ሉቃ̈ሳ 18
18
ኣስኒ ዓይቂ̇ኖ ፔቲ̇ ዎርባዪንዲኬ ዉጫ ዳይና ሚሳ̇̈ሊ
1ዬሱ̈ሲ ፌ ታማ̈ራንቦ፥ ኢንቲ̇ ዎይ ጋላስ ሚ̈ጛር ዎ̈ሳንዳብ ኮሻ̇ዚን ኤራምፔ̈ን ሚሳ̇̈ሊ ኢንታ̇ብ ሶ̈ሊ̈ርዶሪ፥ 2“ፔቲ̇ ካታሚን ጋርታ̇ ጾ̈ሳ̇̇̈ብ ኢ̈ጪ̇ባ̈ሲ ኣሳር ቦንቺ̇ባ̈ሶ ፔቲ̇ ዳይና ዎ። 3ማ ዪና̇ ኢዝ ካታሚን ጋርታ̇ ኣስኒ ዓይቂ̇ኖ ፔቲ̇ ኣሲ ዎዶ̈ራ ኢዛ ዳይና̈ክ ዬ̈ራ ‘ቴ ጻላ̈ታብኬ ታ̈ብኬ ጊዳ̇ ዎ ሞ̈ቲን ታ̈ቦ ፊርዲሼ’ ዪዝ ጋ̈ራ ዎይ ጋላስ ኢ̈ክ ዬ̈ሬ።
4ዳይና̈ዳሬ ኣሲን ዎይ ጋላስ ኢ̈ክ ዬ̈ዚምባራ ኢ ኢዝ ሶ̈ሊን ሲስካ̇ካ̇ይ ጋምኢዴ። ፔታ̇̈ብ ፌ ቡ̈ዳ ጋርታ̇ ቆፓ̇ር ጌዪ ‘ታ̈ኒ ኣባካር ጾ̈ሳ̇̇̈ብ ኢ̈ጫ̇ባስካዶናሬ፥ ኣሳር ቦንቻ̇ባስካዶናሬ፥ 5ዓና̇ ኣስኒ ዓይቂ̇ኖ ኣሲንዳ̇ ዎይ ጋላስ ታ̈ክ ዬያ ታ̈ና ዋ̈ይዚንኮታ̇ ቴ ኢዝቦ ፊርዳንዳ̇፥ ቴ ዪዝ ዎታካ̇ይ ኣቴ̇ጌይን ዎይ ጋላስ ታ̈ክ ማ̈ቃ̇ ማ̈ቃ̇ ዬያ ሙታ̇ ታ̈ና ዋ̈ይ̈ሬ’ ” ጌይዴ።
6ኢናፖ̇ ጎዳ̈ዲ “ዉጫ ዳይና ጌይኖን ዪኖ̇ ሲስኪ̇ብቴ። 7ጾ̈ሲ̇ ፌ̈ክ ጋላሲ̇ ቃሚ̇ ዉይሲዝ ፌ ማራ̇ጺኖ ኣሳንቦ ፊርዲ̇ባ̈ሳ? ዓሪ ኢንታ̇ኮን ሲስካ̇ካ̇ይ ኣታ̇ንዳዶ̈ኔ? 8ቴ ዪንታ̇ብ ሶ̈ሎ፥ ዪን ፌ̈ኖንቦ ኤሊ̇ባር ፊርዲ̈ሬ። ዎቲናካሬ ታ ኣሳ ናኣ ዬ̈ዝ ጋላሲ̇ን ሳ̈ዝ ጋልዳ̇ ኣማ̇ና ዎ ኣሲ ቤንታ̇ንዳዶ̇̈ኔ?” ጌይዴ።
ፔቲ̇ ፋራሳ̈ዋ̈ኮንዲኬ ቃራጻ ቃጺሲዝ ና̈ሳ ሚሳ̇̈ሊ
9ፌ̈ና ጺላ̇ ኣስፌ̈ን ፋይዳር ኬርፊዛንብኬ ሜላን ሌቃ̇ር ሳ̈ዝባር ጎ̈ቺ̇ዝ ኣሳንቦ ዬሱ̈ሲ ሚሳ̇̈ሊ ሶ̈ሊ̈ርዶሪ፥ 10“ናምኢ ኣሳን ዎ̈ስ ዎ̈ሳንዳቦ ጾ̈ሳ̇̇ ኬ̈ ጋርታ̇ ጌሊዴ። ፔታ̇ና̈ዲ ፋራሳ̈ዋ ሜላ̈ዲ ቃራጻ ቃጺሲዝ ኣስዶ̈ር፥ 11ፋራሳ̈ዋ ኤቃ̇ር ፌ̈ብ ዎ̈ሲ̇̈ርዶሪ ‘ጾ̈ሳ̇̇̈ዶ! ቴ ሜላንፌ̈ኒ ኣሳ ባዝ ቡሪዝ ኣሲ፣ ኢ̈ት ኣሲ፣ ኦሎላ ጋዲ̇ዝ ኣሲ፣ ማ ዎይ̈ፖ̇ ቃራጻ ቃጺዛ ና̈ሳ ዓ̈ዲፌ̈ኒ ማ̈ቃካ̇ዮኮታ̇ቦ ቴ ኔ̈ና ጋላታ̈ሬ። 