ሃዋ̈ 9
9
ሳ̈ኦ̈ሊ ዬሱ̈ሳ ኣማ̇ኒዴ
ሃዋ̈ 22፡3-16፤ 26፡9-18
1ሳ̈ኦ̈ሊ ጎዳ ኣማ̇ኒኖ ኣሳን ዎ̈ንዳቦ ዪሊ̇ሙታ̇ዶ̈ር ቄ̈ሳ ኣላቃንቦ ኣላቃ̈ኮ ሉኪ̇ዴ። 2ጎዳ̈ ኣማ̇ኒዝ ኣሳን ኣቲናንር ማ̈ቆ ማጫ̇ንር ኢና ዲጜጌዪን ቃቺ̇ሻር ዬሩሳ̈ላም ኤሄ̈ንዳብ ዳማ̈ስቃ ዎ ኣይሁድ ዎ̈ሳ ኬ̈ን ጋርታ̇ ዎ ኣላቃንብ ኪ̈ታ̇ ጻፋር ሚሻምፔ̈ን ቄ̈ሳ ኣላቃንቦ ኣላቃ ጌሺዴ። 3ኢ ዳማ̈ስቃ ዬላ̇ንዳብ ኡኪ̇ንዶን፥ ኢ ቆ̈ፓካይዶን ፎ̈ኢን ኣፋፖ̇ ኢ ቡጊዳባር ፎ̈ኢዴ። 4ኢያር ሳ̈ዳ̇ ኬዲ̇ዴ፤ ዪኒባራ ኢ̈ኮ “ኣን ሳ̈ኦ̈ሎ! ሳ̈ኦሎ! ኣባብ ኔ ታ̈ና ዳካ̇̈ራ?” ዪዝ ጌይዝ ኣሳ ቆ̈ ሲስኪ̇ንቲ̇ዴ። 5ሳ̈ኦ̈ላሬ “ጎዳ̈ዶ! ኔ ኦኖ̇?” ጌይዴ። ኢያሬ “ታ̈ኒ ኔ ታ̈ና ዳኪ̇ዛ ዬሱ̈ሳ፤ 6ዓት ዲንዳራ ካታ̇ሚን ጋርታ ሉካ̇ቤ ኔ ዎታዝ ባዚን ኢና ኔብ ሶ̈ላንዳ” ጌይዴ። 7ሳ̈ኦላባር ዎልኣ ሉኪ̇ዝ ኣሳን ጌዪንቲኖ ባዚን ሙታ̇ ሲስኪሙታ̇ ኦ̈ናካር ቤቃካ̇ዮኮታ̇ቦ ኢንቲ̇ ሶ̈ሊዝ ባዚ ዪን ዚም ጋር ኤቂ̇ዴ። 8ሳ̈ኦ̈ላር ኬዲ̇ኖ ቤሲን ጋልዳፖ̇ ዲንዳ̇ር ፌ ኣፊን ፊርቃምባ̇ራ ኣባካር ቤቃ̇ንዳብ ዳንዳኣካ̇ዬ፤ ዪኮታ̇ብ ኣሳን ኢ ኩሺን ኤ̈̇ር ኢያ ቲ̈ኒ ሙታ̇ ዳማ̈ስቃ ዬልዴ። 9ዓይዚ̇ ቃም ኣ̈ፊ ዎብ ማ̈ቂ ካ̈ ዋ̈ ጋ̈ካይ ጋምኢዴ።
10ዳማ̈ስቃ ጋርታ̇ ሃና̈ና ጌይዛ ዬሱ̈ሳ ኣማ̇ኒዝ ኣስ ፔታ̇ን ዎዶ̈ን፤ ጎዳ̈ዳሬ ሳጻባር ኢ̈ኮ “ሃና̈ኖ!” ጋ̈ር ጼይጊዴ። ኢያር “ጎዳ̇ዶ! ታ ዓይ ዎ” ጌይዴ።
11ጎዳ ኢ̈ኮ “ዲንዳ̇ራ ‘ጺታ̇ ጎይ’ ጋ̈ዝ ጎይምባር ይሁዳ ጌይዝ ና̈ሳ ኣ̈ል ሉካ̇ቤ፤ ኢና ሳ̈ኦ̈ል ጌይዛ ጣርሴሳ ካታሚን ጋርታ̇ፖ̇ ዬይኖ ፔቲ̇ ኣስዶ̈ሪ ዎ ኢያ ኮያቤ፤ ኢ ዓት ዎ̈ሳ ጋልዳ ዎ፤ 12ኢ ሃና̈ና ጌይዝ ኣሲ ኢ ዎ ቤስ̇ ዬ̈ር ፌ ኩሽ ኢ ጋልዳ ጋዳ̇ር ኢ ኣፊን ቤቃ̇ምፔ̈ን ኢ̈ብ ዎ̈ሳ̇ምባር ሳ̈ጻባር ቤቂ̇ኔ” ጌይዴ።
