Fakasigadan 12
12
Yawi nu Guro Abram
1Yawi nalong sas Abram te, “Ubuni wan am fagbanwanan ay anggan am ngay kalongan, ay dewa am mama fag bale, ay loi wan sa ku fagnamoyungun emu fag talun.
2Ay namayu kban am kasugfunanan,
ay gfadante au emu,
ay namasik takadungug au am ngayan.
Ay siginan emu gfadante kban ngayuk taw.
3Gfadante kban sas nusnga sinu at nafadante tua emu,
ay gfaurianan kban fagayu at nafaurianan emu.
Ay siginan emu gfadante kban fagayu talun at taw.”
4-5Nu katanya, Abram nalao siginans Karan ay andasug sas Kanaan, kata Yawi at longan sa anya. Ginanya Abram fituk safulu e limak banwa. Ay at mangwai Lut naufud anya. Ay gtaban yangay at bubay Saray ay anggan at ngay fagsuguan. Ay gbuba yangay at ngay ramraman at nafungsu sis Karan.
6Nu ndasug sas Kanaan, kanya fagayu nafataglayun nu glao yakmay andasug sa sik fun kayu ayu daul#12:6 fun kayu ayu daul: didayu sik fun terebintu, fagsegan fag kayu. sis Mure at munakbang sis furuan Sekem. (Ginanya sanya yay fag talun ngay taw Kanaan.) 7Sanya ginan, Yawi ansure sas Abram ay nalong anya te, “Gfon kban sam ngay kasugfunanan ste fag talun.” Ay Abram nawat sik fagirugan fanggalangun laman sas Yawi aroro sat nasurean sa anya. 8Siginan ginanya, Abram ay at ngay ufud nalin sas talun buid sas Betel, ay sanya nu kawat sik bale ramit sis Betel ay sis Ai at wabilug. (Betel tagsis fakayabian ay Ai tagsis fakamenitan.) Abram nawat yangay sik fagirugan fanggalangun ay sanya nu gseg Yawi. 9Wa ngaduge kanya fagayu nadog yay nalin, ay nafataglayun nu glao sas talun Negeb.
Abram nasas Talun Igiptu
10Sis talun Kanaan malunus, nu katanya, Abram ay at ngay ufud nalao sas talun Igiptu laman namanwan sanya, aroro ginanya maksvn nu malunus. 11Ay kanya fagayu nu gakadasugun wan sas talun Igiptu, Abram nalong sat bubay te, “Saray, sik masine o fag mangena. 12Taw Igiptu ro nu nalag emu, lumong ro te, ku mangena o, nu katanya, namabul ro angku laman gbul emu. 13Dewa gina ro longi way te, duksay way ta, laman ro kafag ngay taw malukme tua ay di namabul angku aroro siginan emu.”
14Ay kanya fagayu nu ndasug sas talun Igiptu, ngay taw Igiptu nalag te, Saray masine. 15Ay ngay fun ayu sirut tagfakamulun sas fun nu nalag, kanya fagayu nalong sat fun te, “Kafag mangena maksvn nu masine.” Nu katanya, kanya fagayu nataban Saray sas fun at bale daul. 16Aroro siginans Saray, at fun malukme tua sas Abram, ay nafon yay anya ngay fagbaugun: ngay tupa, ngay kambing, ngay baka, ngay asnu, ngay kamelyu, ay anggan ngay fagsuguan.
17Dewa katanya, Yawi nafadasug sik maksvn fag fakasaitun sas fun ay sas fagayu tagbanwan sis fun at bale daul aroro siginan at nabulan Saray. 18Ay fun nu nasaful te, katanya at fanlonganan, nafauro Abram ay nainto te, “Nataw am fagnafakamulunun sa angku takatanya? Ay wain am fagyudun nalong te, kanya am mangena way? 19Wain am fagnalongun te, duksay wayam? Ay wain am fagnafabayanun lang nu gbul au anya laman ku bubay? Katsi tuy wan am bubay, tabani wan anya ay loi wan!” 20Ay at fun nasugu sat ngay fagsuguan te, “Aiyani wan anya.” Nu katanya, naiyan Abram sanya ginan fag talun, gadgaloan at bubay ay anggan fagayu at ngay ramraman.
Currently Selected:
Fakasigadan 12: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