12ታ̈ኒ ፔቲ̇ ሳ̈ሚንታ̇ ጋርታ̇ ናምኢ ቃም ጾ̈ማ̈ሬ። ቴ ዴጚኖ ባዝ ዎይ ጋርታ̇ፖ̇ ኣስራ̈ታ ኬሳ̇̈ሬ’ ጌይዴ። 13ቃራጻ ቃጺሲዛ̈ዲ ፋራሳ̈ዋፖ̇ ጌዳ ጎት ኤቃ̇ሪ ሜላ ኣቲ̇ን ፉዳ ኣፋ ሾክ ጋ̈ር ቤቃ̇ንዳብ ኢ̈ጫ̇ሪ ፌ ቲሪን ቆጺ̇ ሙታ̇ዶ̈ሪ ‘ጾ̈ሶ̇! ታ̈ና ናጋራንቻ̇ ኔ ማ̈ራቤ’ ጌይዴ።
14ዪዚ ቴ ዪንታ̇ብ ሶ̈ሎ፥ ና̈ሳ ፋራሳ̈ዋፖ̇ ቃራጻ ቃጺሲዝ ና̈ሳ ዪ̈ዲ ጾ̈ሳ̇̇ ቲ̈ን ጺላ̇ ማ̈ቃ̇ር ፌ ኣ̈ል ሉኪ̇ዴ። ፌ̈ና ሾክ ሾክ ዎቲዛ ዎይ ዪርክ ጌይሬ፤ ፌ̈ና ዪርክ ዎቲዛ ዎይ ሾክ ጌይሬ” ጌይዴ።
ዬሱ̈ሲ ኣቂሊ ናኣን ኣንጂዴ
ማ̈ቶ̈ሳ 19፡13-15፤ ማ̈ርቆ̈ሳ 10፡13-16
15ዬሱ̈ሲ ኣቂሊ ናኣን ኣንጃምፔ̇̈ኒ ኣሳን ኢ̈ክ ኤኪ̇ ዬይን ኢ ታማ̈ራን ዪኖ̇ ቤቃ̇ር ኣሳን ቆዲ̇ዴ። 16ኢ ኣቂሊ ናኣን ፌ̈ክ ዬ̈ምፔ̇̈ን ጼይጋሪ ፌ ታማራንኮ “ኣቂሊ ናኣን ታ̈ክ ዬያጋ̈ቤ ካያፒ̇ቴ፤ ጾ̈ሳ̇̇ ካ̈ቲቲንዳ ኣቂሊ ናኣን ዓንፌ̈ኖንዬ። 17ቴ ዪንታ̇ክ ኪን ጋ̈ሬ፥ ኦ̈ናካር ማ̈ቂ̇ን ጾ̈ሳ̇̇ ካ̈ቲቲን ናኢ ኣቂሊፌ̈ኒ ኤኪ̇ባ̈ሶ ኣሲ ኣባካር ጌይን ኢና ጌሊባ̈ሴ” ጌይዴ።
ፔቲ̇ ዱር ኣስዶ̈ሪ ኦይጪ̇ኖ ኦይች
ማ̈ቶ̈ሳ 19፡16-30፤ ማ̈ርቆ̈ሳ 10፡17-31
18ኣይሁድ ኣላቃን ጋርታ̇ፖ̇ ፔታ̇ና̈ዲ “ኮሽ ኣስታማ̈ራ̈ዶ! ታ̈ኒ ሜናብ ሼምፓባር ዶኣንዳቦ ኣብዝ ዎቲን ኮሻ̇?” ጋ̈ሪ ዬሱ̈ሳ ኦይጪ̇ዴ።
