ዋ̈ኒ̇ሳ 12
12
ማ̈ራማ ዬሱ̈ሳ ሺታ̇ ዲርካ̇ዴ
ማ̈ቶ̈ሳ 26፡6-13፤ ማ̈ርቆ̈ሳ 14፡3-9፤ ሉቃ̈ሳ 7፡37-39
1ኣይሁዳን ፋ̈ሲጋ ባ̈ል ቦንቻ̇ንዳብ ሌሂ ቃ̈ሚ ኣቲ̇ንዶን ዬሱ̈ሲ ቢታ̈ና ዬይዴ። ቢታ̈ና፥ ዬሱ̈ሲ ዓይቃ ጋርታፖ̇ ዲንኖ ኣላ̈ዛ̈ሪ ዶኣዝ ሳፋራ። 2ኢና ዬሱ̈ሳቦ ኢራ̈ታ ጊ̈ጊሲዴ፤ ማ̈ርታ̇ ኢንታ̇ቦ ዎ̈ሲንታ̈̇ሬ፤ ኢራ̈ታ ሞ̈ንዳብ ኢና ዶኢኖን ጋርታ̇ፖ̇ ፔታ̇ና ኣላ̈ዛ̈ራ። 3ዪና̇ ኢዝባራ ማ̈ራማ ዎይሊን ሚ̈ሺ ኤኪ̇ዝ ፔቲ̇ ቡርጩካክ ባጋ̇ክ ማ̈ቂ̇ዝ ና̈ርዶ̈ሳፖ̇ ኦንቲኖ ኮሻ ሺታ̇ ቢልቃ̈ጻ ፔታ̇ን ኤካ̇ ዬ̈ራ ዬሱ̈ሳ ቶሂን ዲርካ̇ዴ። ኢናፖ̇ ፌ ቆሚ̇ንባር ኢ ቶሂን ቁቻ̇ር ካሊ̇ሳዴ፤ ሺቲ̇ን ሳ̈ዉቃራ ኬ̈ን ማሃዴ።
4ኢ ታማ̈ራን ጋርታፖ̇ ፔታ̇ና ዎሃ ዬሱ̈ሳ ኣ ኢሚዛ ዪሁዳ ኣስቆሮቶ̈ዲ፥ 5“ዓ ሺታ̇ ዓይዚ̇ ጼታ̇ ዲና̈ራብፌ̈ን ዎጚንታር ሚ̈ሺ̇ን ዎርባያንቦ ኣባብ ኢሚንታባሳ?” ጌይዴ። 6ኢ ዪኖ̇ ጌይኖንዳ ዎርባያንቦ ሚጪንታ̇ር ጊዳካይዶ̈ን ሶላ ማ̈ቂ̇ኖኮታ̇ቦ፤ ሚ̈ሺ̇ ቃርጺሪ̈ቲንዳ̇ር ኤ̈̇ዛ ኢያ ማ̈ቂ̇ኖ ጊሻ̇ቦ ኢናፓ̇ር ሚ̈ሺ̇ ኤኪ̇ ሎሲኔ።
7ዬሱ̈ሳሬ ኢንታኮ “ዪንቲ̇ ኢዞ ኣሺ̇ብቴ፤ ዓና̇ ሺቲ̇ን ኢዛ ቴ ዱ̈ፊምቦ̇ ጊ̈ጊሲኔ። 8ዎርባያን ዎይ ጋላስ ዪንታ̇ባር ዶኢ̈ሬ፤ ቴ ዎይ ጋላስ ዪንታ̇ባር ዶኣባሴ” ጌይዴ።
