ዋ̈ኒ̇ሳ 6
6
ዬሱ̈ሲ ኢሺ̇ን ሙኩላ ኣስ ፊ̈ሺ ሙሲዴ
ማ̈ቶ̈ሳ 14፡13-21፤ ማ̈ርቆ̈ሳ 6፡32-44፤ ሉቃ̈ሳ 9፡10-17
1ዪኒ̇ፖ ዓኒ ዬሱ̈ሲ ጢብራ̈ዶ̈ሳ ዎይ ጋሊላ ጋ̈ዝ ባሃ̈ሪምፖ̇ ጌዳ ፊ̈ን ፊ̈ጚዴ። 2ዬሱ̈ሲ ማኖ ኣሳን ፋ ዎቲኖ ታ̈ሚራ̈ታን ቤቂ̇ኖኮታ̇ቦ ዎይሊን ኣሲ ኢ ዎሂን ዬ ኤ̈̇ዴ። 3ኢናፖ ዬሱ̈ሲ ኢንዳ̇ ጋልዳ̇ ኬስካ̇ሪ ኢና ፌ ታማ̈ራንባር ዎልኣ ዶኢዴ። 4ኣይሁዳንቦ ፋ̈ሲጋ ባ̈ል ቦንቻ̇ንዳብ ቃሚ̇ን ኡኪ̇ንዶ̈ን፥ 5ዪና̇ ኢዝባራ ዬሱ̈ሲ ዎይሊን ዎርዦ ኢ̈ክ ዬ̈ዚምባራ ሾክ ጌዪ ቤቃ̇ሪ ፊልጶ̈ሳኮ “ዓ ዎይ ኣሳ̈ቦ ጊዲዝ ፊ̈ሺ ኑ ዎይዲፖ̇ ዎ̈ጛንዳብ ዳንዳኢ̈ራ? ጌይዴ። 6ኢ ዪኖ̇ ጌይኖንዳ̇ ፊልጶ̈ሲ ዎዛር ጋ̈ናኮ ሲስካ̇ንዳብዶኬ ፌ ኦ̈ዝ ባዚን ኢ ፌ̈ብ ቲ̈ን ኤሪ̈ሬ።
7ፊልጶ̈ሳር ኢ̈ኮ “ዪን ዎይንቦ ሜላ ኣቲ̇ን ጊላ̇ ጊላ̇ ዳርሳ̇ር ዬልንዳ ጌዬጌይንዳ̇ር ናምኢ ጼ̈ታ ዲናራባር#6፡7 ናምኢ ጼ̈ታ ዲና̇ራ- ፔቲ̇ ኣሳቦ ላማሃይ ኣጋን ቃና ኦ̈ሳብ ዳሞ̈ዛ ጪጊ̇ን ጊዲዝ ሚሼ̇ ዎጜጌይናር ጊዳባሴ” ጋ̈ር ማሂዴ።
8ኢ ታማራን ጋርታ̇ፖ̇ ፔታ̇ና ሲሞ̈ን ጴ̈ጥሮ̈ስ ኢና̇ኣ ኢንድራ̈ሲ ኢንታ̇ኮ፥ 9“ኢሺ̇ን ጎስ ሶ̈ላ̇ኬ ናምኢ ሞላኬ ኤ̈̇ኖ ፔቲ̇ ናኢ ዓይ ኑ ጊዳ ዎ፤ ዎቲናካር ዓና̇ ዓ̈ ዎይ ዎርዣ̈ቦ ዎዛ̈ርታ̇ር ጊዳ̈ራ?” ጌይዴ።