19ኢያር ኢ̈ኮ “ኔ ታ̈ና ኣ ኮታ̇ብ ኮሻ̇̈ዶ ጋ̈ራ ጾ̈ሳ̇̇ ፔታ̇ና̈ፖ̇ ኣቲ̇ን ኦናካር ኮሺ̇ ባዬ̇፥ 20ኔ̈ኒ ጾ̈ሳ̇̇ ኪ̈ቲን ኤራ̈ሬ። ዪንሬ፦ ‘ኦሎላ ጋዳፔ̇፣ ኣስ ዎፔ̇፣ ዉ̈ቃፔ፣ ዎርዳ̇ ማርኪታፔ፣ ኔ ባ̈ቢክ ኔ ኢንዲ̇ክ ቦንቻ̇ቤ’ ጌይዛን። 21ና̈ሳ̈ዳር “ዪንኮ ታ̈ኒ ናኢቲፖ̇ ኤ̈̇ር ና̈ጋ ዎ” ጌይዴ። 22ዬሱ̈ሲ ዪኖ̇ ኢ ሶ̈ሊኖን ሲስካ̇ሪ “ዓት ፔቲ̇ ባዝ ኔ ጋልዳ̇ፖ ኣቲ̇ኔ። ኔ̈ብ ዎ ባዝ ዎይ ዎጛራ ዎርባያንቦ ኢማ̇ቤ። ቆሊን ኣፋ ጾ̈ሳ̇̇ ቲ̈ን ኔ̈ብ ዶኢ̈ሬ። ዪኒ̇ፖ ዓኒ ዬ̈ራ ቴ ዎሂን ዬ̇ቤ” ጌይዴ። 23ና̈ሳ ዪኖ̇ ሲስካ̇ሪ፥ ኢ̈ብ ዎይሊን ቆሊን ዎኮታ̇ቦ ጴች ሙዲዲዴ።
24ዬሱ̈ሲ ና̈ሳ ቤቃ̇ር ኢ̈ኮ “ዎይሊን ቆሊን ዎ ኣሳን ጾ̈ሳ̇̇ ካ̈ቲቲን ጋርታ̇ ጌላንዳ̇ቦ ኢንታ̇ ዎይሊን ዋዪ̈ሬ! 25ዱር ኣሲ ጾ̈ሳ̇̇ ካቲቲን ጋርታ̇ ጌላዚምፖ̇ ጊማሊ ናርፓ̇ ፉላባራ ኣንዳ̇ብ ኢ̈ብ ̈ጻ̇ባሴ” ጌይዴ።
26ዪ ሲስኪ̇ኖ ኣሳን “ዓት ዪ̈ዲኮ ኦ̈ኖ ጾ̈ሳ̇̇ ካቲቲን ጋርታ̇ ጌላንዳብ ዳንዳኢዛ̈ዲ?” ጌይዴ።
27ዬሱ̈ሲ ኢንታ̇ኮ “ኣሳብ ዳንዳኢንቲ̇ባ̈ሶ ባዚ ጾ̈ሳ̇̇̈ብ ዳንዳኢንቲ̇̈ሬ” ጌይዴ።
28ጴ̈ጥሮ̈ሲ ኢ̈ኮ “ዓዲሼ ኑ̈ኒ ኑ̈ብ ዎ ባዝ ዎይ ኣሻ̇ሪ ኔ ዎሂን ዬይኔ” ጌይን፥ 29ኢያሬ “ቴ ዪንታ̇ክ ኪን ጋ̈ሬ፥ ጾ̈ሳ̇̇ ካቲቲንቦ ጋ̈ሪ ፌ ኣ̈ሊንዶ፣ ፌ ማጪ̇ንዶ፣ ፌ ኢሺንታ̇፣ ፌ ባ̈ባዲኬ ፌ ኢንዲ̇ንዶ̇ ዎይ ፌ ናኣን ኣሺ̇ኖ ኣሲ፥ 30ዓና̇ ላይን ጋርታ̇ ቲ̈ኖምፖ̇ ናምኢ ኩሽ ዲጚ̈ሬ። ቢርት ዬ̈ዝ ላይን ጋርታ̇ሬ ሜናብ ሼምፓባር ዶኢ̈ሬ” ጌይዴ።
ዬሱ̈ሲ ፌ ዓይቂን ኣይዚ̇ ሶ̈ሊዴ
ማ̈ቶ̈ሳ 20፡17-19፤ ማ̈ርቆ̈ሳ 10፡32-34
31ዬሱ̈ሲ ፌ ታማ̈ራን ታጶ̇ ናምኣን ዱማ ጌዳ ኤ̈ጛሪ ኢንታ̇ኮ “ዪዚ ኑ ዬሩሳ̈ላም ሉካ̇ንዳ፥ ናባን ታ ኣሳ ናኣ̈ኮን ጻ̈ፊኖ ባዛን ዎይ ፎቲንቲ̇̈ሬ። 32ኣሳን ታ̈ና ኣይሁድ ዜር ማ̈ቃካ̇ዮ ኣሳንቦ ኣ̈ ኢሚ̇̈ሬ፥ ኢንታ̇ር ታ ጋልዳ ቃልዲ፣ ታ ጋል ጩቲ̇፣ ታ̈ና ጋራ̇ፊ ኢናፖ̇ ዓኒ ታ̈ና ዎ̈ሬ። 33ታ̈ናር ዓይቃ ጋርታ̇ፖ̇ ዓይዚ ቃምባራ ዲንዳ̇̈ሬ” ጌይዴ።