9ዪኒ̇ባራ ዎይሊን ኣይሁዳን ዬሱ̈ሲ ኢና ቢታ̈ና ዎን ኤራሪ ዬይዴ። ኢንቲ̇ ዬይኖንዳሬ ዬሱ̈ሳ ቤቃ̇ንዳ̇ብ ሙታ̇ ጊዳካይዶ̈ን ኢ ዓይቃ ጋርታፖ̇ ዲንኖ ኣላ̈ዛ̈ራ ቤቃ̇ንዳቦ። 10ዪ̈ኮታ̇ቦ ቄ̈ሳ ኣላቃን ኣላ̈ዛ̈ራር ጉጃ̇ር ዎንዳቦ ዞሪንቲ̇ዴ። 11ኣባ ጌይንዶ̇ ኢ ኣላ̈ዛ̈ራ ዓይቃ ጋርታ̇ፖ̇ ዲንኖምቦ̇ ዎይሊን ኣይሁዳን ኢንታ̇ ኣሻ̇ሪ ዬሱ̈ሳ ኣማ̇ኒኖኮታ̇ቦ።
ዬሱ̈ሲ ቦንችባራ ዬሩሳ̈ላም ጌሊዴ
ማ̈ቶ̈ሳ 21፡4-9፤ ማ̈ርቆ̈ሳ 11፡7-10፤ ሉቃ̈ሳ 19፡35-38
12ኢዝ ዎንን ፋ̈ሲጋ ባ̈ሊምቦ̇ ጋ̈ር ዬይኖ ዎይሊን ኣሳን ዬሱ̈ሲ ዬሩሳ̈ላማ ዬ̈ዚን ሲስኪዴ። 13ዪ̈ኮታ̇ቦ ሜ̈ጻ̇ ሜይሲ̇ ሜይሲ̇ ኤካ̇ሪ ኢያ ሞኪ̇ ኤካ̇ንዳብ ኬስኪ̇ዴ፥ ኢንታ̇ር ፌ ቆ̈ ሾክ̇ ዎታሪ፥
“ሆሳ̈ና!#12፡13 ሆሳ̈ና ጌንቲ̇ ‘ዓት ፋቤ’ ጌይዝ ጋላታ ሶ̈ላ
ጎዳ ሱምባራ ዬይዛ ኢ ኣንጂንቶ̇!
ኢስሬ̈ላ ካ̈ታ̇ ኢ ኣንጂንቶ̇!” ጌይዴ።
14ዬሱ̈ሳሬ ዬራ ናእ ዲጛር ኢዝ ጋልዳ ቶጊ̇ዴ። ዪና̇ሬ፥
15ጌ̈ሻ̇ ማጻ̈ፋ ጋልዳ̇፥
“ዬሩሳ̈ላም ዎርዣዶ! ኢጫፒ̇ቴ፤
ቤቂ̇ብቴ̇፥ ዪንታ̇ ካ̈ታ̇ ዬራ ናኣ ጋልዳ ቶጋ̇ር ዬይሬ”
ጌዪ ጻ̈ፊንቲ̇ኖ ቃ̈ላ ፎቲንታ̇ንፔ̈ኔ።
16ኢ ታማራን ዪና̇ ዎይ ቲ̈ን ኢንታ̇ብ ጌላያካ̇ዬ። ጌ̈ሻ̇ ማጻ̈ፋ ጋልዳ̇ ዪኖ̇ ኢ ኮታ̇ ጻ̈ፊንቲ̇ኖንዲኬ ኣሳን ዪኖ̇ ኢ̈ብ ኦ̈ኖን ኢንታ̇ብ ኤልቅ ጌይኖንዳ ዬሱ̈ሲ ቦንችባራ ኣፋ ሉኪ̇ኖፖ̇ ዎሃ።
17ዬሱ̈ሲ ኣላ̈ዛ̈ራ ዱ̈ፊ ጋርታ̇ፖ̇ ጼይጋር ዓይቃ ጋርታፖ̇ ዲንምባራ ኢባር ዎ ኣሳን ኢ ዲንዳዚን ቤቂ̇ኖን ማርኪቲኔ። 18ዎይሊን ኣሳንሬ ኢ ዪኖ̇ ታ̈ሚራቲን ኦ̈ኖን ሲስኪኖኮታ̇ቦ ኢያ ሞ̈ኪ ኤካ̇ንዳብ ኬስኪ̇ዴ። 19ፋራሳ̈ዋንር ዎል ዎልኣ “ናኢቶ ቤቂ̇ቴ! ዎርዣ ዎይ ኩፕ ጌዪ ኬስካ̇ር ኢ ዎሃ ዬ ኤ̈̇ዴ፤ ዪዚ ኑ ኣባካር ዎታንዳብ ዳንዳኢባ̈ሴ” ጌይዴ።