10ዬሱ̈ሳሬ ኢንታ̇ኮ “ኣሳን ዶይሲ̇ብቴ̇” ጌይን ቤሲ̇ን ቡጫዶ̈ን ኣሳን ኢና ዶኢዴ። ኢንታ̇ሬ ኣቲና ሙታ̇ ኢሺ̇ን ሙኩላ ኣስ ማ̈ቃ̇ምፔ̈ኔ። 11ኢናፖ̇ ዓኒ ዬሱ̈ሲ ሶ̈ሊ̇ን ኤካ̇ር ጾ̈ሳ̇̇ ጋላታሪ ዶኢኖ ኣሳን ቃጊ̇ዴ። ማ ሞላንሬ ዪና̇ ኢዝፌ̈ኒ ኢንታ̇ቦ ፋጊዴ። ዎይን ፌ̈ብ ጊዳዚን ዲጚዴ። 12ዎይን ሙዪ ሚሽኪኖፖ̇ ዓኒ ዬሱ̈ሲ ፌ ታማ̈ራንኮ “ፔቲ̇ ባዛር ሳ̈ዳ ኬዲ̇ ኣታካ̇ይፌ̈ኒ ሺኖ ዶካ̇ን ዎይ ሺ̈ሺ̇ብቴ̇” ጌይዴ። 13ኢንታ̇ሬ ኢሺ̇ን ጎስ ሶ̈ሊ̇ን ጋርታ̇ፖ̇ ኣሳን ሙይን ሺኖ ዶካ̇ ሺ̈ሻ̇ሪ ታጶ̇ ናምኢ ሌ̈ማታ ኩምዴ።
14ኣሳንሬ ዬሱ̈ሲ ኦ̈ኖ ታ̈ሚ̇ራ̈ቲን ቤቃ̇ሪ “ዓ ኪን ዓና̇ ኣላሚን ጋልዳ ዬይዝ ናባ ኢያ!” ጌይዴ። 15ዬሱ̈ሳሬ ኣሳን ኢ̈ክ ዬ̈ሪ ዎልቃባር ኢያ ካ̈ት ኣ̈ንዳብ ኮዪኖን ኤራሪ ፌ ፌ̈ብዶ̈ሪ ማ̈ቃ̇ር ፔቲ̇ ኢንዳ ጋልዳ ሉኪ̇ዴ።
ዬሱ̈ሲ ባሃ̈ራ ጋልዳ ቶህብባር ዬ̇ ሉኪ̇ዴ
ማ̈ቶ̈ሳ 14፡22-33፤ ማ̈ርቆ̈ሳ 6፡47-51
16ሳ̈ዚን ቃሚ̇ን ዬሱ̈ስ ታማ̈ራን ቶ̈ራ ጋሊላ ባሃ̈ሪንኮ̇ ሉኪ̇ዴ። 17ኢናፖ̇ ጎጛ ጋርታ̇ ጌላሪ ቂፊርና̈ሆ̈ም ሉኪ̇ዴ። ዪና̇ ኢዝባራ ሳ̈ዚንዳ ሚ̇ኔ፥ ዬሱ̈ሳር ቢርት ኢንታ̇ክ ዬ̈ካ̇ዬ። 18ጴች ኣይጊ ባቂ̇ዛኮታ̇ቦ ባሃ̈ሪንዳ ጌዳክ ዓኒክ ኤንኣዴ። 19ኢ ታማራሬ ኢሺ̇ን ዎይ ሌሂ ኪሎሜ̈ትራ ማ̈ቃ̇ምፔ̈ን ጎጚን ዋ̇ ሉኪ̇ኖፖ̇ ዓኒ ዬሱ̈ሲ ባሃ̈ሪን ጋልዳ̇ ቶህባር ዬ̇ ሙታ̇ ጎጚንኮ ኡኪ̇ዴ ኢንታ̇ር ኢያ ቤቃ̇ሪ ኢ̈ጪ̇ዴ። 20ዎቲናካር ኢ ኢንታ̇ኮ “ታ̈ኒሽዋ! ኢጫፒ̇ቴ!” ጌይዴ። 21ኢንታ̇ር ኡፋይስባራ ኢያ ፌ̈ክ ጎጚን ጋርታ̇ ጌልሲ̇ዴ። ጎጚንዳሬ ኤሊ̇ባራ ፌ ሉካ̇ዝ ቤሲ̇ን ዬላ̇ዴ።