13ሃና̈ኖ ኢ̈ኮ “ጎዳ̈ዶ! ዓ ና̈ሳ̈ዲ ዬሩሳ̈ላም ዎ ኣማ̇ኒዝ ኣሳን ጋልዳ ዎዛርፌ̈ን ሜታ ዬልኖን ቴ ዎይሊን ኣሳ ጋልዳፖ̇ ሲስኪኔ̈። 14ኢ ኔ ሱ̈ምን ጼይጊዛን ቃቻ̇ንዳብ ቄ̈ሳ ኣላቃን ጋልዳ̇ፖ̇ ሲልጣ̈ና ኤካ̇ሪ ዬይኔ” ጌይዴ።
15ጎዳ̈ዳሬ ኢ̈ኮ “ሉካ̇ቤ! ዪ ና̈ሳ̈ዲ ቴ ሱምን ኣይሁድ ባዮ̇ ኣሳንኬ ካ̈ቲንታ̇ን ቲ̈ን ማ ኢስሬ̈ላ ዎርዣ ቲ̈ን ዎይ ኤርሲዛ ታ̈ብ ማራጺ̇ንቲ̇ኖ ቴ ሚ̈ሻ̇ ኢያ። 16ኢ ቴ ሱ̈ምንቦ ጋ̈ሪ ዎዛርፌን ሜታ ኤካ̇ንዳብ ኮሺ̇̈ርኮ ቴ ኢያ ቤይሳንዳ” ጌይዴ።
17ሃና̈ኖ ሉካ̇ቤ ጌይኖ ኣ̈ሊን ጋርታ ሉኪ̇ ጌላሪ ሳ̈ኦላ ጋልዳ ፌ ኩሺን ጋዳ̇ሪ “ቴ ኢሻ ሳ̈ኦ̈ሎ! ኔ ዓይ ዬዚምባራ ጎይም ጋልዳ ኔ̈ብ ቤንቲ̇ኖ ጎዳ̇ ዬሱ̈ሲ፤ ኔ ኣ̈ፊን ቤቃምፔ̈ንኬ ኔ ጌ̈ሻ̇ ኣያ̇ናባር ኩማንፔ̈ኒ ታ̈ና ኔ̈ክ ሚሺኔ” ጌይዴ። 18ኢ ዪኖ ጋ̈ምባ̇ራ ኤሊ̇ባር ሳ̈ኦላ ኣፊን ጋልዳፖ̇ ቁራ ማይጺዝ ባዚ ኬዲ̇ዴ። ኢናፖ ኢ ኣ̈ፊን ቤቃ̇ዴ፤ ማ ዲንዳር ጻማ̇ቂንቲ̇ዴ። 19ፊ̈ሺ ሙ̈ዪ ዎታር ሚ̈ጚዴ፤ ኢና ዳማ̈ስቃ ዎ ኣማ̇ኒዝ ኣሳንባር ሙ̈ቃ ቃም ጋምኢዴ።
ሳ̈ኦ̈ሊ ዳማ̈ስቃኬ ካታማ ጋርታ̇ ታማ̈ርሲዴ
20ሳ̈ኦ̈ሊ ዎይሊን ጋምኣካ̇ይዶሪ ዳማ̈ስቃ ጋርታ “ዬሱ̈ሲ ጾ̈ሳ̇ ናኤ” ጌዪ ሙታ̇ ኣይሁዳን ዎ̈ሳ ኬ̈ ጋርታ̇ ታማ̈ርሲ ኤ̈̇ዴ።
21ኢ̈ኮን ሲስኪኖንር ዎይ “ዓ ና̈ሳ̈ዲ ዬሩሳ̈ላም ካታ̇ሚን ጋርታ ዬሱ̈ሳ ሱ̈ሚን ጼይጊዝ ኣሳን ዎይ ዳኪ̇ ይሲዛ̈ዳባያ? ማ ኢ ዓይዲ̇ ዬይኖንዳ ኢንታ ቃቺ̇ሙታ̇ ቄሳ ኣላቃንቦ ኤጛንዳብባያ” ጋ̈ር ጋራ̇ሚንቲዴ። 22ዎቲናካር ሳ̈ኦ̈ሊ ጌዳ ሚጚ ሙታ̇ ሉኪ̇ዴ፤ ዬሱ̈ሲ ኢ ክርስቶ̈ሳ ማ̈ቂ̇ኖን ሶ̈ሊሙታ̇ ዳማ̈ስቃ ዎ ኣይሁዳን ሶ̈ሊዝ ባዝ ኢንታ̇ ይሲ̇ዴ።