ዬሱ̈ሲ ፌ ዓይቂንዲኬ ፌ̈ና ዬላ̇ዝ ሜቲን ሶ̈ሊዴ
20ፋ̈ሲጋ ባ̈ሊን ቦንቻ̇ዝ ጋላሲን ጾ̈ሳ̇̇̈ቦ ጎሽታ̇ንዳብ ዬሩሳ̈ላም ሉኪ̇ኖ ኣሳን ጋርታ̇ፖ̇ ፔታ̇ን ፔታ̇ና ጊሪ̈ኮ ኣሴ። 21ኢንታ̇ሬ ጋሊላ ዎ ቤ̈ቴሳይዳ ካታሚን ጋርቶ̇ ናሳ ፊልጶ̈ሳክ ዬ̈ሪ “ላ̈! ዋ̈ዴ ኑ ዬሱ̈ሳ ቤቃ̇ንዳ ኮዪ̈ሬ” ጌይዴ። 22ፊልጶ̈ሳሬ ሉካ̇ሪ ኢንዲራ̈ሳብ ሶ̈ሊን፥ ኢንቲ̇ ናምኣን ዎል ማ̈ቃ̇ሪ ዬሱ̈ሳብ ሶ̈ሊዴ። 23ዬሱ̈ሳር ኢንታ̇ኮ “ታ ኣሳ ናኣ̈ዲ ጴች ቦንች ኤኪ̇ዝ ሳ̈ኣታ ታ̈ብ ዬሊ̇ኔ። 24ቴ ዪንታ̇ክ ኪን ጋ̈ሬ ፔቲ̇ ዜርቃ ኣ̈ፊንዳ ሳ̈ዳ ጌላራ ዱ̈ኪንታ̇ካ̇ይ ኣቴ̇ጌይንዶ̇ ፌ̈ብ ሙታ̇ ኣታ̇̈ሬ፤ ሳ̈ዳ̇ ጌላር ዱ̈ኪንቴ̇ጌይንዶ̇ ዎይሊን ኣ̈ፍ ካጻ̇̈ሬ። 25ፌ̈ና ካዝ ኣሲ ኢ ፌ ሼምፒ̇ን ይሲ̈ሬ፤ ዓና ኣላሚን ጋልዳ̇ ፌ̈ና ኢጺ̇ዝ ኣሲ ሜናብ ዶኣንዳ̇ቦ ፌ ሼምፒ̇ን ጋዲ̇̈ሬ። 26ታ̈ብ ኦንዳብ ኮይዝ ኣሲ ዎኮ ቴ ዎሂን ዬጋ̈ቤ፤ ታ̈ብ ኦ̈ዝ ና̈ሳዲ ቴ ዎ ቤሲ̇ን ኢና ዶኢ̈ሬ፤ ታ̈ብ ኦ̈ዛ̈ዳ ቴ ባ̈ባ ኢያ ቦንቺ̇̈ሬ።
27ዬሱ̈ሲ ጋ̈ሪ “ዓኒሼ ቴ ሼምፒ̇ን ዎይሊን ጫና̇ቂንታ̈ሬ፤ ዪዚ ቴ ዎዛር ጋ̈ኖ? “ቴ ባ̈ባ̈ዶ! ዓና̇ ሜታ ሳ̈ኣቲን ጋርታፖ̇ ታ̈ና ቡ̈ቲሳቤ ጋ̈ኖ? ዪና̇ ጋ̈ካ̇ይፌ̈ኒ ቴ ኣላሚን ጋርታ̇ ዬይኖንዳ ዓና ሜቲን ኤካ̇ንዳ̇ቦ። 28ቴ ባ̈ባ̈ዶ! ኔ̈ኒ ቦንች ጾ̈ስ ማ̈ቂ̇ኖንዶ̇ ዎርዣ̈ብ ቤይሳቤ!” ጌይዴ።