ዬሱ̈ሲ ሼምፓ ኢሚ̇ዝ ሶ̈ላ̇
22ኢዝ ዎንን ባሃ̈ሪምፖ̇ ጌዳ ፊ̈ን ኣቲ̇ኖ ኣሳን፥ ባሃ̈ሪን ጋልዳ ፔቲ̇ ጎጛ ሙታ̇ ዎን ቤቂ̇ዴ። ኢ ታማ̈ራን ፌ̈ብ ሙታ̇ ኢዝ ጋርታ̇ ጌላር ሉኪ̇ኖንዲኬ ዬሱ̈ሲ ኢንታ̇ባር ጎጚን ጋርታ̇ ጌላካ̇ዮን ኤሪዴ። 23ኢናፖ̇ ዓኒ ሜላ ጎጛን ጢብራ̈ዶ̈ሳፖ̇ ዲንዳ̇ሪ ዬሱ̈ሲ ጋላታ ዎ̈ሳ ዎ̈ሳሪ ዎርዣ ሶ̈ላ̇ ሙሲኖ ቤሲ̇ን ላፍ ዬይዴ። 24ኣሳን ዬሱ̈ሳሬ ማ ኢ ታማ̈ራንሬ ኢና ባዮ̇ን ቤቃ̇ሪ ዪን ጎጛን ጋርታ̇ ጌላሪ ኢያ ኮዪ ቂፊርና̈ሆ̈ም ሉኪ̇ዴ። 25ባሃ̈ሪምፖ̇ ፊ̈ን ኢያ ዲጚኖፖ̇ ዓኒ ኢ̈ኮ “ኣስታማ̈ራ̈ዶ! ኔ ዓይዲ ኣ̈ንታ̇ ዬዪ?” ጌይዴ።
26ዬሱ̈ሳር ኢንታ̇ኮ “ቴ ዪንታ̇ክ ኪን ጋ̈ሬ፥ ዪንቲ̇ ታ̈ና ኮዪኖንዳ̇ ዪንቲ̇ ሶ̈ላ̇ ሞ̈ሪ ሚሽኪ̇ኖኮታ̇ብዶኬ ታ̈ሚ̇ራ̈ታ ቤቂ̇ኖኮታ̇ብ ጊዳካ̇ዬ። 27ታ ኣሳ ናኣ̈ዲ ዪንታ̇ብ ኢማ̇ዝ ሜናብ ዶኣምፔ̈ን ዎታዝ ፊ̈ሺምቦ̇ ኦ̈ብትዶኬ፥ ሳማር ያዝ ፊ̈ሺምቦ̇ ኦ̈ፒ̇ቴ። ጾ̈ሳ̇̇ ባ̈ባ̈ዲ ቴ ዪኖ̇ ኦ̈ምፔ̈ን ሲልጣ̈ና ታ̈ብ ኢሚ̇ኔ። 28ኣሳንሬ “ዪ̈ዶኮ፥ ጾ̈ሳ̇̇ ኑ ጋልዳፖ̇ ኮዪዝ ባዚን ኦ̈ንዳብ ኑ ዓት ኣብዝ ዎታንዳብ ኮሺ̇̈ራ?” ጌይዴ። 29ኢያር ኢንታኮ፥“ጾ̈ሳ̇̇ ዪንታ̇ ጋልዳፖ̇ ኮያዚንዳ̇፥ ኢ ኪ̈ታ̇ር ሚሺኖ ኣማ̇ናዚንዶ̇”ጋ̈ር ማሂዴ።
