിന്താര്. അദ്‌നാലെ അവാള് കേ്ട്ടാദ്‌ന ഗേയ പാങ്കില്ലെന്റ് സൊല്ല്യ രാജാവുക്കുമു മുഡ്യാലെ. 27അത്തെ രാജാവു ഓഗന്നാന് തലേന ബെ്ട്ടി എ്ഡ്‌ത്ത് ബര്യ ഒന്റു പട്ടളഗാറാന്‌ന സൊല്ലി ബ്‌ട്ടാന്. അയാള് ജെയില്‌ക്ക് പോയി അദ്‌ല് ബെത്ത് ഓഗന്നാന് തലേന ബെ്ട്ടി 28ഒന്റു തട്ട്‌ക്കിക്കി എ്ഡ്‌ത്ത് ബന്ത് അയി പ്‌ള്ളേക്ക് കൊഡുത്താന്. അയി പിള്ളെ എ്ഡ്‌ത്ത് പോയി അവ്വേസിക്ക് കൊഡുത്താള്. 29അദ്‌ന കേ്ട്ട് ഓഗന്നാന് സൊല്ലുപഡി നഡാക്ക്‌ന്റവാര് ബന്ത് അയാള് സാവുന എ്ഡ്‌ത്ത് പോയി പാത്ത്‌നാര്.
ഏസ്സ് അഞ്ചായിര ഗണ്ടാള്‌ന പജ്യാറ്‌സ്‌ന്റാന്
30അപ്പോസുത്തലാര് തിരിഗി ബന്ത് തമ്മ ഗേന്താദ്‌നാമ് പഡ്‌സ്‌നാദ്‌നാമ് എല്ലാ ഏസ്സ്‌ക്ക് സൊന്നാര്. 31എഞ്ചോ ജനഗാള് ഏസ്സ് പട്ട്‌ക്ക് ബന്ത് പോയി കൊണ്ടു ഇന്താദ്‌നാലെ ഏസ്സ്‌ക്ക്‌മ് സൊല്ലുപഡി നഡാക്ക്‌ന്റവാര്‌ക്ക്‌മ് തീനി തിന്ന്യ ഗുഡി നേര കെ്ഡേക്കാലെ. അദ്‌നാലെ <<നമ്മ ഒട്ടുക്കു ഒന്റാളില്ലാത്ത പട്ട്‌ക്ക് പോയി ഒന്റു മൂസു എ്ളേക്ക്‌ഗാന്>> എന്റ് ഏസ്സ് അവാര്‌ക്ക് സൊന്നാന്.
32അത്തെ അവാര് തമ്മ താനെ തോണിക്ക് ഏ്റി ഒന്റു ആളില്ലാത്ത എ്ഡേക്ക് പോനാര്. 33എന്റാല്‌മ് അവാര് പോവാദ്‌ന ലേസ ആള്‌ഗാള് കണ്ടിന്താര്. അയി പോനാദ് ഏസ്സ്‌മ് കൂട്ടാര്‌മ്‌ത്തെ എന്റ് അവാര്‌ക്ക് തെരിന്ത്‌ദ്. അത്തെ എല്ലാ ഊരുഗാള്‌ലിന്ത്‌മ് ആള്‌ഗാള് ഓഡി പോയി ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് എജ്ജാത്ത മുന്നുക്കു താനെ ആങ്ക് പോയി എജ്ജ്‌നാര്. 34ഏസ്സ് തോണിലിന്ത് ഇ്റാഗാട്ട്യെല്ല തനാന കാത്ത്‌കൊണ്ടു ജനഗാള് അദ്‌ലിന്താദ്‌ന അയാള് കണ്ടാന്. മാട്ട്യാനില്ലാത്ത കൊറ്യാഡ്‌ഗാള്‌ന പാസെ ഇര്‌ക്കുവ അവാര്‌ന കണ്ട് ഏസ്സ്‌ക്ക് ബേ്റ്‌വെന്ത്‌ദ്. പല കാര്യഗാള്‌നാമ് അവാര്‌ക്ക് പഡിസ്യ പ്‌ഡിത്താന്.
