लूका 3

यूहन्ना बपतिस्मा देंइ बाले के सेबा

(मत्ती 3:1-12; मरकुस 1:1-8; यूहन्ना 1:19-28)

1तिबिरियुस कैसर के रोम सम्राज माहीं राज करँइ के पन्द्रहमे बरिस माहीं, जउने समय माहीं पुन्तियुस पिलातुस यहूदिया प्रदेस के राजपाल रहे हँय, अउर गलील प्रदेस माहीं हेरोदेस राजा, इतूरइया अउर त्रखोनीतिस प्रदेस माहीं ओखर भाई फिलिप्पुस, अउर अबिलेने माहीं लिसानियास, चउथ भाग के राजा रहे हँय, 2अउर जब हन्ना अउर कैफा महायाजक रहे हँय, उहय समय माहीं परमातिमा सुनसान जघा माहीं जकरयाह के लड़िका यूहन्ना से बात किहिन। 3यूहन्ना यरदन नदी के आस-पास के सगले प्रदेसन माहीं जाइके, मनइन से इआ कहिके प्रचार करँइ लागें, कि अपने-अपने पापन के माफी प्रभू से पामँइ के खातिर पाप करब छोंड़िके, अपने मन काहीं बदला, अउर बपतिस्मा ल्या। 4जइसन परमातिमा के सँदेस बतामँइ बाले यसायाह के किताब माहीं लिखा हय:

“सुनसान जघा माहीं एक जने के गोहरामँइ के बोल सुनात हय, कि

अपने मन काहीं तइआर कइके गइल सऊँ बनाय ल्या, काहेकि ‘प्रभू आमँइ बाले हें।

5सगली घाटिन काहीं भर दीन जई, अउर सगले पहारन अउर टिकुरन काहीं बराबर कीन जई;

अउर जऊँ टेंढ़ हय ओही सऊँ, अउर जउन ऊँच नीच हय ओही समथर बनाबा जई।

6अउर हरेक मनई परमातिमा के मुक्ती के काम काहीं देखिहँय’।”

7जउन भीड़ के भीड़ मनई यूहन्ना के लघे बपतिस्मा लेंइ के खातिर आबत रहे हँय, उनसे ऊँ कहत रहे हँय, “हे साँप के बच्चन कि नाईं बुरे मनइव, तोंहईं को चेताय दिहिस, कि परमातिमा के आमँइ बाले सजा से बचा? 8अरथात तूँ पंचे अपने जीबन से इआ देखाय द्या, कि तूँ पंचे बास्तव माहीं पाप करब छोंड़ दिहा हय, अउर परमातिमा के बातन काहीं मनते हया। तूँ अपने-अपने मन माहीं इआ न सोचा, कि हम अब्राहम के सन्तान आहेन एसे परमातिमा हमहीं सजा न देइहँय; काहेकि हम तोंहसे सही कहित हएन, कि परमातिमा ईं पथरन से अब्राहम के खातिर बंस पइदा कइ सकत हें। 9अब परमातिमा के क्रोध रूपी कुल्हारा बिरबन के जर माहीं धरा हय, एसे जउन-जउन बिरबा निकहा फर न फरी, उआ काटिके आगी माहीं झोंक दीन जई।” 10तब मनई यूहन्ना से पूछँइ लागें, “त हम पंचे का करी?” 11यूहन्ना उनहीं जबाब दिहिन, “जेखे लघे दुइठे कुरथा होंय, त उआ जेखे लघे एक्कवठे कुरथा नहिं आय ओही दइ देय, अउर जेखे लघे खाँइ बाली चीज होंय, उहव अइसय करय।” 12अउर चुंगी लेंइ बाले घलाय बपतिस्मा लेंइ आएँ, अउर यूहन्ना से पूँछिन, “हे गुरू, हम पंचे का करी?” 13यूहन्ना उनसे कहिन, “जेतनी चुंगी लेंइ के खातिर तोंहईं बताबा ग हय, ओसे जादा न लिहा।” 14अउर सिपाहिव यूहन्ना से पूँछिन, “हम पंचे का करी?” तब यूहन्ना उनसे कहिन, “जबरजस्ती कोहू से धन न लिहा, अउर न कउनव मनई के ऊपर झूँठ अरोप लगाया, बलकिन अपने तनखाह माहीं सन्तोस किहा।”

15जब इजराइली लोग इआ आसा करत रहे हँय, कि हमहीं मुक्ती देंइ बाले आमँइ बाले हें, तब सगले जन अपने-अपने मन माहीं यूहन्ना के बारे माहीं सोचत रहे हँय, कि कहँव ईंन परमातिमा के पठए मुक्ती देंइ बाले मसीह त न होंहीं, 16तब यूहन्ना ऊँ सगलेन से कहिन, “हम त तोंहईं पानी से बपतिस्मा देइत हएन, पय जउन आमँइ बाले हें, ऊँ हमसे एतना महान हें; कि हम त उनखे पनहिन के डोरव तक छोरँइ के काबिल नहिं आहेन; ऊँ तोंहईं पबित्र आत्मा अउर आगी से बपतिस्मा देइहँय। 17उनखर न्याय रूपी सूपा उनखे हाँथेन माहीं हय; अउर उँइ संसार रूपी राहा काहीं निकहा से साफ करिहँय; अउर गोहूँ काहीं अपने बखारी माहीं रखिहँय; पय बूसा काहीं कबहूँ न बुझाँय बाली आगी माहीं डार देइहँय।”