30ኢንታ̇ር ኢ̈ኮ “ኑ ቤቃ̇ር ኔ̈ና ኣማ̇ናምፔ̈ን ኣ ማላ̇ ባዝ ኦ̈ንዳ? ዎይ ሜላ ኣብዝ ኦ̈ንዳ̇? 31‘ኢንቲ̇ ሞ̈ምፔ̈ን ኣፋፖ̇ ኢንታ̇ብ ሶ̈ላ̇ ኢሚ̇ዴ’ ጋ̈ሪ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖንዲፌ̈ኒ፥ ኑ ባ̈ቢንታ̇ን ባራሃ ጋርታ̇ ማና̇ ጌይዝ ፊ̈ሺ ሙይኔ” ጌይዴ።
32ዪና̇ ኢዝባራ ዬሱ̈ሲ ኢንታ̇ኮ “ቴ ዪንታ̇ክ ኪን ጋ̈ሬ፥ ኣፋፖ̇ ሶ̈ቢኖ ሶ̈ሊ̇ን ዪንታ̇ብ ኢሚ̇ኖ ሙ̈ሳ ጊዳካ̇ዬ፥ ኪን ሶ̈ሊ̇ን ዪንታ̇ብ ኢሚ̇ዛ̈ዲ ቴ ባ̈ባ̈ዳ።
33ጾ̈ሳ̇̇ ሶ̈ላ̇̈ዲ ኣፋፖ̇ ሶ̈ቢዛ̈ዳ፤ ኣላሚን ጋርታ̇ ዎ ኣሳ̈ቦ ሼምፓ ኢሚ̇ዛ̈ዳ” ጌይዴ።
34ኢንታ̇ር ኢ̈ኮ “ጎዳ̈ዶ! ዪኒ̇ ፌ̈ኖ ሶ̈ሊ̇ን ኑ̈ቦ ዎይ ጋላስ ኢሚ̇ሼ” ጌይዴ።
35ዬሱ̈ሳር ኢንታ̇ኮ “ሼምፓ ኢሚ̇ዝ ሶ̈ላ̇̈ዲ ታ̈ና፥ ታ̈ክ ዬይዝ ኣሲ ኣባካር ጋፍሲንቲ̇ባ̈ሴ፥ ታ̈ና ኣማ̇ኒዝ ኣሲ ዉርሲ ባ̈ርሲንቲ̇ባ̈ሴ። 36ቴ ዪንታ̇ብ ሶ̈ሊኖንዲፌ̈ኒ ዪንቲ̇ ታ̈ና ቤቃ̇ራር ኣማ̇ናካ̇ዬ። 37ቴ ባ̈ባ ታ̈ብ ኢሚ̇ኖ ኣሲ ዎይ ታ̈ክ ዬይሬ፤ ታ̈ክ ዬይኖን ቴ ኢንታ̇ ዛ̈ና ኬሳ̇ ሚሻባሴ። 38ኣባ ጌዬጌይንዶ̇፥ ታ̈ኒ ኣፋፖ̇ ሶ̈ቢኖንዳ̇ ታ̈ና ኪ̈ታ̇ር ሚሺኖ ጾ̈ሳ̇̇ ኮያዚን ኦ̈ንዳብዶኬ ቴ ቆፊን ኦ̈ንዳብ ጊዳካ̇ዬ። 39ታ̈ና ኪ̈ታ̇ር ሚሺኖ ጾ̈ሳ̇̇ ኮዪዛ̈ዲ፥ ኢ ታ̈ብ ኢሚ̇ኖ ኣሳን ዎይን ጋርታ̇ፖ̇ ሜላ ኣቲ̇ን ፔታ̇ናር ያካ̇ርዶ̈ር ዉርሲ ቃሚ̇ን ጋላስ ዓይቃ ጋርታ̇ፖ̇ ዲንኒፌ̈ኒዬ። 40ቴ ባ̈ባ ኮያዚንዳ̇፥ ታ̈ና ናኣ ቤቃ̇ሪ ኣማ̇ኒዝ ኣሲ ዎይ ሜናብ ሼምፓባር ዶኢ ዲጛምፔ̈ኒዬ፤ ታ̈ናር ዉርሲ ቃምባራ ኢያ ዓይቃ ጋርታ̇ፖ̇ ዲንሬ” ጌይዴ።