35നേര ബ്‌ന്ത പ്‌റ സൊല്ലുപഡി നഡാക്ക്‌ന്റവാര് ഏസ്സ് പട്ട്‌ക്ക് ബന്ത്: <<ഇദ് ഒന്റു ആളില്ലാത്ത എ്ഡെ. നേരാമ് പോയി ജാമാമ് ആന്റ്. 36അദ്‌നാലെ അര്‌ഗെ ഇര്‌ക്കുവ ഊരുഗാള്‌ക്കൊ കാഡ് സാളെഗാള്‌ക്കൊ പോയി എന്താറ്റ ഏറ്റ് തിന്ന്യ ആള്‌ഗാള്‌ന സൊല്ലി ബ്‌ഡ്‌ഡൊ>> എന്റ് സൊന്നാര്
37<<നിമ്മ താനെ അവാര്‌ക്ക് തിന്ന്യ കൊഡുനു>> എന്റ് ഏസ്സ് അവാര്‌ക്ക് സൊന്നാന്.
<<എമ്മ പോയി ഇര്‌നൂറു ദിനാറ്‌ക്ക്#6:37ഇര്‌നൂറു ദിനാറ്‌ക്ക് ഒന്റു ഗിലാസഗാറാന്‌ത്ത് ഒന്റു നാള് കൂലിത്തെ ഒന്റു ദിനാറ് അഡെ ബാങ്കി ഇഞ്ചൊന്റു ആള്‌ഗാള്‌ക്ക് കൊഡുക്കുഡൊ എന്റ്‌ത്തേഗ നീ സൊല്ലുവാദ്?>> എന്റ് സൊല്ലുപഡി നഡാക്ക്‌ന്റവാര് ഏസ്സ്‌ന കേ്ട്ടാര്.
38<<നിമ്മോഡ എഞ്ച് അഡെ ഇര്‌ക്ക്‌ന്റ് എന്റ് പോയി നോഡി ബന്ത് സൊല്ലുനു>> എന്റ് ഏസ്സ് അവാര്‌ക്ക് സൊന്നാന്.
അവാര് പോയി നോഡി <<അയിദ് അഡേമ് റാഡ് മീന്‌മ് ഇര്‌ക്ക്‌ന്റ്>> എന്റ് സൊന്നാര്.
39<<ആള്‌ഗാള്‌ന പുല്ലണെ കുദ്ദാക്ക് സരസരമായി കുക്കാക്ക്യ സൊല്ല്യ>> ഏസ്സ് സൊല്ലുപഡി നഡാക്ക്‌ന്റവാര്‌ക്ക് സൊന്നാന്. 40അവാര് നൂറുനൂറുമു, അമ്പദമ്പദ്‌മ് ആള്‌ഗാളായി സരസരമായി കുക്കാന്താര്. 41ഏസ്സ് അയിദ് അഡെനാമ് റാഡ് മീന്‌നാമ് എ്ഡ്‌ത്ത് മേലോഗന നോഡി സാമിക്ക് നണ്ണി സൊല്ലി അഡേന മുറുത്താന്. പ്‌റ ആള്‌ഗാള്‌ക്ക് പങ്കി കൊഡുക്ക്യ തന്ന് സൊല്ലുപഡി നഡാക്ക്‌ന്റവാര്‌ക്ക് കൊഡുത്താന്. അയി റാഡ് മീന്‌നാമ് അയാള് എല്ലാവാര്‌ക്ക് പങ്കി കൊഡുത്താന്. 42ആള്‌ഗാള് ഒട്ടുക്കു ബേ്റ്‌തുമ്പ തിന്റാര്. 43മിച്ച ബന്ത അഡെനാമ് മീന്‌നാമ് സൊല്ലുപഡി നഡാക്ക്‌ന്റവാര് പന്നന്റ് ബട്ടി തുമ്പിസി എ്ഡ്‌ത്താര്. 44തിന്റവാര് ഗണ്ടാള്‌ഗാള് താനെ അഞ്ചായിര ഇന്താര്.
ഏസ്സ് നീര് കുദ്ദാക്ക് നഡാക്ക്‌ന്റാന്
45അന്നാല് താനെ ഏസ്സ് ആള്‌ഗാള്‌ന സൊല്ലി ബ്‌ഡുവ ഗളിഗേല് തന്ന് സൊല്ലുപഡി നഡാക്ക്‌ന്റവാര്‌ന തോണിക്ക് ഏ്റി തനാക്ക് മുദാല് അക്കരെ ബേദ്‌സയിദാക്ക് പോയ നത്ത്‌നാന്. 46അവാര് പോന പ്‌റ ഏസ്സ് പരേസ്യ മലേക്ക് പോനാന്.