34ኢ ታማ̈ራንቦ ኢ ጌይኖን ዪን ዎይን ጋርታ̇ፖ̇ ኣባክ ፔቲ̇ ባዚ ኢንታ̇ብ ጌሊኖ ባዚ ባዬ̇። ኢ ሶ̈ላዝ ሶ̈ሊን ኢንቲ̇ ኤራካ̇ይፌ̈ኒ ኢንታ̇ብ ኣ̈ቺንቲ̇ኔ፤ ኢ ኣብዝ ሶ̈ሊኖኮ ኢንቲ̇ ኤራካ̇ዬ።
ዬሱ̈ሲ ኣ̈ፍ ዎባ̇ ፋዴ
ማ̈ቶ̈ሳ 20፡29-34፤ ማ̈ርቆ̈ሳ 10፡46-52
35ዬሱ̈ሲ ያ̈ሪኮ ካታሚንኮ̇ ዬላ̇ንዳብ ዎታዚምባራ፥ ፔቲ̇ ኣ̈ፊ ዎብ ኣሲ ጎይ ቡጊድ ዶኣር ጌሺ̈ርዶ̈ን፥ 36ኢያር ዎርዣ ኢ ላፍባር ኣ̈̇ዚምባ̇ር ሲስካ̇ር “ዪ ኣብዛ” ጋ̈ር ኢንታ̇ ኦይጪ̈ዴ። 37ኣሳንሬ “ና̈ዝሬ̈ት ዬሱ̈ሲ ዓኒ̇ባር ኣ̈̇̈ሬ” ጋ̈ር ኢ̈ብ ሶ̈ሊዴ።
38ኢያሬ “ዳ̈ዊታ ናኣ ዬሱ̈ሶ! ታ̈ብ ሚጪንታ̇ር ታ̈ና ፋሼ” ጌዪ ዉይሳር ጌሺዴ።
39ቲ̈ን ኣ̈̇ኖ ኣሳን ኢያ ቆዲ̇ዴ። ዎቲናካሬ ኢ “ዳ̈ዊታ ናኣ̈ዶ! ታ̈ብ ሚጪንታ̇ር ታ̈ና ፋሼ” ጋ̈ር ኤስኤሳ ዉይሳር ጌሺዴ። 40ዬሱ̈ሲ ኤቃ̇ሪ ና̈ሳ ፌ̈ክ ኤሄ̈ምፔ̇̈ን ኪ̈ቲ̇ዴ። ና̈ሳ̈ዳር ኢ̈ክ ዬዪ ዬሊ̇ኖፖ̇ ዓኒ ኢ̈ኮ፥ 41“ቴ ኔ̈ብ ኣብዝ ዎታምፔ̈ን ኔ ኮያ̈ራ?” ጋ̈ር ኢያ ኦይጪ̇ዴ።
ኣ̈ፊ ዎባ̇̈ዳሬ “ጎዶ! ቴ ኣ̈ፊን ቤቃ̇ምፔ̈ን ኮያ̈ሬ” ጌይዴ።
42ዬሱ̈ሳር ኢ̈ኮ “ኔ ኣ̈ፊን ቤቃ̇ ጋ̈ቤ፥ ኔ ኣማ̇ኒን ኔ̈ና ፋኔ” ጌይዴ።
43ና̈ሳ ኣ̈ፊን ኤሊ̇ባር ፊርቂንቲ̇ን ቤቃ̇ንዳብ ዳንዳኢዴ። ጾ̈ሳ̇̇ ቦንቺ̇ሙታ̇ ዬሱ̈ሳ ዎሂን ዬ̇ዴ። ዎርዣ ዎይ ዪኖ̇ ቤቃ̇ር ጾ̈ሳ̇̇ ጋላቲዴ።
Currently Selected:
ሉቃ̈ሳ 18: ኦጫ̈ቃማ
Highlight
Share
Copy
Want to have your highlights saved across all your devices? Sign up or sign in