ኢናፖ̇ “ቴ ቴ ቦንቺን ቤይሲኔ፥ ዓታ̇ር ማሃር ቤይሳንዳ̇” ዪዝ ጌይዝ ጊርሲ ኣፋፖ̇ ሲስኪ̇ንቲ̇ዴ።
29ኢና ዎ ዎርዣ̈ዲ ዪኖ̇ ሲስካ̇ሪ “ዪ̈ዲ ዳዳ” ጌይን፤ ሜላን ማ “ኪ̈ታንቾ̇ ኢባር ሶ̈ሊቲ̇ኔ” ጌይዴ።
30ዬሱ̈ሳር ኢንታ̇ኮ “ዪና̇ ጊርሲን ዪንታ̇ ማ̈ዳ̇ንዳብ ዬይንዶኬ ታ̈ብ ዬ̈ካ̇ዬ። 31ዓና̇ ኣላሚን ፊርዲንታ̇ዝ ኬሊ̇ን ዓቴ̇፤ ጾ̈ሲ̇ ዓና̇ ኣላሚን ላ̈ ሴ̈ጣና ዛና ቶጚ̈ሬ። 32ታ̈ና ሳ̈ዳ̇ፖ̇ ፉዳ ኣፋ ሾክ ዎታር ሶቴ̇ጌይንዶ̇ ኣስ ዎይ ታ̈ክ ዬ̈ምፔ̈ን ዎታ̇̈ሬ” ጌይዴ። 33ዪኖ̇ ዬሱ̈ሲ ሶ̈ሊኖንዳ ኢ ኣ ፌ̈ኖ ዓይቃ ዓይቂ̇̈ርኮ ኤሪሳንዳ̇ቦ።
34ዎርዣዳሬ “ኑ̈ኒ ክርስቶ̈ሲ ሜናብ ዶኢ̈ሬ ጋ̈ዚንዶ ሂጋ̇ ማጻ̈ፋ ጋልዳፖ̇ ሲስኪ̇ኔ፤ ዓት ዪ̈ዲኮ ኔ̈ኒ ‘ኣሳ ናኢ ሶቲንታ̇ንዳ̇ብ ኮሺ̈ሬ’ ጋ̈ራ ዎዛርፌ̈ን ሶ̈ላ̈ራ? ዪ ‘ኣሳ ናኣ’ ኢ ኦኖ?” ጌይዴ።
35ዬሱ̈ሲ ኢንታ̇ኮ “ዓት ዪዚ ፎኢን ጊላ̇ ቃ̈ም ዪንታ̇ባር ዶኢ̈ሬ፤ ፎኢን ዎምባ̇ራ ̈ሚ ዪንታ̇ ዬላ̇ካይዶን ዬ̇ ቢሪንቲ̇ብቴ̇፤ ምባር ዬ̇ዝ ኣሲ ኢ ዎይዲ ሉኪ̇̈ርኮ ኤሪባ̈ሴ። 36ዪንቲ̇ ፎኢን ጋርታ̇ ዬ̇ዝ ኣስ ማ̈ቃምፔ̈ን ፎኢን ዪንታ̇ብ ዎምባራ ፎኢን ኣማ̇ኒብቴ” ጌይዴ። ዬሱ̈ሲ ዪኖ ሶ̈ሊኖፖ̇ ዓኒ ኢንታ ጋልዳፖ̇ ሉኪ̇ ጌ̈ሚቲዴ።
ኣይሁዳን ዓታ̇ር ዬሱ̈ሳ ኣማ̇ናብዳ ጌዪ ጋሚዴ
37ዬሱ̈ሲ ዪን ዎይ ታሚ̇ራታን ኣይሁዳን ቲ̈ን ኦናርዶ̈ን ዓታ̇ር ኢንቲ ኢያ ኣማ̇ና̇ካ̇ይ ኣቲ̇ዴ። 38ዪና̇ሬ ናባ ኢሳ̈ሲ፥
“ጎዳ̈ዶ! ኑ ማርኪቲን ኦ ኣማ̇ኔ?
ጾ̈ሳ̇̇ ዎልቂን ኦ̈ብ ቤንታ̇?”