41ኢ ኢንታ̇ኮ “ኣፋፖ̇ ሶ̈ቢኖ ሶ̈ላ̇ ታ̈ና” ጌይኖኮታ̇ቦ ኣይሁዳን ጉንዲሚዴ። 42ማ ኢንቲ̇ “ዓ̈ዲ ዮ̈ሴ̈ፋ ናኣ ዬሱ̈ሳ ባያ? ኢ ባ̈ባ̈ዲክ ኢ ኢንዲንዲክ ኑ ኢንታ̇ ኤሪባ̈ሳ? ዓት ኢ ፌ̈ና ዎዛርፌ̈ኒ ‘ቴ ኣፋፖ̇ ሶ̈ቢኔ’ ጌይራ?” ጌይዴ።
43ዬሱ̈ሳር ኢንታ̇ኮ “ዪንቲ̇ ዎልዎልኣ ጉንዲማፒ̇ቴ፥ 44ታ̈ና ኪ̈ታ̇ር ሚሺኖ ቴ ባ̈ባ ኢ ታ̈ክ ኤሄካ̇ዮ ኣሲ ኦ̈ናካር ታ̈ክ ዬ̈ንዳ̇ብ ዳንዳኢባ̈ሴ፤ ታ̈ክ ዬይኖ̈ዳ ዉርሲ ጋላስ ቴ ኢያ ዓይቃ ጋርታ̇ፖ̇ ዲንሬ። 45ናባን ማጻ̈ፋ ጋልዳ̇ ‘ኣሳን ዎይ ጾ̈ሳ̇̇ ጋልዳፖ̇ ታማ̈ሪ̈ሬ’ ጋ̈ሪ ጻ̈ፊንቲ̇ኔ፤ ቴ ባ̈ባ ጋልዳፖ̇ ሲስካ̇ር ታማ̈ሪኖን ዎይ ታ̈ክ ዬይሬ። 46ዪና̇ ጋ̈ዚንዳ ጾ̈ሳ̇̇ ባ̈ባ ቤቂ̇ኖ ኣስ ዎ ጌንት ጊዳካ̇ዬ፤ ጾ̈ሳ̇̇ ባ̈ባ ቤቂ̇ኖ̈ዲ ኢ̈ፖ̇ ዬይኖ ኢ ሙታ̇። 47ቴ ዪንታ̇ክ ኪን ጋ̈ሬ፥ ታ̈ና ኣማ̇ኒዝ ኣሳቦ ሜናብ ሼምፓባር ዶኢ ዎ። 48ታ̈ኒ ሼምፓ ሶ̈ላ̇። 49ዪንታ̇ ባ̈ቢንታ̇ን ባራሃ ጋርታ̇ ማና̇ ሙይዴ፥ ዎቲናካር ዓይቂ̇ዴ። 50ኣፋፖ̇ ሶ̈ቢኖ ሶ̈ላ̇ ዓዳ፤ ዪ ሶ̈ላ̇ ሙይኖ ኣሲ ዉርሲ ዓይቂ̇ባ̈ሴ። 51ኣፋፖ̇ ሶ̈ቢኖ ሼምፓ ኢሚ̇ዝ ሶ̈ላ̇ ታ̈ና። ሶ̈ሊ̇ን ዪኖ̇ ሙይዝ ኣሲ ዎይ ሜናብ ዶኢ̈ሬ። ዓና̇ ኣላሚን ጋልዶ ኣሳንቦ ሼምፓ ማ̈ቃ̇ምፔ̈ኒ ቴ ኢማ̇ዝ ሶ̈ሊ̇ንዳ̇ ቴ ኣይሺ̇ንዶ̇” ጌይዴ።
52ዪና̇ ኢዝባራ ኣይሁዳን “ዓ̈ ና̈ሳ ፌ ኣይሺ̇ን ኑ ሞ̈ምፔ̈ን ዎዛ̈ርታ̇ር ኢማ̇ንዳብ ዳንዳኢ̈ራ?” ጋ̈ሪ ዎልዎልኣ ዋጪዴ።
