Yaya 17

Ɛnza ŋé Ala dɛ́lila a gbú yɛ́

1 Ɛnza ŋé ó kóman ó fɔ kɛ́ mínngɛ, aa í ɲán láyɛɛ sáman kɛ́ fɔ kó: «Nvá o, wáati ó wɛ́ɛ sé ii bwóɲan lá i Dhyé ŋó ka, ké né a bwóɲan lá ile ka, 2kɛ mansɔɔ i wɛ́ɛ sébhaaya o dí a man kɛ i síi Adamandhye ŋolu kunnan, kɛ́ ɲáanmanɲan wɛ́ɛbhɛɛ ó dí a yɛ́ mɔɔn ólu bɛ́ mán í wɛ́ɛ mínnu dí a mán. 3Ɲáanmanɲan wɛ́ɛbhɛɛ ó kɔ́ɔ ó lée ko kɛ ile lɔ, ile kée míin Ala bhɛ́ɛbhɛɛ ó lé, óni kɛ́ Ɛnza Ngílisi lɔ, ii min njé. 4Né wɛ́ɛ i bwóɲan lúukolo ó ka, i tɛ́ wɛ́ɛ bháala min dí né mán, né wɛ́ɛ o bɛ́ kɛ́ kɛ wɛ́ɛ. 5Sísan Nvá o, nɔ́lɔya min ndɛ́ɛ né ka i tɔ́ɔfɛ jónan ké dínɲan man la bhá, ó bwóɲan o dí né man.»

Ɛnza ŋé Ala dɛ́lila a yɛ kaamɔɔndhye ŋolu yɛ

6«Ii mɔɔn mínnu lɔ́tɔnmɔn kɛ́ í bhɔ́ dínɲan mɔɔn ólu cɛ́man kɛ́ í dí né mán, né wɛ́ɛ í tɔ́ɔ yáa ólu lá. Í tɛ́ɛ í tá le lé, i tɛ́ wɛ́ɛ í dí né mán, ólu wɛ́ɛ í yɛ́ kóman ó labhato. 7Sísan í wɛ́ɛ a lɔ́ kó i wɛ́ɛ fé mínnu dí né mán, kó ó bɛ́ɛ bhɔ́ íle lé lɔ́, 8ní kóman mínnu myɛ́n ile lá ni o lé fɔ í yɛ í lo ŋwɛ́ɛn la o lá, í wɛ́ɛ bhɔ́ a ɲánle cɛ́ɛne kó ni bhɔ́ ile lé lɔ́, í wɛ́ɛ la a lá kó íle lée né cé.

9Né tɛ́ í dɛ́lila dínɲan mɔɔn ólu bɛ́ yɛ́ lɛ́. Waa i wɛ́ɛ mínnu dí né mán, ni i dɛ́lila o léelu yɛ́, kɛ mansɔɔ í wɛ́ɛ kɛ́ i tá le. 10Fé ŋóo fé ŋé né tá le, óo ile tá le lé, fé min no ŋé í tá lé, oo né tá lé le, né tá bwóɲan oo lɔnan íle léelu man. 11Né tɛ́ dínɲan lɔ bhée. Waa ílee lúu dínɲan ó lɔ, né lo ŋé táala ile sáala. Fá Sɛ́nnɛnyanin ŋo, ní i dɛ́lila ii i mala i tɔ́ɔ ó bháaka lɔ. Ii tɔ́ɔ ó mín dí né mán, ké íi kɛ́ kéene óyoo né ni í lée kéene ɲánminman. 12Né tɛ́ɛ ni íle mínngɛ, ni í bɛ́ mala i yɛ sébhaaya o lɔ, ii sébhaaya min ndí né man. Ni í bɛ́ mala í sí man túun, fɔ min nátɛɛnin ndɛ́ɛ túunnin ó kanman. Oo kɛ́ le ke míin sɛ́wɛ i yɛ́ Kitabu ó lɔ, o tɛ́ɛ i lafa.

13Sísan ni ngwɔsɛɛla i fɛ́ yé, ni ó kóman ó fɔ í yɛ dínɲan lɔ, ké íi né yɛ́ nisɔdhyaa láfanin ŋó sɔ́ɔ. 14Né wɛ́ɛ i yɛ́ kóman o fɔ i yɛ, o lɔ í wɛ́ɛ gbóya dínɲan mɔɔn ólu yɛ́, kɛ mansɔɔ i tɛ́ dínɲan tá lé, óyoo né tɛ dínɲan tá lé ɲánminman. 15Né tɛ́ i dɛ́lila ngó íi i tá kɛ́ í bhɔ́ dínɲan lɔ, wáa íi i lataan Sɔtaannan o man. 16Í tɛ́ dínɲan tá lé óyoo né tɛ́ dínɲan tá lé ɲánminman. 17Ii i sɛ́nnɛnya i yɛ́ tínɲan ó bháaka lɔ. I yɛ́ kóman ó lée tínɲan o le. 18Ii né bhyáashaa dínɲan lɔ ɲánminman, o ɲán kée ŋó mán née i bhyáashaala dínɲan ó kɔ́ɔnnɔn. 19Ni yɛ́ɛ díla i man í kósɔn, ké íle a kɛ ile tá lé tínɲan in ne.»

Ɛnza ŋé Ala dɛ́lila lánanbhaa olu yɛ

20«Né tɛ́ i dɛ́lila olu gbɛɛgbɛɛ yɛ́ lɛ́, wáa mínnu káa lá né lá í yɛ́ kóman ó bháaka lɔ, ni i dɛ́lila o léelu yɛ́, 21ké i bɛ́ a kɛ́ kéene. Fá o, óyoo í lée né lɔ tó née í lée lɔ ɲánminman. Ile a kɛ́ kéene cé ní án ne, ké dínɲan a lá a lá kó ile lée né bhyáashaa.

22Ii bwóɲan min ndí né mán, né wɛ́ɛ ó dí í man, ké íi kɛ́ kéene óyoo án nin kéene ɲánminman. 23Ni tó í fɛ́, óyoo íi né fɛ́ ɲánminman, ké íi bhyɛ kɛ́ kɛ́ kéene, ké dínɲan mɔɔn ólu a lɔ ŋóo ile lée né bhyáashaa óni kó í ko a di i yɛ́ óyoo né ko a dí i yɛ́ ɲánminman.

24Nvá Ala, i wɛ́ɛ mínnu lɔ́tɔnmɔn kɛ í dí né mán, ní fɛ́ ké ni ywáa min nɔn, í lée a kɛ́ o ywáa ó lɔ, i wɛ́ɛ nɔ́lɔya min na ne ka, ké íi sé kɛ o nɔlɔya o yé, kɛ mansɔɔ i wɛ́ɛ dhyáa i yɛ kabiini jónan jónan sannin dínɲan a lá.

25Nvá Ala, ile min ndéenin yé, dínɲan mɔɔn ólu mán ile lɔ́, né a i lɔ́. Ɲɛn kaamɔɔndhye míinnu a lɔ́ ŋóo ile lée ne cé. 26Né wɛ́ɛ kɛ tó í wɛ́ɛ i tɔ́ɔ o lɔ, óni ngáa i tɔ́ɔ o yáa í lá íkwɔ, ké né a dí í yɛ́ ɲánminman, o dhyáaɲɔɔnya o ɲɔ́ɔn ŋan kɛ́ i yóso ó lɔ, óni né a kɛ́ í yóso ó lɔ́.»

Currently Selected:

Yaya 17: MXX

Highlight

Copy