23ዎይሊን ቃ̈ማፖ̇ ዓኒ ኣይሁዳን ሳ̈ኦ̈ላ ዎንዳቦ ዎል ዎልኣ ዞሪንቲ̇ዴ። 24ኢንቲ ኢያ ዎንዳብ ዞሪንቲኖን ኢ ኤሪዴ̈። ኢንታሬ ኢያ ዎንዳቦ ቃ̈ምኬ ጋላስኬ ካታ̇ሚን ጋርታ̇ፖ̇ ኬስኪ̇ዝ ካራን ጋልዳ ና̈ጊ ኤ̈̇ዴ። 25ዎቲናካር ኣማ̇ኒዝ ኣሳንሲ̇ ቃም ካታ̇ሚንቦ ኣጺሪን ጋልባር ዳ̈ቻ̇ ጋርታ̇ ሚሻር ዛ̈ና ኢያ ሶ̈ቢሲ̇ዴ።
26ሳ̈ኦላሬ ዬሩሳ̈ላም ዬ̈ሪ ኢና ዎ ኣማ̇ኒዝ ኣሳን ጋርታ ጌላንዳብ ኮዪዶን ኢንቲ ኢ ኪን ኣማ̇ኒኖ ማ̈ቂ̇ኖን ኣማ̇ናካዮኮታ̇ቦ ዎይን ኢ̈ብ ኢ̈ጪ̇ዴ። 27ዎቲናካር ባርናባ̈ሲ ኢያ ሃዋራታንኮ ኤጛሪ ኢ ዚቃንታ̇ ዳማ̈ስቃ ሉኪ̇̈ርዶሪ ጎይም ጋልዳ ጎዳ ዬሱ̈ሲ ኢ̈ብ ቤንታ̇ር ኢባር ሶ̈ሊኖንዶ ማ ኢ ዳማ̈ስቃዶ̈ሪ ጎዳ ሱ̈ምምባራ ዎዛርፌ̈ን ኢ̈ጫካ̇ይዶር ሳ̈ባ̇ኪኖኮ ኢንታ̇ብ ሶ̈ሊዴ። 28ዪዚ ኢናፖ̇ ሳ̈ኦ̈ሊ ኢንታባር ዎልኣ ዶኢዴ። ዬሩሳ̈ላም ካታሚን ጋርታ̇ ቢሪንቲ̇ ሙታ̇ ጎዳ ዬሱ̈ሳ ሱምባራ ኢ̈ጫካይ ሶ̈ሊ ታማ̈ርሲዴ። 29ግሪ̈ክ ጋዳፖ̇ ዬይኖ ኣይሁዳንባር ሶ̈ሊንቲ ኢንታ̇ባር ፋላሚዴ፤ ዎቲናካሬ ኢንቲ̇ ኢያ ዎንዳብ ጎይ ኮዪዴ። 30ኣማ̇ኒኖ ኣሳንሬ ዪኖ̇ ኤራሪ ቂሳ̈ራ ጌይዝ ቤስ̇ ኤ̈ጛሪ ጣርሴሳ ጌይዝ ካታማ ኢያ ሚሺዴ።
31ዪና̇ ኢዝባራ ይሁዳ፣ ጋሊላኬ ሳማ̈ራ ዎ ኣማ̇ኒኖ ኣሳን ሳሪቲ ዲጚዴ፤ ሚ̈ጚዴ፤ ማ ጾ̈ሳ̇̇̈ቦ ኢ̈ጪ̇ሙታ̇ ጾ̈ሳ̇ ቦንቺ̇ ጌ̈ሻ̇ ኣያ̇ናባር ሚ̈ጚሙታ̇ ኣሳር ኢንታ ጋልዳ ጉጂንቲ̇ሙታ̇ ዬይዴ።
ጴ̈ጥሮ̈ሲ ሊ̈ዳኬ ዮ̈ጴ ጌይዝ ቤሳ̇ን ጋርታ̇ ታማ̈ርሲዴ
32ጴጥሮ̈ሲ ዱማ ዱማ ጋዳ̇ ቢሪንታ̇ዚምባ̇ራ ሊ̈ዳ ካታሚን ጋርታ̇ ዎ ኣማ̇ኒዝ ኣሳን ቤቃ̇ንዳብ ሉኪ̇ዴ። 33ኢና ላማካይ ላይ ዎይ ዪ̈ ጋልዳ ሱርቂ ዎ ኤ̈ና̇ ጌይዛ ፔቲ̇ ቶሂ ዎ̈ብ ኣስ ዲጚዴ። 34ጴ̈ጥሮ̈ሳሬ “ኣን ኤ̈ኖ! ዬሱ̈ስ ክርስቶ̈ሲ ኔ̈ና ፋ̈ሬ፤ ዲንዳ̇ራ ኔ ዪ̈ን ዪ̈ጻ̇ቤ” ጌይዴ። ኤ̈ናሬ ኤሊ̇ባር ፉክ ጋ̈ር ዲንዲዴ። 35ሊ̈ዳ ካታሚን ጋርታ̇ኬ ሳ̈ሮና ጋዳ̇ ዶኢዛን ዎይ ኢያ ቤቃ̇ሪ ጎዳ ዬሱ̈ሳ ኣማ̇ኒዴ።