53ዬሱ̈ሳር ኢንታ̇ኮ “ቴ ዪንታ̇ክ ኪን ጋ̈ሬ፥ ቴ ኣሳ ናኣ ኣይሺ̇ን ሞ̈ካ̇ይ፥ ሱ̈ን ኡሽካካ̇ይ ኣቴ̇ጌይን ሼምፓ ዪንታ̇ብ ባዬ̇። 54ቴ ኣይሺ̇ን ሙዪ ቴ ሱ̈ን ኡሽኪ̇ዝ ኣሲ ሜናብ ሼምፓባር ዶኢ ኢ̈ብ ዎ። ታ̈ናር ኢያ ዉርሲ ቃምባራ ዓይቃ ጋርታ̇ፖ̇ ዲንሬ። 55ቴ ኣይሺ̇ንዳ̇ ኪን ፊ̈ሼ፤ ቴ ሱ̈ንዳ̇ር ኪን ኡሼ̇። 56ቴ ኣይሺ̇ን ሙይዛ̈ዲኬ ቴ ሱ̈ን ኡሽኪ̇ዝ ኣሲ ዎይ ታባር ፔታ̇ን ማ̈ቃ̇ር ዶኢ̈ሬ፥ ታ̈ናር ኢባር ዶኣ̈ሬ። 57ሼምፓባር ዶኢዛ ቴ ባ̈ባ ታ̈ና ኪ̈ቲ̇ ሚሺኖንዲፌ̈ንኬ ታ̈ናር ኢ ጎይባራ ሼምፓባር ዎንዲፌ̈ን ቴ ኣይሺ̇ን ሙይዝ ኣሲ ዎይ ቴ ጎይባራ ሼምፓባር ዶኢ̈ሬ። 58ዪዚ ኣፋፖ̇ ሶ̈ቢኖ ሶ̈ላ̇ ዪ̈ዳ፤ ዪ̈ዳሬ ዪንታ̇ ባ̈ቢንታ̇ን ሙይኖ ማና̇ዲፌ̈ን ጊዳካ̇ዬ፤ ማኒ̇ን ኢዞ ሙይኖ ኣሳን ዓይቂ̇ኔ፤ ሶ̈ሊ̇ን ዓኖ̇ ሙይዝ ኣሳን ሜናብ ዶኢ̈ሬ” ጌይዴ።
59ዬሱ̈ሲ ዪኖ̇ ቂፊርና̈ሆ̈ማ ኣይሁዳን ዎ̈ሳ ኬ̈ ጋርታ̇ ታማ̈ርሲ̈ርዶ̈ር ሶ̈ሊዴ።
ሜናብ ሼምፓባር ዶኢ ኢሚ̇ዝ ቃ̈ላ
60ኢ ታማራን ጋርታ̇ፖ̇ ዎይሊንን ኢ ዪኖ̇ ሶ̈ሊኖን ሲስካ̇ሪ “ሶ̈ሊን ዪና̇ ዋዪሬ፥ ኦ ኢዞ ኪን ጌዪ ኤካ̇ንዳብ ዳንዳኢ̈ራ?” ጌይዴ።
61ዬሱ̈ሳሬ ኢ ታማ̈ራን ዪኖ̇ ኢ ሶ̈ሊኖ ጎይምባራ ዎልዎልኣ ጉንዲሚኖን ፌ̈ብ ኤራሪ ኢንታ̇ኮ “ሶ̈ሊን ዪና̇ ዪንታ̇ ኣማ̇ኒን ጋልዳፖ̇ ዪንታ̇ ጋስ ማሃ̈ራ? 62ዓት ዪዚ ዪ̈ዶኮ ታ̈ኒ ኣሳ ናኣ̈ዲ ዎዳ ቴ ዎ ቤሲ̇ን ማ̈ቃ̇ ፉዳ ኣፋ ሉካ̇ምባ̇ር ቤቃ̇ር ዎዛርጋ̈ንዳ? 63ሼምፓ ኢሚ̇ዛ̈ዲ ጾ̈ሳ̇̇ ኣያ̇ና̈ዳ፤ ኣሳ ዎልቆ ኣባካር ማ̈ዲ̇ባ̈ሴ፤ ቴ ዪንታ̇ብ ሶ̈ሊኖ ቃ̈ሊንዳ̇ ኣያ̇ና፥ ማ ሼምፓ። 