Fakasigadan 28
28
1Nu katanya, Isak nafauro Akub. Ay nafadante anya ay nasugu te, “Lag gfanmangena ste ginans talun Kanaan. 2Loi wan sas Padan-Aram#28:2 Padan-Aram: sik furuan sis Mesuputamia. sam fufuama Betuel, am mina at mama. Sanyai tua ban nu nanfanmangena o, sam sai Laban at ngay sisian, am mina at faduksay. 3Ay at mabalyanan fag Dius ggubuk ban nangus emu, ay gfon ban nangus emu ngayuk sisian laman ban o wan ngayuk gaban taw at mama. 4Ay gfon yangay ban nangus sa emu anggan sa am ngay kasugfunanan kata at nafon sas Abrayam, laman ban o wan tagagbilug ste si am fagbanwanan katsi fag talun, Dius at nafon sas Abrayam.” 5Isak nasugu wa vtv Akub sas Padan-Aram, sas Laban, Betuel fag taw Aram at baguama. Rebeka, Laban at faduksay, ay Akub ay Isaw at mina.
Isaw Nadog Nafanmangena
6Isaw nasaful te, Isak nafadante Akub ay nasugu anya sas Padan-Aram laman nanfamubay sanya. Ay nasaful yangay te, gina at mama nafadante Akub, nalong sa anya te, “Lag o kamubay siginans talun Kanaan.” 7Ay nasaful yangay te, Akub nafaning tua at fagtainan ay nalao sas Padan-Aram. 8Siginan takatanya, Isaw nasaful te, at mama wa kaylat at ngay mangena tagsiginans Kanaan. 9Nu katanya, kanya nalao sat sai Ismael, Abrayam at baguama sit fagsuguan Agar, ay kanya nafamubay Makalat, Nebayut at faduksay, Ismael at baguina, ay saman ya sit bubay at dua.
Akub at Taginfan sis Betel
10Akub nalao siginans Beerseba sas Karan. 11Ay menit nu nfalyu wan, kanya andasug sa sik talun ay kanya gfamenit yay sanya ginanya fag yabi. Ay kanya nabul sik gang laman at tangil. 12Ay Akub anke taginfan sik agdan gdasug sas banwa. Ay kanya nalag Dius at ngay tagbarita nu glao gfoyfolian sanya fag agdan. 13Ay kanya nalag yangay Yawi nu malindug sis tungud agdan,#28:13 sis tungud agdan: ay mannga, sat day tigyangan. ay nalong sa anya te, “Au Yawi, am fufuama Abrayam at Dius ay am mama Isak at Dius. Gfon kban sa emu ay sa am ngay kasugfunanan ste am fagtaygilidanan fag talun. 14Am ngay kasugfunanan ban kayu lukbu sis daga, ay gsaruayan ban sas fagayu afud daga. Ay siginan ban emu ay am ngay kasugfunanan ggubuk kban fagayu taw sas fagdaul daga. 15Amatangani gugat te, galo ktua ban gugat emu ay gdiri nusnga nday ban nu kadasug o. Namafoli kban emu stae fag talun, ay kwa gfabayan emu anggan ban umfasludan ku fatuyanan sa emu.”
16Ay Akub nu nfulo, namatangan te, “Kwa saful te, Yawi ste fag talun.” 17Ay kanya anlimu ay nalong te, “Madulo ste fag talun! Ste mangaro Dius at fagbanwanan ay banwa at sakbawan.”
18Akub masurip nu kafulo ay nu kalunggung ay kanya nabul at tangil fag gang ay nafalindug laman sik famamatang. Ay sanya ginan, nabusbus sanya fag gang sik langis laman sik masine sas Dius. 19Akub nafangayan kafag talun te, Betel.#28:19 Betel: at masuad, Dius at bale. Ebi at ngayan Lus. 20Akub nafatuyanan wa vtv ay nalong te, “Yawi, nu galo tuo angku ay gfon angku ku fakonun ay ku lanbung, 21ay nu nfoli ktua ban sa ku mama at bale ay nu ddi ban e ndasug sa angku at mauri, o waban ku Dius. 22Tuy fag gang ku nafalindug laman sik famamatang te, ste am bale. Ay gfon kban emu at fasafuluk afud nusnge wain fagayu am fon angku.”
Currently Selected:
Fakasigadan 28: OCCT
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Philippines