47മജാക്കെ ആയിമ് തോണി നഡ്‌കഡാല്‌ല് താനെ ഇന്ത്‌ദ്. ഏസ്സ് ഒന്റേ ഒരുത്താന് താനെ ഏ്ട്ടിലിന്താന്. 48സൊല്ലുപഡി നഡാക്ക്‌ന്റവാര്‌ക്ക് നേരെ കാറ്റ് അഡിത്താദ്‌നാലെ തോണിന അയ്യെ്ട്ടി എജ്ജ്‌സ്യ അവാര് ഓരാഡ്‌നാര്. ഇത്തെ ഓരാഡുവാദ്‌ന ഏസ്സ് കണ്ടാന്. കോയിജാമ ആഗാട്ട്യെല്ല ഏസ്സ് കഡാല് കുദ്ദാക്ക് നഡാന്ത് അവാര് പട്ട്‌ക്ക് ബന്താന്. ഏസ്സ് അവാര്‌ന പിന്ന്‌ക്ക് ബെത്ത് മുന്നുക്കു പോയ പട്ടാന്. 49ഏസ്സ് കഡാല് കുദ്ദാക്ക് നഡാക്കുവാദ്‌ന കണ്ട് അവാര് അദ് ഒന്റു പിജാദ്‌ത്തെ എന്റ് നെനേത്താര്. 50ഏസ്സ്‌ന അയി ഉരുവാത്ത്‌ല് കണ്ടാദ്‌നാലെ അഞ്ചിക്കെപട്ട് അവാര് അഗാറ്‌നാര്. അന്നാല് താനെ ഏസ്സ് അവാര്‌ക്ക്:
<<ദയിരപഡ്‌ന്, ഇദ് നാന്‌ത്തെ, അഞ്ചദേന്>> എന്റ് സൊന്നാന്. 51ഏസ്സ് പ്‌റ അവാരോഡൊപ്പ തോണിക്ക് ഏ്റ്‌നാന്. അദുക്കുള കാറ്റ് അഡാങ്ക്‌റ്റ്. അവാര് സെരിക്ക്‌മ് അദിസ്യപട്ട് അഞ്ചി തള്ള്‌നാര്. 52അഞ്ചായിര ആള്‌ഗാള്‌ക്ക് തീറ്റ്‌സ്‌നാദ്‌ന അവാര് കണ്ടാര്. ആന അദുക്കുള്ള അര്‌ത്ത അവാര്‌ക്ക് തെര്യാലെ; എന്ത്‌ക്കെന്റ് സൊന്ന അവാര് നെഞ്ച് മര നെഞ്ച് ആയിന്ത്‌ദ്.
ഏസ്സ് മൊത്തന ആള്‌ഗാള്‌ന തെ്ള്‌സ്‌ന്റാന്
53ഏസ്സ്‌മ് സൊല്ലുപഡി നഡാക്ക്‌ന്റവാര്‌മ് കഡാല് കഡാന്ത് ഗന്നേസര നാഡ്‌ക്ക് എജ്ജ്‌നാര്. അവാര് തോണിന അദ്‌ക്ക് താനെ കെ്ട്ടി ബെത്ത് പോനാര്. 54ഏസ്സ്‌ത്തെ ബന്ത് ഇ്റാഗ്‌നാദ് എന്റ് അന്നാല് താനെ ആള്‌ഗാള്‌ക്ക് തെരിന്ത്‌ദ്. 55അവാര് അന്നാല് താനെ സട്ട്‌പൊട്ട അര്‌ഗെ ഇര്‌ക്കുവ ഊരുഗാള്‌ക്കെല്ല ഏസ്സ് ബന്ത സേദിന സൊല്ല്യ ഓഡി പോയി സൊന്നാര്. ഏസ്സ് ഇന്ത പട്ട്‌ക്കെല്ല നോയിഗാറാര്‌ന ബിരിസ്സിന്ത സീലോഡ കെ്ട്ടി എ്ഡ്‌ത്ത് ബന്താര്. 56ഏസ്സ് അയി ദേസാത്ത്‌ല പട്ടണഗാള്, ഊരുഗാള്‌ക്കെല്ല പോനാന്. അയി എ്ഡെഗാള്‌ല് ഇര്‌ക്കുവ ആള്‌ഗാള് തമ്മ് നോയിഗാറാര്‌ന സന്തേക്ക്‌റാഗ എ്ഡ്‌ത്ത് ബന്ത് ക്‌ഡാത്ത്‌നാര്. അവാര്: <<നിന്ന് സീലെ താനെന എന്റാല് അണ്ണ്യ നോയിഗാറാര്‌ന ബ്‌ഡ്‌ഡോമെ>> എന്റ് ഏസ്സ്‌ന ബേ്ണ്ട്‌നാര്. അത്തെ അണ്ണ്‌നവാര് ഒട്ടുക്കു തെ്ളിന്താര്.
Currently Selected:
മര്‌ക്കോസു 6: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