ጌዪ ሶ̈ሊኖ ቃ̈ሊን ፎቲንታምፔ̈ኔ። 39ዪ̈ኮታ̇ቦ ኢንቲ̇ ኣማ̇ናንዳቦ ዳንዳኣካ̇ዬ። ዪና̇ሬ ኢሳ̈ሲ ሜላ̇ ቤሳ̇ ጋልዳ፥ 40“ኢንቲ̇ ፌ ኣ̈ፊንባር ቤቃ̇ሪ፥
ፌ ቡ̈ዲንባራ ቆፓ̇ሪ፥
ኢ̈ኮ ማ̈ቂ̇ ፋጻካ̇ይፌ̈ኒ
ጾ̈ሲ̇ ኢንታ̇ ኣ̈ፊን ዎቢ̇ሲዴ፥
ኢንታ̇ ቡ̈ዲንዳር ዛቢሲኔ” ጋ̈ሪ ሶ̈ሊኔ።
41ኢሳ̈ሲ ዬሱ̈ሳ ቦንቺ̇ን ቤቂ̇ኖኮታ̇ቦ ዪኖ̇ ኢ ባዝ ሶ̈ሊዴ።
42ዪ ማ̈ቂ̇ናካሬ ሜላ ኣቲ̇ን ኣይሁድ ኣላቃን ጋርታፓ̇ር ኣታካይዶር ዎይሊንን ኢያ ኣማ̇ኒንዶኒ ፋራሳ̈ዋ̈ን ኢንታ̇ ኣይሁዳን ዎ̈ሳ ኬ̈ ጋርታ̇ፖ̇ ዳኪ̇ ኬሳካ̇ይፌ̈ኒ ኢ̈ጫር ፌ ኣማ̇ኒን ኤሪሳካ̇ዬ። 43ኢንቲ̇ ዪኖ̇ ዎቲኖንዳ ጾ̈ሳ̇̇ ጋልዳፖ̇ ቤንታ̇ዝ ቦንቺ̇ምፖ̇ ሺ ኣሲ ኢማ̇ዝ ቦንቺ̇ን ዶሲኖኮታ̇ቦ።
44ዬሱ̈ሲ ፌ ቆ̈ን ሾክ ዎታሪ “ታ̈ና ኣማ̇ኒዝ ኣሲ ታ̈ና ሙታ̇ ጊዳካ̇ይዶን ታ̈ና ኪ̈ታ̇ር ሚሺኖ̈ዳር ኣማ̇ኒ̈ሬ። 45ታ̈ና ቤቂ̇ዛ̈ዲ፥ ታ̈ና ኪታ̇ር ሚሺኖ ቤቂ̇̈ሬ። 46ታ̈ና ኣማ̇ኒዝ ኣሲ ዎይ ም ጋርታ̇ ዶኣካ̇ዮ̈ዲፌ̈ኒ ታ̈ኒ ፎኢን ማ̈ቃ̇ራ ዓና̇ ኣላሚን ጋልዳ̇ ዬይኔ። 47“ታ ቃ̈ሊን ሲስካ̇ሪ ኦ̈ሳ ጋልዳ ፌ̈ሺ̇ባ̈ሶ ኣሳ ጋልዳ̇ ፊርዲዛ̈ዲ ታ̈ና ጊዳካ̇ዬ፤ ቴ ዬይኖንዳ ኣላሚን ጋልዳ ዎ ኣሳን ፋንዳብዶኬ ኢንታ̇ ጋልዳ̇ ፊርዳንዳ̇ብ ጊዳካ̇ዬ። 48ታ̈ና ኮዪባሶ̈ዲኬ ቴ ቃ̈ሊን ኤኪ̇ባ̈ሶ ኣሳ ጋልዳ̇ ፊርዲዛ̈ዲ ዎ፥ ዪና̇ሬ ቴ ሶ̈ሊኖ ቃሊን ኢዛ ዉርሲ ጋላስ ኢ ጋልዳ ፊርዳ̈ሬ። 49ታ̈ኒ ቴ ሲልጣናባር ሶ̈ላካዬ፤ ቴ ጋ̈ዚንዲክ ሶ̈ላዚን ጋ̈ቤ ጌዪ ታ̈ብ ኢሚ̇ኖ ታ̈ና ኪ̈ቲ̇ ሚሺኖ ቴ ባ̈ባ̈ዳ። 50ኢ ኪ̈ቲንዳር ሜናብ ዶኣዝ ሼምፓ ጎይ ኤ̈ጚዛ ማ̈ቂ̇ኖን ቴ ኤራ̈ሬ። ዪ̈ኮታ̇ቦ ቴ ሶ̈ላዚንዳ̇ ቴ ባ̈ባ̈ ቴ ሶ̈ላምፔ̈ን ታ̈ብ ሶ̈ሊኖንዶ̇” ጌይዴ።
Currently Selected:
ዋ̈ኒ̇ሳ 12: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