64ዎቲናካሬ ዪንታ̇ ጋርታ̇ፖ̇ ፔታ̇ን ፔታ̇ን ኣማ̇ኒባ̈ሶን ዎ” ጌይዴ። ዬሱ̈ሲ ዪኖ̇ ኢንታ̇ብ ሶ̈ሊኖንዳ̇ ቲና̇ፖ̇ ኤ̈̇ሪ ኢንታ̇ ጋርታ̇ፖ̇ ኣማ̇ኒባሶን ኦ̈ናኮ ማ ኢያ ኣ̈ ኢሚ̇ዛዳር ኦ̈ናኮ ኤሪዛኮታ̇ቦ። 65ኢናፖ̇ ዬሱ̈ሲ “ቴ ዪንታ̇ኮ ‘ጾ̈ሳ̇̇ ባ̈ባ ዬዮ ጋ̈ካ̇ዮ ኣሲ ኦ̈ናካር ታ̈ክ ዬ̈ንዳብ ዳንዳኢባ̈ሴ’ ጌይኖን ዓኒ̇ኮታ̇ቦ” ጌይዴ።
66ዪ̈ኮታ̇ቦ ኢ ታማ̈ራን ጋርታ̇ፖ̇ ዎይሊንን ጋስ ማ̈ቂ̇ዴ፤ ዪና̇ ኢዝ ኬሊ̇ምፖ̇ ኤ̈̇ሪ ኢ ዎሂን ዬ̇ዚን ኣሺ̇ዴ። 67ዬሱ̈ሳር ፌ ታማ̈ራን ታጶ̇ ናምኣንኮ “ዪንታ̇ር ማ ሉካ̇ንዳብ ኮዪ̈ራ?” ጌይዴ።
68ዪና̇ ኢዝባራ ሲሞ̈ን ጴ̈ጥሮ̈ሲ ኢ̈ኮ “ጎዳ̈ዶ! ኑ ኦ̈ክ ሉኪ̇̈ራ? ኔ̈ክ ሜናብ ሼምፓባር ዶኢ ኢሚ̇ዝ ቃ̈ላ ዎ። 69ኔ ጌ̈ሻ̇ ጾ̈ሳ̇̇ ናኣ ማ̈ቂ̇ኖን ኑ ኤሪኔ፤ ማ ኣማ̇ኒኔ” ጌይዴ። 70ዬሱ̈ሳር ኢንታ̇ኮ “ቴ ዪንታ̇ ታጶ̇ ናምኣን ማራ̇ጺናባያ? ዎቲናካሬ ዪንታ̇ጋርታ̇ፖ̇ ፔታ̇ና ሴ̈ጣና” ጌይዴ። 71ዪና̇ ኢ ጌይኖንዳ ኣስቆሮ̈ቶ ሲሞ̈ና ናኣ ዪሁዳ ጌይሬ። ኣባ ጌይን ዪሁዶ ታጶ̇ ናምኢ ዬሱ̈ስ ታማ̈ራን ጋርታ̇ፖ̇ ፔታ̇ና ኢያ ማ̈ቂ̇ናካሬ ዬሱ̈ሳ ኣ̈ ኢሚ̇ዛ ኢያ ማ̈ቂ̇ኖኮታ̇ቦ።
Currently Selected:
ዋ̈ኒ̇ሳ 6: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