36ኢዮ̈ጳ̇ ካታሚን ጋርታ̇ ጣ̈ቢታ ጋ̈ዚን ኣማ̇ኒዝ ኣስ ፔታ̇ንዶር ዎ። (ኢዝ ሱምን ግሪ̈ክ ኖ̈ናባር ዶርቃ ጌዪንታ̇̈ሬ)#9፡36 ጣቢታ ጋ̈ዚንዳ ኣራማዪክ ኖ̈ና ዶርቃ ጋ̈ዚንዳ ግሪክ ኖ̈ና ቢርሺቺ̇ንዳሬ ጌ̈ንኣ ጌንቴ̇። ኢዛሬ ዎይ ጋላስ ሚጛር ኮሽ ባዝ ኦሙታ̇ ዎርባያን ማ̈ዳሙታ̇ ዎ ኣሴ። 37ኬል̇ ኢዝባራ ኣሲን ኢዛ ማ̈ራ ዓይቃ̇ዴ፤ ኣሳን ኢዝ ኣሂን ሜ̈ጫ̇ር ፎ̈ቃ ጋልዳ ዎ ፔቲ̇ ኪፊላ ጋርታ̇ ጋዲ̇ዴ። 38ሊ̈ዳ ጋ̈ዝ ቤሲ̇ንዳ̇ ዮ̈ጲ̇ ላፍ ጋልዳ ኡክ ማ̈ቂ̇ኖኮታ̇ቦ ዮ̈ጳ̇ ዎ ኣማ̇ኒዝ ኣሳን ጴ̈ጥሮ̈ሲ ሊ̈ዳ ዎን ሲስካ̇ሪ ናምኢ ኣስ ኢ̈ክ ሚሻሪ “ዋ̈ዴ ኔ ኑ̈ክ ኤሊ̇ ዬይሼ” ጋ̈ር ጌሺዴ።
39ጴ̈ጥሮ̈ሳሬ ዲንዳ̇ሪ ኢንታ̇ባር ዬይዴ። ኢና ዬላ̇ሪ ኣፋ ፎ̈ቂን ጋልዳ ኢያ ኬሲ̇ዴ፤ ኣስኒ ዓይቂ̇ኖ ማጫ̇ን ዎይ ዶርቃ ኢንታ̇ባር ዎዶራ ኢዛ ኦ̈ኖ ቃሚሳንኬ ሜል ኣፊላን ኢያ ቤይሲሙታ̇ ኢ ቡጊዲንባር ኤቂ̇ዴ። 40ጴ̈ጥሮ̈ሳሬ ኣሳን ዎይ ዛ̈ና ኬሳ̇ሪ ኢ ኬ̈ ኢና ቡቂንታ̇ር ዎ̈ሲ̇ዴ፤ ኢናፖ̇ ኢዝ ኣሂንኮ ቢሪንታ̇ሪ “ጣ̈ቢታ! ዲንዳ̇ቤ!” ጌይዴ። ኢዛር ፌ ኣፊን ፊርቃ̇ዴ፤ ጴ̈ጥሮ̈ሳ ቤቃ̇ራ ሾክ ጋ̈ር ዶኣዴ። 41ኢያር ኢዝ ኩሺን ኤ̈̇ር ዲንዴ ኣማ̇ኒኖ ኣሳንኬ ኣስኒ ዓይቂ̇ኖ ማጫ̇ን ጼይጋር ፋ ኣስ ኢንታብ ኢሚ̇ዴ። 42ባዝ ዪና̇ ዮ̈ጳ̇ ጋርታ ዎይ ቤስ̇ ኤሪንቲን ዎይሊን ኣሲ ጎዳ̈ ኣማ̇ኒዴ። 43ጴ̈ጥሮ̈ሳር ሲሞ̈ና ጌይዛ ጋማ̇ ጻ̈ዚዝ ፔቲ̇ ና̈ሳባር ኢና ዮ̈ጳ̇ ዎይሊን ቃ̈ም ዶኢዴ።
Currently Selected:
ሃዋ̈ 9: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