18अरथात यूहन्ना खुब सिच्छा दइ-दइके सगले जनेन काहीं खुसी के खबर सुनाबत रहिगें। 19पय जब यूहन्ना चउथाई देस के राजा हेरोदेस काहीं, अपने भाई फिलिप्पुस के मेहेरिआ हेरोदियास काहीं राख लिहे के बारे माहीं, अउर सगले कुकर्मन के बारे माहीं जउन ऊँ किहिन रहा हय, उलाहना दिहिन। 20तब हेरोदेस ऊँ सगले कुकर्मन से बढ़िके, इआ कुकर्म किहिन, कि यूहन्ना काहीं जेल माहीं डरबाय दिहिन।

यीसु के बपतिस्मा (मत्ती 3:13-17; मरकुस 1:9-11)

21जब सगले जने बपतिस्मा लइ चुकें, तब यीसु घलाय आइके यूहन्ना से बपतिस्मा लइके प्राथना करत रहे हँय, तबहिनय स्वरग खुलिगा, 22अउर पबित्र आत्मा सारीरिक रूप से परेबा के रूप माहीं उनखे ऊपर उतरा, अउर इआ अकासबानी भय: “तूँ हमार पियार लड़िका आह्या, हम तोंहसे प्रसन्न हएन।”

यीसु के बंसाबली

(मत्ती 1:1-17)

23जब यीसु सेबकाई सुरू किहिन, तब ऊँ तीस बरिस के करीब रहे हँय, अउर (जइसा माना जात हय) यीसु, यूसुफ के लड़िका आहीं; अउर यूसुफ, एली के, 24अउर एली, मत्तात के, अउर मत्तात, लेबी के, अउर लेबी, मलकी के, अउर मलकी, यन्ना के, अउर यन्ना, यूसुफ के, 25अउर यूसुफ, मत्तित्याह के, अउर मत्तित्याह, आमोस के, अउर आमोस, नहूम के, अउर नहूम, असल्याह के अउर असल्याह, नोगह के, 26अउर नोगह, मात के, अउर मात, मत्तित्याह के, अउर मत्तित्याह, सिमी के, अउर सिमी, योसेख के, अउर योसेख, योदाह के, 27अउर योदाह, यूहन्ना के अउर यूहन्ना, रेसा के अउर रेसा, जरुब्बाबिल के, अउर जरुब्बाबिल, सालतिएल के, अउर सालतिएल, नेरी के, 28अउर नेरी, मलकी के, अउर मलकी, अद्दी के, अउर अद्दी, कोसाम के, अउर कोसाम, इलमोदाम के, अउर इलमोदाम, एर के, 29अउर एर, एसू के, अउर एसू, इलाजार के, अउर इलाजार, योरीम के, अउर योरीम, मत्तात के, अउर मत्तात, लेबी के, 30अउर लेबी, समौन के, अउर समौन, यहूदाह के, अउर यहूदाह, यूसुफ के, अउर यूसुफ, योनान के, अउर योनान, इलयाकीम के, 31अउर इलयाकीम, मलेयाह के, अउर मलेयाह, मिन्नाह के अउर मिन्नाह, मत्तता के, अउर मत्तता, नातान के अउर नातान, दाऊद के, 32अउर दाऊद, यिसय के, अउर यिसय, ओबेद के, अउर ओबेद, बोअज के, अउर बोअज, सलमोन के, अउर सलमोन, नहसोन के, 33अउर नहसोन, अम्मीनादाब के, अउर अम्मीनादाब, अरनी के, अउर अरनी, हिस्रोन के, अउर हिस्रोन, फिरिस के, अउर फिरिस, यहूदाह के, 34अउर यहूदाह, याकूब के अउर याकूब, इसहाक के, अउर इसहाक, अब्राहम के, अउर अब्राहम, तिरह के, अउर तिरह, नाहोर के, 35अउर नाहोर, सरूग के, अउर सरूग, रऊ के, अउर रऊ, फिलिग के, अउर फिलिग, एबिर के, अउर एबिर, सिलह के 36अउर सिलह, केनान के, अउर केनान, अरफच्छद के, अउर अरफच्छद, सेम के, अउर सेम, नूह के अउर नूह, लिमिक के, 37अउर लिमिक, मथूसिलह के, अउर मथूसिलह, हनोक के, अउर हनोक, यिरिद के, अउर यिरिद, महललेल के, अउर महललेल, केनान के, 38अउर केनान, एनोस के, अउर एनोस, सेत के, अउर सेत, आदम के, अउर आदम परमातिमा के लड़िका आहीं।

Currently Selected:

लूका 3: bag

Highlight

Copy